Te wan sma di wi lobi gowe libi Yehovah

MARK nanga Louise na Yehovah Kotoigi. * Na wan lobi-ati fasi, den du furu muiti fu leri den pikin fu den Bijbel gronprakseri. Dati na san Kresten papa nanga mama musu du, soleki fa Bijbel e taki (Odo 22:6; 2 Timoteyus 3:15). A de wan sari sani taki, a no ala den pikin fu den ben tan dini Yehovah di den kon bigi. Louise e taki: „Mi e sari trutru fu di wan tu fu den pikin fu wi no e dini Yehovah moro. Mi no man du neleki a no e hati mi trutru ibri dei. Te tra sma e taki fu den manpikin fu den, dan a e hati mi srefisrefi èn mi musu hori misrefi fu no krei.”

Iya, te wan sma no wani dini Yehovah moro èn te a no wani libi moro soleki fa den Buku fu Bijbel e taki, dan nofo tron a de so taki den famiriman di e dini Yehovah na wan getrow fasi, e firi sari trutru. Irene e taki: „Mi lobi mi bigi sisa trutru. Mi ben sa wani du iniwan sani fu meki a drai kon baka na Yehovah!” Maria, di abi wan brada di gowe libi Yehovah fu go libi wan yayo libi, e taki: „Disi ben hebi gi mi fu di na ini ala tra sani, a ben de wan kefalek bun brada gi mi. Mi e misi en spesrutu na den okasi pe a heri famiri e kon na wan.”

Fu san ede a hebi so?

Fu san ede a e hati Kresten trutru te wan pikin fu den, noso wan tra lobiwan na ini a famiri fu den no e dini Yehovah moro? Fu di den sabi taki den Buku fu Bijbel e pramisi taki den wan di tan loyaal na Yehovah, sa kisi têgo libi na tapu wan paradijs grontapu (Psalm 37:29; 2 Petrus 3:13; Openbaring 21:3-5). Den e howpu fu prisiri drape makandra nanga den trowpatna, den pikin fu den, den papa nanga mama, den brada nanga sisa, èn den granpikin fu den. A e hati den trutru te den e prakseri taki den lobiwan fu den di no e dini Yehovah moro, no sa kisi a blesi dati! Kresten e frustan tu taki den wet fu Yehovah bun gi den lobiwan fu den nownow srefi. Dati meki, Kresten e sari srefisrefi fu si taki den lobiwan fu den e du sani di o tyari takru bakapisi kon gi den seiker.—Yesaya 48:17, 18; Galasiasma 6:7, 8.

 Kande noiti wan lobiwan fu yu gowe libi Yehovah. Dati meki a kan muilek gi yu fu frustan fa son Kresten e firi te wan lobiwan fu den no e dini Yehovah moro. A abi krakti tapu pikinmoro den heri libi. Louise e taki: „A kon moro tranga gi mi fu sidon na den Kresten konmakandra èn fu si fa papa nanga mama e lafu èn e taki nanga den pikin fu den. Na ibri prisiri demakandra, mi e firi sari fu di lobiwan fu mi no de drape.” Wan Kresten owruman e memre den fo yari di na umapikin fu a wefi fu en no ben abi demakandra nanga den. A e taki: „Srefi te wi ben abi prisiri demakandra, dan a ben hebi gi wi. Efu mi ben gi mi wefi wan kado, noso efu mi ben tyari en go na wan moi presi tapu satra nanga sonde, dan a ben bigin krei. A ben hati en taki na umapikin fu en no ben kan prisiri makandra nanga wi.”

A de so taki den Kresten disi e meki wan tumusi bigi sani fu a tori? Nôno, a no abi fu de so. Fu taki en leti, na wan noso tra fasi den e sori fa Yehovah e firi, fu di Gado meki den leki wan prenki fu En (Genesis 1:26, 27). San disi wani taki? We, fa Yehovah ben firi di Israel, a pipel fu en, opo densrefi teige en? Psalm 78:38-41 e sori wi taki Yehovah ben firi sari, èn taki a ben hati en. Ma toku, nanga pasensi a ben warskow den èn a ben gi den trangaleri. A ben gi den pardon ibri tron baka te den ben sori berow. A de krin taki Yehovah lobi ibriwan fu den sma di a meki, fu di den na ’a wroko fu en anu’. Dati meki a no gaw fu drai baka gi den  (Yob 14:15; Yona 4:10, 11). A meki libisma na so wan fasi, taki den kan sori a srefi sortu lobi disi. Èn spesrutu famiriman kan abi wan bun matifasi nanga makandra. Sobun, a no de fu fruwondru taki libisma e sari te wan lobiwan fu den no e dini Yehovah moro.

Fu tru, wan fu den moro hebi tesi di tru anbegiman kan abi, na te wan lobiwan fu den gowe libi Yehovah (Tori fu den Apostel 14:22). Yesus ben taki dati, te sma ben o gi yesi na a boskopu fu en, dan dati ben o tyari pratifasi kon na mindri son famiriman (Mateyus 10:34-38). Disi no wani taki dati a boskopu fu Bijbel e tyari pratifasi kon na mindri famiriman. Na presi fu dati, dan na den famiriman di no de na bribi, noso di gowe libi Yehovah, e tyari pratifasi kon fu di den no wani teki a tru Kresten bribi. Den e tyari pratifasi kon tu te den e gowe libi a tru Kresten bribi, noso te den e gens tru Kresten. Ma wi kan breiti taki Yehovah e yepi den loyaalwan fu en fu horidoro ondro den hebi tesi fu den. Kande yu e sari fu di wan lobiwan fu yu gowe libi Yehovah. Ma sortu Bijbel gronprakseri kan yepi yu fu horidoro na ini a sari situwâsi disi, èn fu de koloku tu?

San yu kan du te wan lobiwan fu yu gowe libi Yehovah?

„Tranga unsrefi . . . ; te unu e du dati, dan Gado sa tan lobi unu.” (Yudas 20, 21). Kande now yu no man du noti fu yepi wan famiriman di gowe libi Yehovah. Ma toku, yu man tranga yusrefi èn yu kan tranga ibri famiriman tu di e dini Yehovah na wan getrow fasi ete. Fu taki en leti, yu musu du dati. Veronica, di abi dri manpikin di gowe libi a tru anbegi, e taki: „Mi nanga mi masra ben kisi a rai fu tan abi wan bun matifasi nanga Yehovah. Efu wi du dati, dan wi sa man yepi den boi fu wi moro bun te den wani drai kon baka. San ben o pasa nanga a lasi manpikin efu en papa no ben sa man teki en baka?”

Efu yu wani tan abi wan bun matifasi nanga Yehovah, dan du furu sani na ini a tru anbegi. Wan tu fu den sani di yu kan du, na fu studeri Bijbel fayafaya èn fu go na den Kresten konmakandra. Suku fasi fa yu kan yepi trawan na ini a gemeente so furu leki yu man. A tru taki na ini a bigin, a kan muilek gi yu fu du den sani disi. Veronica e memre: „A fosi sani di kon na mi ede, na fu hori misrefi aparti fu tra sma, neleki fa wan dagu e gowe go kibri te a kisi mankeri. Ma doronomo mi masra ben gi mi deki-ati fu tan poti prakseri na a diniwroko fu wi doronomo. A ben sorgu taki wi ben e go na den konmakandra. Te wi ben musu go na wan bigi konmakandra, dan mi ben abi furu deki-ati fanowdu fu go drape pe mi ben o miti furu sma. Ma toku, a konmakandra ben meki wi fu kon moro krosibei na Yehovah. A manpikin fu wi, di tan dini Yehovah, ben kisi furu deki-ati na a kongres dati.”

Maria, di wi ben taki fu en na a bigin, feni taki a de wan bigi yepi gi en fu du furu na ini a preikiwroko. Nownowde a e studeri Bijbel nanga fo sma. Laura e taki tu: „Aladi mi e krei ibri dei ete fu di sani no waka so bun nanga mi osofamiri soleki fa a ben waka nanga tra osofamiri, toku mi e taigi Yehovah tangi taki mi abi a tumusi bun boskopu fu Bijbel, di man yepi osofamiri na ini den lasti dei disi.” Ken nanga Eleanor, di abi bigi pikin di gowe libi a gemeente, seti den libi na so wan fasi taki den  ben kan froisi go na wan presi pe moro Kownukondre preikiman de fanowdu, èn den go na ini a furuten diniwroko. Disi yepi den fu no bruya, èn fu no sari pasa marki.

No lasi howpu. Lobi „e howpu ala sani” (1 Korentesma 13:7). Ken, di wi ben taki fu en didyonsro, e taki: „Di den pikin fu wi gowe libi a tru anbegi, dan gi mi a ben de neleki den dede kaba. Ma di mi sisa dede, mi kon denki tra fasi fu a tori. Mi breiti taki den pikin fu mi no dede trutru, èn taki Yehovah e tan gi den na okasi fu drai kon baka na en.” Fu tru, ondrofeni sori taki furu sma di gowe libi a tru anbegi, drai kon baka te fu kaba.—Lukas 15:11-24.

No gi yusrefi a fowtu. Spesrutu papa nanga mama abi a firi fu prakseri baka fa sani waka na ini a ten di pasa. Èn furu tron den e sari taki den no ben handri tra fasi na ini son situwâsi. Ma a moro prenspari sani di Esekièl 18:20 e tyari kon na krin, na taki Yehovah no e gi fowtu na a papa nanga mama. Ma a e gi fowtu na a sma di sondu, fu di na en teki wan fowtu bosroiti. A moi fu si taki a buku Odo e taki furu fu a frantwortu di papa nanga mama abi fu kweki den pikin fu den na a yoisti fasi. Ma den rai di a buku Odo e gi yonguwan fu gi yesi na den papa nanga mama, de fo tron moro furu leki den rai di papa nanga mama e kisi. Iya, pikin abi a frantwortu fu gi yesi na a Bijbel leri di den e kisi fu den sondu papa nanga mama fu den. Kande yu du ala san yu man fu du sani na wan bun fasi na a ten dati. Kande yu feni taki na yu meki fowtu son leisi. Ma a no abi fu de so taki, na den fowtu fu yu meki a lobiwan fu yu gowe libi a tru anbegi. Awinsi fa sani waka, toku a no sa tyari wini kon gi yu te yu e sidon prakseri fa yu ben kan du sani tra fasi. Leri fu den fowtu di yu meki, abi a fasti bosroiti fu no meki den srefi fowtu dati baka, èn begi Yehovah fu gi yu pardon (Psalm 103:8-14; Yesaya 55:7). Luku go na fesi, no luku go na baka.

Abi pasensi nanga trawan. A kan muilek gi son sma fu sabi fa den kan gi yu trutru deki-ati, noso fa den kan trowstu yu, spesrutu efu a sani dati no miti den noiti. Boiti dati, san a wan sma e si leki wan deki-ati nanga wan trowstu, no de so gi wan tra sma. Sobun, efu son sma e taki sani di e meki yu firi fruferi, dan du san na apostel Paulus taki na ini Kolosesma 3:13: „Tan frudrage makandra èn gi makandra pardon nanga un heri ati te wan sma feni taki wan trawan du en wan ogri.”

Sori lespeki gi den sani di Yehovah seti fu gi sma trangaleri. Efu a famiriman fu yu kisi trangaleri fu a gemeente, dan memre taki disi na wan seti fu Yehovah èn taki a sa tyari wini kon gi ala sma, iya srefi gi a sma di sondu (Hebrewsma 12:11). Fu dati ede, du tranga muiti fu no krutu den owruman di luku a tori, èn no krutu a bosroiti di den teki. Memre taki wi e kisi den moro bun bakapisi te wi e du sani soleki fa Yehovah wani. Ma te wi no e wroko nanga den seti fu Yehovah, dan dati kan tyari moro problema kon gi wi.

Baka di Israel kisi frulusu fu Egepte, dan Moses ben e koti krutu gi a pipel doronomo (Exodus 18:13-16). A kan taki, te a ben e koti krutu, dan wan sma ben kisi wini èn wan tra sma ben lasi. Fu dati ede wi kan frustan, taki son sma no ben breiti nanga den bosroiti di Moses ben teki. A kan taki son leisi a pipel ben opo densrefi teige Moses, fu di den ben krutu den bosroiti di Moses ben e teki. Ma Yehovah ben gebroiki Moses fu tiri a pipel fu En, èn A no strafu Moses, ma a strafu den sma di ben opo densrefi, èn sosrefi den famiriman di ben  e horibaka gi den (Numeri 16:31-35). San wi kan leri fu a tori disi? Disi e leri wi taki wi musu pruberi fu lespeki den bosroiti fu owruman di e teki na ini a ten disi, èn wi musu horibaka gi den.

Gi Delores a ben muilek fu si sani na wan yoisti fasi, di a gemeente gi trangaleri na a umapikin fu en. A e taki: „San ben yepi mi, na taki ibri tron baka mi ben e leisi tori di ben e sori taki den seti fu Yehovah de reti. Efu mi yere wan lezing noso leisi wan moi penti na ini wan artikel di kan yepi mi fu horidoro èn fu tan dini Yehovah, dan mi e skrifi dati na ini wan spesrutu buku.” Disi e meki wi memre wan tra prenspari sani di wi musu du fu man horidoro.

Taki fa yu e firi. A kan de wan yepi gi yu fu taki nanga wán noso tu mati di e frustan fa yu e firi èn di yu kan frutrow. Te yu e du dati, dan suku mati di sa yepi yu fu abi wan yoisti fasi fu denki. A o de wan yepi gi yu trutru te yu e begi Yehovah èn te yu e ’fruteri en san de tapu yu ati’ (Psalm 62:7, 8). * Fu san ede? Fu di en e frustan heri bun fa yu e firi trutru. Fu eksempre, kande yu e aksi yusrefi fu san ede yu musu ondrofeni so wan hati sani. Bika te yu luku en bun, a no yu gowe libi Yehovah. Fruteri Yehovah fa yu e firi, èn aksi en fu yepi yu fu si sani na wan yoisti fasi, so taki a no e hati yu so furu moro.—Psalm 37:5.

Baka wan pisi ten, yu o man basi den firi fu yu moro bun. Now, yu musu tan du muiti fu plisi yu hemel Tata, èn noiti yu musu denki taki na fu soso yu e du muiti (Galasiasma 6:9). Memre taki efu wi o gowe libi Yehovah, dan wi o tan abi problema. Ma te wi e tan getrow na en, dan a sa yepi wi fu pasa den tesi fu wi. Fu dati ede, yu kan abi a dyaranti taki Yehovah e frustan heri bun fa yu e firi èn a o tan tranga yu na a yoisti ten.—2 Korentesma 4:7; Filipisma 4:13; Hebrewsma 4:16.

[Futuwortu]

[Faki na tapu bladzijde 19]

San kan yepi yu fu horidoro

◆ „Tranga unsrefi . . . ; te unu e du dati, dan Gado sa tan lobi unu.” —Yudas 20, 21.

◆ No lasi howpu.—1 Korentesma 13:7.

◆ No gi yusrefi a fowtu.—Esekièl 18:20.

◆ Abi pasensi nanga trawan. —Kolosesma 3:13.

◆ Sori lespeki gi den sani di Yehovah seti fu gi sma trangaleri. —Hebrewsma 12:11.

◆ Taki fa yu e firi.—Psalm 62:7, 8.

[Faki/​Prenki na tapu bladzijde 21]

Yu gowe libi Yehovah?

Efu dati de so, dan awinsi sortu sani meki taki yu gowe libi Yehovah, memre taki yu kan lasi yu matifasi nanga en èn yu kan lasi yu libi, fu têgo. Ma kande yu e prakseri fu drai kon baka na Yehovah. A de so taki yu e meki tranga muiti fu du dati? Noso yu e draidrai teleki yu feni taki a ten doro fu kon baka? Memre taki Armagedon e kon heri esi. Boiti dati, na ini a sistema disi wi e libi wan syatu pisi ten, èn wi kan lasi wi libi makriki. Yu no kan sabi efu yu sa de na libi tamara srefi (Psalm 102:3; Yakobus 4:13, 14). Wan man di ben kisi wan seryusu siki, ben taki: „Di mi kisi a siki disi, mi ben e dini Yehovah fayafaya, èn mi no abi fu syen fu noti. Èn a switi fu abi a firi dati.” Ma prakseri fa a man disi ben o firi efu a ben o kon siki na ini wan ten pe a ben e taki: „Wan dei mi sa drai kon baka na Yehovah!” Efu yu gowe libi Yehovah, dan now na a moro bun ten fu drai kon baka.

[Prenki na tapu bladzijde 18]

Efu yu abi furu fu du na ini a tru anbegi, dan dati kan yepi yu fu si sani na wan yoisti fasi