Yob—Wan man di ben horidoro èn di ben de getrow
Yob—Wan man di ben horidoro èn di ben de getrow
„Yu poti prakseri na mi futuboi Yob? Nowan sma na grontapu de leki en. A de wan bun man èn wan opregti man, di abi frede gi Gado, èn di no e du ogri.”—YOB 1:8.
1, 2. (a) Sortu problema miti Yob wantronso? (b) Fa a libi fu Yob ben de bifo den problema miti en?
WAN man ben de di ben abi bun furu sani, a ben abi gudu, biginen, a ben de gosontu, èn a ben abi wan koloku osofamiri-libi. Ne, bun bigi problema miti en dri leisi baka makandra. Wantronso a lasi den gudu fu en. Baka dati, wan bigi winti di wai wantronso, meki taki ala den pikin fu en lasi den libi. Syatu baka dati, a kisi wan siki di meki taki a kon swaki, èn en heri skin kon abi sweri di ben hati en srefisrefi. Kande yu sabi taki a man disi na Yob, a moro prenspari sma na ini a Bijbel buku di e tyari en nen.—Yob, kapitel 1 nanga 2.
2 „O fa mi e winsi taki mi ben de leki den mun fu langa ten pasa”, na so a ben e geme (Yob 3:3; 29:2). Te problema e miti wi, dan wi e winsi taki sani ben de leki fosi, a no so? Yob, ben de wan opregti man, èn soleki fa a ben sori, dan ala sani ben e waka bun gi en. Heihei sma ben e lespeki en èn den ben e suku rai na en (Yob 29:5-11). A ben gudu, ma a no ben gridi gi moni (Yob 31:24, 25, 28). Te a ben e miti sma di ben de na nowtu, soleki uma di lasi den masra na ini dede, noso pikin di no ben abi papa nanga mama, dan a ben e yepi den (Yob 29:12-16). Èn a ben tan getrow na a wefi fu en.—Yob 31:1, 9, 11.
3. Fa Yehovah ben si Yob?
3 Yob ben de wan bun man, fu di a ben e anbegi Gado. Yehovah ben taki: „Nowan sma na grontapu de leki en. A de wan bun man èn wan opregti man di abi frede gi Gado, èn di no e du ogri” (Yob 1:1, 8). Aladi Yob ben de getrow na Gado, toku problema tyari wan kaba kon na a switi libi fu en. A lasi ala sani di a ben abi, a nyan skin-ati, a ben de nanga broko-ede, èn a ben e firi brokosaka. Den tesi disi ben musu sori efu a ben e anbegi Yehovah nanga wan opregti ati.
4. Fu san ede a bun fu poti prakseri na a muilek situwâsi di Yob ben de na ini?
4 A no de fu taki dati Yob no ben de a wan-enkri futuboi fu Gado di ben kisi bigi problema. Furu Kresten na ini a ten disi ondrofeni den srefi sortu sani di Yob ben ondrofeni. Fu dati ede, a bun fu poti prakseri na tu aksi: Te problema miti wi, dan san wi kan leri fu a muilek situwâsi di Yob ben de na ini? Fa a situwâsi dati e leri wi fu sori trawan di e pina taki wi e firi gi den?
Yob ben musu sori taki a ben de loyaal èn taki a ben de getrow
5. Fu san ede Yob ben e dini Gado, soleki fa Satan ben feni?
5 A situwâsi fu Yob ben de wan aparti wan. Yob no ben sabi taki Didibri ben feni taki a no ben e anbegi Gado nanga wan opregti ati. Na wan konmakandra na hemel, Yehovah ben aksi Satan efu a ben poti prakseri na den bun fasi fu Yob. Ne Satan pikin en: „A no yusrefi meki wan skotu lontu en, lontu en oso èn lontu ala sani di a abi?” Satan ben taki disi fu di a ben feni taki Yob ben e dini Gado soso fu kisi wini gi ensrefi, èn nanga dati a ben wani sori taki ala den tra futuboi fu Gado de so. Satan taigi Yehovah: „Grantangi, langa yu anu now èn fasi ala den sani di a abi, dan yu o si efu a no o fluku yu leti na ini yu fesi.”—Yob 1:8-11.
6. Sortu prenspari aksi opo kon leki bakapisi fu den sani di Satan ben taki?
6 Wan tumusi prenspari aksi opo kon fu di Satan ben taki den sani dati. Satan ben feni taki Yehovah no ben e tiri hemel nanga grontapu na wan bun fasi. A tru taki Gado e tiri hemel nanga grontapu fu di a lobi den sani di a meki? Noso a de so taki Satan ben abi leti di a taki dati a trutru reide fu san ede den mekisani fu Yehovah e dini en, na fu di den e suku wini gi densrefi? Fu di Yehovah ben de seiker taki Yob ben o tan getrow na en, meki a gi pasi taki Didibri tesi Yob, so taki na eksempre fu Yob ben kan de leki wan buweisi taki ala sma man tan getrow na Gado. Sobun, Satan srefi meki taki Yob kisi a wan problema baka a trawan. Di Satan no ben abi bun bakapisi na a bigin, dan a naki Yob nanga wan siki di gi en bun furu skin-ati. „Skin fu skin, èn ala san wan libisma abi, a sa gi fu kibri en sili”, na so Didibri taki.—Yob 2:4.
7. Na sortu fasi den futuboi fu Gado na ini a ten disi e ondrofeni den srefi sortu problema leki den di fu Yob?
7 Aladi furu Kresten na ini a ten disi no e nyan pina na a fasi fa Yob ben nyan pina, toku den e kisi fu du nanga difrenti sortu problema. Furu fu den e kisi frufolgu, noso den abi problema na ini den osofamiri. Moni problema, noso siki kan meki den firi brokosaka. Sonwan fu den dede fu a bribi fu den ede. A no de fu taki dati wi no musu denki taki ibri leisi te wi e kisi problema, dan na Satan srefi e meki dati pasa. Fu taki en leti, son leisi wi e kisi problema tu fu di wisrefi meki fowtu, noso fu di wi gebore nanga son swakifasi (Galasiasma 6:7). Èn wi alamala e ondrofeni den takru bakapisi fu owrudei èn fu den rampu di e pasa na ini a naturu. Bijbel e sori krin taki na ini a ten disi, Yehovah no e kibri den futuboi fu en na wan wondru fasi gi den problema disi.—Preikiman 9:11.
8. Fa Satan kan gebroiki problema fu meki wi lasi bribi?
8 Awansi fa a no fa, Satan kan gebroiki den problema di wi abi fu meki wi lasi bribi. Na apostel Paulus ben taki dati ’wan maka na ini en skin, namku wan engel fu Satan’ ben e tan „pina” en (2 Korentesma 12:7). A kan taki Paulus ben siki na en ai, noso taki a ben abi wan tra siki. Ma awansi fa a no fa, a ben sabi taki efu a ben e firi brokosaka fu a problema dati ede, dan Satan ben kan gebroiki dati fu meki taki a lasi en prisiri èn fu meki a kon weri teleki a brokokindi te fu kaba (Odo 24:10). Na ini a ten disi, Satan kan meki famiriman, skoromati, èn srefi ogri-ati tirimakti frufolgu den futuboi fu Gado.
9. Fu san ede wi no musu fruwondru tumusi te problema noso frufolgu e miti wi?
9 San wi kan du te den problema disi e miti wi? Wi musu si den problema disi leki wan okasi fu sori taki wi lobi Yehovah èn taki wi e saka wisrefi nanga wi heri ati na ondro a moro hei tiri fu en (Yakobus 1:2-4). Awansi sortu problema wi abi, te wi e frustan o prenspari a de fu de loyaal na Gado, dan dati sa yepi wi fu tan abi wan tranga bribi. Na apostel Paulus ben taigi den Kresten na ini wan brifi: „Un lobiwan, no fruwondru fu a tesi di e kon na un tapu leki wan faya, neleki na wan freimde sani e pasa nanga unu” (1 Petrus 4:12). Èn Paulus ben fruklari: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). Te now ete, Satan feni taki den Kotoigi fu Yehovah no e anbegi Gado na wan opregti fasi, soleki fa a ben denki fu Yob. Fu taki en leti, Bijbel e sori taki Satan e tyari moro tesi kon tapu a pipel fu Gado na ini den lasti dei disi.—Openbaring 12:9, 17.
Yob no e frustan sani bun èn a e kisi rai di no bun
10. San Yob no ben sabi?
10 Wan sani ben de di Yob no ben sabi, ma a no abi fu de so nanga wi. A no ben sabi fu san ede den problema disi ben miti en. Yob ben abi a fowtu denki taki ’Yehovah srefi ben gi, èn Yehovah srefi ben teki baka’ (Yob 1:21). A kan taki Satan ben de nomonomo fu meki Yob denki taki na Gado ben meki a kisi den problema.
11. Fruklari fa Yob ben firi di problema miti en.
11 Yob weigri fu fluku Gado soleki fa en wefi ben taigi en fu du, ma toku a ben e firi brokosaka srefisrefi (Yob 2:9, 10). ’A gersi leki sani e waka moro bun gi den ogriwan leki gi mi’, na so a ben taki (Yob 21:7-9). ’Fu san ede Gado e strafu mi?’, na so a ben e aksi ensrefi kande. Son leisi a ben wani dede. A ben e bari: „O, taki yu ben sa kibri mi na ini Syeol, taki yu ben sa kibri mi, teleki na atibron fu yu saka!”—Yob 14:13.
12, 13. Fa den sani di den dri mati fu Yob ben taki, ben abi krakti na en tapu?
12 Yob ben abi dri mati di kon luku en, èn den du neleki den ben kon fu „sori taki den e firi sari gi en èn fu trowstu en” (Yob 2:11). Ma Yob ben taki dati den mati disi ben de ’trowstuman di ben broko en saka’ (Yob 16:2). A ben o bun efu Yob ben abi mati di ben kan yepi en nanga den problema fu en, ma den dri mati disi meki taki Yob kon bruya moro, èn a kon firi moro brokosaka.—Yob 19:2; 26:2.
13 A no de fu taki dati Yob ben kan aksi ensrefi: ’Fu san ede den problema disi e miti mi? San mi du?’ Den mati fu en taigi en sani di no ben tru kwetikweti. Den ben feni taki na fu di Yob ben du wan seryusu sondu, meki a ben e pina. „Oiti wan sma dede fu di a no du ogri?” na so Elifas ben aksi. „Soleki fa mi si, den wan di e prakseri ogri, èn den wan di e sai problema, densrefi sa koti dati.”—Yob 4:7, 8.
14. Fu san ede wi no musu denki wantewante taki den problema di sma e kisi e kon fu di den tyari densrefi na wan fasi di no fiti?
14 A tru taki, wi kan kisi problema te wi e du san a sondu skin wani, na presi fu du san a yeye wani (Galasiasma 6:7, 8). Ma na ini a disiten sistema, wi kan kisi problema awansi wi e tyari wisrefi na wan fasi di fiti. Boiti dati, a no tru kwetikweti taki nowan problema sa miti den wan di no e du ogri. Yesus Krestes, di ’no ben abi fowtu, di no ben abi sondu leki den sondari’, dede na wan ogri-ati fasi na wan pina postu, èn na apostel Yakobus dede fu a bribi fu en ede (Hebrewsma 7:26; Tori fu den Apostel 12:1, 2). Fu di Elifas nanga den tu mati fu en ben abi wan fowtu denki fu sani, meki Yob opo taki gi ensrefi di den pruberi fu pori a bun nen fu en, èn a sori den krin taki a no ben du nowan ogri. Toku a kan de so taki Yob ben meki a fowtu fu denki taki Gado no ben e handri na wan reti fasi nanga en, fu di den dri mati fu en ben e tan taigi en taki a frudini en fu pina.—Yob 34:5; 35:2.
Wi kan feni yepi te problema e miti wi
15. Sortu denki wi musu abi te problema e miti wi?
15 San wi kan leri fu a tori fu Yob? Kande wi e firi brokosaka te problema e miti wi, te wi e siki, noso te wi e kisi frufolgu. Furu fu den problema dati no e miti tra sma (Psalm 73:3-12). Son leisi, a kan de fanowdu fu aksi wisrefi den prenspari sani disi: ’A lobi di mi abi gi Gado tranga so te taki mi sa tan dini en awansi san e pasa? Mi e angri fu plisi Yehovah so taki a kan gi „wan piki na a sma di e spotu En?”’ (Odo 27:11; Mateyus 22:37) Noiti wi musu gi pasi taki den don sani di sma e taki e meki wi tweifri taki wi hemel Tata sa yepi wi. Wan getrow Kresten di ben siki srefisrefi furu yari langa, ben taki wan leisi: „Mi sabi taki awansi san Yehovah e gi pasi fu pasa nanga mi, mi sa man horidoro. Mi sabi taki a sa gi mi a krakti di mi abi fanowdu. A du dati ala ten.”
16. Fa a Wortu fu Gado e yepi den wan di e kisi fu du nanga problema?
16 Tra fasi leki Yob, wi sabi den triki fu Satan. „Wi sabi san a abi na prakseri”, noso sortu ogri a wani du (2 Korentesma 2:11). Boiti dati, wi abi bun furu sabi di e leri wi fa fu handri na wan koni fasi. Na ini Bijbel wi kan feni ondrofenitori fu getrow man nanga uma di horidoro awansi sortu problema miti den. Na apostel Paulus di ben pina moro leki tra Kresten, ben skrifi: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu” (Romesma 15:4). Wan Kotoigi fu Europa di ben musu koti strafu fu a bribi fu en ede na a ten fu a di fu Tu Grontapufeti, ben gi wan sma a nyanyan di a ben kan gebroiki dri dei langa, so taki a sma ben kan gi en wan Bijbel. „Mi kisi wini trutru fu di mi du dati!” na so a e taki. „Aladi angri ben e kiri mi, toku a yeye nyanyan di mi kisi yepi mi nanga trawan fu horidoro na ini den muilek ten dati. Te now ete mi abi a Bijbel dati.”
17. Sortu sani Gado seti fu yepi wi fu horidoro?
17 Boiti a trowstu di wi e kisi fu Bijbel, wi abi furu Bijbel publikâsi di e sori wi san fu du te wi e kisi problema. Te yu e luku na ini na Index van Wachttoren-publikaties, dan kande yu sa feni wan ondrofenitori fu wan Kresten brada noso sisa di ben kisi wan srefi sortu tesi leki di fu yu (1 Petrus 5:9). A kan de wan yepi tu te yu e taki fu a situwâsi fu yu nanga owruman, noso nanga tra lepi Kresten di e frustan fa yu e firi. Ma san moro prenspari, na taki yu kan abi a dyaranti taki te yu e begi Yehovah, dan a sa yepi yu, èn a santa yeye fu en sa tiri yu. Fa Paulus ben e kakafutu di Satan ben e „pina” en? A leri fu frutrow tapu a krakti fu Gado (2 Korentesma 12:9, 10). Paulus ben skrifi: „Mi man du ala sani nanga yepi fu a sma di e gi mi krakti.”—Filipisma 4:13.
18. Fa tra Kresten kan gi wi a deki-ati di wi abi tranga fanowdu?
18 Soleki fa wi si, yu kan kisi yepi, èn noiti yu musu draidrai fu suku a yepi dati. Wan odo e taki: „Yu ben e firi brokosaka a dei di yu ben de na ini banawtu? Yu no sa abi furu krakti” (Odo 24:10). Neleki fa uduloso kan pori wan udu oso teleki a fadon broko, na so wan Kresten kan brokokindi te a e firi brokosaka. Fu sorgu taki a sani disi no e pasa, Yehovah e gebroiki den futuboi fu en fu yepi wi. A neti di sma grabu Yesus, wan engel kon na en èn a gi en krakti (Lukas 22:43). Di Paulus ben go leki wan strafuman na Rome, dan a „taki Gado tangi èn a kisi deki-ati”, di a miti den brada na a Wowoyo fu Apius nanga den Dri Taveernen (Tori fu den Apostel 28:15). Wan Kotoigi fu Doisrikondre e memre ete fa a kisi yepi di a doro na a Ravensbrück strafuman kampu, leki wan fredefrede tini. „Wan Kresten sisa feni mi wantewante èn a gi mi wan switikon”, na so a e taki. „Wan tra getrow sisa yepi mi, èn a ben de leki wan mama gi mi na yeye fasi.”
„Tan getrow”
19. San yepi Yob fu kakafutu gi Satan?
19 Yehovah ben taki dati Yob ben de wan man di ben „abi a fasti bosroiti fu tan getrow” (Yob 2:3). Aladi Yob ben e firi brokosaka èn a no ben frustan fu san ede a ben kisi problema, toku a ben abi a fasti bosroiti fu tan getrow. Yob no ben drai baka gi ala den sani di ben de prenspari gi en. A ben taki krin: „Mi sa tan getrow teleki mi dede!”—Yob 27:5.
20. Fu san ede a bun fu horidoro?
20 Te wi abi a srefi fasti bosroiti leki Yob, dan dati sa yepi wi fu tan getrow awansi san e pasa, iya awansi sortu tesi e miti wi, awansi sma e gens wi, noso awansi sortu problema e miti wi. Yesus ben taigi a gemeente na ini Smirna: „No frede a pina di o miti yu. Luku! Didibri o tan trowe sonwan fu unu na ini strafu-oso, so taki unu kan kisi tesi dorodoro èn so taki unu kan nyan pina [problema, broko-ede, noso kwinsi] tin dei langa. Tan getrow srefi te na dede, dan mi o pai yu nanga libi.”—Openbaring 2:10.
21, 22. San kan gi wi trowstu te wi e kisi tesi?
21 Na ini a sistema disi di Satan e tiri, wi sa kisi tesi fu sori taki wi man horidoro èn taki wi man de getrow. Toku, Yesus e gi wi a dyaranti taki wi no abi fu frede a ten di e kon. A prenspari sani di wi musu du, na fu tan getrow. „A banawtu de fu wan syatu pisi ten nomo”, na so Paulus ben taki, ma a „glori”, noso a pai di Yehovah pramisi fu gi wi, sa ’kon bigi moro nanga moro èn a sa tan fu têgo’ (2 Korentesma 4:17, 18). Srefi den problema fu Yob ben de wan syatu pisi ten nomo, te yu e teki den gersi nanga den someni koloku yari bifo a ten dati, èn sosrefi baka a ten dati.—Yob 42:16.
22 Ma toku, a kan gersi son leisi taki den tesi di wi e kisi no e kon na wan kaba, èn taki den hebi tumusi. Na ini na artikel di e kon wi sa go luku sortu tra sani wi kan leri fu na ondrofenitori fu Yob. Wi sa luku tu na sortu fasi wi kan gi trawan deki-ati te problema e miti den.
San yu ben sa piki?
• Sortu tumusi prenspari aksi opo kon fu di Satan ben feni taki Yob no ben de getrow trutru?
• Fu san ede wi no musu fruwondru tumusi te problema e miti wi?
• Fa Yehovah e yepi wi fu horidoro?
[Aksi fu a tori disi]
[Prenki na tapu bladzijde 23]
Te wi e studeri, te wi e taki nanga lepi Kresten, èn te wi e taigi Yehovah ala san de tapu wi ati, dan dati kan yepi wi fu horidoro