1. Fu san ede wi musu teki a trangaleri fu Yehovah?

KOWNU SALOMO fu owruten Israel e gi ibriwan fu wi wan bun reide fu teki a trangaleri fu Gado. Salomo ben taki: „O mi manpikin, no weigri fu teki a trangaleri fu Yehovah; èn no tegu gi a piri-ai fu en, bika Yehovah e piri-ai gi a sma di a lobi, neleki fa wan papa e du nanga wan manpikin di e gi en prisiri” (Odo 3:11, 12). Iya, yu hemel Tata e gi yu trangaleri fu di a lobi yu.

2. San na „trangaleri”, èn fa wan sma kan kisi dati?

² „Trangaleri” abi fu du nanga strafu, piri-ai, rai, nanga leri. Na apostel Paulus ben skrifi: „Te wan sma e kisi strafu, dan dati no de wan prisiri sani gi en, ma a de wan sari sani; toku, gi den sma di e leri wan sani fu disi, a sa abi bun bakapisi di e tyari vrede kon, èn dati na regtfardikifasi” (Hebrewsma 12:11). Te yu e teki a trangaleri fu Gado èn e handri akruderi dati, dan a kan yepi yu fu libi na wan regtfardiki fasi, èn na so yu sa kisi wan moro bun banti nanga a santa Gado, Yehovah (Psalm 99:5). Yu kan kisi piri-ai nanga yepi fu brada nanga sisa, nanga yepi fu den sani di yu e leri na den Kresten konmakandra, fu Gado Wortu, èn fu den publikâsi fu „a getrow futuboi” (Lukas 12:42-44). Yu kan de nanga tangi trutru te yu e kisi rai fu tyari kenki kon na ini wan afersi! Ma sortu trangaleri wan sma musu kisi te a du wan seryusu sondu?

3. O ten den e puru wan Kresten fu a gemeente?

³ Den futuboi fu Gado e studeri Bijbel nanga Kresten publikâsi. Den e taki fu den markitiki fu Yehovah, na ala den konmakandra fu den. Sobun, Kresten e kon sabi san Yehovah wani den fu du. Den e puru wan Kresten fu a gemeente, soso te a e tan du seryusu sondu sondro fu abi berow.

4, 5. Fu san ede den ben puru wan sma fu a gemeente, soleki fa Bijbel e sori, èn fu san ede a gemeente ben kisi a rai fu teki a man baka na ini a gemeente?

 ⁴ Luku wan eksempre na ini Bijbel, di abi fu du nanga wan sma di den ben puru fu a gemeente. A gemeente na ini Korente ben gi pasi taki hurudu ben de na ini a gemeente, èn „srefi den trakondre sma no [ben] e du a sortu hurudu dati, namku taki wan man [ben] e libi nanga a wefi fu en papa”. Paulus ben gi den Korentesma a rai fu „libi so wan man gi Satan so taki wan kaba [ben] kan kon na a krakti di a sondu fu en [ben] abi tapu trawan, èn na so fasi a yeyefasi fu a gemeente [ben] sa tan bun na a dei fu Masra” (1 Korentesma 5:1-5). Di den puru a man di ben du sondu na ini a gemeente, dan den libi en gi Satan, èn na so a tron wan pisi baka fu a grontapu fu Didibri (1 Yohanes 5:19). Iya, den puru a sma disi fu a gemeente, fu di a ben kan abi wan takru krakti tapu den tra brada nanga sisa. Leki bakapisi fu dati den sorgu taki a yeye fu Gado ben e tan na ini a gemeente, so taki a yeye disi ben kan tan abi krakti tapu den brada nanga sisa.—2 Timoteyus 4:22; 1 Korentesma 5:11-13.

⁵ A no tumusi langa baka dati, Paulus gi den Kresten na ini Korente a rai fu meki a sma di ben sondu, tron wan memre baka fu a gemeente. Fu san ede? Efu den no ben o teki a man baka na ini a gemeente, dan ’Satan ben kan wini den’, na so na apostel ben taki. Soleki fa a sori, dan a man di ben sondu, ben abi berow èn a ben drai en libi (2 Korentesma 2:8-11). Efu den Korentesma ben weigri fu meki a man di ben abi berow tron wan memre baka fu a gemeente, dan Satan ben o wini den. Iya, den ben o de sma di e weigri fu gi trawan pardon, soleki fa Didibri ben wani den fu de. A ben musu de so taki syatu baka dati den ’gi a man di ben abi berow pardon èn den trowstu en’.—2 Korentesma 2:5-7.

6. Sortu bun bakapisi a abi te den puru wan sma fu a gemeente?

⁶ Sortu bun bakapisi a abi te den puru wan sma fu a gemeente? A sani disi e sorgu taki sma no e pori a santa nen fu Yehovah, èn a e sorgu tu taki sma no e pori a bun nen fu a pipel fu en (1 Petrus 1:14-16). A puru di den e puru wan sma fu a gemeente fu di a no abi berow, na wan sani di e kruderi nanga den markitiki fu Gado, èn a e sorgu taki a gemeente tan krin na yeye fasi. A sani disi kan meki tu taki a sma di no abi berow, e kon frustan taki a du wan seryusu sondu.

7. San pasa nanga David di a kibri den sondu fu en?

⁷ Furu fu den sma di du seryusu sondu, abi trutru berow, èn na so den e tan memre fu a gemeente. A no de fu taki dati a no makriki gi son sma fu sori trutru berow. Luku na eksempre fu Kownu David fu Israel, di skrifi Psalm 32. A singi dati e tyari kon na krin taki wan pisi ten David ben kibri den seryusu sondu fu en di ben abi fu du nanga Batseiba. Leki bakapisi fu dati, a ben e broko en ede nanga den sondu fu en, èn a sani disi meki en skin kon swaki, neleki fa wan bon e kon flaw na ini dreiten. David en skin ben kon swaki èn a ben kisi konsensi fonfon. Ma di a ’taki fu den sondu fu en, dan Yehovah gi en pardon’ (Psalm 32:3-5). Baka dati David ben singi: „Koloku fu a man di no abi fowtu na ini Yehovah ai” (Psalm 32:1, 2). David ben breiti srefisrefi taki Gado sori en sari-ati!

8, 9. Fa wan sma di den puru fu a gemeente musu sori berow, èn san a musu du fu man tron wan memre fu a gemeente baka?

⁸ Soleki fa wi si, dan wan sma di sondu musu abi berow efu a wani taki Gado sori sari-ati gi en. Ma te wan sma e syen noso te a frede taki trawan o kon sabi sortu sondu a du, dan dati no wani taki dati a abi berow. Wan sma di abi berow e kon frustan taki a tyari ensrefi na wan fasi di no fiti, èn a e sari fu a sani di a du. So wan sma ’en ati broko èn a masi’, èn a wani „poti sani kon reti baka” efu dati kan.—Psalm 51:17; 2 Korentesma 7:11.

⁹ A de tumusi prenspari taki wan sma abi berow efu a wani tron wan memre baka fu a Kresten gemeente. A no de so taki wan sma sa tron wan memre baka fu a gemeente, fu di wan spesrutu pisi ten pasa. Fosi wan sma kan tron wan memre fu a gemeente baka, dan a musu kisi wan tra fasi fu denki. A musu kon frustan taki a du wan seryusu sondu, èn taki a pori a nen fu  Yehovah èn di fu a gemeente. A sma di du sondu musu abi berow, a musu begi Gado nanga en heri ati fu gi en pardon, èn a musu libi akruderi den regtfardiki markitiki fu Gado. Te a sma disi e aksi fu tron wan memre baka fu a gemeente, dan a musu man buweisi taki a abi berow, èn taki a e ’du sani di e sori taki a abi berow’.—Tori fu den Apostel 26:20.

10, 11. Fu san ede wi no musu pruberi fu kibri a sondu di wi du?

¹⁰ Son sma di du sondu e prakseri kande: ’Efu mi fruteri wan sma fu a sondu di mi du, dan kande mi o abi fu piki wan lo fruferi aksi di o meki mi firi syen, èn kande den o puru mi fu a gemeente. Ma efu mi no e taki noti, dan den sani dati no abi fu pasa èn noiti wan sma na ini a gemeente o sabi san mi du.’ Wan sma di e denki so, no e poti prakseri na wan tu prenspari sani. Sortu sani na dati?

¹¹ Yehovah na „wan Gado di abi sari-ati nanga switifasi, di no e atibron esi, di abi bun-ati nanga waarheid pasa marki, di abi bun-ati gi dusundusun bakapikin, di e gi sma pardon te den meki fowtu, te den du ogri, èn te den du sondu”. Ma a e gi a pipel fu en rai „na a yoisti fasi” (Exodus 34:6, 7; Yeremia 30:11). Efu yu du wan seryusu sondu, dan fa yu wani taki Gado abi sari-ati gi yu efu yu e pruberi fu kibri a sondu fu yu? Yehovah sabi san yu du, èn a no e tapu en ai gi den sondu di sma e du.—Odo 15:3; Habakuk 1:13.

12, 13. San kan pasa te yu e pruberi fu kibri a sondu di yu du?

¹² Te yu du wan seryusu sondu, dan yu kan kisi wan krin konsensi baka te yu e taki fu a sondu di yu du (1 Timoteyus 1:18-20). Ma te yu no e taki fu a sondu di yu du, dan a konsensi fu yu no sa wroko bun moro, èn dati kan meki taki yu du moro sondu. Hori na prakseri taki yu no sondu teige wan tra libisma noso teige a gemeente nomo. Yu sondu teige Gado. A psalm skrifiman ben singi: „Yehovah de na ini a santa tempel fu en. Yehovah en kownusturu de na ini hemel. En eigi ai e si, en eigi ai di e brenki e ondrosuku den manpikin fu libisma. Yehovah srefi e ondrosuku a regtfardikisma, sosrefi a sma di e du ogri.”—Psalm 11:4, 5.

¹³ Yehovah no sa blesi nowan enkri sma di e kibri a sondu di a du, èn di e pruberi fu tan na ini a Kresten gemeente di krin (Yakobus 4:6). Sobun efu yu du wan sondu èn yu wani du san reti, dan no draidrai fu taki na wan opregti fasi fu a sondu di yu du. Efu yu no e du dati, dan yu sa kisi konsensi fonfon, spesrutu te yu e leisi èn e yere rai di abi fu du nanga a seryusu sondu di yu du. Ma fa a ben o de efu Yehovah ben o puru en santa yeye na yu tapu, neleki fa a ben du nanga Kownu Saul? (1 Samuel 16:14) Te Gado puru en santa yeye na yu tapu, dan dati kan meki taki yu du moro bigi sondu.

14. Fu san ede wan sma di du sondu, musu teki a rai fu Yakobus 5:14, 15?

¹⁴ We, dan san wan sma musu du te a abi berow fu den sondu di a du? „Meki a kari den owru man fu a gemeente kon na en; meki den begi gi en èn lobi oli gi en na ini a nen fu Yehovah. Te den e begi nanga bribi, dan a sma di siki sa kon betre, èn Yehovah sa opo en. Sosrefi, efu a du sondu, dan a sa kisi pardon fu dati” (Yakobus 5:14, 15). Wan fasi fa wan sma kan ’sori taki a abi berow’, na fu go na den owruman (Mateyus 3:8). Den getrow man disi di abi switifasi, sa „begi gi en èn lobi oli gi en na ini a nen fu Yehovah”. Neleki fa oli e safu a pen fu wan sma en skin, na so a rai fu Bijbel sa trowstu iniwan sma di abi berow trutru.—Yeremia 8:22.

15, 16. Fa Kresten owruman e teki na eksempre fu Gado, soleki fa skrifi na ini Esekièl 34:15, 16?

¹⁵ Yehovah, a lobi-ati Skapuman fu wi, gi wi wan moi eksempre trutru, di a frulusu den Dyu na ini katibo na Babilon na ini 537 b.G.T., èn di a fri Israel na yeye fasi fu „Babilon a Bigiwan” na ini 1919 G.T.! (Openbaring 17:3-5; Galasiasma 6:16) Na so fasi a meki a pramisi fu en kon tru. A ben pramisi: „Misrefi sa gi den skapu fu mi nyanyan, èn misrefi sa meki den didon . . . Mi sa suku fu feni a wan di lasi, a wan di drifi gowe mi sa tyari kon baka, a sani di broko mi sa tai, èn mi sa tranga a wan di swaki.”—Esekièl 34:15, 16.

 ¹⁶ Yehovah gi den agersi skapu fu en nyanyan, a gi den a dyaranti taki sani ben o waka bun gi den, èn a suku fu feni den wan di lasi. Na so Kresten skapuman e sorgu tu taki na ipi fu Gado e kisi nofo yeye nyanyan, èn den e gi den a dyaranti tu taki sani sa waka bun gi den. Den owruman e suku fu feni den skapu di drifi gowe fu a gemeente. Neleki fa Gado ben ’tai a sani di broko’, na so owruman e „tai” den soro di skapu kisi fu di wan sma taigi den hati sani, noso fu di den skapu srefi du sondu. Èn neleki fa Gado ’ben tranga a wan di ben swaki’, na so den owruman e yepi den wan di kon swaki na yeye fasi, kande fu di den du wan sondu.

17. Fu san ede wi no musu draidrai fu suku yepi na den owruman so taki den kan tranga wi na yeye fasi?

¹⁷ Den owruman de klariklari fu fiti a rai disi: „Tan sori sari-ati gi trawan, ma unsrefi musu luku bun” (Yudas 23). Son Kresten du hurudu èn dati na wan seryusu sondu. Ma efu den abi berow trutru, dan den kan fruwakti taki den owruman di de klariklari fu yepi den fu kon tranga baka na yeye fasi, sa sori sari-ati gi den èn den sa yepi den na wan lobi-ati fasi. Paulus ben taki fu ensrefi èn fu den sortu man disi: „A no de so taki wi na basi fu un bribi, ma wi e wroko makandra nanga unu so taki unu kan de nanga prisiri” (2 Korentesma 1:24). Fu dati ede, noiti no draidrai fu suku yepi na den man disi so taki den kan tranga yu na yeye fasi.

18. Fa owruman e yepi brada noso sisa di du sondu?

¹⁸ Fu san ede yu kan frutrow den owruman, te yu du wan seryusu sondu? Fu di den na skapuman fu na ipi fu Gado, èn dati na a moro prenspari frantwortu fu den (1 Petrus 5:1-4). Nowan lobi-ati skapuman e fon wan pikin skapu di e bari fu di a kisi mankeri. Ma te den owruman e yepi wan brada noso sisa di du sondu, dan a no strafu den e suku fu strafu a sma, ma den e luku fu san ede a sma du a sondu dati èn fa den kan yepi en fu kon tranga baka na yeye fasi efu dati kan (Yakobus 5:13-20). Owruman musu krutu trawan na wan regtfardiki fasi èn den musu „handri na wan switi fasi nanga den skapu” (Tori fu den Apostel 20:29, 30; Yesaya 32:1, 2). Neleki ala tra Kresten, owruman musu ’du san reti, den musu lobi fu sori trawan switifasi, èn den musu abi sakafasi te den e waka nanga Gado’ (Mika 6:8). A de tumusi prenspari taki den owruman e sori den fasi disi te den e teki bosroiti di abi fu du nanga a libi èn nanga a santa diniwroko fu „den skapu fu [Yehovah] en weigron”.—Psalm 100:3.

19. Fa Kresten owruman e handri te den e pruberi fu meki wan sma kisi wan tra denki fu sani?

¹⁹ Kresten skapuman e poti na wroko nanga yepi fu santa yeye, èn den e pruberi fu meki a yeye disi tiri den. Efu „wan sma meki wan fowtu  bifo a sabi”, fu di a no ben abi na prakseri fu du a sani dati, dan lepi Kresten brada e pruberi „na wan safri-ati fasi fu tyari so wan sma kon na tapu a reti pasi baka” (Galasiasma 6:1; Tori fu den Apostel 20:28). Aladi den owruman e handri na wan safri-ati fasi, toku den e hori densrefi na den markitiki fu Gado te den e pruberi fu meki a sma kisi wan tra denki fu sani. Iya, den e handri neleki wan datra di abi switifasi, ma di no e frede fu seti den broko bonyo fu wan sma (Kolosesma 3:12). Den owruman e begi Gado èn den e gebroiki Bijbel fu kon sabi efu den musu sori sari-ati gi wan sma, èn fu dati ede a bosroiti di den e teki e kruderi nanga a fasi fa Gado e si sani.—Mateyus 18:18.

20. O ten a kan de fanowdu taki den brada e meki bekènti na ini a gemeente taki wan sma kisi piri-ai?

²⁰ Te furu sma sabi fu a sondu di wan sma du, noso te a de krin taki furu sma sa kon sabi a tori, dan a ben o bun te den brada e meki bekènti na ini a gemeente taki a sma dati kisi piri-ai, so taki a gemeente no e kisi porinen. Son leisi tra reide de fu san ede den brada musu meki a sani dati bekènti. Na ini a pisi ten te wan sma di kisi piri-ai e kon tranga baka na yeye fasi, dan yu kan agersi en nanga wan sma di e kon betre fu wan mankeri di a kisi, èn di no man du ala san a ben gwenti fu du. A no de fu taki dati fu wan pisi ten, a ben o bun te a sma di abi berow, e arki na den konmakandra na presi taki a e gi piki. Den owruman kan meki wan sma studeri Bijbel nanga en so taki a kan wroko na den swakifasi fu en, èn disi sa yepi en fu kon abi „wan tranga bribi” baka (Titus 2:2). Ala den sani disi e pasa na wan lobi-ati fasi, èn den no de fu strafu a sma di sondu.

21. San den owruman kan du na ini son situwâsi te wan sma du sondu?

²¹ Den owruman kan yepi wan sma na difrenti fasi fu kon tranga baka na yeye fasi. Fu eksempre, kon meki wi taki dati wan brada ben abi a gwenti fosi fu dringi sopi pasa marki, ma a brokokindi gi a swakifasi disi wán noso tu leisi di a ben de na oso en wawan. Noso kande wan sma di ben tapu nanga a gwenti fu smoko tabaka langa ten kaba, no ben man hori ensrefi wán noso tu leisi, èn a smoko baka di a ben de en wawan. Aladi a begi Gado fu aksi en pardon, èn aladi a e bribi taki Gado gi en pardon, toku a musu suku yepi na wan owruman, so taki a sondu dati no e tron wan gwenti gi en. Wán noso tu owruman kan gi yepi na ini so wan situwâsi. Ma den owruman sa taigi a fesiman-opziener fu a tori disi, fu di a kan de so taki den sa musu poti prakseri na tra sani tu.

22, 23. Fu san ede yu musu tan teki a trangaleri fu Gado?

²² Ibri Kresten di wani taki Gado feni en bun, musu teki a trangaleri di Yehovah e gi (1 Timoteyus 5:20). Sobun, teki iniwan piri-ai di yu e kisi te yu e studeri Bijbel nanga den Kresten publikâsi, noso te yu de na den difrenti konmakandra fu a pipel fu Yehovah. De klariklari fu du a wani fu Yehovah. Te yu e du dati, dan a trangaleri fu Gado sa yepi yu fu tan kakafutu gi sondu, neleki fa wan tranga skotu e tapu sani fu pasa.

²³ Te yu e teki a trangaleri fu Gado, dan A sa tan lobi yu. Iya, den puru son sma fu a Kresten gemeente, ma disi no abi fu pasa nanga yu efu yu e „kibri yu ati”, èn efu yu e ’waka leki wan koni sma’ (Odo 4:23; Efeisesma 5:15). Ma efu yu no de wan memre fu a gemeente moro, dan fu san ede yu no e du san de fanowdu fu tron wan memre baka? Gado wani taki ala den sma di gi densrefi abra na en, anbegi en na wan getrow fasi èn „nanga wan ati di breiti” (Deuteronomium 28:47). Yu kan du disi fu têgo te yu e teki a trangaleri fu Yehovah ala ten.—Psalm 100:2.