Sori lespeki gi den santa konmakandra fu wi
Sori lespeki gi den santa konmakandra fu wi
„Mi wani tyari den kon na mi santa bergi tu èn meki den prisiri na ini mi oso pe sma e kon begi.”—YESAYA 56:7.
1. Fa Bijbel e sori wi taki wi musu sori lespeki gi den konmakandra fu wi?
YEHOVAH tyari en pipel, namku den salfu Kresten nanga den kompe fu den kon makandra, fu anbegi en na en „santa bergi”. A e meki den prisiri na ini en „oso pe sma e kon begi”, namku en yeye tempel di de „wan oso pe sma fu ala kondre e kon begi” (Yesaya 56:7; Markus 11:17). Den sani disi di Yehovah du fu meki en pipel kon makandra fu anbegi en, e sori taki na anbegi fu Yehovah de santa, soifri, èn hei. Te wi e sori lespeki gi den konmakandra pe wi e studeri èn e anbegi, dan wi e sori taki wi e si santa sani soleki fa Yehovah e si den.
2. San e sori taki Yehovah ben si a presi di a gi den sma fu anbegi en, leki wan santa presi? Fa Yesus sori taki ensrefi ben si a tempel leki wan santa presi?
2 Den Israelsma ben musu si a presi di Yehovah ben gi den fu anbegi en, leki wan santa presi. Den ben musu santa a tabernakel, den sani di ben de na ini, èn den wrokosani, so taki den ben kan ’kon santa srefisrefi’ (Exodus 30:26-29). Den tu pisi fu a tabernakel ben nen „a Santa Presi” nanga „a Moro Santa Presi” (Hebrewsma 9:2, 3). Bakaten, a tempel na ini Yerusalem ben kon na ini a presi fu a tabernakel. Fu di Yerusalem ben tron a moro prenspari presi pe sma ben e anbegi Yehovah, meki den ben kari a foto „a santa foto” (Nehemia 11:1; Mateyus 27:53). Di Yesus ben du en diniwroko na grontapu, dan ensrefi ben sori lespeki gi a tempel. A ben atibron tapu den sma di no ben sori lespeki gi a tempel, bika den ben e du bisnis drape èn den ben e gebroiki a dyari fu a tempel leki wan boropasi.—Markus 11:15, 16.
3. San e sori taki den konmakandra fu den Israelsma ben de santa?
3 Den Israelsma ben kon makandra doronomo fu anbegi Yehovah èn fu arki te sma ben e leisi a Wet fu en. Te den ben abi den fesa fu den, dan wan tu fu den dei ben de gi konmakandra di den ben kari seryusu konmakandra noso santa konmakandra (Lefitikus 23:2, 3, 36, 37). Na wan konmakandra na ini a ten fu Esra nanga Nehemia, den Leifisma „ben e tyari a wet kon na krin gi a pipel”. Fu di „ala den sma ben e krei di den yere san a wet taki”, meki den Leifisma „taigi a pipel fu tan tiri. Den taki: ’Tan tiri! bika a dei disi santa.’” Baka dati, den Israelsma hori a Kampufesa seibi dei langa, èn den ben e „prisiri srefisrefi”. Sosrefi, ’den ben e leisi a buku di ben abi a wet fu a tru Gado na ini. Den ben e du disi ibri dei, fu a fosi dei teleki a lasti dei. Den tan hori a fesa seibi dei langa, èn na a di fu aiti dei wan seryusu konmakandra ben hori, soleki fa a wet taki’ (Nehemia 8:7-11, 17, 18). Den ben de trutru santa konmakandra, èn den sma di ben de drape ben musu arki nanga lespeki.
Den konmakandra fu wi santa
4, 5. Sortu sani di wi e du na den konmakandra fu wi, e sori taki den na santa konmakandra?
4 A tru taki na ini a ten disi Yehovah no abi wan trutru santa foto na grontapu, èn a no abi wan spesrutu tempel pe sma musu anbegi en. Ma toku wi no musu frigiti taki den konmakandra pe wi e anbegi Yehovah, na santa konmakandra. Dri leisi wan wiki, wi e kon makandra fu leisi èn fu studeri Bijbel. Na den konmakandra wi e kisi yepi fu frustan a Nehemia 8:8). Ala den konmakandra fu wi e bigin nanga begi èn den e kaba nanga begi, èn wi e singi prèisesingi gi Yehovah na moro furu fu den (Psalm 26:12). Den gemeente konmakandra na trutru wan pisi fu na anbegi fu wi, èn fu dati ede wi musu si den leki seryusu okasi fu anbegi Gado, èn wi musu arki nanga lespeki.
Wortu fu Yehovah, èn soleki fa a ben de na ini a ten fu Nehemia, wi e kisi fu yere „san a wani taki” (5 Yehovah e blesi en pipel te den e kon makandra fu anbegi en, fu studeri en Wortu, èn fu abi switi demakandra nanga Kresten brada nanga sisa. Te a ten doro fu go na wan konmakandra, dan wi kan de seiker taki na drape ’Yehovah wani taki en blesi musu de’ (Psalm 133:1, 3). Wi e kisi a blesi dati te wi de drape èn te wi e poti prakseri na den sani di wi e leri fu Bijbel. Boiti dati, Yesus ben taki: „Te tu, noso dri sma kon makandra na ini mi nen, dan mi de drape na den mindri.” Den wortu disi abi moro fu du nanga Kresten owruman di e kon makandra fu lusu seryusu problema na mindri trawan, ma den e fiti sosrefi gi den konmakandra fu wi (Mateyus 18:20). Nanga yepi fu a santa yeye, Krestes de nanga wi te wi e kon makandra na ini en nen. Fu di dati de so, dan wi musu si den konmakandra leki santa sani, a no so?
6. San wi kan taki fu den presi pe wi e hori bigi konmakandra noso pikin konmakandra?
6 A tru taki Yehovah no e tan na ini wan tempel di libisma meki. Ma toku den Kownukondre zaal fu wi na presi pe wi e anbegi a tru Gado (Tori fu den Apostel 7:48; 17:24). Wi e kon drape fu studeri a Wortu fu Yehovah, fu begi, èn fu singi prèisesingi gi en. Na dati wi e du tu na den kongreshal fu wi. Den stadion noso den tra bigi presi di wi e yuru fu hori kongres, e tron presi pe wi e anbegi Gado te wi e hori santa konmakandra. Wi musu sori lespeki te wi e kon na den bigi konmakandra nanga den pikin konmakandra fu anbegi Gado, èn dati musu de fu si na a fasi fa wi e tyari wisrefi.
Fa wi kan sori lespeki gi den konmakandra fu wi
7. Na sortu fasi wi kan sori lespeki gi den konmakandra fu wi?
7 Difrenti fasi de fa wi kan sori taki wi abi lespeki gi den konmakandra fu wi. Wan fasi fa wi kan du dati, na te wi de drape fu singi Kownukondre singi. Furu fu den singi disi de leki begi, èn fu dati ede wi musu singi den nanga lespeki. Na apostel Paulus ben gebroiki den wortu fu Yesus di skrifi na ini Psalm 22: „Mi o meki yu nen bekènti na den brada fu mi; na mindri fu a gemeente mi o prèise yu nanga singi” (Hebrewsma 2:12). Fu dati ede, wi musu abi a gwenti fu sidon na wi presi kaba fosi a fesiman e taki san na a singi. Èn te wi e singi, wi musu luku san den wortu wani taki. Te wi e singi, dan meki wi abi den srefi firi leki a psalm skrifiman di ben taki: „Mi sa prèise Yehovah nanga mi heri ati makandra nanga den opregtiwan èn den sma di kon makandra” (Psalm 111:1). Iya, a singi di wi wani singi prèisesingi gi Yehovah, na wán prenspari sani di musu meki taki wi de fruku na den konmakandra fu wi èn taki wi tan te na a kaba.
8. Sortu eksempre na ini Bijbel e sori taki wi musu arki nanga lespeki te den e begi na den konmakandra fu wi?
8 Wan tra sani di e meki taki ala den konmakandra fu wi de santa trutru, na a begi di wi e begi nanga wi heri ati gi ala den sma di kon na den konmakandra. Wan leisi di den fosi-yarihondro Kresten na ini Yerusalem ben kon makandra, dan ’den alamala opo den sten fu taki nanga Gado’ na ini wan fayafaya begi. A bakapisi ben de taki den tan „taki a wortu fu Gado sondro frede”, aladi den ben kisi frufolgu (Tori fu den Apostel 4:24-31). Yu denki taki wan fu den sma drape ben e denki tra sani aladi den ben e begi? Nôno, „den alamala” ben e begi. Den begi di den e taki na den konmakandra fu wi, e sori den firi fu ala sma di de drape. Fu dati ede wi musu arki den begi nanga dipi lespeki.
9. Fa den krosi di wi e weri èn a fasi fa wi e tyari wisrefi kan sori a lespeki di wi abi gi den santa konmakandra?
9 Boiti dati, nanga den krosi di wi e weri, wi kan sori omeni lespeki wi abi gi den santa konmakandra fu wi. Den krosi fu wi èn sosrefi a fasi fa wi seti wi wiwiri, kan meki taki sma sa abi moro lespeki gi den konmakandra fu wi. Na apostel Paulus ben gi a rai: „Mi wani taki na ibri presi den mansma musu tan begi; te den e du dati, den musu opo den anu na wan loyaal fasi, èn den no musu atibron noso haritaki nanga makandra. Mi wani tu taki den umasma musu moi densrefi nanga krosi di fiti, èn den musu du dati na wan lespeki fasi èn nanga krin frustan, ma den no musu moi densrefi fu di den e brei den ede-wiwiri nanga ala sortu modo, noso fu di den e weri gowtu, peri noso diri krosi, ma den musu du dati soleki fa a fiti umasma di e taki dati den e anbegi Gado” (1 Timoteyus 2:8-10). Te wi e go na bigi kongres na ini stadion di no tapu nanga daki, dan wi kan weri krosi di bun fu weri te a son faya, ma toku den krosi musu sori taki wi e lespeki a konmakandra. Sosrefi, te wi abi lespeki gi den konmakandra disi, dan wi no sa nyan noso kawkaw sani te a programa bigin kaba. Te wi e weri krosi di fiti èn wi e tyari wisrefi na wan bun fasi na den konmakandra fu wi, dan wi e gi grani na Yehovah Gado, na a anbegi fu en, èn na den brada nanga sisa fu wi.
Wi musu tyari wisrefi na wan fasi di fiti a pipel fu Gado
10. Fa na apostel Paulus sori taki wi musu hori wisrefi na hei markitiki te wi de na wi Kresten konmakandra?
10 Na ini 1 Korentesma kapitel 14, na apostel Paulus ben gi koni rai di e sori fa Kresten konmakandra musu hori. Na a kaba, a taki: „Meki ala sani pasa na wan fasi di fiti èn soleki fa sani seti” (1 Korentesma 14:40). Den konmakandra fu wi na wan fu den prenspari sani di a Kresten gemeente e du, èn fu dati ede wi musu tyari wisrefi na wan fasi di fiti a pipel fu Yehovah.
11, 12. (a) San den pikin di e kon na den konmakandra fu wi, musu leri? (b) Na sortu bun fasi pikin-nengre kan sori a bribi fu den na den konmakandra fu wi?
11 Spesrutu pikin-nengre musu leri fa den musu tyari densrefi na den konmakandra fu wi. Kresten papa nanga mama musu leri den pikin fu den taki a Kownukondre zaal nanga a presi pe a Gemeente Bukustudie e hori, a no presi pe den kan prei. Den de presi pe wi e anbegi Yehovah èn e studeri en Wortu. A koni Kownu Salomo ben skrifi: „Luku bun fa yu e tyari yusrefi te yu e go na a oso fu a tru Gado. A moro prenspari fu go arki” (Preikiman 5:1). Moses ben leri den Israelsma taki den bigiwan nanga den „pikinwan” musu kon makandra. A ben taki: „Tyari a pipel kon na wán . . . so taki den kan arki èn so taki den kan leri, fu di den musu frede Yehovah, un Gado, èn musu sorgu taki den e du ala den wortu fu a wet disi. Èn den manpikin fu den di no ben sabi, sa musu arki, èn den musu leri fu frede Yehovah.”—Deuteronomium 31:12, 13.
12 Na so a de tu na ini a ten disi. Den yonguwan fu wi e kon na den konmakandra nanga den papa nanga mama fu arki èn fu leri. Te den pikin man poti prakseri kaba na a konmakandra èn den man frustan wan tu prenspari tori fu Bijbel, dan den kan gi syatu piki, èn na so den kan meki „bekènti” tu taki den abi bribi (Romesma 10:10). Wan yongu pikin kan gi wan syatu piki tapu aksi di a e frustan. Biginbigin a kan taki a abi fu leisi a piki, ma bakaten a sa pruberi fu gi a piki soleki fa ensrefi ben o taki en. Disi sa tyari wini kon gi a pikin èn a sa gi en prisiri. Boiti dati, te wan pikin e gi piki fu ensrefi fu sori a bribi fu en, dan disi e prisiri na ati tu fu den moro owruwan di de na a konmakandra. A no de fu taki dati papa nanga mama musu gi wan bun eksempre fu di densrefi e gi piki tu. Efu a kan, a ben o bun efu den pikin abi den eigi Bijbel, singibuku, noso den buku di wi e studeri na den konmakandra. Den musu leri fu sorgu bun gi den buku disi. Ala den sani disi sa leri den pikin taki den konmakandra fu wi na santa konmakandra.
13. San sma musu man taki te den e kon na den konmakandra fu wi fu a fosi leisi?
13 A no de fu taki dati wi no wani meki den konmakandra fu wi gersi den di fu den kerki fu Krestenhèit. Son kerki e du sani nomo fu sori leki den santa, èn sonwan fu den konmakandra fu den gersi den bigi fesa pe sma e singi, e dansi èn e meki poku. Wi wani taki den konmakandra na ini a Kownukondre zaal musu switi èn den musu meki sma firi bun, ma a no musu kon gersi den presi pe sma lobi fu go meki prisiri. Wi e kon makandra fu anbegi Yehovah, èn fu dati ede den konmakandra fu wi musu hori na wan lespeki fasi ala ten. Te sma kon na wi konmakandra fu a fosi leisi, èn den arki a programa èn den si fa wi nanga den pikin fu wi e tyari wisrefi, dan den musu man taki: „Gado de trutru na un mindri.”—1 Korentesma 14:25.
Wi sa hori konmakandra fu ala ten
14, 15. (a) San wi musu du so taki wi no „libi na oso fu wi Gado sondro fu sorgu en”? (b) Fa Yesaya 66:23 e kon tru nownow kaba?
14 Soleki fa wi ben taki kaba, Yehovah e tyari en pipel konmakandra fu prisiri na ini en „oso pe sma e kon fu begi”, namku na ini en yeye tempel (Yesaya 56:7). A getrow man Nehemia ben memre den tra Dyu taki den ben musu sori lespeki gi a trutru tempel èn taki den ben kan du dati te den e gi sani fu sorgu a tempel. A ben taki: „Wi no musu libi na oso fu wi Gado sondro fu sorgu en” (Nehemia 10:39). Wan tra sani, na taki wi no musu weigri fu teki a kari di Yehovah e kari wi fu anbegi en na ini en „oso pe sma e kon begi”.
15 Na ini wan profeititori, Yesaya ben sori o prenspari a de fu tan kon makandra fu anbegi: „’A sa pasa trutru taki fu wan nyun mun te go miti wan nyun mun, èn fu wan sabadei te go miti wan sabadei, ala sma sa kon fu boigi na mi fesi’, na so Yehovah taki” (Yesaya 66:23). Na dati e pasa na ini a ten disi. Ibri wiki fu ibri mun, dopu Kresten e kon makandra fu anbegi Yehovah. Fu eksempre, den e du disi te den e kon na den Kresten konmakandra èn te den e preiki. Yu na wan fu den sma di e kon doronomo ’na fesi Yehovah fu boigi gi en’?
16. Fu san ede wi musu abi a gwenti nownow kaba fu tan kon doronomo na den konmakandra?
16 Yesaya 66:23 sa kon tru krinkrin na ini a nyun grontapu di Yehovah pramisi wi. Na a ten dati, a o de so taki ibri wiki nanga ibri mun, „ala” sma trutru „sa kon fu boigi” noso anbegi Yehovah fu têgo. Fu di wi o tan kon makandra fu anbegi Yehovah na ini a nyun grontapu, meki wi musu abi a gwenti nownow kaba fu tan kon doronomo na den santa konmakandra fu wi, a no so?
17. Fu san ede wi abi den konmakandra fu wi fanowdu „o moro [wi] e si a dei e kon krosibei”?
17 Now di a kaba e kon moro krosibei, wi musu abi a moro fasti bosroiti fu kon na den Kresten konmakandra fu anbegi Yehovah. Fu di wi e frustan taki den konmakandra fu wi santa, meki wi no wani taki grontapuwroko, skorowroko, noso neti-skoro e tapu wi fu kon makandra doronomo nanga wi brada nanga sisa. Wi abi a krakti fanowdu di wi e kisi te wi e kon makandra. Den gemeente konmakandra e gi wi na okasi fu kon leri sabi makandra moro bun, fu gi makandra krakti, èn fu gi makandra deki-ati fu „abi lobi èn fu du bun wroko”. Wi musu du disi „o moro [wi] e si a dei e kon krosibei” (Hebrewsma 10:24, 25). Fu dati ede, meki wi sori lespeki ala ten gi den santa konmakandra fu wi, fu di wi e go doronomo na den konmakandra, fu di wi e weri krosi di fiti, èn fu di wi e tyari wisrefi na wan bun fasi. Te wi e du dati, dan wi e sori taki wi e si santa sani soleki fa Yehovah e si den.
Luku baka san wi leri
• San e sori taki wi musu si den konmakandra fu Yehovah en pipel, leki santa konmakandra?
• Sortu sani di wi e du na den konmakandra fu wi, e sori taki den na santa konmakandra?
• Fa pikin-nengre kan sori taki den e si den konmakandra fu wi leki santa konmakandra?
• Fu san ede wi musu abi a gwenti fu tan kon doronomo na den konmakandra?
[Aksi fu a tori disi]
[Prenki na tapu bladzijde 28]
Den konmakandra di wi e hori fu anbegi Yehovah, na santa konmakandra, awinsi pe wi e hori den
[Prenki na tapu bladzijde 31]
Den pikin fu wi e kon na den konmakandra fu arki èn fu leri