Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fa Yesus o „frulusu a pôtiwan”, soleki fa Psalm 72:12 ben taki na fesi?

Te a o tiri, dan retidu o de na ala sei, èn nowan kruktudu o de. Nofo tron a de so taki orloku e tyari pôtifasi kon, ma Krestes sa tyari trutru vrede kon. A e firi gi trawan, a sa meki ala sma kon de na ini wánfasi, èn a sa sorgu taki nofo nyanyan de gi ala libisma (Psalm 72:4-16).—1/5, bladzijde 7.

• Fa wi leki Kresten kan sori taki wi e ’taki sondro fu frede’? (1 Timoteyus 3:13; Fileimon 8; Hebrewsma 4:16)

Wi kan du dati te wi e preiki fayafaya gi trawan sondro fu frede, te wi no e draidrai fu gi bun leri nanga bun rai, èn te wi e fruteri Gado ala san de na tapu wi ati fu di wi abi a frutrow taki a sa arki wi èn taki a sa piki den begi fu wi.—15/5, bladzijde 14-16.

• Fu san ede a Wet ben e sori taki wan man „no krin” te skiti komoto fu en syenpresi, èn taki wan uma „no krin” te a abi en munsiki, èn baka te a meki wan pikin?

Den wet di ben e sori taki wan man no krin te skiti komoto fu en syenpresi, taki wan uma no krin te a abi en munsiki èn baka te a meki wan pikin, ben e yepi den Israelsma fu de krin na skin fasi, èn fu libi wan gosontu libi. Boiti dati, den wet disi ben e sori krin taki brudu santa, èn taki libisma musu kisi pardon fu sondu.—1/6, bladzijde 31.

• Fu san ede a bun taki wan sma di wani de koloku e poti prakseri na a buku Psalm?

Den skrifiman fu Psalm ben sabi taki wan sma sa de koloku te a abi wan bun banti nanga Gado (Psalm 112:1). Den ben e sori krin taki nowan banti di wi abi nanga trawan, nowan gudu, èn nowan sani di wi ben man du kan meki wi de so koloku leki te wi de fu „a pipel di abi Yehovah leki a Gado fu den” (Psalm 144:15).—15/6, bladzijde 12.

• Sortu spesrutu banti Yehovah ben abi nanga owruten Israel?

Na ini 1513 b.G.T., Yehovah kisi wan nyun banti nanga den Israelsma, di a sroto wan frubontu nanga den (Exodus 19:5, 6; 24:7). Den Israelsma di gebore baka dati, ben gebore leki memre fu a nâsi di Gado ben teki èn di ben gi ensrefi abra na En. Toku, ibriwan fu den Israelsma ben musu bosroiti efu den ben o dini Gado.—1/7, bladzijde 21, 22.

• Fu san ede wi musu du ala sani „sondro fu krutukrutu”? (Filipisma 2:14)

Furu Bijbel eksempre e sori taki a krutukrutu di a pipel fu Gado ben e krutukrutu tyari takru bakapisi kon gi den. Wi musu denki seryusu sortu takru bakapisi a sani disi kan abi na ini a ten disi. Onvolmaakti libisma de gaw fu krutukrutu, èn wi musu luku bun taki a sani disi no e kon tron wan gwenti gi wi.—15/7, bladzijde 16-17.

• Fa wi du sabi taki a koni di Odo 8:22-31 e taki fu en, no abi fu du nanga a koni di libisma abi?

Yehovah ben „meki” a koni dati fosi ala tra sani di a meki. Ala ten Gado ben de, èn na so a de tu nanga a koni fu en. A koni fu en no abi wan bigin. A koni di kari na ini Odo 8:22-31, ben de krosibei fu Gado leki „wan tumusi bun wrokoman”. Sobun a koni disi abi fu du nanga a yeye mekisani di kon tron Yesus, èn di ben e wroko makandra nanga Gado fu meki ala sani (Kolosesma 1:17; Openbaring 3:14).—1/8, bladzijde 31.