Daniel nanga en kongres lapelkarta

DEN kerki fesiman di ben e si densrefi leki regtfardikisma, ben atibron di den si pikin boi e prèise Gado na fesi furu sma. Dati meki Yesus piri-ai gi den fesiman dati. A fiti taki a aksi den: „Noiti unu no leisi a sani disi: ’Yu meki pikin-nengre nanga pikin di de na bobi ete prèise yu nanga den mofo’?”—Mateyus 21:15, 16.

Daniel, wan boi di abi siksi yari, de fu wan Rosiatongo gemeente na ini Doisrikondre. A sani di a boi disi du, e sori taki yongu sma e prèise Yehovah na ini a ten disi tu. Makandra nanga en mama èn en sisa, a ben go na wan kongres fu Yehovah Kotoigi na ini a foto Duisburg. Disi ben de a fosi leisi di den go na so wan bigi kongres. Ala sani ben nyun gi Daniel: a hotel, den someni sma di ben kon na a kongres, a sidon di a ben musu sidon pî dri dei langa, a teki di sma teki dopu, èn a drama srefi. Ma fa Daniel ben tyari ensrefi? A ben tyari ensrefi na wan tumusi bun fasi.

A munde baka a kongres, di a ben de na oso baka, a opo fruku fu go na skoro. Ma san ben fasi na en dyakti ete? A lapelkarta di sori taki a ben go na a kongres! En mama taigi en: „A kongres kaba. Yu kan puru a lapelkarta now.” Ma Daniel taki: „Mi wani ala sma fu si pe mi ben go èn den musu sabi tu san mi leri.” Sobun, nanga prisiri a weri en lapelkarta a heri dei di a ben de na skoro. Di a skoromisi aksi en san na a karta, dan Daniel fruteri en fu a kongres.

Iya, na so Daniel teki na eksempre fu dusundusun boi nanga meisje di prèise Yehovah na ini ala den hondrohondro yari di pasa.