Fu san ede wi musu du san bun?

WAN sabiman ben taki wan leisi: „Mi wani du san bun, ma mi no man du en. Bika a bun di mi wani du, mi no e du, ma na ogri di mi no wani du, na dati mi e du.” Fu san ede a man disi ben feni en muilek fu du a bun di a ben wani du? A ben taki: „Mi kon si taki disi na a wet di de na ini mi: te mi wani du bun, dan ogri de na ini mi. Na ini mi ati mi e prisiri trutru nanga a wet fu Gado, ma mi e si taki wan tra wet de na ini mi skin, èn a wet disi e feti nanga a wet fu mi frustan èn a e meki taki mi e tron wan srafu fu sondu di de leki wan wet na ini mi skin.”—Romesma 7:18, 19, 21-23.

Den wortu disi di na apostel Paulus ben taki, skrifi sowan 2000 yari pasa, èn den e tyari kon na krin fu san ede a muilek gi sondusma fu du san bun. Wan sma di wani tan hori ensrefi na bun markitiki, spesrutu te a de na ini muilek situwâsi, musu abi a krakti fu du san bun. Fu dati ede wi musu aksi wisrefi a sani disi: San na a moro prenspari reide fu san ede wi musu du san bun?

Luku fa sani o waka gi wan sma di e du san bun, soleki fa Bijbel e taki. Na ini Psalm 37:37, 38, wi e leisi: „Poti prakseri na a wan di no abi fowtu èn tan luku na opregtiwan, bika a tamara fu a sma dati sa de nanga vrede. Ma den sma di pasa a wet, sa kisi pori makandra trutru; a tamara fu den ogrisma sa koti puru fu tru.” Odo 2:21, 22 e taigi wi: „Bika den opregtisma na den wan di sa libi na grontapu, èn den wan sondro fowtu na den wan di sa tan abra na en tapu. Gado sa koti den ogrisma puru fu grontapu; èn den wan di e tori trawan, A sa hari den puru fu grontapu.”

Aladi den pramisi disi, èn sosrefi trawan na ini Bijbel e gi wi bun reide fu libi na wan fasi di e plisi Gado, toku den sani disi a no den moro prenspari reide fu san ede wi musu du san bun. A moro prenspari reide dati, abi fu du nanga wan afersi di wi alamala musu teki sei na ini. Na artikel di e kon sa tyari kon na krin san na a afersi dati, èn san a abi fu du nanga wi.