Ondrofenitori

Mi kisi wini fu di den lobiwan fu mi tan getrow

SOLEKI FA KATHLEEN COOKE FRUTERI

DI MI granmama, Mary Ellen Thompson, ben de na mi famiri na ini Glasgow, Scotland, dan a ben go arki wan lezing fu Charles Taze Russell, wan prenspari memre fu den Bijbel Ondrosukuman, di sma kon sabi bakaten leki Yehovah Kotoigi. Mi granmama ben lobi san a ben yere. Di a drai go baka na Zuid-Afrika, dan a meki kontakti nanga den Bijbel Ondrosukuman na ini a kondre dati. Na ini april 1914, den Bijbel Ondrosukuman ben hori den fosi kongres na ini Zuid-Afrika, èn mi granmama ben de wán fu den 16 sma di teki dopu na a kongres dati. Na a ten dati, mi mama Edith, na umapikin fu mi granmama, ben abi siksi yari.

Baka di Brada Russell dede na ini 1916, dan trobi ben de na mindri den Bijbel Ondrosukuman na heri grontapu. A nomru fu loyaalwan na ini a foto Durban ben saka fu 60 te go miti 12 sma. Ingeborg Myrdal, mi granmama fu mi papa sei, nanga en wan-enkri manpikin, Henry Myrdal, wan yonkuman di no ben dopu langa ete, ben e horibaka gi den loyaalwan. Na ini 1924, Henry ben tron wan colporteur, soleki fa den ben kari den furuten dinari fu Yehovah Kotoigi na a ten dati. Èn feifi yari langa, a preiki na furu kontren na a zuidsei fu Afrika. Na ini 1930, Henry nanga Edith trow, èn dri yari baka dati mi gebore.

Wan bigi famiri

Wan pisi ten, wi ben e libi na ini Mosambik, ma na ini 1939 wi froisi go na a oso fu mi granmama nanga granpapa na ini Johannesburg. Mi granpapa no ben wani sabi noti fu den tru tori fu Bijbel, èn son leisi a ben e gens mi granmama. Ma awinsi fa no fa, a ben  abi switifasi trutru. Thelma, mi pikin sisa, gebore na ini 1940, èn mi nanga en leri fu sorgu gi owrusma. Furu tron te wi ben e sidon nyan te neti yuru, dan wi ben e fruteri makandra fa wi pasa a dei fu wi, noso wi ben e fruteri makandra fa a ben de fosi.

A famiri fu mi ben e prisiri te son Kotoigi ben kon tan na wi, spesrutu den wan di ben de na ini a furuten diniwroko. Te wi ben e sidon nyan te neti yuru, dan den Kotoigi disi ben e fruteri tu fa den ben pasa a dei fu den. Den ondrofenitori fu den furuten dinari disi, meki taki wi kisi moro warderi taki wi de na ini a tru anbegi. Disi meki taki mi nanga Thelma kisi moro deki-ati fu tron pionier neleki den furuten preikiman dati.

Sensi di wi ben de pikin-nengre ete, wi leri fu prisiri fu leisi buku. Mi mama, mi papa, nanga mi granmama ben e leisi moi buku gi wi, noso den ben e leisi Bijbel gi wi. Den Kresten konmakandra nanga a preikiwroko ben de tumusi prenspari sani na ini wi libi. Mi papa ben de „groepsdienaar” (now den e kari a groepsdienaar, a fesiman-opziener) na ini a Gemeente Johannesburg. Fu dati ede, wi alamala ben musu de na den konmakandra biten. Te kongres ben e hori, dan mi papa ben e yepi fu orga sani, èn mi mama ben e yepi fu suku tanpresi gi den tra brada nanga sisa di ben komoto na wan tra kontren.

Wan prenspari kongres gi wi

A kongres di ben hori na ini Johannesburg na ini 1948, ben de wan prenspari wan gi wi. Fu a fosi leisi, memre fu na edekantoro fu Yehovah Kotoigi ben de na wan kongres na ini Johannesburg. Den brada disi ben komoto na Brooklyn, New York. Mi papa ben kisi a grani fu rèi Nathan Knorr nanga Milton Henschel nanga wagi fu a pisi ten di den ben o de na ini Johannesburg. Mi teki dopu na a kongres dati.

Syatu baka dati, mi granpapa fu mi papa sei, taigi mi papa taki a ben e sari taki a teki a sei fu den wan di gowe libi den Bijbel Ondrosukuman baka di Brada Russell dede. Wan tu mun baka dati, mi granpapa dede. Ma na a tra sei, mi granmama Myrdal, tan getrow teleki a kaba en diniwroko dyaso na grontapu na ini a yari 1955.

Sani pasa di ben abi krakti tapu mi libi

Mi bigin dini leki gewoon pionier tapu 1 februari 1949. Heri esi, wi kisi wan moi sani fu yere di ben gi wi moro prisiri. Wi kon yere taki wan internationaal kongres ben o hori na New York City a yari baka dati. Wi ben wani go trutru, ma wi no ben abi moni fu pai go. Ma na ini februari 1950, mi granpapa fu mi mama sei, dede. Mi granmama kisi a moni di mi granpapa ben libi na baka, èn a teki a moni dati fu pai gi wi so taki mi nanga ete fo tra famiriman ben kan go na a internationaal kongres.

Wan tu wiki bifo wi ben o gowe, mi kisi wan brifi fu na edekantoro fu Yehovah Kotoigi na ini Brooklyn, New York. Mi kisi wan kari fu go na a di fu 16 klas fu a Gilead zendelingskoro. A ben span gi mi trutru, bika mi no ben tapu 17 yari  ete! Di a skoro bigin, mi ben de wan fu den tin studenti fu Zuid-Afrika. Mi ben prisiri trutru taki mi ben abi a grani dati.

Di wi kaba a skoro na ini februari 1951, mi nanga seibi trawan fu Zuid-Afrika, drai go baka na wi kondre leki zendeling. Na ini den yari baka dati, mi nanga mi pionier patna ben e preiki na ini pikinpikin foto pe sma e taki Afrikaans. Na ini a bigin, mi no ben man taki a tongo so bun. Mi man memre tu taki, wan dei di mi ben e rèi mi baisigri go na oso, èn mi ben e krei fu di mi no ben abi bun bakapisi na ini a preikiwroko. Ma bakaten, a ben go moro bun èn Yehovah blesi a muiti di mi du.

A trowlibi fu mi, èn a kringwroko

Na ini 1955, mi kon leri sabi John Cooke. A ben yepi fu bigin a preikiwroko na ini Fransikondre, Potogisikondre, nanga Spanyorokondre na ini a pisi ten fosi a di fu Tu Grontapufeti, èn baka a Grontapufeti dati. A yari di mi nanga en miti, a ben tron wan zendeling na ini Afrika. Bakaten a skrifi wan brifi gi mi taki: „Na ini wán wiki, mi ondrofeni dri sani di mi no ben fruwakti . . . Mi kisi wan pikin wagi fu wan brada di lobi fu gi sma sani; mi ben tron distrikt-opziener; èn mi ben kon lobi wan sisa.” * Na ini december 1957, mi nanga John trow.

Na ini a pisi ten di mi nanga John ben hori nanga makandra, dan a gi mi a dyaranti taki noiti a ben o soi gi mi efu mi ben o trow nanga en, èn a ben abi leti. Wi fisiti difrenti gemeente na ala sei fu Zuid-Afrika, èn moro furu na presi pe blaka sma e tan. Ibri wiki, a ben de wan tyalensi gi wi fu kisi primisi fu pasa go na ini den kontren dati. Dan mi no e taki ete fu a tranga muiti di wi ben musu meki fu kisi primisi fu kan tan wan tu dei drape. Wan tu leisi, wi ben musu sribi na tapu gron na ini wan leigi wenkri, na wan kontren pe wetiman e libi. Wi ben pruberi fu no meki sma si wi te den ben e waka pasa. Nofo tron, wi ben musu tan nanga den Kotoigi di ben de wetiman, èn furu fu den ben tan bun fara.

 Wan tra tyalensi di wi ben abi, na taki wi ben musu hori konmakandra na ini presi di no ben abi pranpran, èn di ben de te na ini a busi. Wi ben sori sma den felem fu Yehovah Kotoigi. Den felem disi yepi sma fu kisi moro warderi gi na organisâsi fu wi di de na heri grontapu. Wi ben tyari wi eigi motor fu leti faya, bika furu tron stroom no ben de na den kontren dati. Wi ben abi problema tu na ini kontren di ben de na ondro a makti fu Ingrisikondre. Wi no ben kisi primisi fu prati den buku fu wi na den kontren dati. A ben de wan tyalensi tu fu leri a Sulutongo. Toku wi ben prisiri taki wi ben kan dini wi brada nanga sisa.

Na ini augustus 1961, John ben de a fosi leriman na a Kownukondre Diniwroko-skoro di ben hori na ini Zuid-Afrika. Na a skoro disi, den gemeente owruman ben o kisi leri fo wiki langa. John ben sabi fa fu gi leri èn a ben man doro na ati fu den arkiman fu en nanga yepi fu makriki agersitori. Pikinmoro wan yari nanga siksi mun langa, wi go na difrenti presi fu hori a skoro gi ibri grupu di e taki Ingrisitongo. Te John ben e hori a skoro, dan mi ben go na ini a preikiwroko nanga den Kotoigi fu a kontren dati. Wi ben fruwondru di wi kisi wan brifi pe wi kisi a kari fu go dini na a bijkantoro fu Zuid-Afrika, krosibei fu Johannesburg. Wi ben o bigin 1 yuli 1964.

Ma na a pisi ten dati, wi kon si taki a no ben go bun nanga a gosontu fu John. Na ini 1948, a ben abi tuberculose (wan takru sortu frikowtu) gi wan syatu pisi ten. Baka dati, a ben e firi weri furu leisi. Son leisi a ben firi korsukorsu, èn dati ben hori en wan tu dei langa. A no ben man du noti èn nowan sma ben kan go luku en. Wan datra pe wi ben go syatu bifo wi kisi a kari fu go dini na a bijkantoro, ben taki dati John ben firi brokosaka.

A datra gi wi a rai fu no du so furu moro na ini a diniwroko fu wi, ma a ben tranga gi wi fu du dati. Na a bijkantoro, John ben musu wroko na a Dienst Afdeling, èn mi ben kisi a wroko fu puru fowtu na ini brifi. Èn a ben de wan blesi trutru di wi kisi wan kamra gi wisrefi! Bifo wi trow, John ben e dini na ini kontren pe sma e taki Potogisitongo. Dati meki na ini 1967, den brada aksi wi efu wi ben kan yepi a wán-enkri Kotoigi osofamiri di ben taki Potogisitongo na ini a birti. Na osofamiri disi ben e preiki na ini a birti fu Johannesburg pe furu Potogisisma e tan. Disi ben wani taki dati mi ben musu leri wan tra tongo.

Fu di den Potogisisma e libi fara fu makandra, meki a ben teki furu ten komoto na a wan presi go na a trawan. Son leisi wi ben musu rèi sowan 300 kilometer go na sma di wani sabi moro fu Bijbel. Na a pisi ten dati, den Kotoigi fu Mosambik di e taki Potogisitongo bigin horibaka gi wi te den bigi konmakandra ben e hori. Disi ben de wan bigi yepi gi den nyunwan na ini a grupu. Na ini den 11 yari di wi preiki gi Potogisisma, wi si fa a pikin grupu fu wi fu 30 sma, gro kon tron fo gemeente.

A situwâsi kenki na oso

Na a srefi ten, a situwâsi na a oso fu mi papa nanga mama, ben kenki. Na ini 1960, Thelma, mi sisa, trow nanga John Urban, di ben e pionier na ini Amerkankondre. Na ini 1965 den go na a di fu 40 klas fu a Gilead-skoro, èn 25 yari langa den dini na wan getrow fasi leki zendeling na ini Brasyonkondre. Na ini 1990, den drai go baka na Ohio fu di a papa nanga mama fu John ben kon siki. Aladi a ben hebi gi den fu sorgu gi den siki papa nanga mama, toku den tan na ini a furuten diniwroko te na a dei fu tide.

Na ini 1965, mi granmama, fu mi mama sei, kaba en diniwroko na grontapu. A ben abi 98 yari, èn a tan getrow na Gado te na a kaba. A srefi yari dati, mi papa go nanga pensyun. Dati meki, di den brada aksi mi nanga John fu yepi na a Potogisi grupu, dan mi papa nanga mama ben de klariklari fu kon yepi wi tu. Den ben de wan bigi deki-ati gi a grupu, èn baka wan tu mun, a fosi gemeente ben seti. Syatu baka dati, mi mama kon siki fu di a ben abi kanker. Na ini 1971, a dede te fu kaba. Seibi yari baka dati, mi papa dede tu.

Wi horidoro aladi John ben kon siki

Na ini den yari baka 1970, wi ben si krin taki John ben kon moro siki. Wan-fru-wan, a ben musu libi wan tu fu den grani di a ben lobi trutru. Fu eksempre, a no ben man hori a  Waktitoren-studie moro di e hori na a bijkantoro ala wiki, èn a no ben man hori den Bijbel takimakandra moro te mamanten. Den ben puru en na a Dienst Afdeling, èn den poti en na a kantoro pe den e luku brifi. Baka dati den poti en fu wroko na ini a dyari.

Fu di John ben de wan sma di ben lobi wroko tranga, meki a ben tranga gi en fu tyari den kenki disi kon. Te mi ben e tan taigi en fu du en moro safri, dan na wan spotu fasi a ben taki dati mi ben de wan hebi na en futu, èn furu tron a ben gi mi wan waran brasa fu sori taki a e warderi mi. Te fu kaba, wi kon si taki a ben o moro bun fu gowe libi a Potogisi grupu èn fu go dini na a gemeente di ben hori konmakandra na ini a Kownukondre zaal fu a bijkantoro.

John ben kon siki moro nanga moro, ma a ben e naki mi ati fu si fa a ben abi wan krosibei matifasi nanga Yehovah. Te John ben wiki mindri neti fu di a ben e firi brokosaka trutru, dan wi ben e taki nanga makandra teleki a firi moro bun. Baka dati, a ben begi Yehovah fu yepi en. Te fu kaba, a ben man pasa den muilek momenti dati en wawan, fu di a ben e taki Filipisma 4:6, 7 safrisafri, ibri tron baka. A tekst dati e taki: „No broko un ede nanga nowan sani . . . ” Dati ben meki a firi moro korostu so taki a ben kan begi. Furu tron, mi ben de na ai èn mi ben luku fa a e taki safri te a ben e tan begi Yehovah komoto fu en ati.

A bijkantoro fu wi no ben abi nofo presi moro. Fu dati ede, den brada bigin meki wan nyun bijkantoro dorosei fu Johannesburg. Furu tron, mi nanga John go na a presi disi, di de farawe fu a babari nanga a doti fu a foto. A ben de wan bigi yepi gi John di wi kisi primisi fu froisi go na ini wan oso drape, teleki a nyun bijkantoro ben kaba.

Tra tesi

Fu di John no ben man denki so bun moro, meki a ben kon moro muilek gi en fu du a wroko fu en. A naki mi ati trutru fu si fa trawan ben e yepi John te a ben meki muiti fu du en wroko. Fu eksempre, wan brada di ben e go na wan bibliotheek pe sma kan leni noso leisi buku, ben kon teki John fu go makandra nanga en. Den saka fu John ben span nanga traktaat èn nanga tijdschrift, te a ben go nanga a brada. Disi ben yepi John fu firi taki a ben du wan bun sani, èn taki a warti ete.

Te fu kaba, John kisi a siki di den e kari Alzheimer, èn dati meki a no ben man leisi moro. Wi ben breiti nanga den cassette di abi Bijbel tori na tapu, èn sosrefi Kownukondre singi. Wi ben arki den ibri tron baka. Furu tron, John ben e atibron te mi no ben sidon arki den cassette nanga en. Dati meki mi ben sidon nanga en someni yuru langa e nai krosi. Dati meki wi kon lai empi nanga bedikrosi!

Baka wan pisi ten, mi ben musu poti moro prakseri na John fu di a ben kon moro siki. Furu tron mi ben weri tumusi fu leisi noso studeri, ma a ben de wan grani fu sorgu gi John te na a kaba. Na ini 1998 John dede safri na ini mi anu, syatu baka di a tapu 85 yari. Iya, a tan getrow te na a kaba. Fu tru, mi e angri fu si en te a kisi wan opobaka bika en gosontu nanga en frustan o kon bun baka!

Mi kisi krakti baka

Baka di John dede, a no ben makriki gi mi fu leri libi mi wawan. Sobun, na ini mei 1999, mi fisiti Thelma, mi sisa, nanga en masra na ini Amerkankondre. A ben switi trutru, èn a gi mi krakti baka di mi si someni fu den getrow mati fu mi di mi lobi srefisrefi. A gi mi furu deki-ati tu di wi go luku den mati fu wi na a edekantoro fu Yehovah Kotoigi na ini New York! Fu tru, dati na a deki-ati di mi ben abi fanowdu fu tan dini Yehovah.

Te mi e prakseri a libi fu den lobiwan fu mi di tan getrow, dan dati e memre mi na so furu sani di ben bun gi mi. A rai di den gi mi, na eksempre fu den, èn a yepi di den gi mi, leri mi fu abi lobi gi sma fu tra kondre nanga tra ras. Mi leri fu abi pasensi, fu horidoro, èn fu fiti misrefi na difrenti situwâsi. San moro prenspari, na taki mi ondrofeni a bun-ati fu Yehovah, a Yereman fu begi. Mi abi den srefi firi fu a psalm skrifiman di ben skrifi: „Koloku fu a sma di yu e frukisi èn di yu e meki kon krosibei na yu, so taki a kan tan na ini den fesidyari fu yu. Seiker wi sa de tevrede nanga den bun sani fu na oso fu yu.”—Psalm 65:4.

[Futuwortu]

[Prenki na tapu bladzijde 8]

Mi granmama nanga den umapikin fu en

[Prenki na tapu bladzijde 9]

Mi èn mi papa nanga mama, di mi teki dopu na ini 1948

[Prenki na tapu bladzijde 10]

Mi nanga Albert Schroeder, a brada di de frantwortu gi na administrâsi fu a Gilead skoro, makandra nanga den tra neigi studenti fu Zuid-Afrika

[Prenki na tapu bladzijde 10]

Mi nanga John na ini 1984