Den rai fu sabiman e kenki doronomo
Den rai fu sabiman e kenki doronomo
NA INI a ten disi, sma di abi wan computer fu suku sani tapu Internet, kan suku rai di abi fu du nanga a fasi fa papa nanga mama musu kweki pikin, èn esi-esi den kan feni moro leki 26 milyun artikel di abi fu du nanga a tori dati. Efu yu ben o teki wán miniti nomo fu leisi ibriwan fu den artikel dati, dan a pikin fu yu ben o de wan bigisma kaba fosi yu kaba leisi den alamala.
Tide na a dei, yu abi spesrutu datra gi pikin-nengre, yu abi sabiman di e ondrosuku den fasi nanga den maniri fu pikin-nengre, èn yu abi Internet tu. Ma pe sma ben e suku rai, fosi den sani disi ben de? Den ben e go moro furu na den famiri fu den. Mama, papa, tanta, nanga omu ben de klariklari fu gi den rai, fu yepi den te den ben abi moni fanowdu, èn fu luku den pikin gi den. Ma na ini furu kondre, bun furu sma froisi fu boitipresi go na foto, èn dati meki famiri no abi so wan krosibei banti nanga makandra moro. Na ini a ten disi, furu mama nanga papa e kweki den pikin den wawan, sondro a yepi fu trawan.
Wi kan frustan fu san ede sma meki so furu sani fu yepi papa nanga mama fu kweki den pikin. Wan tra sani fu san ede den du dati, na fu di furu sma e bribi taki sabiman kan yepi den. Syatu bifo a yari 1900, sma na ini Amerkankondre ben e bigin bribi taki sabiman ben kan meki ala afersi fu libisma waka moro bun. Dati meki den ben e denki taki sabiman ben kan sori den tu fa fu kweki pikin moro bun. Na ini 1899, wan Amerkan organisâsi di e feti gi a bun fu pikin-nengre (American National Congress of Mothers), bigin kragi taki papa nanga mama no e kweki den pikin fu den bun. A bakapisi ben de taki furu sma di ben e kari densrefi sabiman ini a tori fu kweki pikin, bigin kon fu gi rai. Den pramisi taki den ben o yepi den mama nanga papa di ben abi problema fu kweki den pikin fu den.
Sma e suku rai na ini buku
Ma den sabiman disi ben abi bun bakapisi? A de so taki papa nanga mama fu a ten disi no e broko den ede moro èn taki now den sabi moro bun fa fu kweki den pikin fu den? Disi no de so, bika sma ben ondrosuku a tori disi na ini Ingrisikondre, èn den kon si taki wán fu ibri dri papa nanga mama di abi yongu pikin e suku bun rai ete. Tra papa nanga mama feni taki den no abi tra fasi leki fu du nomo san densrefi feni bun.
Ann Hulbert ben skrifi wan buku di e taki fu den someni sani di sabiman skrifi kaba fu a fasi fa pikin-nengre musu kweki (Raising America: Experts, Parents, and a Century of Advice About Children). Ann Hulbert di abi tu pikin, e sori taki furu fu den sani di den sabiman skrifi, no abi fu du nanga sani di den ondrosuku bun. Fu taki en leti, den rai fu den sabiman abi fu du nanga sani di den ondrofeni na ini den eigi libi, na presi taki den abi fu du nanga sani di den ondrosuku trutru. Te wi e luku den rai di sma gi fositen, dan furu fu den rai dati wroko bun fu wan pisi ten nomo, den no kruderi nanga makandra, èn son leisi den meki sma du lawlaw sani srefi.
Sobun, sortu krakti disi abi tapu papa nanga mama na ini a ten disi? We, furu fu den bruya, bika na ini a ten disi, sma e kon na den tapu nanga moro rai èn nanga ala sortu denki nanga prakseri di no e kruderi nanga makandra. Ma a no ala papa nanga mama e firi leki yepi no de. Na artikel di e kon, o sori fa papa nanga mama na heri grontapu e kisi wini fu wan owruten buku pe sma kan feni koni rai di e wroko bun te now ete.