Kerki—Sortu wini a e tyari gi sma?

„MI NO abi fu go na kerki fu de wan bun sma!” Dati na fa furu sma e denki. Furu opregtisma di abi sari-ati nanga trawan, èn di de fu frutrow, no lobi fu go na kerki. Fu eksempre, furu sma na ini West-Europa no e go na kerki, aladi moro furu fu den sma dati e taki dati den e bribi na ini Gado. * Srefi na ini Latijns-Amerika, sowan 15 te go miti 20 procent nomo fu den Lomsusma e go na kerki doronomo.

Furu sma feni taki kerki no e yepi den fu libi wan moro bun libi, èn kande yusrefi e denki so tu. Kande yu sabi tu taki someni tenti yari pasa, furu sma na ini son kondre ben gwenti fu go na kerki. Ma dati no de so moro na ini a ten disi. San meki taki furu sma no lobi fu go na kerki moro? Wan sma kan de wan bun sma aladi a no e go na kerki? Wan kerki de di kan tyari wini kon gi yu?

Fu san ede furu sma gowe libi den kerki?

Hondrohondro yari kaba, furu sma di e taki dati den na Kresten, ben bribi taki Gado wani taki sma gi yesi na en. Dati meki den ben e go na kerki fu di den wani taki Gado feni den bun. Den ben hori densrefi na kerki gwenti, noso den ben go suku yepi na kerki fesiman. A no de fu taki, dati furu fu den sma dati ben sabi taki den kerki fesiman ben e hoigri. Sma ben sabi taki kerki ben teki prati na ini orloku, èn taki son kerki fesiman ben e tyari densrefi na wan ogri-ati fasi. Ma furu sma ben feni taki kerki srefi bun. Trawan ben lobi den dangratori, den gwenti, nanga den poku fu den kerki. Sonwan ben e bribi taki sma o bron na ini hel efu den no e libi bun. Aladi a leri disi no komoto fu Bijbel, toku den ben si a leri disi leki wan bun sani di e gi sma deki-ati fu libi bun. Bakaten, difrenti sani pasa di meki taki furu sma bigin denki tra fasi fu den kerki.

Furu sma bigin bribi na ini na evolutie-leri. Son sma bigin bribi taki a no Gado meki libisani, ma taki den sani disi kon fu densrefi. Furu kerki no ben man yepi den sma fu bribi taki na Gado e gi libi (Psalm 36:9). Boiti dati, sabidensi go na fesi. Den sabiman kon meki moro bun dresi, moro bun wagi, boto, nanga opolani, èn moro bun sani di e meki taki libisma kan taki nanga makandra awinsi pe den de. Den sani disi gi sma a denki taki sabidensi kan lusu ala problema. Boiti dati, sma go suku yepi na sabiman nanga datra di e ondrosuku fa libisma e handri nanga makandra èn fu san ede den e handri na wan spesrutu fasi. Den sma disi feni taki den sabiman e gi moro bun yepi leki den kerki fesiman. Den kerki fu den sei, no ben man yepi sma fu si krin taki a moro bun fasi fu libi, na fu hori densrefi na den wet fu Gado.—Yakobus 1:25.

Ala den kenki disi meki taki furu kerki bigin leri sma tra sani. Kerki fesiman no ben leri sma moro fu gi yesi na Gado. Na presi fu dati, furu fu den kerki fesiman bigin leri sma taki den kan bosroiti gi densrefi san bun èn san no bun. Fu di son kerki fesiman ben wani hari moro sma fu kon na den kerki, meki den bigin leri  sma taki Gado e feni den bun awinsi fa den e libi. Den sortu leri disi e memre wi san Bijbel ben taki na fesi: „Wan ten o kon taki den no sa frudrage a bun leri, ma na fu di densrefi wani, meki den o suku leriman gi densrefi fu switi den yesi nanga sani di densrefi wani yere.”—2 Timoteyus 4:3.

Na presi taki den leri disi ben e hari sma, dan sma bigin tegu fu den. Fu dati ede, wi kan frustan fu san ede sma bigin aksi densrefi: „Efu den kerki no e bribi taki Gado abi makti fu meki sani èn taki a no abi koni fu meki wet, dan fu san ede mi musu go na kerki? Fu san ede mi musu du muiti fu leri den pikin fu mi sani fu Gado?” Sma di ben e du muiti fu libi wan bun libi, bigin si kerki leki wan sani di no de fanowdu trutru. Den gowe libi den kerki, èn den no ben si en leki wan prenspari sani moro fu anbegi Gado. Iya, na presi taki kerki tyari bun gi sma, a tyari soso ogri. Fa dati du kon? Bijbel e tyari kon na krin fa dati pasa.

Sma gebroiki kerki fu du ogri-ati sani

Na apostel Paulus ben warskow den fosi Kresten taki son sma ben o teki a Kresten bribi fu du ogri-ati sani. A ben taki: „Ogri busidagu sa kon na un mindri èn den no sa handri na wan switi fasi nanga den skapu; sma sa opo na un mindri, èn den sa taki kruktu sani fu hari den disipel kon na den baka” (Tori fu den Apostel 20:29, 30). Wan fu den sma di ben taki „kruktu sani”, ben de a Lomsu kerki sabiman Augustinus. Na ini Lukas 14:23 Yesus ben gi wan agersitori pe wan masra e taigi den srafu fu en fu ’dwengi sma fu kon na ini en oso’. Nanga na agersitori disi, Yesus ben wani leri den bakaman fu en fu taki-go-taki-kon nanga yepi fu den Buku fu Bijbel, fu yepi sma tron bakaman fu en. Ma Augustinus drai den wortu fu Yesus. A ben taki dati den wortu disi e sori taki a bun fu dwengi sma nanga tranga fu tron Kresten (Mateyus 28:19, 20; Tori fu den Apostel 28:23, 24). Augustinus gebroiki kerki fu basi sma libi.

Satan, wan engel di opo ensrefi teige Gado, e gebroiki kerki fu du ogri èn fu prati falsi leri. Na ini a fosi yarihondro, a gebroiki kerkisma fu pruberi fu pori a Kresten gemeente. Bijbel e taki fu den man dati: „Den man dati na falsi apostel, den na wrokoman di e bedrigi sma, èn den e kenki densrefi kon tron apostel fu Krestes. Èn dati no e fruwondru wi, bika Satan srefi e tan kenki ensrefi kon tron wan engel fu leti. Fu dati ede a no de wan fruwondru sani taki den dinari fu en e tan kenki densrefi tu kon tron dinari di e du san regtfardiki.”—2 Korentesma 11:13-15.

Satan wani taki sma musu libi soleki fa en wani, na presi taki den e libi soleki fa Gado wani. Fu dati ede, te now ete a e kori sma nanga yepi fu kerkigrupu di e taki dati den na Kresten. Den kerki disi e taki dati den e leri sma fu tyari densrefi na wan fasi di fiti, èn den e taki dati den e yepi sma fu kon sabi Gado (Lukas 4:5-7). Kande yu srefi si fa furu kerki fesiman na ini a ten disi e gebroiki kerki fu hei densrefi nanga kefalek bigi nen, èn fu kisi moni fu den memre fu a kerki. Tiriman gebroiki kerki sosrefi fu gi den kondreman deki-ati fu go feti na ini orloku.

Furu sma no sabi taki Didibri e gebroiki kerki fu du so furu ogri sani. Kande yu e denki taki wan tu faya-ede  kerkiman nomo de di e du san Satan wani. Ma soleki fa Bijbel e sori, dan „a wan di den e kari Didibri nanga Satan . . . e kori sma na heri grontapu”. Bijbel e taki tu: „Heri grontapu de na ini a makti fu na ogriwan” (Openbaring 12:9; 1 Yohanes 5:19). Fa Gado e denki fu kerki di den tiriman nanga kerki fesiman e gebroiki fu hari sma fu tron bakaman fu den?

„Sortu bun unu e du mi?”

Efu yu e broko yu ede nanga a fasi fa sonwan fu den falsi Kresten e tyari densrefi, dan sabi taki na Almakti Gado e atibron nanga den srefisrefi. Den sokari Kresten kerki taki dati den abi wan frubontu nanga Gado, neleki fa den Israelsma fu owruten ben taki dati tu. Ma no wan fu den tu tan getrow na Gado. Yehovah krutu den Israelsma èn dati a o du tu nanga falsi Kresten kerki na ini a ten disi. Yehovah taki: „Den no arki den wortu fu mi. Èn den tan poti den wet fu mi na wan sei tu. Sortu bun unu e du mi, te unu e tyari switismeri kon fu Seba? . . . Den srakti-ofrandi fu unu no e plisi mi” (Yeremia 6:19, 20). A fasi fa den hoigriman ben e anbegi Gado, no ben plisi En kwetikweti. A no ben poti prakseri na den seremonia nanga den begi fu den sma disi. A ben taigi den Israelsma: „Mi sili no wani si . . . den fesa ten fu unu na ai. Den tron wan hebi gi mi; mi kon weri fu tyari den. Èn te unu e bradi den mindri-anu fu unu opo, mi e kibri mi ai gi unu. Awansi unu e begi furu, toku mi no e arki; un eigi anu kon furu nanga a brudu fu sma di unu kiri.”—Yesaya 1:14, 15.

Yu denki taki Yehovah lobi den fesa di den kerki e kari Krestenfesa, ma di e gi grani na falsi gado? A e arki den begi fu den kerki fesiman di e pori den leri fu Krestes? Yu denki taki Gado e horibaka gi kerki di e weigri fu hori densrefi na a wet fu en? Yu kan de seiker taki a e tegu gi den kerki seremonia na ini a ten disi, neleki fa a ben e tegu gi den ofrandi di den Israelsma fu owruten ben e tyari. A ben taki fu den ofrandi disi: „Sortu bun unu e du mi?”

Toku Yehovah e poti prakseri na opregtisma di e anbegi en na a yoisti fasi. Gado breiti te sma e sori warderi gi ala den sani di a du gi den (Maleaki 3:16, 17). Sobun, yu denki taki yu kan de wan bun sma sondro fu anbegi Gado? Efu wan sma no e du noti gi en papa nanga mama, dan wi no kan taki dati a sma bun, a no so? Yu denki taki wan sma di no e du noti gi Gado, na wan bun sma? Fu dati ede, wi musu du sani fu leri sabi a tru Gado, a sma di e gi libi. Na ini na artikel di e kon, wi sa si fa tru anbegi e gi grani na Gado, èn wi sa si sosrefi fa wi kan kisi wini fu dati.

[Futuwortu]

[Prenki na tapu bladzijde 4]

Den kerki buweisi sma taki Gado meki ala sani?

[Prenki na tapu bladzijde 4, 5]

A fiti taki wan anbegiman fu Gado de dyaso?

[Prenki na tapu bladzijde 5]

Fa Gado e prakseri fu den sortu fesa disi?

[Sma di abi a reti fu a prenki]

AP Photo/Georgy Abdaladze