Ondrofenitori

Yehovah meki mi tron wan zendeling soleki fa mi ben wani

SOLEKI FA SHEILA WINFIELD DA CONCEIÇÃO FRUTERI

Wan zendeling sisa di e dini na Afrika, ben fruteri wi wan leisi taki te a e preiki drape, dan ala sma e kari en kon na inisei èn den e poti yesi arki a bun nyunsu fu Gado Kownukondre. ’Mi ben o lobi fu preiki na ini so wan kondre!’, na so mi ben e denki na ini misrefi. A takimakandra nanga a zendeling ben gi mi deki-ati fu tron wan zendeling. Na a ten dati, mi ben abi 13 yari.

MA MI famiri ben kon leri sabi Yehovah wan tu yari na fesi kaba. Na ini 1939 wi ben e tan na ini a foto Hemel Hempstead, pikinso moro fara fu a bigi foto London na ini Ingrisikondre. Wan mamanten, tu yonkuman di ben weri moi krosi, naki na tapu wi doro. Den ben de Yehovah Kotoigi. Mi ben gebore a yari na fesi, sobun mi no man memre taki den ben kon na wi. Fu meki den man disi gowe, dan mi mama taigi den taki mi papa ben o wani sabi moro kande, ma a no ben o kon na oso fosi neigi yuru na neti. Mi mama fruwondru srefisrefi di den kon baka a srefi neti dati! Mi papa di nen Henry Winfield, ben aksi fosi efu den e teki prati na politiek afersi noso efu den e teki sei te a kondre fu den de na feti. Di a kon frustan taki dati no de so, dan a kari den Kotoigi kon na inisei èn a agri fu studeri Bijbel. A ben e go na fesi esi-esi teleki a teki dopu. Wan tu yari baka dati, mi mama Kathleen bigin studeri tu. En teki dopu na ini 1946.

Na ini 1948, mi bigin preiki a bun nyunsu fu Gado Kownukondre doronomo. Mi ben feni taki mi ben o abi wan oloisi fanowdu fu sabi o langa mi wroko na ini a preikiwroko. Efu wi ben tyari wisrefi na wan bun fasi, dan ala satra  mi nanga den brada fu mi ben kisi wán pisi moni fu siksi sensi. Mi ben kibri mi moni sowan tu yari langa fu man bai a moro bunkopu oloisi di ben de na a ten dati. Ma Ray, a moro yonguwan fu den tu pikin brada fu mi, ben gwenti aksi mi papa tu pisi moni fu dri sensi. Noiti a ben aksi en wán pisi moni fu siksi sensi. Wan dei, a ben wani nomonomo taki mi papa gi en tu pisi moni, ne mi papa mandi. Ray bigin krei, èn a taki dati a ben abi tu pisi moni fanowdu fu di en nanga Yehovah meki wan mofo. Te fu kaba, Ray fruteri: „A wán pisi moni fu dri sensi na fu poti na ini a bijdrage-boksu, èn a trawan na fu mi.” A sani disi ben gi mi mama so furu prisiri taki a krei, èn wantewante mi papa suku tu pisi moni. Misrefi leri o prenspari a de fu gi moni gi a Kownukondre wroko.

Na a ten dati, mi papa ben seti sani fu froisi go na wan presi pe moro Kownukondre preikiman ben de fanowdu. A ben abi wan pranigron èn wan presi pe a ben diki santi nanga ston puru fu seri. Ma na ini 1949 a seri ala den sani disi, dan a go dini leki pionier, wan furuten preikiman fu Yehovah Kotoigi. Mi teki dopu na tapu 24 september 1950 fu sori taki mi gi misrefi abra na Yehovah. Bigin fu a ten dati, mi ben e dini leki fakansi pionier (now wi e kari en yepi-pionier) te mi ben abi skoro fakansi. Na ini den mun dati, mi ben e preiki 100 yuru wan mun. Ma dati ben de a bigin nomo. Heri esi mi ben kon abi a winsi fu du moro fu meki a soifri anbegi go na fesi.

Mi kisi a winsi fu tron wan zendeling

Na ini 1951, mi papa ben kisi a kari fu go dini na a foto Bideford, na ini North Devon. Syatu baka di wi doro drape, a zendeling di ben dini na Afrika, ben kon na wi gemeente soleki fa mi ben fruteri na a bigin. Baka dati, ala den bosroiti di mi teki, ben abi fu du nanga a winsi di mi ben abi fu tron wan zendeling. Den leriman na skoro ben sabi san mi ben wani du nanga mi libi, èn den ben e pruberi ala sortu sani fu tapu mi, bika den ben wani taki mi go suku wan bun wroko nanga biginen na ini a grontapu disi. Ma na a lasti dei di mi go na skoro fu taki den leriman tangi èn fu taki den odi, dan wan fu den taki: „Wi e fristeri yu! Yu na a wan-enkri studenti di sabi trutru san a wani du nanga en libi. Wi howpu taki yu man du san yu abi na prakseri.”

Heri esi mi feni wroko wan tu dei na ini a wiki, èn na tapu 1 december 1955 mi tron wan gewoon pionier. Bakaten, mi mama nanga den brada fu mi tron pionier tu. Sobun, wan tu yari langa a heri osofamiri ben de na ini a furuten diniwroko.

Mi e go na Ierland

Wán yari baka dati, mi kisi wan kari fu dini na Ierland. Disi ben yepi mi fu doro a marki di mi ben abi fu tron wan zendeling. Na ini februari 1957, mi go na a foto Cork na a zuidsei fu Ierland, makandra nanga tu yongu pionier sisa. A wan ben nen June Napier, èn a trawan ben nen Beryl Barker.

 A ben muilek fu preiki na ini Ierland. A Lomsu Kerki ben e du ala sortu sani fu gens wi. Te wi ben de na ini birti pe oso lai, noso na ini bigi oso pe sma kan yuru kamra, dan wi ben kisi a gwenti fu luku efu wan fasi ben de fu lon komoto efu a ben de fanowdu fu gowe wantronso. Wi ben gwenti fu kibri den baisigri fu wi na wan presi di ben de pikinso moro fara, ma nofo tron sma ben feni den èn den ben e boro den banti, noso den ben e saka den banti.

Wan leisi, di mi nanga Beryl go na wan presi pe oso lai, dan wan grupu pikin bigin kosi wi èn den trowe ston na wi tapu. Dati meki wi go na ini wan pikin wenkri pe den ben e seri merki. A wenkri disi ben de wan pisi fu wan sma oso. Ne wan bigi grupu sma kon tanapu na dorosei fu du wi ogri. Beryl di lobi merki, ben dringi tu noso dri grasi safrisafri, fu di a ben howpu taki den sma ben o gowe. Ma dati no pasa. Ne wan yongu priester kon na ini a wenkri. Fu di a ben denki taki wi kon drape nanga fakansi, meki a taigi wi taki a ben o lobi fu sori wi a presi pikinso. Ma fosi a du dati, a tyari wi go na ini wan tra pisi fu na oso pe wi sidon pî, bika a ben e begi gi wan owru man di ben de fu dede. Baka dati, wi waka komoto fu na oso nanga a priester. Di a grupu sma si dati wi ben e taki na wan switi fasi nanga a priester, dan den gowe.

Mi e go na Gilead

Na ini 1958, a Gado wani-kongres ben o hori na ini New York, èn sma fu ala sortu kondre ben o de drape. Mi papa ben o go, èn mi ben wani go tu, ma mi no ben abi moni. Ne mi granmama dede wantronso, èn a libi 280 Amerkan dala gi mi. A moni di mi ben abi fu pai fu go na a kongres èn fu drai kon baka, ben de 180 Amerkan dala, sobun mi bai wan ticket wantewante.

Syatu baka dati, wan brada fu a bijkantoro fu Yehovah Kotoigi na Ingrisikondre, ben kon na wi. A ben gi ala spesrutu pionier di ben o go na a kongres, a deki-ati fu gi den nen gi a Waktitoren Bijbelskoro Gilead pe sma e kisi leri fu tron zendeling. Mi no ben man bribi san mi ben yere! Dan a brada gi wan papira na ala sma fu skrifi den nen, boiti mi. Mi ben yongu tumusi. Mi aksi en efu mi ben kan skrifi mi nen tu, bika mi ben gowe libi a kondre fu mi kaba, èn yu kan taki dati mi ben de leki wan zendeling kaba. Di a si taki mi ben wani go trutru, a gi mi wan papira. Mi begi fayafaya fu den gi mi wan kari! Heri esi mi kisi a piki, èn den kari mi fu go na Gilead.

Mi ben e prisiri srefisrefi di den poti mi na ini a di fu 33 klas fu Gilead, makandra nanga 81 tra pionier fu 14 kondre. Den feifi mun fu a Gilead-skoro pasa esi-esi! Pikinmoro na a kaba fu a skoro, Brada Nathan H. Knorr ben hori wan lezing fo yuru langa, èn a gi wi furu deki-ati. A ben gi den wan di no trow, a deki-ati fu tan so efu den  man (1 Korentesma 7:37, 38). Ma a gi den wan fu wi di ben wani trow wan dei, a rai fu skrifi gi wisrefi sortu sani wi wani si na ini wan bun trowpatna. Dan efu wi si wan sma di kande ben o de wan bun trowpatna, wi ben kan luku efu a sma dati abi den sani di wi wani.

Disi na den sani di mi ben wani si na ini mi masra: A musu de wan zendeling tu. A musu lobi Yehovah. A musu sabi Bijbel moro mi. A no musu wani abi pikin fosi Armagedon kon, so taki wi man tan du a furuten diniwroko. A musu man taki Ingrisitongo bun. Èn a musu owru moro mi. A skrifi di mi skrifi den sani disi ben de wan bigi yepi gi mi, bika mi ben de wan uma fu 20 yari di ben de fu go dini na wan farawe kondre.

Mi e go na Brasyonkondre

Tapu sonde 2 augustus 1959, di wi ben kaba nanga a skoro, wi yere na sortu kondre wi ben o go. Mi nanga Vehanouch Yazedjian, Sarah Greco, Ray nanga Inger Hatfield, Sonia Springate, nanga Doreen Hines ben musu go na Brasyonkondre. Wi ben e prisiri srefisrefi. Mi ben denki taki wi ben o si busi, sneki, balatabon, nanga Ingi. Ma di mi doro drape, mi fruwondru! Na presi fu a bigi Amazone busi, mi kon doro na ini Rio de Janeiro, wan bigi foto nanga ala sortu nyun sani. Na a ten dati, disi ben de a mamafoto fu a kondre.

A muilek sani di wi ben musu du wantewante, ben de fu leri Potogisitongo. Na ini a fosi mun, wi ben e studeri 11 yuru langa ibri dei. Di mi ben e du preikiwroko na ini Rio, mi ben tan wan pisi ten na a bijkantoro fu Yehovah Kotoigi na ini a foto dati, èn baka dati den seni mi fu go tan na wan zendeling-oso na a foto Piracicaba, na ini São Paulo. Bakaten mi go na wan zendeling-oso na Porto Alegre, na ini Rio Grande do Sul.

Na a bigin fu 1963, mi ben kisi a kari fu go wroko na a Vertaalafdeling fu a bijkantoro. Floriano Ignez da Conceição, di ben leri wi Potogisitongo di wi doro na Brasyonkondre, ben e teki fesi na a Vertaalafdeling dati. A ben kon leri sabi a waarheid na ini 1944, di soso 300 Kotoigi ben de na Brasyonkondre, èn a ben go na a di fu 22 klas fu Gilead. Baka wan tu mun, dan brada Conceição aksi mi wan dei fu tan na baka na brekten, fu di a ben wani taki nanga mi. Na ini a bigin, mi ben e broko mi ede. Mi no du wan sani bun? Di a gengen naki na brekten, dan mi aksi en san a ben wani taigi mi. Ne a aksi mi: „Yu wani trow nanga mi?” Mi fruwondru. Ne mi aksi en fu gi mi ten fu prakseri fosi, dan mi waka gowe esi-esi gi a brekten-nyanyan.

Floriano no ben de a fosi brada di ben wani trow nanga mi. Ma teleki a momenti dati, nowan fu den ben abi den sani di mi ben wani si na ini wan bun trowpatna. Mi e bribi taki den sani di mi ben skrifi gi misrefi, yepi mi fu no teki wan fowtu bosroiti. Disi leisi, sani ben de tra fasi. Floriano ben abi ala den sani di mi ben wani! Sobun, wi trow tapu 15 mei 1965.

Wi e feti nanga siki

Mi nanga Floriano ben abi wan koloku trowlibi, aladi problema ben e miti wi. Floriano ben abi problema nanga en gosontu, èn a ben bigin kisi den problema disi syatu bifo wi trow. Wan tu yari na fesi, wan fu den fokofoko fu en no ben e wroko bun moro, èn a sani dati ben e trobi en srefisrefi. Fu dati ede, wi gowe fu Bethel èn den seni wi fu go dini leki spesrutu pionier na ini a foto Teresópolis, na a pisi kontren fu Rio de Janeiro pe furu bergi de. Wi ben howpu taki Floriano ben o kon betre efu a tan drape.

Boiti dati, na ini december 1965, mi ben kisi boskopu taki mi mama ben siki srefisrefi. A ben abi kanker. Wi ben e skrifi brifi gi makandra doronomo, ma mi no ben si mi mama seibi yari kaba. Dati meki a pai a moni gi wi fu go luku en na Ingrisikondre. Den datra ben koti mi mama, ma den no ben man puru a kanker. A ben siki so te taki a no ben man opo fu en bedi srefi, ma toku a ben lobi a preikiwroko ete. A ben abi wan masyin na ini en kamra, so taki a ben kan meki sma skrifi-masyin brifi gi en. Boiti dati, a ben e preiki syatu gi sma di ben e kon luku en. Mi mama dede tapu 27 november 1966. A srefi mun dati, a preiki tin yuru! Mi papa tan du a pionierwroko teleki a dede na ini 1979.

 Baka di mi mama dede, mi nanga Floriano drai go baka na Brasyonkondre, èn sensi a ten dati wi dini na ini Rio de Janeiro. Biginbigin wi ben e du kringwroko na ini a mamafoto, ma wi no ben man du a wroko dati langa, bika Floriano ben kon siki hebi baka. Sobun, wi go baka na Teresópolis leki spesrutu pionier.

Te fu kaba na ini 1974, baka di Floriano pina someni yari langa, datra puru a kruktusei fokofoko fu en. Na a ten dati, a no ben man dini leki fesiman-opziener noso leki spesrutu pionier, ma a ben man hori bijbelstudie na den yuru te sma ben e kon luku trawan na ati-oso. Wan fu den bijbelstudie a ben e hori na ini Ingrisitongo nanga wan owru Amerkan man di ben nen Bob. Bob teki waarheid èn bakaten a teki dopu. Safrisafri Floriano kon betre, èn a dini leki gewoon pionier sensi a ten dati.

Yehovah blesi a preikiwroko fu mi

Na ini den yari di pasa, mi tan dini leki spesrutu pionier, èn Yehovah blesi a preikiwroko fu mi. Na ini Teresópolis, mi ben abi a tumusi moi grani fu yepi moro leki 60 sma fu gi den libi abra na Yehovah. Wan fu den ben de wan uma di nen Jupira. Mi ben leri en fu leisi tu. Bakaten, mi studeri nanga aiti pikin fu en di ben de bigisma kaba. A bakapisi de taki Jupira nanga moro leki 20 sma fu en famiri e dini Yehovah fayafaya now. Wan fu den na wan owruman, dri na dinari ini a diniwroko, èn tu na pionier.

Mi leri fu tan abi a denki taki sma man kon leri sabi a waarheid. Wan leisi, di mi ben e studeri Bijbel nanga wan yongu uma di nen Alzemira, dan en masra Antônio bari taki a o lusu tu bigi dagu gi mi efu mi no gowe wantewante. Baka di a sani dati pasa, mi ben e taki nanga Alzemira wanwan leisi nomo. Na so a sani disi ben go seibi yari langa, teleki mi ben man kisi primisi fu Antônio fu studeri nanga Alzemira baka. Ma Antônio srefi no ben wani mi taki nanga en fu Bijbel kwetikweti. Ma toku, wan dei di alen ben e fadon, mi aksi Antônio fu kon sidon na a studie. A dei dati mi kon frustan taki a no ben sabi leisi. Sensi a ten dati, Floriano nanga trawan studeri nanga en èn den leri en fu leisi. Tide na a dei, Alzemira nanga Antônio na dopu Kotoigi. Antonio e yepi furu na ini a gemeente, èn a e wroko nanga furu yonguwan na ini a preikiwroko.

Disi na soso wan tu fu den sani di wi ondrofeni na ini den moro leki 20 yari di wi dini na ini Teresópolis. Na a bigin fu 1988, wi ben kisi a kari fu go wroko na wan tra presi, namku a foto Niterói. Wi dini drape feifi yari langa teleki wi froisi go na Santo Aleixo. Baka dati, wi go na Gemeente Japuíba, leti na ini Rio de Janeiro, èn drape wi ben abi a grani fu opo Gemeente Ribeira.

Wi no ben abi furu gudu, ma wi kisi furu blesi

Na ini ala den yari di pasa, mi nanga Floriano ben abi a grani fu yepi moro leki 300 sma fu gi den libi abra na Yehovah. Now wan tu fu den e dini na a bijkantoro, èn trawan na pionier, owruman, nanga dinari ini a diniwroko. Mi de nanga tangi srefisrefi taki Gado gebroiki en santa yeye fu meki wi yepi someni sma!—Markus 10:29, 30.

A tru taki Floriano ben kisi seryusu problema nanga en gosontu. Ma aladi a siki, toku a e tan tanapu kánkan, a de nanga prisiri ala ten, èn a abi wan tranga frutrow na ini Yehovah. Nofo tron a e taki: „Na ini a ten disi yu no man taki dati yu de koloku fu di yu abi wan libi sondro problema. Yu de koloku fu di yu abi Yehovah fu yepi yu fu basi den problema.”—Psalm 34:19.

Na ini 2003, datra kon si taki mi abi kanker na mi kruktusei ai. Den puru na ai dati, dan na presi fu dati den poti wan tra sani di gersi wan ai, èn ibri dei mi musu krin en furu leisi. Aladi den sani disi miti mi, toku Yehovah gi mi a krakti fu dini go doro leki spesrutu pionier.

Mi no abi furu gudu nanga moni, ma toku mi kan taki dati mi gudu, fu di Yehovah blesi mi srefisrefi na ini mi diniwroko. A wroko fu wi na Brasyonkondre waka soifri soleki fa a zendeling sisa ben taki fu a preikiwroko na ini Afrika. Iya, mi ben winsi fu tron wan zendeling, èn trutru Yehovah gi mi san mi ben wani!

[Prenki na tapu bladzijde 9]

Mi nanga mi famiri na ini 1953

[Prenki na tapu bladzijde 9]

Mi e preiki na ini Ierland na ini 1957

[Prenki na tapu bladzijde 10]

Na ini Brasyonkondre na ini 1959, makandra nanga tra zendeling. Fu a kruktu-anusei go na a reti-anusei: Mi, Inger Hatfield, Doreen Hines, nanga Sonia Springate

[Prenki na tapu bladzijde 10]

Mi nanga mi masra