Leri den pikin fu yu fu gi piki

PERLA di e libi na ini Meksikow, e memre ete taki di a ben de wan pikin meisje, dan en mama ben e yepi en fu sreka ensrefi na fesi fu gi syatu piki na a Waktitoren-studie. Now Perla abi wan boi fu feifi yari. Fa a e yepi a boi fu en? „A fosi sani di mi e du, na taki mi e sreka misrefi. Te mi e du dati, dan mi e suku wan paragraaf di a boi fu mi man frustan, èn di a man taki fu en nanga en eigi wortu. Baka dati wi e poti prakseri na a paragraaf dati di a e kari ’a paragraaf fu mi’. Mi e aksi en fu fruklari a paragraaf dati nanga yepi fu eksempre fu na aladei libi. Baka dati wi e oefen a piki wan tu leisi. Wi e gebroiki wan sani di bigi leki wan mikrofon, so taki a o sabi fa a musu hori a mikrofon te a gi piki. Mi breiti srefisrefi taki a e gi piki noso taki a e opo en anu na ibri konmakandra. Nofo tron a de so taki fosi a konmakandra e bigin, a e go na a brada di o hori a Waktitoren-studie, èn a e taigi en na sortu paragraaf a wani gi piki.”

Jens, wan owruman di e dini na ini wan grupu di e taki Hinditongo, abi tu boi, wan fu tu yari èn wan fu fo yari. Te Jens nanga en wefi e sreka gi a konmakandra makandra nanga den pikin fu den, dan den e du dati na a fasi fa Jens en papa nanga mama ben e sreka densrefi. A e taki: „Wi e luku sortu pisi fu na artikel den pikin man frustan. Dan wi e fruteri den san na den moro prenspari pisi fu na artikel, èn baka dati wi e poti den aksi gi den di wi wani den fu piki na den konmakandra. Nofo tron wi e fruwondru fu yere fa den e gi piki nanga den eigi wortu. Den sani di den e taki e sori krin fa den e frustan a tori. Leki bakapisi fu dati, den piki fu den e gi Yehovah prèise trutru, èn den pikin e sori na so fasi taki den abi bribi.”