Wan afersi di abi fu du nanga yu
Wan afersi di abi fu du nanga yu
YU ABI wan mati noso wan famiriman di yu de heri bun nanga en? Fa yu ben o feni en te wan sma ben o taki dati yu de bun nanga a mati noso a famiriman dati, soso fu di yu wani kisi wini? A sani dati ben o hati yu, èn kande yu ben o atibron srefi, a no so? Na a sani dati Satan Didibri taki fu ala sma di abi wan bun banti nanga Yehovah Gado.
Luku san pasa di Satan kisi den fosi libisma, Adam nanga Eva, so fara fu trangayesi a wet fu Gado, èn fu opo densrefi teige Gado, neleki fa en ben du. A sani disi wani taki dati libisma ben o tan gi yesi na Yehovah soso te dati ben o tyari wini gi den? (Genesis 3:1-6) Sowan 2500 yari baka di Adam opo ensrefi teige Gado, dan Satan meki na afersi disi opo kon, ma disi leisi a ben abi fu du nanga a man di nen Yob. A sani di Didibri ben taki e sori krin san na a afersi di ben opo kon. Fu di dati de so, dan meki wi go luku a Bijbel tori dati finifini.
„Mi sa tan getrow teleki mi dede”
Yob na „wan bun man èn wan opregti man di abi frede gi Gado, èn di no e du ogri”. Ma Satan e taki dati Yob no opregti trutru. „Na fu soso Yob sori taki a abi frede gi Gado?”, na so a e aksi Yehovah. Baka dati, Didibri e krutu Gado nanga Yob. A e taki dati na fu di Yehovah e kibri èn e blesi Yob, dati meki Yob de loyaal na Yehovah. Satan e taki: „Langa yu anu now èn fasi ala sani di a abi, dan yu o si efu a no o fluku yu leti na ini yu fesi.”—Yob 1:8-11.
Fu meki a kon na krin suma abi leti na ini a tori disi, dan Yehovah e gi pasi taki Satan tesi Yob. Fu di Didibri wani meki Yob drai baka gi Gado, meki a e tyari a wán rampu baka a trawan kon tapu a getrow man dati. Sma fufuru noso kiri ala den meti fu Yob, sma kiri den futuboi fu Yob, èn den pikin fu Yob e lasi libi (Yob 1:12-19). Ma sani e waka soleki fa Satan ben abi na prakseri? Nôno, kwetikweti! Aladi Yob no sabi taki na Didibri e tyari den tesi disi kon na en tapu, toku a e taki: „Na Yehovah gi, èn na Yehovah teki baka. Meki a nen fu Yehovah kisi prèise ala ten.”—Yob 1:21.
Baka dati, Satan e kon na fesi Yehovah, èn Yehovah e taigi en: „[Yob] abi a fasti bosroiti fu tan getrow, aladi yu e gi mi deki-ati fu pori en sondro reide” (Yob 2:1-3). A prenspari afersi abi fu du nanga a getrowfasi fu Yob, èn fu man de getrow, dan wan sma musu de loyaal dorodoro na Gado, èn a musu de regtfardiki ala ten. Aladi den tesi dati miti Yob, toku a e tan getrow na Gado. Ma Didibri no kaba nanga en.
Baka dati, Satan e taki wan sani di abi fu du nanga ala libisma. A e taigi Yehovah: „Skin fu skin, èn ala san wan libisma abi, a sa gi fu kibri en sili. Ma grantangi, langa yu anu disi leisi èn fasi en te na ini en bonyo èn en meti èn tan luku efu a no sa fluku yu leti na ini yu fesi” (Yob 2:4, 5). Didibri e taki fu „wan libisma” na presi fu kari a nen Yob, èn disi e sori taki a feni taki nowan libisma sa tan getrow na Gado. Fu taki en leti, Satan e taki: ’Wan sma sa du iniwan sani fu kibri en libi. Efu mi kisi na okasi, dan mi sa meki iniwan sma drai baka gi Gado.’ A de so taki nowan libisma sa tan loyaal na Gado, awansi san e pasa?
Yehovah e gi pasi taki Didibri naki Yob nanga wan takru siki. Yob e pina so te taki a e begi Gado fu tyari wan kaba kon na en libi (Yob 2:7; 14:13). Ma toku Yob e taki: „Mi sa tan getrow teleki mi dede!” (Yob 27:5) Yob e taki a sani disi fu di a lobi Gado, èn noti kan kenki dati. Na so Yob e sori taki a de getrow. Bijbel e taki: „Bakaten Yehovah blesi a kaba fu Yob moro leki a bigin fu en” (Yob 42:10-17). Yu ben abi tra sma di ben de leki Yob? San kon na krin na ini a ten di pasa?
A kon na krin suma abi leti
Na ini kapitel 11 fu a Bijbel buku Hebrewsma, na apostel Paulus e kari a nen fu getrow man nanga uma fu a ten bifo den Kresten, èn wan tu fu den sma disi na Noa, Abraham, Sara, nanga Moses. Baka dati na apostel e taki: „A ten o syatu tumusi efu mi musu taki ete fu [trawan]” (Hebrewsma 11:32). A nomru fu den getrow futuboi disi fu Gado ben bigi so te taki Paulus e kari den ’wan bigi wolku fu kotoigi’, fu di a e teki den gersi nanga wan bigi wolku di de na hemel (Hebrewsma 12:1). Iya, na ini den hondrohondro yari di pasa, bun furu sma tan getrow na Yehovah Gado, sondro taki sma dwengi den fu du dati.—Yosua 24:15.
A moro prenspari sma di buweisi taki Satan no man meki ala libisma drai baka gi Yehovah, soleki fa a ben taki, na Gado en eigi Manpikin, Yesus Krestes. Srefi a hebi pen di a kisi na a pina-postu bifo a dede, no meki taki a drai baka gi Gado. Di Yesus hari en lasti bro, a bari: „Mi Tata, mi e poti mi yeye na ini yu anu.”—Lukas 23:46.
Na ini a ten di pasa a kon na krin taki Didibri no ben man meki ala sma drai baka gi a tru Gado. Bun furu libisma kon leri sabi Yehovah èn den kon ’lobi en nanga den heri ati, nanga den heri sili, èn nanga den heri frustan’ (Mateyus 22:37). Fu di den tan loyaal na Yehovah awansi san miti den, meki a kon na krin taki Satan no ben abi leti di a taki dati libisma no sa tan getrow na Gado. Te yu de loyaal, dan yu kan buweisi tu taki Didibri no abi leti.
San yu musu du?
Gado wani taki „ala sortu sma musu kisi frulusu èn taki den musu kon sabi a waarheid soifri” (1 Timoteyus 2:4). Fa yu kan du dati? Poti ten na wan sei fu studeri Bijbel, èn ’tan leri sabi a wan-enkri tru Gado, èn a sma di a seni kon, Yesus Krestes’.—Yohanes 17:3.
Satan ben taki dati libisma no sa de getrow, fu di a feni taki den no e dini Gado na wan opregti fasi. Efu yu wani taki a sabi fu Gado abi krakti na yu tapu, dan a musu doro yu ati. Fu man meki disi pasa, dan yu musu du moro leki fu kon sabi sani fu Bijbel nomo. Kisi a gwenti fu denki dipi fu den sani di yu e leri (Psalm 143:5). Te yu e leisi Bijbel noso wan Bijbel publikâsi, dan sorgu taki yu e teki ten fu poti prakseri na aksi soleki den wan disi: ’San disi e leri mi fu Yehovah? Sortu fasi fu Gado e kon na krin na ini a tori disi? O ten mi musu sori den fasi disi? Sortu sani Gado feni bun, èn sortu sani a no e feni bun? Fa dati abi krakti tapu a fasi fa mi e denki fu Gado?’ Te yu e denki dipi fu den sani dati, dan yu ati sa kon furu nanga lobi èn nanga warderi gi a Mekiman.
Fu de getrow na Gado, wani taki moro leki fu de opregti te a abi fu du nanga na anbegi fu wi (1 Kownu 9:4). Fu de getrow na Yehovah Gado wani taki dati yu musu tyari yusrefi na wan krin fasi na ini ala afersi fu yu libi. Ma a no sa de wan lasi gi yu kwetikweti fu tan getrow na Gado. Yehovah na „a koloku Gado”, èn a wani taki yu nyan bun fu a libi (1 Timoteyus 1:11). Poti prakseri na wan tu sani di yu musu wai pasi gi fu man tan tyari yusrefi na wan krin fasi, so taki yu kan abi wan moro koloku libi, èn so taki Gado feni yu bun.
Wai pasi gi hurudu
Na ini a Wortu fu en, Bijbel, Yehovah srefi poti markitiki di abi fu du nanga a trowlibi. Genesis 2:21-24). Fu di trowpatna tron „wán skin”, meki den e sori lespeki gi a trowlibi di Gado seti, te den abi seks demakandra soso nanga a trowpatna fu den. Na apostel Paulus ben taki: „Un alamala musu si a trowlibi leki wan lespeki sani èn un no musu doti a trowlibi fu unu, bika Gado o krutu huruman nanga sutaman” (Hebrewsma 13:4). Den wortu „un no musu doti a trowlibi”, abi fu du nanga a seks demakandra di wan man nanga wan uma di trow na lanti, abi nanga makandra. Efu wan fu den abi seks demakandra nanga wan tra sma di no de a patna fu en, dan a e du sutadu, èn Gado kan strafu en gi a sani dati.—Maleaki 3:5.
Bijbel e taki: „Wan man sa gowe libi en papa nanga en mama, èn a musu tai hori na en wefi èn den musu tron wán skin” (Fa a de nanga a seks demakandra di sma abi fosi den trow? A sani dati sosrefi no e kruderi nanga den markitiki di Yehovah poti fu sori wi fa wi musu tyari wisrefi. Bijbel e taki: „Disi na san Gado wani: . . . taki un no musu du hurudu” (1 Tesalonikasma 4:3). Wan sma di e libi wan homo-sekslibi, di abi seks nanga en eigi famiriman, èn nanga meti, e sondu tu teige Gado (Lefitikus 18:6, 23; Romesma 1:26, 27). Iniwan sma di wani plisi Gado, èn di wani abi wan trutru koloku libi, musu abi noti fu du nanga hurudu.
Fa a de te sma di no trow e du sani di e wiki seks lostu? Yehovah no e feni a sani disi bun (Galasiasma 5:19). Wan sma musu luku bun tu taki a no poti prakseri na sani di no fiti. Yesus ben taki: „Iniwan sma di e tan luku wan uma fu kisi tranga lostu gi en, du sutadu nanga en kaba na ini en ati” (Mateyus 5:28). Den wortu disi fiti tu te a abi fu du nanga a luku di sma e luku seks prenki na ini buku, na telefisi, noso na Internet. Den fiti tu, te a abi fu du nanga a leisi di sma e leisi seks tori, èn nanga a arki di sma e arki doti poku. Te wi e wai pasi gi den sortu sani disi, dan wi e plisi Gado, èn a abi bun krakti tapu wi libi.
Fa a de te wan sma e prei nanga den firi fu trawan? Wan sma di e prei nanga den firi fu trawan e du neleki a abi lobi firi gi den sma dati, noso a e tyari ensrefi na wan fasi di e wiki den seks firi fu trawan. Te wan man noso wan uma di trow e poti prakseri na a fasi dati na wan sma di no de en trowpatna, dan a no e hori ensrefi na Bijbel gronprakseri, èn a e sori taki a no abi lespeki gi Yehovah (Efeisesma 5:28-33). A no fiti srefisrefi taki sma di no trow e prei nanga den firi fu makandra, soso fu firi bun! Fa a o de te a tra sma e denki taki na trutru lobi de na ini a tori, aladi dati no de so? Prakseri fa a sma dati o sari. Wan tra seryusu sani di wi musu hori na prakseri tu, na taki te wi e prei nanga den firi fu trawan, dan dati kan abi leki bakapisi taki wi e du hurudu noso sutadu. Ma na a tra sei, a de so taki te mansma nanga umasma e handri na wan lespeki fasi nanga makandra, dan den sa abi moro lespeki gi densrefi.—1 Timoteyus 5:1, 2.
Plisi Gado na ini tra afersi fu a libi
Na ini furu kondre a de so taki, sma kan feni sopi makriki fu dringi. A de wan fowtu sani fu dringi sopi? Bijbel no e taki dati sma no mag dringi pikinso win, biri, noso tra sopi (Psalm 104:15; 1 Timoteyus 5:23). Ma Gado no feni en bun te sma e dringi tumusi furu sopi, èn te den e kon drungu (1 Korentesma 5:11-13). A no de fu taki dati yu no wani kon siki, èn taki yu no wani na osofamiri-libi fu yu kon pori, soso fu di yu e dringi tumusi furu sopi.—Odo 23:20, 21, 29-35.
Yehovah na „a Gado fu waarheid” (Psalm 31:5). „Gado no man lei kwetikweti”, na so Bijbel e taki (Hebrewsma 6:18). Efu yu wani taki Gado feni yu bun, dan yu no musu lei (Odo 6:16-19; Kolosesma 3:9, 10). „Ibriwan fu unu musu taki san tru te unu e taki nanga trawan”, na dati Bijbel e gi Kresten leki rai.—Efeisesma 4:25.
Dan yu abi sosrefi a dòbel di sma e dòbel. Aladi furu sma lobi fu dòbel, toku a sani disi e sori taki wan sma gridi, fu di a e howpu taki trawan lasi moni so taki ensrefi kan meki moni. Yehovah no lobi sma di „gridi fu feni wini 1 Timoteyus 3:8). Efu yu wani plisi Yehovah, dan yu no musu dòbel na nowan enkri fasi, dati wani taki tu dati yu no sa bai lòt, èn yu no sa go na casino. Te yu no e du den sani dati, dan yu sa si taki yu abi moro moni fu sorgu gi den sani di yu osofamiri abi fanowdu.
na wan fasi di no fiti” (Wan tra sani di e sori taki wan sma gridi, na a fufuru di a e fufuru, èn dati wani taki dati a e teki wan sani di no de fu en. „Yu no musu fufuru”, na so Bijbel e taki (Exodus 20:15). A no bun fu bai wan sani na wan sma, te yu sabi taki a sma fufuru a sani dati, èn a no bun tu fu teki wan sani fu wan sma sondro fu aksi en. Bijbel e taki: „A sma di e fufuru, no musu fufuru moro, ma a musu wroko tranga, èn meki a du bun wroko nanga en anu, so taki a kan prati wan sani nanga sma di de na nowtu” (Efeisesma 4:28). Sma di lobi Yehovah no e nyan den yuru fu a basi fu den, ma den e wroko tranga. Den „wani du ala sani na wan opregti fasi” (Hebrewsma 13:18). Èn a no de fu taki dati wan sma di abi wan krin konsensi, sa abi wan korostu firi.
Fa Gado e si wan sma di e kisi faya atibron? Bijbel e warskow wi: „No abi demakandra nanga wan sma di e atibron esi, èn no tron wan kompe fu wan sma di e kisi faya atibron” (Odo 22:24). Nofo tron a de so taki wan sma di no man hori ensrefi te a e atibron, kan du ogri nanga trawan (Genesis 4:5-8). Ma te a abi fu du nanga na ogri di wan sma wani du baka nanga wan trawan di ben du en ogri fosi, dan Bijbel e taki: „Te wan sma du unu wan ogri, dan no du a sma dati ogri baka. Du sani di ala sma feni bun. Efu a kan, efu a e didon na unu, dan libi na ini vrede nanga ala sma. No teki refensi, mi lobiwan, ma libi en gi na atibron fu Gado; bika Gado Buku taki: ’Na mi o teki refensi; mi o pai den baka gi den ogri di den du, na so Yehovah taki.’” (Romesma 12:17-19). Te wi e teki den rai disi, dan wi sa abi vrede na ini a libi, èn wi sa de moro koloku.
Yu kan tan getrow na Gado
A de so taki yu kan tan getrow na Gado awansi yu e kisi tesi fu drai baka gi en? Iya, yu kan du dati. Yu musu frustan taki Gado wani taki yu tan getrow na en, so taki yu kan buweisi taki Satan no ben abi leti di a taki dati sma no man tan loyaal na Gado. Fu dati ede a Wortu fu Gado e taki: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi.”—Odo 27:11.
Yu kan begi Yehovah fu gi yu a krakti fu du san A feni bun (Filipisma 4:6, 7, 13). Fu dati ede, abi a fasti bosroiti fu kon sabi moro fu Gado Wortu, Bijbel. Te yu e denki dipi fu den sani di yu leri fu Bijbel, èn te yu abi warderi gi den sani dati, dan dati sa yepi yu fu kon abi moro lobi gi Gado, èn yu sa du muiti fu plisi en. Wan Yohanes 5:3 e taki: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi.” Yehovah Kotoigi na ini a kontren fu yu sa prisiri fu studeri Bijbel nanga yu. Grantangi meki muiti fu miti den na ini a kontren fu yu, noso skrifi go na den sma di tyari a tijdschrift disi kon na doro.
[Prenki na tapu bladzijde 4]
Yob tan getrow aladi a ben e kisi tesi
[Prenki na tapu bladzijde 7]
Te yu e kon sabi moro fu Gado Wortu, dan yu sa kisi wan moro fasti bosroiti fu du san bun