’Begi Gado fayafaya’
’Begi Gado fayafaya’
„Begi Gado ala san unu wani, èn du dati fayafaya sosrefi, èn taki en tangi tu.”—FILIPISMA 4:6.
1. Nanga suma wi abi a grani fu taki, èn fu san ede dati na wan kefalek moi sani?
EFU yu ben o aksi primisi fu go taki nanga a tiriman fu a kondre fu yu, dan sortu piki yu denki taki yu ben o kisi? Kande den sma di e wroko gi en sa seni wan boskopu gi yu. Ma furu tron yu no e kisi primisi fu taki nanga a tiriman srefi. Toku a de heri tra fasi nanga a moro bigi Tiriman, Yehovah Gado, a Moro Heiwan fu hemel nanga grontapu. Wi kan taki nanga en awinsi pe wi de èn awinsi o ten wi wani. Te wi e begi na wan yoisti fasi, dan a sa arki wi ala ten (Odo 15:29). Dati na wan kefalek moi sani! Wi abi warderi gi a seti disi. Dati meki wi wani taki doronomo nanga a Sma di abi a reti fu tyari a nen „Yereman fu begi”, a no so?—Psalm 65:2.
2. San de fanowdu efu wi wani taki Gado arki den begi fu wi?
2 Ma kande wan sma e aksi ensrefi: „Sortu begi Gado e arki?” Bijbel e taki fu wán tumusi prenspari sani di wi musu abi efu wi wani taki Gado arki den begi fu wi. A e taki: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya” (Hebrewsma 11:6). Soleki fa a fosi studie-artikel sori, dan bribi na wan prenspari sani di wi musu abi fu kan taki nanga Gado. Gado de klariklari fu arki den begi fu iniwan sma, ma den musu begi nanga bribi èn den musu du bun wroko. Boiti dati, den musu de opregti èn den ati musu krin.
3. (a) Soleki fa den begi fu getrow futuboi na ini owruten e sori, dan san wi kan taki te wi e begi Gado? (b) Na sortu difrenti fasi wi kan begi?
3 Na apostel Paulus ben gi Kresten na ini a ten fu en a deki-ati: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu” (Filipisma 4:6, 7). Na ini Bijbel wi kan leisi fu someni sma di ben taki nanga Gado fu den broko-ede fu den. Wan tu fu den sma disi na Hana, Elia, Heskia, nanga Danièl (1 Samuel 2:1-10; 1 Kownu 18:36, 37; 2 Kownu 19:15-19; Danièl 9:3-21). Wi musu teki na eksempre fu den sma disi. Luku taki den wortu fu Paulus e sori tu taki difrenti fasi de fa wi kan begi. Paulus ben taki dati wi musu taki Gado tangi. Disi na wan begi pe wi e sori warderi gi den sani di Gado e du gi wi. Na ini den begi disi, wi kan prèise Gado tu. A ben taki tu dati wi musu begi fayafaya. Dati wani taki dati wi e aksi Gado na wan saka fasi fu yepi wi nanga wan spesrutu sani (Lukas 11:2, 3). Wi hemel Tata o prisiri fu arki wi te wi e begi en na wan fu den fasi disi.
4. Fu san ede wi e fruteri Yehovah san wi wani, aladi a sabi kaba san wi abi fanowdu?
4 Son sma kan aksi densrefi: „A no de so taki Yehovah sabi kaba san wi abi fanowdu?” Iya, a sabi (Mateyus 6:8, 32). Ma dan fu san ede a wani taki wi begi en fu fruteri en san wi wani? Luku na eksempre disi: Kon meki wi taki dati wan wenkriman wani gi wan kado na wan tu klanti fu en. Ma efu den klanti wani kisi a kado, dan den musu kon na a wenkriman èn den musu aksi efu den kan kisi a kado. Den sma di no wani meki muiti fu aksi en, e sori taki den no abi warderi gi a sani di a wenkriman wani gi den. Na so a de tu taki, te wi no e fruteri Yehovah na ini begi san wi wani, dan wi ben o sori taki wi no e warderi den sani di a seti gi wi. Yesus ben taki: „Aksi, dan unu o kisi” (Yohanes 16:24). Na a fasi dati, wi e sori taki wi e frutrow tapu Gado.
Fa wi musu taki nanga Gado?
5. Fu san ede wi musu begi na ini a nen fu Yesus?
5 Yehovah no e poti wan heri ipi muilek wet gi wi fu sori wi fa wi musu begi. Ma toku, wi musu kon sabi fa wi musu taki nanga Gado na a yoisti fasi, soleki fa Bijbel e taki. Fu eksempre, Yesus leri den bakaman fu en: „Iniwan sani di unu e aksi a Tata, a o gi unu na ini mi nen” (Yohanes 16:23). Sobun, Gado wani taki wi musu begi na ini a nen fu Yesus. Wi musu frustan krin taki, Gado e blesi a libisma famiri soso nanga yepi fu Yesus.
6. Fa wi musu sidon noso tanapu te wi e begi?
6 Fa wi musu sidon noso tanapu te wi e begi? Bijbel no e sori taki wi musu sidon noso tanapu na wan spesrutu fasi, efu wi wani taki Gado arki den begi fu wi (1 Kownu 8:22; Nehemia 8:6; Markus 11:25; Lukas 22:41). San prenspari na taki wi musu begi Gado na wan opregti fasi èn nanga wan krin ati.—Yoèl 2:12, 13.
7. (a) San a wortu „amen” wani taki? (b) Te wi e begi, dan fa wi musu gebroiki a wortu „amen” na wan fasi di fiti?
7 Fa wi musu gebroiki a wortu „amen”? Den Buku fu Bijbel e sori taki nofo tron a fiti fu tapu den begi fu wi nanga a wortu disi, spesrutu te wi e begi na fesi tra sma (Psalm 72:19; 89:52). A Hebrew wortu ʼa·menʹ wani taki „na so a de”. Wan buku e sori taki a prenspari fu taki „Amen” na a kaba fu wan begi, fu di na so fasi „yu e sori taki yu e agri nanga den sani di taki na ini a begi, èn taki yu e winsi taki den sani dati pasa trutru” (McClintock and Strong’s Cyclopedia). Sobun, te wan sma kaba begi èn a e taki „Amen” komoto fu en ati, dan a e sori fa a e firi trutru fu den sani di a taki na ini a begi fu en. Te wan Kresten e begi na den gemeente konmakandra èn a e tapu a begi fu en nanga „Amen”, dan den wan di e arki en kan taki „Amen” na ini den ati, noso den kan taki en meki trawan yere. Na so fasi den e sori taki den e agri trutru nanga den sani di taki na ini a begi.—1 Korentesma 14:16.
8. Fa wi kan begi son leisi neleki Yakob nanga Abraham, èn san dati ben o sori fu wi?
8 Son leisi, Gado wani si o furu wi e broko wi ede nanga dan sani di wi e taki na ini den begi fu wi. Kande wi musu handri neleki Yakob fu owru ten, di ben feti wan heri neti nanga wan engel, so taki a ben kan kisi wan blesi (Genesis 32:24-26). Noso son leisi wi musu de leki Abraham, di ben aksi Yehovah ibri tron baka fu kibri Lot èn sosrefi iniwan tra regtfardiki sma di ben kan de na ini Sodom (Genesis 18:22-33). Na a srefi fasi, wi kan begi Yehovah fayafaya fu sani di wi lobi trutru, èn wi kan aksi en fu sori wi retidu, lobi-bun ati, nanga sari-ati.
San wi kan aksi Gado?
9. San na den moro prenspari sani di wi musu taki fu den na ini den begi fu wi?
9 Memre taki Paulus ben taki: „Begi Gado ala san unu wani” (Filipisma 4:6). Sobun, na ini den begi fu wi, wi kan taki fu pikinmoro ibri sani di abi fu du nanga wi libi. Ma den fosi sani di wi musu broko wi ede nanga den te wi e begi, musu de den afersi fu Yehovah. Danièl gi wan moi eksempre ini a tori disi. Di Israel kisi strafu fu di den sondu, Danièl begi Yehovah fu sori sari-ati gi den. A ben taki: „No draidrai, fu yu eigi bun, o mi Gado, bika yu eigi nen kari na tapu a foto disi” (Danièl 9:15-19). San den begi fu wi e sori? Den e sori tu taki den moro prenspari sani di wi e broko wi ede nanga den, na taki a nen fu Yehovah musu kon santa èn taki a wani fu en musu kon tru?
10. Fa wi sabi taki a fiti fu aksi Gado sani di wisrefi abi fanowdu?
10 Ma toku, a fiti tu fu aksi Gado sani di wisrefi abi fanowdu. Fu eksempre, neleki a psalm skrifiman wi kan aksi Gado fu yepi wi fu frustan den dipi tori fu Bijbel moro bun. A psalm skrifiman ben begi: „Meki mi frustan, so taki mi kan hori yu wet èn so taki mi kan du en nanga mi heri ati” (Psalm 119:33, 34; Kolosesma 1:9, 10). Na ini begi, Yesus ’ben e taki fayafaya nanga a Sma di ben man puru en na dede’ (Hebrewsma 5:7). Na so fasi, a sori taki a fiti fu aksi Gado fu tranga wi te ogri e miti wi, noso te wi e kisi tesi. Di Yesus ben leri den disipel fu en fa fu begi, dan a sori den taki den ben kan aksi Gado sani di den ben abi fanowdu. Fu eksempre, den ben kan aksi pardon fu sondu èn den ben kan aksi gi nyanyan fu a dei.
11. Fa begi kan yepi wi fu no brokokindi gi tesi?
11 Di Yesus ben sori den disipel fu en fa fu begi, dan a ben taki tu: „No meki wi kisi tesi, ma frulusu wi fu na ogriwan” (Mateyus 6:9-13). Bakaten, a gi den a rai: „Un tan na ai èn begi doronomo, so taki unu no kisi tesi” (Mateyus 26:41). A de prenspari fu begi te wi e kisi tesi. Kande wi e kisi a firi fu no hori wisrefi na Bijbel gronprakseri te wi de na wrokope noso na skoro. A kan taki sma di no de Kotoigi, e aksi wi fu du sani di no fiti gi wan Kresten. Sma kan aksi wi fu du sani di no regtfardiki. Na den momenti dati, a bun fu du san Yesus taki, namku fu begi Gado fu yepi wi fu no brokokindi gi tesi. A bun fu du dati fosi wi kisi tesi, èn sosrefi na a momenti te wi e kisi tesi.
12. Fu sortu sani di e gi wi broko-ede wi kan begi, èn san wi kan fruwakti fu Yehovah?
12 Na ini a ten disi, den futuboi fu Gado e ondrofeni difrenti tesi nanga problema na ini den libi. Gi furu fu den futuboi disi a libi hebi trutru fu di den siki èn fu di den e firi brokosaka srefisrefi. Na ogridu di e pasa lontu wi e meki wi firi brokosaka. Den problema na ekonomia sei e meki en muilek gi wi fu bai den sani di wi abi fanowdu na ini a libi. A e gi wi trowstu trutru fu sabi taki Yehovah e arki te den futuboi fu en e taki nanga en fu den tori disi! Psalm 102:17 e taki fu Yehovah: „Trutru a sa arki den begi fu den sma di lasi ala sani, èn a no sa wisiwasi den begi fu den.”
13. (a) Fu sortu sani di wi abi fanowdu, wi kan begi? (b) Gi wan eksempre fu so wan begi.
13 Fu taki en leti, wi kan begi fu iniwan sani di abi fu du nanga wi diniwroko gi Yehovah, noso nanga wi matifasi nanga en (1 Yohanes 5:14). Efu yu musu teki bosroiti di abi fu du nanga a trowlibi, noso nanga wroko, noso nanga a du di yu wani du moro na ini a diniwroko, dan no frede fu taki nanga Gado fu den sani disi èn fu aksi en fu tiri yu. Fu eksempre, wan yongu uma na ini den Filippijnen, ben wani go na ini a furuten diniwroko. Ma a no ben abi wan wroko fu kan sorgu gi ensrefi. Na uma e taki: „Wan satra, mi begi Yehovah spesrutu fu a pionierwroko. Moro lati a srefi dei dati, di mi ben de na ini a preikiwroko, mi pristeri wan buku na wan tini. Ma sondro taki mi fruwakti dati, a meisje taki: ’Munde, yu musu go na mi skoro fruku mamanten.’ Mi aksi en fu san ede. A sori mi taki den ben e suku wan wrokoman so esi leki a kan. Mi go drape, èn mi kisi a wroko wantewante. Ala sani pasa so esi.” Na heri grontapu, furu Kotoigi e ondrofeni den srefi sortu sani disi. Sobun, no draidrai fu begi Yehovah èn fu aksi en komoto fu yu ati san yu abi fanowdu!
San wi musu du efu wi du wan sondu?
14, 15. (a) Fu san ede wan sma no musu tapu fu begi te a du wan sondu? (b) Boiti taki a bun te wan sma e begi gi ensrefi te a du wan sondu, dan san moro kan yepi a sma dati?
14 Fa begi kan yepi wan sma efu a sondu? Son sma di sondu, no begi fu di den ben firi syen. Ma dati a no wan koni sani fu du. Fu gi wan eksempre: Wan kapten di e frei wan opolani sabi taki efu a lasi pasi, a kan meki kontakti nanga den sma di kan sori en pe a musu frei go. Ma san o pasa efu a kapten no wani meki kontakti nanga den sma disi fu di a e syen taki a lasi? Dati kan tyari bigi rampu kon, a no so? Na so a de tu taki, a sma di sondu èn di e syen fu begi Gado, kan ondrofeni moro ogri. Efu wan sma sondu, dan a syen di a e syen, no musu tapu en fu taki nanga Yehovah. Fu taki en leti, Gado e aksi den wan di du wan seryusu sondu, fu taki nanga en. A profeiti Yesaya ben gi den sma di ben e du sondu na ini a ten fu en, a deki-ati fu taki nanga Yehovah, „bika a sa gi furu pardon” (Yesaya 55:6, 7). A no de fu taki dati a sma o abi fu ’kowru na ati fu Yehovah’. Fu man du disi, dan na a fosi presi a sma musu sori sakafasi, a musu tapu nanga a sondu libi fu en, èn a musu sori opregti berow.—Psalm 119:58; Danièl 9:13.
15 Wan tra sani de fu san ede a prenspari taki wan sma e begi te a du wan sondu. A disipel Yakobus ben taki san wan sma musu du fu kisi yepi fu tron mati baka nanga Gado: „Meki a kari den owru man fu a gemeente kon na en; meki den begi gi en . . . èn Yehovah sa opo en” (Yakobus 5:14, 15). Iya, efu wan sma sondu dan a musu fruteri Yehovah dati na ini begi, ma a kan aksi den owruman tu fu begi gi en. Disi sa yepi a sma fu tron mati baka nanga Yehovah.
Piki tapu begi
16, 17. (a) Fa Yehovah e piki den begi fu wi? (b) Sortu ondrofenitori e sori taki begi kan yepi wi furu na ini wi preikiwroko?
16 Fa Gado e piki den begi fu wi? Son leisi, Gado e piki den begi fu wi wantewante èn son tron wi kan si krin te a e du dati (2 Kownu 20:1-6). Son leisi wi musu wakti fosi a piki den begi fu wi, èn a kan taki wi no man si wantewante fa a e piki a begi fu wi. Soleki fa Yesus ben sori na ini na agersitori fu na uma di tan go na a krutuman, dan a kan de fanowdu fu begi Gado fu wan tori moro leki wán leisi (Lukas 18:1-8). Ma wi abi a dyaranti taki te wi e begi akruderi a wani fu Gado, dan noiti Yehovah sa taigi wi: „No trobi mi.”—Lukas 11:5-9.
17 Furu leisi a pipel fu Yehovah ondrofeni fa a piki den begi fu den. Furu tron disi de so na ini a preikiwroko fu wi. Fu eksempre, na ini den Filippijnen tu Kresten sisa ben e prati Bijbel publikâsi na wan farawe presi na ini a kondre. Di den gi wan traktaat na wan uma, dan den ai fu na uma bigin furu nanga watra. Na uma ben taki: „Esde neti mi begi Gado fu seni wan sma kon fu leri mi san Bijbel e taki, èn mi denki taki disi na a piki tapu a begi fu mi.” Syatu baka dati, na uma bigin go na den konmakandra na a Kownukondre zaal. Na wan tra presi na a zuid-owstusei fu Asia, wan Kresten brada ben frede fu go preiki na wan oso pe furu waktiman ben de. Sobun a begi Yehovah, dan a hori deki-ati, èn a go na ini a oso. A naki na a doro fu wan kamra pe wan yongu uma e tan, ne na uma opo a doro. Di a brada fruteri na uma fu san ede a ben de drape, dan na uma bigin krei. A fruteri a brada taki a ben e suku fu miti Yehovah Kotoigi èn taki a begi Gado fu yepi en fu feni den. A brada ben breiti fu yepi en fu meki kontakti nanga a gemeente fu Yehovah Kotoigi na ini a birti fu en.
18. (a) San wi musu du te Gado piki den begi fu wi? (b) Sortu dyaranti wi abi efu wi e begi na ibri okasi?
18 Begi na trutru wan tumusi moi seti. Yehovah de klariklari fu arki den begi fu wi èn fu piki den tu (Yesaya 30:18, 19). Ma wi musu poti prakseri na a fasi fa Yehovah e gi piki tapu den begi fu wi. A no ala ten a e gi piki soleki fa wi ben o fruwakti. Toku wi no musu frigiti fu taigi en tangi èn fu prèise en, te wi si fa a e tiri wi (1 Tesalonikasma 5:18). Ma ala ten wi musu memre a deki-ati di na apostel Paulus gi wi: „Begi Gado ala san unu wani, èn du dati fayafaya sosrefi, èn taki en tangi tu.” Iya, teki ibri okasi fu taki nanga Gado. Te yu du dati, dan yu sa tan ondrofeni taki den sani di Paulus taki fu den wan di e kisi piki tapu den begi fu den, de tru. A ben taki: „A vrede fu Gado di bigi moro leki san libisma man frustan, sa kibri un ati èn un frustan.”—Filipisma 4:6, 7.
Yu kan gi piki?
• San na difrenti fasi fa wi kan begi?
• Fa wi musu begi?
• Fu sortu sani wi kan taki na ini den begi fu wi?
• Fu san ede wan sma musu begi te a du wan sondu?
[Aksi fu a tori disi]
[Prenki na tapu bladzijde 29]
Te wi e begi komoto fu wi ati, dan dati e yepi wi fu no brokokindi gi tesi
[Prenki na tapu bladzijde 31]
Nanga yepi fu begi, wi kan taki Gado tangi, wi kan fruteri en den broko-ede fu wi, èn wi kan aksi en den sani di wi abi fanowdu