Aksi fu leisiman

A de so trutru taki a fasi fa Yesus ben taki nanga en mama na a trow-oso na ini Kana, e sori taki a no ben abi lespeki gi en mama, noso taki a ben taki grofu nanga en?—Yohanes 2:4.

Syatu baka di Yesus dopu, en nanga den disipel fu en kisi a kari fu go na wan trow-oso na ini Kana. En mama ben de drape tu. Di nofo win no ben de moro, dan Maria taigi Yesus: „Den no abi win moro.” Yesus piki en mama taki: „Uma, san mi abi fu du nanga dati? Mi yuru no doro ete.”—Yohanes 2:1-4.

Efu wan sma na ini a ten disi ben o kari en mama „uma” èn efu a taigi en ’san mi abi fu du nanga dati?’, dan sma ben o taki dati a sma no abi lespeki gi en mama, èn taki a afrontu en mama. Ma wi no kan taki dati Yesus no ben abi lespeki gi en mama, fu di wi musu hori den gwenti fu den Dyu na prakseri èn a fasi fa den ben e taki. Wi o frustan a tori moro bun efu wi kon sabi fa sma na ini Bijbel ten ben e taki son sani.

Disi na san wan wortubuku e taki fu a wortu „uma”: „Efu sma ben e gebroiki a wortu disi te den ben e taki nanga wan uma, dan den no ben taki en fu piri-ai gi na uma, noso fu bari en. Ma den ben taki en fu sori lobi nanga lespeki gi en” (Vine’s Expository Dictionary of Old and New Testament Words). Tra buku e taki a srefi sani. Fu eksempre, The Anchor Bible e taki: „A wortu disi a no fu piri-ai gi sma èn a no de wan grofu wortu. A no e sori taki wan sma no lobi wan trawan . . . Na so Yesus ben gwenti taki nanga umasma na wan lespeki fasi.” Wan tra wortubuku e sori taki „sma no e gebroiki a wortu disi srefisrefi fu lagi trawan” (The New International Dictionary of New Testament Theology). Ete wan wortubuku e sori taki te wan sma e taki a wortu disi, dan „a no de so srefisrefi taki a sma no abi lespeki, noso taki a e wisiwasi wan trawan” (Gerhard Kittel’s Theological Dictionary of the New Testament). Sobun, wi no kan taki dati Yesus ben e taki grofu nanga en mama di a kari en „uma”.—Mateyus 15:28; Lukas 13:12; Yohanes 4:21; 19:26; 20:13, 15.

Ma fa a de nanga den wortu „san mi abi fu du nanga dati?” Soleki fa a sori, disi na wan odo di den Dyu ben gwenti taki, èn a skrifi na ini Bijbel wan tu leisi. Fu eksempre, na ini 2 Samuel 16:10, wi e leisi taki David tapu Abisai fu no kiri Simei, fu di a taigi en: „San mi abi fu du nanga unu, un manpikin fu Seruya? Meki a taki ogri fu mi, bika na Yehovah srefi taigi en: ’Taki ogri fu David!’” Na ini 1 Kownu 17:18 wi e leisi tu taki, di a weduwe fu Sarfat kon si taki a manpikin fu en dede, dan a taigi Elia: „San mi abi fu du nanga yu, o man fu a tru Gado? Yu kon dyaso fu memre mi na den sondu fu mi èn fu kiri mi manpikin.”

Den Bijbel eksempre disi e sori wi taki sma ben gwenti fu gebroiki na odo „san mi abi fu du nanga dati?” Den no ben e du disi fu wisiwasi wan sma, noso fu di den abi bigifasi. Ma den ben e gebroiki na odo disi fu sori taki den no wani teki prati na wan sani di sma aksi den fu du, noso fu sori taki den e denki tra fasi fu wan tori. San wi kan taki fu a sani di Yesus taigi Maria?

Di Maria taigi Yesus taki „den no abi win moro”, dan soleki fa a sori, a no ben e fruteri Yesus nomo san ben pasa, ma a ben wani taki Yesus du wan sani fu lusu a problema. Yesus gebroiki na aladei odo dati fu sori Maria taki a no wani du san a ben taigi en fu du. Den wortu di Yesus taki baka dati, e yepi wi fu frustan fu san ede Yesus no ben wani du dati. A ben taki: „Mi yuru no doro ete.”

Sensi a yari 29 G.T., di Yesus teki dopu èn di Gado salfu en, a ben sabi heri bun taki Yehovah ben poti en leki a pramisi Mesias, èn taki a ben musu tan getrow. A ben sabi tu taki te fu kaba a ben o dede, taki a ben o kisi wan opobaka, èn taki a ben o kisi glori. Yesus ben taki: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Mateyus 20:28). Di a ten ben e doro taki Yesus ben o dede, dan a ben taki krin: „A yuru doro” (Yohanes 12:1, 23; 13:1). Sobun, di Yesus begi a lasti neti bifo a ben o dede, a taki: „Mi Tata, a yuru doro; gi yu manpikin glori, so  taki yu manpikin kan gi yu glori” (Yohanes 17:1). Èn te fu kaba, di a grupu sma doro na ini Getseimanei fu teki en tyari gowe, dan Yesus wiki den apostel èn a taki: „A yuru doro! Luku! Wan sma o tori a Manpikin fu libisma fu gi en na ini na anu fu sondari.”—Markus 14:41.

Ma na a ten fu a trow-oso na ini Kana, Yesus no ben bigin so langa ete nanga en diniwroko leki Mesias, èn en „yuru” no ben kon ete. A moro prenspari sani gi en, ben de fu du a wani fu en Tata. A ben musu du dati soleki fa en Tata ben wani èn na a ten di en Tata ben feni bun. Nowan sma ben kan tapu en fu du dati, fu di a ben abi a fasti bosroiti fu libi soleki fa en Tata ben wani. Yesus ben wani taki en mama ben musu frustan dati krin, ma a no du dati na wan grofu fasi, noso na wan fasi di e sori taki a no ben abi lespeki gi en. Na a tra sei, Maria no ben e firi syen èn a no ben hati en di en manpikin piki en na so wan fasi. Fu taki en leti, Maria ben frustan san Yesus ben wani sori en, èn dati meki a taigi den sma di ben yepi na a trow-oso: „Un musu du ala san a e taigi unu.” Yesus no du leki a no yere en mama, ma na presi fu dati, a du en fosi wondru leki Mesias; a kenki a watra kon tron bun win. Iya, na wan koni fasi Yesus ben du a wani fu en Tata èn na a srefi ten a sori taki a ben e frustan a broko-ede fu en mama.—Yohanes 2:5-11.

[Prenki na tapu bladzijde 31]

Yesus ben taki na wan switi fasi nanga en mama, ma a ben sori krin tu fa a ben e prakseri fu sani