Edepenti fu a di fu feifi pisi fu a buku Psalm
A Wortu fu Yehovah de libilibi
Edepenti fu a di fu feifi pisi fu a buku Psalm
KANDE den gudu sma e taki: „Den manpikin fu wi de neleki pransun di gro kon bigi. Den umapikin fu wi de neleki pilari na a uku fu wan palèisi, den maksin fu wi furu, . . . den skapu fu wi e meki dusundusun pikin.” Boiti dati, a kan taki den e taki tu: „Koloku fu a pipel di e ondrofeni a srefi sani dati!” Ma na a tra sei, a psalm skrifiman e taki: „Koloku fu a pipel di abi Yehovah leki a Gado fu den!” (Psalm 144:12-15) Wi no abi fu fruwondru fu dati. Fu di Yehovah na a koloku Gado, meki den wan di e anbegi en sa de koloku trutru (1 Timoteyus 1:11). Den lastiwan fu den singi di Gado meki sma skrifi, e sori taki disi tru. Den singi disi na Psalm 107 te go miti Psalm 150.
A di fu feifi pisi fu a buku Psalm e poti prakseri tu na den kefalek moi fasi fu Yehovah, soleki a lobi bun-ati fu en, a trufasi fu en, nanga a bunfasi fu en. O moro wi e kon frustan den fasi fu Gado, o moro wi o lobi en èn o moro wi o abi frede gi en. Disi sa meki wi kon de koloku. Disi na trutru wan warti sani di wi e leri na ini a di fu feifi pisi fu a buku Psalm!—Hebrewsma 4:12.
A LOBI BUN-ATI FU YEHOVAH E MEKI WI DE KOLOKU
„O meki sma taki Yehovah tangi gi a lobi bun-ati fu en, èn gi den wondruwroko di a du gi den manpikin fu libisma”, na so den Dyu ben singi di den komoto na ini katibo na Babilon (Psalm 107:8, 15, 21, 31). Na ini wan singi, David ben prèise Gado taki: „A trufasi fu yu de te na loktu” (Psalm 108:4). Na ini a tra psalm, a e begi: „O Yehovah mi Gado, yepi mi. Kibri mi akruderi yu lobi bun-ati” (Psalm 109:18, 19, 26). Psalm 110 na wan profeititori di abi fu du nanga a tiri fu a Mesias. Psalm 111:10 e taki: „A frede gi Yehovah na a bigin fu koni.” A tra psalm e taki: „Koloku fu a man di abi frede gi Yehovah.”—Psalm 112:1.
Sma e kari den Psalm 113 te go miti 118 den Hallel psalmsingi, fu di ibri tron baka wi kan leisi den wortu „Hallelujah”, noso „Prèise Yah!” na ini den psalm disi. Na ini a Misjna, wan buku fu a di fu dri yarihondro, yu kan leisi fu den gwenti fu den Dyu. Soleki fa a buku disi e sori, dan den Dyu ben e singi den singi disi na a Paskafesa èn na den dri fesa di den Dyu ben e hori ibri yari. Psalm 119 na a moro langa psalm èn a moro langa kapitel na ini Bijbel. A Psalm dati e gi glori na a wortu, noso a boskopu di Yehovah tyari kon na krin.
Piki tapu den aksi fu Bijbel:
109:23—San David ben wani taki nanga den wortu: „Neleki fa wan skaduw e pasa gowe, na so misrefi musu gowe”? Disi na wan puwema fu David, pe a e taki dati a ben e firi neleki a ben o dede heri esi.—Psalm 102:11.
110:1, 2—San Yesus Krestes, ’a Masra fu David’, du di a ben sidon na a reti-anusei fu Gado? Baka di Yesus kisi wan opobaka, a go na hemel èn a ben wakti na a reti-anusei fu Gado teleki a tron Kownu na ini 1914. Na a pisi ten di Yesus ben wakti, a ben e tiri den salfu bakaman fu en. A ben tiri a preikiwroko fu den èn sosrefi a wroko di den ben e du fu meki disipel. Yesus ben sreka den salfuwan disi tu fu tiri makandra nanga en na ini a Kownukondre fu en.—Mateyus 24:14; 28:18-20; Lukas 22:28-30.
110:4—San Yehovah ’sweri fu du sondro fu firi sari’? A sweri disi, na a frubontu di Yehovah sroto nanga Yesus Krestes fu dini leki Kownu nanga Granpriester.—Lukas 22:29.
113:3—Na sortu fasi sma e prèise a nen fu Yehovah „fu pe son e opo te pe son e dongo”? A tekst disi no e taki nomo fu wan grupu sma di e anbegi Gado ala dei. A leti fu a son e skèin na a heri grontapu, fu pe son e opo na owstusei, te pe son e dongo na west-sei. Na a srefi fasi, Yehovah musu kisi prèise na heri grontapu. Disi no man pasa efu sma no orga fu du a wroko dati. Leki Yehovah Kotoigi, wi abi a tumusi moi grani fu prèise Gado èn fu preiki a bun nyunsu fu a Kownukondre fayafaya.
116:15—O ’warti a dede fu den loyaalwan de na ini Yehovah ai’? Den anbegiman fu Yehovah warti so furu gi en, taki a no o gi pasi taki den alamala dede leki grupu. Efu Yehovah ben o gi pasi taki a sani dati pasa, dan a ben o gersi leki den feanti fu en tranga moro en. Boiti dati, efu a ben o meki a sani dati pasa, dan nowan sma ben o tan abra fu libi na ini a nyun grontapu.
119:71—Sortu bun pina e tyari gi sma? Te wi e kisi problema, dan wi e leri fu frutrow moro nanga moro tapu Yehovah. Wi e leri fu begi Gado nanga moro faya, fu studeri Bijbel fayafaya, èn fu du san a e taki. Boiti dati, te wi e pina, dan dati kan tyari kon na krin sortu swakifasi wi abi di wi kan kenki. Wi no sa firi sari efu wi gi pasi taki a pina di wi e pina, meki wi tron moro bun sma.
119:96—San den wortu ’wan kaba na ala sani di de volmaakti’, wani taki? A psalm skrifiman ben e taki fu a fasi fa libisma e prakseri fu a wortu volmaaktifasi. Kande a ben abi na prakseri taki libisma no sabi krin san volmaaktifasi wani taki trutru. Na a tra sei, a komando fu Gado volmaakti dorodoro. Wi kan gebroiki den rai fu en na ini ala sani di wi e du ini wi libi.
119:164—San a wani taki trutru fu prèise Gado „seibi tron na ini wan dei”? Furu tron, a nomru seibi e prenki wan sani di no e mankeri noti. Fu dati ede, a psalm skrifiman e sori taki Yehovah warti fu kisi ala grani.
Sani di wi kan leri:
107:27-31. A koni fu grontapu ’o de fu soso’ te Armagedon kon (Openbaring 16:14, 16). A koni fu grontapu no man kibri nowan sma fu no kisi pori. Soso den wan di e suku kibri na Yehovah, o tan na libi fu „taigi [en] tangi gi a lobi bun-ati fu en”.
109:30, 31; 110:5. Furu tron, te wan srudati ben e feti, dan a ben e hori en feti-owru na ini en reti-anu. Dati meki a no ben man kibri en reti-anusei nanga a skilt fu en di a ben hori nanga en krutu-anu. Na wan agersifasi, Yehovah de „na a reti-anusei” fu den futuboi fu en, èn a e feti gi den. Sobun, a e kibri den èn a e yepi den. Disi na wan tumusi bun sani fu „prèise [en] trutru”!
113:4-9. Yehovah hei so te, taki a musu saka ensrefi „fu luku hemel”. Toku a e sori sari-ati gi den mofinawan, den pôtiwan, èn gi na uma di no man kisi pikin. Yehovah, a Moro Hei Masra, abi sakafasi èn a wani taki den anbegiman fu en musu abi sakafasi tu.—Yakobus 4:6.
114:3-7. Te wi e leri fu den wondruwroko di Yehovah du fu yepi a pipel fu en na a Redi Se, na Yordanliba, èn na a Sinaibergi, dan dati musu naki wi ati trutru. Libisma, di a tekst e teki gersi nanga „grontapu”, musu abi „hebi skin-ati”. Dati wani taki dati den musu abi bigi lespeki gi Masra.
119:97-101. Te wi e studeri Gado Wortu, dan wi sa kisi koni, wi o kisi a koni fu man si sani krin, èn wi o kisi frustan. Disi sa yepi wi fu no lasi a matifasi di wi abi nanga Gado.
119:105. A Wortu fu Gado na wan lampu gi wi futu, fu di a kan yepi wi fu lusu den problema di wi abi na ini a ten disi. Na wan agersifasi, a de wan leti na tapu wi pasi, fu di a e fruteri wi san Gado o du na ini a ten di e kon.
WI DE KOLOKU AWINSI WI E KISI PROBLEMA
San wi kan du te wi de na ini muilek situwâsi èn te wi abi problema? Psalm 120 te go miti 134 e gi wi wan krin piki tapu na aksi disi. Te wi e suku yepi na Yehovah, dan wi o man pasa den muilek ten fu wi, èn wi o tan koloku. Sma e kari den psalm disi, ’Den singi fu opo go’. A kan taki den Israelsma ben e singi den psalm disi te den ben go na Yerusalem ala yari, fu hori den fesa fu den.
Psalm 135 nanga 136 e sori taki Yehovah na a Sma di e du iniwan sani di e plisi en. Ma den kruktugado no man du dati kwetikweti. Psalm 136 skrifi na so wan fasi, taki wan grupu sma ben kan singi a lasti pisi fu ibri vers, leki wan piki tapu a fosi pisi fu a vers. Psalm 137 e taki fu a sari situwâsi fu den Dyu di ben de na ini katibo na Babilon, èn di ben wani go na Sion fu anbegi Yehovah. David skrifi Psalm 138 te go miti 145. A ben e wani ’prèise Yehovah nanga en heri ati’. Fu san ede? Soleki fa a ben taki, dan na ’fu di Yehovah meki en na wan tumusi fruwondru fasi’ (Psalm 138:1; 139:14). Na ini den tra feifi Psalm, David e aksi Yehovah na ini begi fu kibri en gi den ogri man, fu piri-ai gi sma na wan regtfardiki fasi, fu frulusu en fu den sma di ben e frufolgu en, èn fu gi en rai fa fu tyari ensrefi. A e tyari kon na krin taki a pipel fu Yehovah de koloku (Psalm 144:15). Baka di David sori taki Yehovah bigi pasa marki, èn taki a abi bunfasi, dan David e taki: „Mi mofo sa prèise Yehovah; èn meki ala skin blesi en santa nen te ten di no skotu, iya, fu têgo.”—Psalm 145:21.
Piki tapu den aksi fu Bijbel:
122:3—Na sortu fasi Yerusalem ben de leki wan foto „di bow na ini wánfasi”? Den oso na ini Yerusalem ben bow krosibei fu makandra, soleki fa sma ben gwenti du dati na ini owruten. Den oso na ini a foto ben de krosibei fu makandra, èn dati meki a ben makriki fu kibri a foto te den ben e feti nanga den feanti. Boiti dati, a ben makriki tu gi den sma na ini a foto fu yepi makandra èn fu kibri makandra. A situwâsi dati e prenki a wánfasi di den 12 lo fu Israel ben abi te den ben kon makandra fu anbegi Gado.
123:2—San na agersitori fu den ai fu futuboi, e leri wi? Tu sani de fu san ede futuboi (man nanga uma) e luku na anu fu a masra, noso a misi fu den: (1) Fu kon sabi san a masra, noso a misi wani; (2) Fu kisi kibri, èn fu kisi den sani di a abi fanowdu fu tan na libi. Na a srefi fasi, wi e luku Yehovah fu kon sabi san na a wani fu en, èn fu kisi a bun-ati fu en.
131:1-3—Fa David ben ’meki en sili firi korostu neleki fa wan pikin di no de na bobi moro, e didon na tapu en mama’? Neleki fa ’wan pikin di no de na bobi moro’, e firi korostu na ini den anu fu en mama, na so David leri fu firi korostu na ini en ati. Fa so? Fu di a no ben kisi heimemre na ini en ati èn fu di a no ben e kisi bigifasi. A no ben feti tu baka sani di ben bigi tumusi gi en. Na presi taki David ben suku biginen, dan ala ten a ben hori na prakseri taki a abi swakifasi, èn a ben sori sakafasi tu. A de wan koni sani taki wi e teki na eksempre fu en, spesrutu te wi e meki muiti fu kisi grani na ini a gemeente.
Sani di wi kan leri:
120:1, 2, 6, 7. Te wi e fruteri lei fu trawan èn te wi e spotu den, dan dati kan meki den firi brokosaka trutru. Wan fasi fa wi kan sori taki wi „lobi vrede”, na te wi e luku bun san wi e taki.
120:3, 4. Efu wi abi fu du nanga wan sma di e „bedrigi” wi, dan wi kan kisi trowstu te wi sabi taki Yehovah sa lusu a problema na a yoisti ten. „Wan tranga man” o tyari rampu kon gi sma di e fruteri lei. A krutu fu Yehovah o kon na den tapu neleki „faya krofaya fu den busibusi”.
127:1, 2. Awinsi san wi e du, wi musu meki Yehovah tiri wi.
133:1-3. A wánfasi di de na mindri a pipel fu Yehovah, e meki sma firi switi, a bun, èn a e gi krakti baka. Wi no musu pori a wánfasi disi, fu di wi e suku fowtu na trawan, e meki trobi nanga den, noso e krutukrutu fu sani.
137:1, 5, 6. Den anbegiman fu Yehovah di ben de na ini katibo, ben de loyaal Sion, na organisâsi di Gado ben abi na grontapu na a ten dati. Ma fa a de nanga wi? Wi de loyaal na a organisâsi di Yehovah abi na ini a ten disi?
138:2. Yehovah e ’gi den wortu fu en glori moro leki ala den nen fu en’. Disi wani taki dati a kontru fu ala den pramisi fu Yehovah o pasa iniwan sani di wi kan fruwakti. Fu tru, wi o miti tumusi moi sani na ini a ten di de na wi fesi.
139:1-6, 15, 16. Yehovah sabi san wi e du, san wi e denki, èn fosi wi opo wi mofo srefi, a sabi kaba san wi wani taki. A sabi wi sensi wi ben de na ini wi mamabere, bifo ibri pisi fu wi skin ben meki srefi. Gado sabi ibriwan fu wi na so wan „tumusi fruwondru fasi”, taki wi no man frustan dati. A e gi wi trowstu trutru fu sabi taki Yehovah no e si den tesi fu wi nomo, ma taki a e frustan tu fa wi e firi te wi e kisi tesi!
139:7-12. Awinsi pe wi e go, toku Gado o man tranga wi.
139:17, 18. A kon de wan prisiri sani gi wi fu sabi sani fu Yehovah? (Odo 2:10) Efu dati de so, dan wi feni wan sani di kan gi wi furu prisiri ala ten. Den prakseri fu Yehovah furu „moro leki santi srefi”. Ala ten wi o man leri moro fu en.
139:23, 24. Wi musu wani taki Yehovah ondrosuku wi fu si efu „sari pasi” de na ini wi ati. Disi wani taki dati a musu luku efu wi abi fowtu denki, fowtu lostu, nanga fowtu firi. Èn wi musu wani taki Yehovah yepi wi fu rutu den puru.
143:4-7. Fa wi kan horidoro te wi e kisi hebi tesi? A psalm skrifiman e sori wi san wi musu du: Prakseri dipi fu den wroko fu Yehovah, wi musu prakseri furu fu den sani di a e du, èn wi musu aksi en na ini begi fu yepi wi.
„Prèise Yah, un pipel!”
Ibriwan fu den fosi fo pisi fu a buku Psalm e tapu nanga wortu di e prèise Yehovah (Psalm 41:13; 72:19, 20; 89:52; 106:48). Na so a de tu nanga a lasti pisi fu a buku Psalm. Psalm 150:6 e taki: „Iya, ibri sani di e bro, meki a prèise Yah. Prèise Yah, un pipel!” Disi o pasa trutru na ini a nyun grontapu fu Gado.
Aladi wi e wakti a prisiri ten dati, wi abi furu sani fu gi a tru Gado glori èn fu prèise a nen fu en. Te wi e prakseri a prisiri di wi abi fu di wi sabi Yehovah èn fu di wi abi wan bun matifasi nanga en, dan wi wani prèise en nanga wan ati di furu nanga tangi, a no so?
[Prenki na tapu bladzijde 15]
Den wondruwroko fu Yehovah moi kefalek
[Prenki na tapu bladzijde 16]
Den prakseri fu Yehovah furu „moro leki santi srefi”