„Na wan boi fu neigi yari meki mi arki”

WIESŁAWA na wan uma di e libi na a zuidsei fu Polen. Ibri leisi te Yehovah Kotoigi ben e kon na en oso, a ben taigi den tangi taki den kon, ma baka dati a ben seni den gowe. Wan dei, Samuel, wan yonkuman fu neigi yari, kon na a oso fu Wiesława makandra nanga en mama. Disi leisi, Wiesława bosroiti fu arki a boskopu èn a teki wan tijdschrift di e taki fu wan paradijs na grontapu.

Fu di a Memrefesa fu a dede fu Yesus Krestes ben de krosibei, meki Samuel ben wani go na Wiesława fu gi en wan kari fu kon na a prenspari okasi disi. Sobun, a boi go baka na Wiesława makandra nanga en mama, èn disi leisi den ben go nanga wan karta fu gi en wan kari. Di Wiesława si taki a boi weri moi krosi, dan a aksi den efu den ben kan wakti pikinso. A drai go baka na ini en oso, èn a go weri krosi di fiti. Di a kon baka na den, dan a arki san Samuel ben abi fu taki. A teki a kari, èn a aksi den: „Mi musu kon mi wawan, noso mi musu tyari mi masra tu?” Ne a taki baka dati: „Awinsi mi masra no wani kon, toku mi sa kon. Mi sa du disi gi yu, Samuel.” Samuel ben breiti fu si taki Wiesława du san a pramisi.

Di a brada ben e hori a lezing fu a Memrefesa, dan Samuel ben sidon na sei Wiesława èn a ben sori en den bijbeltekst di a brada ben taki fu den. Disi naki Wiesława en ati. A nyan bun fu a Memrefesa èn a warderi en taki a brada ben fruklari den dipi tori na wan makriki fasi. A ben lobi tu fa a gemeente gi en wan switi kon èn fa den brada nanga sisa ben handri na wan switi fasi nanga en. Sensi a ten dati, Wiesława wani kon sabi moro fu na anbegi fu Gado èn a bigin abi demakandra nanga Yehovah Kotoigi doronomo. No so langa pasa, a taki: „Mi e firi syen fu di mi no ben wani arki unu di unu ben kon na mi oso den ten di pasa. Èn fu taki en leti, na wan boi fu neigi yari meki mi arki a boskopu fu unu. Na Samuel meki mi arki.”

Neleki Samuel di e libi na ini Polen, na so furu tra yongu Kotoigi fu Yehovah e prèise Gado nanga den mofo èn nanga a fasi fa den e tyari densrefi. Efu yu na wan yonguwan, dan yu srefi kan yepi opregtisma fu kon sabi moro fu den moi leri fu Gado.