Ondrofenitori

Yehovah yepi mi fu pasa muilek ten na ini a libi

SOLEKI FA DALE IRWIN FRUTERI

„FO BEN DE KABA, NOW ETE FO KON! AITI PIKIN NA DOBRU WROKO.” Na so wan koranti ben meki bekènti taki mi wefi kisi fo pikin na a srefi dei. Boiti den fo pikin disi, wi ben abi fo umapikin kaba. Di mi ben de wan yongu man, mi no ben denki fu trow, èn noiti mi no ben denki fu abi pikin. Sobun, prakseri nomo fa mi ben e firi: wantronso mi tron papa fu aiti pikin!

MI GEBORE na ini a yari 1934, na ini a foto Mareeba na Australia. Mi ben de a moro yonguwan fu den dri pikin di mi mama nanga papa ben abi. Bakaten wi froisi go na Brisbane, pe mi mama ben e leri pikin na a sonde-skoro fu a Methodist kerki.

Na a bigin fu 1938, koranti ben taki dati kande lanti ben o tapu Joseph F. Rutherford fu na edekantoro fu Yehovah Kotoigi, te a ben o wani kon na ini Australia. „Fu san ede den e du so nanga en?”, na so mi mama aksi wan Kotoigi di ben kon na wi oso bakaten. A Kotoigi piki en: „Yesus ben taki dati sma ben o frufolgu den bakaman fu en, a no so?” Dan a Kotoigi gi mi mama a pikin buku Genezing (Dresi) di ben sori furu difrenti na mindri a tru bribi èn falsi bribi. * A pikin buku ben abi so furu krakti tapu mi mama, taki a tra sonde a tyari wi go na wan konmakandra fu Yehovah Kotoigi. Biginbigin, mi papa no ben lobi en srefisrefi taki wi ben e go na den konmakandra, ma wanwan leisi a ben e skrifi wan tu Bijbel aksi na tapu wan papira di mi mama ben musu gi na wan fu den brada. A brada ben e skrifi den piki, dan mi mama ben e gi dati na mi papa baka.

Wan sonde, mi papa kon nanga wi na wan konmakandra, ma soso fu sori den Kotoigi taki a no  lobi den. Wan owruman di ben e go na difrenti gemeente fu gi den deki-ati, ben kon na wi gemeente na a ten dati. Baka di mi papa taki nanga na owruman disi, dan a kenki prakseri. A ben gi den Kotoigi primisi srefi fu hori wan alawiki bijbelstudie na ini wi oso gi birtisma di ben wani sabi moro fu Bijbel.

Mi papa nanga mi mama dopu na ini september 1938. Mi, mi brada, nanga mi sisa dopu na ini december 1941 na wan kongres di ben hori na Hargreave Park na ini a foto Sydney na New South Wales. Mi ben abi seibi yari na a ten dati. Baka di mi dopu, mi ben gwenti fu go nanga mi papa nanga mama na ini a preikiwroko. Na a ten dati, den Kotoigi ben e prei Bijbel lezing na tapu gramofon-plaat gi den ososma te den ben e go oso fu oso.

Wan Kotoigi di mi e memre heri bun, na Bert Horton. Na tapu en wagi a ben poti wan bigi boksu di ben e piki bun tranga. A ben switi fu wroko nanga Bert, èn spesrutu gi wan pikin boi leki mi a ben span srefisrefi. Fu eksempre, te wi ben de na tapu wan pikin bergi e prei wan Bijbel lezing gi a heri birti, dan nofo tron skowtu ben e rèi kon miti wi. Te wi ben si a skowtu-wagi, dan esi-esi Bert ben tapu fu drai a lezing, èn a ben e rei wan tu kilometer go moro fara fu prei wan tra lezing na tapu wan tra bergi. Na eksempre fu Bert nanga tra getrow brada di sori deki-ati, ben leri mi fu frutrow tapu Yehovah èn fu no frede libisma.—Mateyus 10:16.

Di mi ben abi 12 yari, mi ben lobi fu preiki mi wawan te mi ben komoto na skoro. Wan leisi, mi miti wan famiri di ben nen Adshead. Bakaten, a papa, a mama, den aiti pikin fu den, nanga furu granpikin fu den kon na ini waarheid. Mi e taki Yehovah tangi taki a gebroiki wan pikin boi leki mi fu yepi a bun famiri disi fu kon sabi den tru tori fu Bijbel.—Mateyus 21:16.

Spesrutu grani na ini mi yongu yari

Di mi ben abi 18 yari, mi tron wan furuten dinari èn den seni mi go wroko na Maitland, na ini New South Wales. Na ini 1956, den seni kari mi fu go wroko na a bijkantoro fu Yehovah Kotoigi na ini Sydney, na Australia. Sowan seibi fu den 20 sma di ben e wroko drape, ben de salfuwan di ben abi a howpu fu tiri nanga Krestes na ini en hemel Kownukondre. A ben de wan bigi grani fu wroko nanga den!—Lukas 12:32; Openbaring 1:6; 5:10.

Di mi miti Judy Helberg, mi frigiti taki mi ben taki dati mi no ben o trow. Judy ben de wan moi pionier sisa di den ben kari kon na a bijkantoro fu yepi mi wan pisi ten nanga wan bigi wroko di mi ben musu du. Wi kon lobi makandra èn baka tu yari wi trow. Baka dati, wi bigin nanga a kringwroko, sobun ibri wiki wi ben abi fu go na difrenti gemeente fu Yehovah Kotoigi fu gi den brada nanga sisa deki-ati.

Na ini 1960, mi nanga Judy kisi wi fosi umapikin Kim. Efu wan kring-owruman kisi wan pikin na ini a ten disi, dan a abi fu tapu nanga a kringwroko èn a abi fu tan libi na wán presi nomo. Ma den brada ben aksi wi fu go doro nanga a kringwroko, aladi wi no ben fruwakti dati srefisrefi. Baka di wi begi fu a tori disi furu tron, wi bosroiti fu go doro nanga a kringwroko. Makandra nanga Kim, wi ben waka sowan 13.000 kilometer nanga bus, opolani, nanga loko fu go na den farawe gemeente na ini Queensland èn na ini a Nortern Territory. Wi no ben abi wan wagi na a ten dati.

Ala ten wi ben e tan na den Kresten brada nanga sisa fu wi. Fu di a kondre waran, meki sma ben abi a gwenti na a ten dati fu poti garden na presi fu doro gi den sribikamra. Sobun, yu kan  frustan taki wi ben e firi pikinso fruferi te Kim ben e krei na neti, bika wi no ben wani wiki den tra sma na ini oso. Te fu kaba, a ben kon muilek gi wi fu sorgu wan beibi èn fu tan du a kringwroko na a srefi ten. Dati meki wi go libi na Brisbane pe mi ben teki a wroko fu ferfi moimoi sani na tapu bigi bord fu meki reklame gi sma. Tu yari baka di Kim gebore, wi kisi wan tra umapikin di wi kari Petina.

Wan tumusi sari sani pasa

Na ini 1972, di den meisje ben abi 10 nanga 12 yari, dan Judy dede fu wan sortu kanker di den e kari a siki fu Hodgkin. A dede fu en ben hebi gi wi trutru. Ma a pisi ten di Judy ben e siki èn baka di a dede, Yehovah tan trowstu wi nanga yepi fu en Wortu, en santa yeye, èn den Kresten brada nanga sisa. Wi ben kisi furu deki-ati tu fu A Waktitoren di ben kon na doro syatu baka di a dede. A Waktitoren ben e fruteri fa fu du te yu e kisi difrenti tesi, soleki a dede fu wan lobiwan. A ben sori tu fa den tesi kan yepi wi fu horidoro, fu kisi wan moro tranga bribi, fu tan getrow na Gado, èn fu kisi tra fasi tu di o yepi wi fu tan abi wan bun banti nanga Gado. *—Yakobus 1:2-4.

Baka di Judy dede, mi nanga den meisje fu mi kisi wan moro krosibei banti nanga makandra. Ma mi musu taki dati a no ben makriki, bika mi no ben de a papa fu den nomo. Mi ben abi fu de a mama fu den tu. Mi breiti taki den lobi umapikin fu mi no ben muilek.

Mi trow baka èn na osofamiri kon moro bigi

Bakaten mi trow baka. Mary, a nyun wefi fu mi, ben de na ini a srefi sortu situwâsi leki mi. A masra fu en ben dede fu a srefi siki di Judy ben abi. Mary ben abi tu umapikin tu, di ben nen Colleen nanga Jennifer. Colleen ben yongu dri yari moro Petina. Sobun, na fo umapikin ben de na ini wi osofamiri now: wan fu 14 yari, wan fu 12 yari, wan fu 9 yari, èn wan fu 7 yari.

Mi nanga Mary bosroiti taki biginbigin na wisrefi ben o piri-ai gi wi eigi pikin te den ben du wan sani di no bun. Wi tan du disi teleki ala den pikin no ben abi trobi fu teki rai fu wi, awinsi wi no ben de den eigi papa noso mama. Mi nanga Mary bosroiti fu du tu prenspari sani ala ten na ini wi trowlibi. A wan sani ben de taki noiti wi ben o haritaki na fesi den pikin te wi no ben e agri nanga makandra. A di fu tu sani ben de taki ala ten wi ben o meki muiti fu lusu wan problema soleki fa Efeisesma 4:26 e taki. Sobun, ala ten wi ben e taki fu a problema teleki wi lusu en, awinsi na omeni yuru wi ben abi fu taki.

Sani ben e waka bun na ini wi osofamiri, aladi mi no ben fruwakti dati. Toku wi ben e prakseri den lobiwan fu wi ete di ben kon dede. Fu eksempre, munde neti ben de ’krei-neti’ gi Mary. Baka na osofamiri studie te den meisje ben de na bedi kaba, dan furu tron Mary ben e bigin krei fu di a ben e sari ete.

Mary ben wani wi fu kisi wan pikin di ben o de fu wi ala tu. A ben de wan sari sani di a lasi a fosi bere. Ma di a kon de nanga bere baka, wan sani pasa di wi no ben fruwakti srefisrefi. Datra sori wi taki a no wán pikin ben de na ini en bere, ma fo! Mi no ben man bribi! Heri esi, mi, wan man fu 47 yari, ben o tron papa fu aiti pikin! Baka 32 wiki, tapu 14 februari 1982, den ben abi fu koti Mary fu puru den fo pikin. A fosiwan di den  puru ben de Clint di ben wegi 1,6 kilo. Baka dati den puru Cindy di ben wegi 1,9 kilo. Ne den puru Jeremy di ben wegi 1,4 kilo, èn a lastiwan ben de Danette di ben wegi 1,7 kilo. Nowan fu den pikin ben e gersi makandra.

Syatu baka di den gebore, a datra fu Mary kon sidon na mi sei.

„Yu e broko yu ede fa fu sorgu den pikin?”, a aksi mi.

Mi piki en: „We, a sani disi no miti mi noiti ete.”

Baka dati a taki wan sani di meki mi fruwondru, ma di gi mi deki-ati tu.

A taki: „Den sma na ini yu gemeente o horibaka gi yu. Na opo yu abi fu opo yu mofo nomo, dan alamala de drape kaba fu yepi yu!”

A bun datra disi èn den sma di ben yepi en na ati-oso ben yepi wi trutru. Baka tu mun nomo ala fo pikin ben tranga nofo fu go na oso.

Fa fu sorgu fo pikin di gebore na a srefi dei

Mi nanga Mary ben poti fasti ten gi den sani di wi ben musu du ibri dei, so taki sani ben o waka bun na ini na osofamiri. Den fo bigi umapikin ben e yepi wi furu nanga den beibi. Èn a datra ben abi leti, bika ala ten te wi ben abi yepi fanowdu, awinsi a ben de wan pikin sani, den sma fu a gemeente ben de klariklari fu yepi wi. Wan pisi ten na fesi, John MacArthur, wan bun mati fu mi, ben kon nanga wan tu tra Kotoigi di sabi bow oso, dan den meki wi oso kon moro bigi. Di den beibi kon na oso, dan wan tu sisa ben kon yepi wi fu sorgu den. Ala den sani di den du, e sori krin taki Kresten lobi makandra trutru.—1 Yohanes 3:18.

Fu taki en leti, a ben gersi leki na a gemeente abi den beibi. Te now ete, den furu lobi-ati brada nanga sisa di yepi wi, de leki famiri gi den pikin. Mary ben de wan heri bun wefi, èn a ben e sorgu den pikin heri bun sondro fu denki ensrefi nomo. A ben e du ala san a ben leri fu Gado Wortu èn fu na organisâsi. Iya, moro bun rai no de!—Psalm 1:2, 3; Mateyus 24:45.

Ibri wiki wi tan go na den Kresten konmakandra èn na ini a preikiwroko, ma a no ben makriki fu go nanga den fo beibi. Na a ten dati, wi ben e studeri Bijbel nanga tu trowpaar di ben abi switifasi trutru. Wi ben breiti taki den ben kon studeri na wi oso, na presi fu wi go na den. Disi ben de moro makriki gi wi, ma toku son leisi Mary ben weri so te taki a ben e fadon na sribi nanga wan beibi na ini en anu, aladi wi ben e hori a studie. Bakaten den tu trowpaar disi tron wi Kresten brada nanga sisa.

Frukufruku kaba wi bigin leri den pikin sani fu Gado

Srefi fosi den beibi bigin waka, mi, Mary, nanga den bigi umapikin fu wi ben e tyari den go na ini a preikiwroko. Di den ben e waka kaba, dan Mary ben e tyari tu pikin èn mi ben e tyari tu pikin, èn den no ben de wan hebi gi wi. Fu taki en leti, nofo tron na den pikin ben meki taki wi ben kan bigin wan switi takimakandra nanga den ososma. Wan leisi, mi ben miti wan man di ben e bribi taki ala sma di gebore na a srefi dei, abi den srefi fasi nanga maniri fu di den stari ben de na wan spesrutu fasi na a dei dati. Fu dati ede, den no man kenki den fasi fu den noiti. Mi no haritaki nanga a man, ma mi aksi en efu mi ben kan kon bakaten na a srefi mamanten. A man ben feni dati bun, ne mi drai kon baka nanga den fo pikin fu mi. Mi poti den sei na sei, aladi a man ben e luku den na wan fruwondru fasi. Nowan fu den ben gersi makandra, èn den no ben abi den srefi fasi nanga maniri. Baka di wi ben abi wan switi takimakandra fu a fasi fa den pikin ben e difrenti, dan a man kon si taki a sani di a taki, no tru. A ben taki: „Now di mi si den pikin, a gersi leki na wan don sani mi taki. Mi denki taki mi abi fu go ondrosuku a tori moro bun.”

 Di den fo pikin ben yongu ete, den no ben lobi en kwetikweti te wi ben e teki ala fo makandra fu piri-ai gi den te den ben du wan sani di no bun. Dati meki wi ben e kari ibriwan fu den aparti fu piri-ai gi en. Ma den ben sabi taki den alamala ben musu hori densrefi na den wet di wi poti. Te den ben de na skoro èn den ben abi fu gebroiki a konsensi fu den fu teki wan bosroiti, dan den ben tan hori densrefi na den gronprakseri fu Bijbel, èn ala ten den ben e horibaka gi makandra. Na den sortu okasi disi, dan na Cindy ben e opo taki gi den alamala. Iya, heri esi sma kon frustan taki yu no musu meki spotu nanga fo brada nanga sisa di gebore na a srefi dei!

Di den pikin tron tini, mi nanga Mary ben abi fu yepi den nanga problema di tini e kisi furu tron te den musu tan getrow na Yehovah. A wan sani di wi kan taki, na taki a ben o moro hebi gi wi fu kweki den pikin bun efu den brada nanga sisa fu a gemeente no ben yepi wi na wan lobi-ati fasi, èn efu wi no ben kisi so furu leri fu Yehovah en organisâsi na grontapu. Wi tan du muiti fu hori na osofamiri studie doronomo èn fu taki krin nanga den pikin, ma a no ala ten disi ben de wan makriki sani. Toku a muiti fu wi no ben de fu soso, bika ala aiti pikin fu wi teki a bosroiti fu dini Yehovah.

Fa mi e du na mi owrudei

Na ini ala den yari di pasa, mi kisi furu grani na ini a gemeente. Mi kisi a grani fu de wan owruman na ini wan gemeente, sosrefi fu luku den afersi fu den gemeente na ini a heri foto, èn son leisi mi teki presi gi a kring-owruman tu. Boiti dati, mi dini leki memre fu wan Ati-oso Kontakti Komte di e yepi datra fu si fa den kan yepi siki Kotoigi sondro fu gi den brudu. Mi kisi a grani tu fu man trow sma na lanti. Na ini den 34 yari di mi du dati, mi trow sowan 350 sma èn siksi fu den na den siksi umapikin fu mi.

Ibri tron baka, mi e taki Yehovah tangi taki ala ten Judy ben e horibaka gi mi fosi a kon dede, èn taki Mary e horibaka gi mi now (Odo 31:10, 30). Aladi den horibaka gi mi leki gemeente owruman, den ben de wan moi eksempre tu gi trawan na ini a preikiwroko, èn den ben de wan bigi yepi fu kweki den pikin na ini a waarheid.

Na ini 1996, datra kon si taki mi abi wan siki na mi frustan di e meki taki mi anu e beifi èn son tron mi wani fadon. A sani disi meki taki mi no man du mi ferfi-wroko moro. Toku mi lobi fu du mi diniwroko gi Yehovah ete, awinsi mi no man du so furu moro. Ma na a tra sei, mi man frustan moro bun now fa tra owrusma e firi.

Te mi e sidon prakseri mi libi, dan mi de nanga tangi trutru taki ala ten Yehovah yepi mi nanga mi osofamiri fu de nanga prisiri, aladi wi ben abi furu problema (Yesaya 41:10). Mi, Mary, nanga den aiti pikin fu wi de nanga bigi tangi tu taki den brada nanga sisa na ini a gemeente horibaka gi wi na so wan lobi-ati fasi. Den sani di den du, furu tumusi fu kari den alamala. Na ala sortu fasi, den sori taki den lobi wi trutru.—Yohanes 13:34, 35.

[Futuwortu]

[Prenki na tapu bladzijde 12]

Mi, mi mama, mi bigi brada Garth, nanga mi sisa Dawn de srekasreka fu go na wan kongres na ini Sydney, na ini 1941

[Prenki na tapu bladzijde 13]

Mi, Judy, nanga wi beibi Kim, di mi ben e du kringwroko na ini Queensland

[Prenki na tapu bladzijde 15]

Baka di den fo pikin gebore, den fo bigi umapikin fu wi, nanga tra sma na ini a gemeente ben de klariklari fu yepi wi