Aksi fu leisiman

Fu san ede a Nieuwe-Wereldvertaling e taki na ini Deuteronomium 31:2 dati Moses ’no ben o kisi pasi moro fu dini’ leki fesiman fu Israel, aladi tra Bijbel e taki dati a no ben man du dati moro?

A Hebrew wortu di gebroiki na ini a tekst disi, kan vertaal na ala tu fasi. Ma son Ingrisitongo Bijbel e taki dati Moses ben kon swaki na a kaba fu en libi, èn taki a no ben abi a krakti moro fu tyari en frantwortu leki fesiman. Fu eksempre, The New English Bible e taki dati Moses ben taki: „Mi abi wan hondro nanga tutenti yari now, èn mi no man du so furu moro leki fa mi wani.” The New American Bible e taki wan srefi sortu sani: „Mi . . . no man du sani so esi moro.”

Ma Deuteronomium 34:7 e sori taki aladi Moses ben kon owru kaba, toku a no ben swaki. A tekst e taki: „Moses ben abi wan hondro nanga tutenti yari di a dede. En ai no ben kon dòf, èn en krakti no ben gowe libi en.” Sobun, Moses ben abi krakti ete fu tiri a pipel, ma na Yehovah no ben wani en fu du dati moro. Disi de krin fu si na san Moses ben taki moro fara: „Yehovah taigi mi: ’Yu no sa abra a Yordanliba.’” Soleki fa a sori, dan Yehovah ben taki nomo san a ben taki kaba na a presi Meriba.—Numeri 20:9-12.

Moses ben libi langa, èn a ben abi wan tumusi aparti libi di wi kan prati na ini dri pisi. Fotenti yari langa a libi na ini Egepte, pe a ben „kon sabi ala den koni fu den Egeptesma”, èn „den wortu fu en èn den sani di a ben e du ben abi bun furu krakti tapu sma” (Tori fu den Apostel 7:20-22). Baka dati, a tan fotenti yari langa na ini Midian. Drape a ben leri fu tyari ensrefi soleki fa Yehovah wani, so taki Yehovah ben kan gebroiki en bakaten fu tiri en pipel. Te fu kaba, Moses tiri a pipel fotenti yari langa. Ma now Yehovah bosroiti taki a ben o gebroiki Yosua na presi fu Moses, fu tyari a pipel go na ini a Pramisi Kondre na a tra sei fu a Yordanliba.—Deuteronomium 31:3.

Sobun, a Nieuwe-Wereldvertaling e tyari a prakseri fu Deuteronomium 31:2 kon na krin na wan soifri fasi. A no fu di Moses ben swaki, meki a no ben o de a fesiman fu Israel moro, ma na fu di Yehovah no ben gi en pasi fu du dati.