Wi kan kon sabi Gado trutru?

„EFU SMA WANI KISI TÊGO LIBI, DAN DEN MUSU TAN LERI SABI . . . A WAN-ENKRI TRU GADO.”—YOHANES 17:3.

„AI, A bigi gudu nanga a koni nanga a sabi fu Gado, dipi pasa marki!”, na so na apostel Paulus ben bari taki. A ben taki moro fara: „Wi no man frustan soifri fa a e krutu sani èn wi no man kon sabi finifini fa den pasi fu en e waka!” (Romesma 11:33) Den wortu disi wani taki dati libisma no man kon sabi Gado nanga den sani di a abi na prakseri, fu di den no man kon sabi a koni nanga a sabi fu Gado?

Son kerkisma e bribi taki libisma no man kon sabi Gado. Wan buku e taki fu a denki disi: „Gado de moro leki ala den sani di wi kan kon sabi fu en. . . . Wi no kan gi Gado wan nen, èn wi no kan fruklari fa a de. Iniwan nen di wi e gi en, noso iniwan fruklari di wi e gi fu en, no sa fiti en, èn Gado de moro . . . leki den sani dati. . . . Wi no sa kon sabi Gado, fu di wi no kan kon sabi en” (The Encyclopedia of Religion). *

Soleki fa wan tijdschrift e taki, dan furu sma na ini libimakandra di no abi noti fu du nanga kerki afersi, kon abi wan nyun denki. Fu taki en leti, den sma disi e bribi taki „nowan sani tru” (Newsweek).

Ma toku, furu sma no sabi krin san na a marki fu a libi. Den e si den bigi problema di kon leki bakapisi fu pôtifasi, siki, nanga ogridu. Den sma disi kan abi bigi broko-ede fu di den no sabi fa a libi fu den o waka. Kande den e angri fu kon sabi san na a marki fu a libi, ma te den no man kon sabi dati, dan den kan denki taki a libi na fu soso. A sani disi meki taki furu fu den sma disi gowe libi kerki, èn efu a de so taki den e bribi ete taki wan Gado de, dan den e anbegi en soleki fa densrefi wani.

San Bijbel e taki fu a tori disi?

Den sma di e lespeki Bijbel èn di e si Yesus Krestes leki a Sma di tyari a boskopu fu Gado, musu de klariklari fu kon sabi san Bijbel e taki fu a tori disi. Kande yu kan memre taki Yesus ben taki fu tu pasi, namku fu wan ’pasi di bradi èn bigi, èn di e tyari sma go dede’, èn fu wan ’smara pasi di e tyari sma go na libi’. A tyari kon na krin fa wi kan kon sabi suma e  waka na tapu ibriwan fu den pasi dati. A taki: „Na den froktu fu den, unu sa si suma na den.” Sortu froktu? We, a no den sani di den e taki, ma na den sani di den e du e sori suma na den. Yesus ben tyari dati kon na krin di a taki: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini.” Wi no musu taki nomo dati wi e bribi na ini Gado, ma wi musu du a wani fu en. A no de fu taki dati wi musu kon sabi soifri fosi san na a wani fu Gado.—Mateyus 7:13-23.

Yesus ben sori krin taki libisma kan kon sabi suma na Gado. A ben taki: „Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). A de krin fu si taki wi kan kon sabi a koni nanga a sabi di Gado e tyari kon na krin, ma wi musu meki tranga muiti fu kon sabi den sani disi. Awansi fa a no fa, den wan di e du dati sa kisi têgo libi fu Gado, èn fu dati ede a bun srefisrefi taki den e meki muiti fu kon sabi den sani dati.

[Futuwortu]

[Prenki na tapu bladzijde 4]

Yesus ben taki dati wan smara pasi de di e tyari sma go na libi