Bijbel tyari kon na krin suma na a anti-krestes

EFU yu ben sabi taki wan takru siki e kiri sma na ini a birti fu yu, dan san yu ben o du fu no kisi a siki disi? Kande yu ben o dringi dresi fu krakti a skin fu yu èn yu no ben o kon na ini a birti fu sma di abi a siki. Na yeye fasi, wi musu du a srefi sani. Bijbel e sori wi taki na anti-krestes „de kaba na grontapu” (1 Yohanes 4:3). Efu wi no wani kon siki na yeye fasi, dan wi musu kon sabi suma na a anti-krestes, èn wi musu tan fara fu en. Koloku taki Bijbel e yepi wi fu frustan a tori disi moro bun.

A wortu „anti-krestes” wani taki „teige (noso na presi fu) Krestes”. Fu taki en leti, a wortu disi abi fu du nanga ala sma di e gens Krestes nanga den bakaman fu en, èn di e lei taki den na Krestes noso bakaman fu Krestes. Yesus srefi ben taki: „A sma di no de na mi sei, de teige mi [noso de wan anti-krestes]; a sma di no e tyari sani kon na wán makandra nanga mi, e tyari bruya kon.”—Lukas 11:23.

A tru taki Yohanes skrifi fu na anti-krestes moro leki 60 yari baka di Yesus kisi wan opobaka go na hemel. Dati meki, efu wi wani sabi suma na a anti-krestes, dan wi musu kon frustan san a e du nanga den getrow bakaman fu Yesus na grontapu.—Mateyus 25:40, 45.

Na anti-krestes e gens den bakaman fu Krestes

Yesus ben taigi den bakaman fu en taki grontapu ben o abi bita-ati gi den. A ben taki: „Sma o tyari banawtu kon na un tapu èn den o kiri unu; na ini ala kondre den sma o teige unu fu mi nen ede. Furu falsi profeiti o opo kon èn den o kori furu sma.”—Mateyus 24:9, 11.

Fu di den disipel fu Yesus e kisi frufolgu „fu [Yesus] nen ede”, meki a de krin taki den sma di e frufolgu den, na anti-krestes noso sma di de teige Krestes. Den „falsi profeiti” na anti-krestes tu. Sonwan fu den ben de Kresten fosi (2 Yohanes 7). Yohanes ben skrifi taki den ’furu anti-krestes disi gowe libi wi, ma den no ben de leki wi. Bika efu den ben de leki wi, dan den ben o tan nanga wi’.—1 Yohanes 2:18, 19.

 Den sani di Yesus nanga Yohanes taki e sori krin taki na anti-krestes no de wán sma nomo, ma taki furu sma kan de anti-krestes. Boiti dati, fu di den na falsi profeiti, meki wan fu den moro prenspari marki fu den na fu kori sma nanga yepi fu kerkileri. San na wan tu fasi fa den e du disi?

Den e panya falsi kerkileri

Na apostel Paulus ben warskow Timoteyus di ben e wroko makandra nanga en, fu luku bun nanga den leri fu sma di fadon komoto na bribi, sma soleki Himeneyus nanga Fileitus. Den sani di den man disi ben e taki ben „panya leki wan takru soro di e nyan a meti fu a skin”. Paulus ben taki moro fara: „Den srefi man disi gowe libi a waarheid, fu di den e taki dati na opobaka pasa kaba; den e meki tu taki son sma lasi bribi” (2 Timoteyus 2:16-18). Soleki fa a sori, dan Himeneyus nanga Fileitus ben e leri sma taki na opobaka ben e pasa na wan agersi fasi, èn taki Kresten kisi wan opobaka kaba na yeye fasi. A tru taki te wan sma e tron wan disipel fu Yesus, dan na ini Gado ai a sma dati e kon na libi, soleki fa Paulus srefi ben taki krin (Efeisesma 2:1-5). Ma toku den leri fu Himeneyus nanga Fileitus no ben kruderi kwetikweti nanga a pramisi fu Yesus taki den dedewan o kisi wan trutru opobaka na ondro a tiri fu Gado Kownukondre.—Yohanes 5:28, 29.

Bakaten, wan grupu sma ben de di ben e leri sma tu taki na opobaka ben e pasa soso na wan agersi fasi. Den ben e kari den sma disi den Gnostik-sma. A grupu disi ben e bribi taki wan sma e kisi sabi (gnoʹsis na ini Grikitongo), soso te a suku fu frustan son kibritori. Dati meki den ben e moksi falsi Kresten leri nanga Griki filosofia èn nanga den dangra leri fu den sma na a Owstusei fu Asia. Fu eksempre, den Gnostik-sma ben e bribi taki ala sani di sma kan si noso fasi, na ogri sani. Dati meki den ben e taki dati Yesus no ben abi wan libisma skin di a ben de na grontapu, ma taki a ben e gersi nomo taki a ben abi wan libisma skin. Soleki fa wi si, dan na fu a sani  disi na apostel Yohanes ben e warskow Kresten.—1 Yohanes 4:2, 3; 2 Yohanes 7.

Wan tra falsi leri di sma bigin panya hondrohondro yari baka dati, ben de a leri di den e kari a santa Dri-wánfasi. Sma di e bribi na ini a leri disi e taki dati Yesus na a Almakti Gado èn sosrefi a Manpikin fu Gado. Na ini wan buku di a sabiman Alvan Lamson skrifi, a e taki dati a leri fu a Dri-wánfasi ’no de fu feni kwetikweti na ini den Santa Buku fu den Dyu èn fu den Kresten. Na den fosi bakaman fu Plato bigin nanga a leri disi, èn te fu kaba Krestenhèit teki a leri disi abra’ (The Church of the First Three Centuries). Suma ben de den „fosi bakaman” disi fu Plato? Den man disi ben de kerki tiriman di fadon komoto na bribi èn di ben lobi den leri fu a heiden Griki filosofiaman di nen Plato.

A leri fu a Dri-wánfasi ben de wan kefalek bun triki fu na anti-krestes, bika a meki taki sma no ben man frustan moro suma na Gado trutru èn den no ben man si moro taki wan difrenti de na mindri Gado nanga a Manpikin (Yohanes 14:28; 15:10; Kolosesma 1:15). Prakseri a tori disi: Bijbel e gi sma deki-ati fu „kon krosibei na Gado”. Ma fa wan sma o man du dati efu a muilek gi en fu frustan suma na Gado?—Yakobus 4:8.

Wan tra sani di e tyari moro bruya kon na ini a tori, na taki furu sma di vertaal Bijbel, puru a nen fu Gado, namku Yehovah. Ma a nen dati skrifi moro leki 7000 tron na ini den Buku fu Bijbel di ben de biginbigin! Boiti taki den sma disi meki en muilek gi trawan fu kon sabi na Almaktiwan, den puru en nen srefi na ini Bijbel. A de krin taki den man disi no abi lespeki srefisrefi gi wi Mekiman èn gi a Wortu fu en (Openbaring 22:18, 19). Boiti dati, den poti den wortu „Masra” nanga „Gado” na ini a presi fu a nen fu Gado. Dati meki den no e du soleki fa Yesus ben taki na ini a begi di a ben leri sma fu di wan pisi fu a begi dati e taki: „Meki yu nen kon santa.”—Mateyus 6:9.

Den anti-krestes no wani saka densrefi na ondro Gado Kownukondre

Spesrutu na ini „den lasti dei” di wi e libi na ini, den anti-krestes e kori sma moro nanga moro (2 Timoteyus 3:1). Wan prenspari sani di den bedrigiman disi e suku fu du na ini a ten disi, na fu kori sma so taki den no sabi sortu prenspari frantwortu Yesus abi leki kownu na ini Gado hemel Kownukondre di o tiri heri grontapu heri esi.—Danièl 7:13, 14; Openbaring 11:15.

Fu eksempre, son kerki fesiman e preiki taki Gado Kownukondre de na ini sma ati. Bijbel no e horibaka gi a leri disi (Danièl 2:44). Trawan e taki dati Krestes e wroko nanga libisma tirimakti èn libisma organisâsi. Ma Yesus ben taki: „Mi kownukondre no de fu a grontapu disi” (Yohanes 18:36). Iya, a no Krestes, ma na Satan na „a tiriman fu grontapu” èn „a gado fu a grontapu sistema disi” (Yohanes 14:30; 2 Korentesma 4:4). Dati meki heri esi Yesus o pori ala libisma tirimakti èn o tron a wan-enkri Tiriman fu grontapu (Psalm 2:2, 6-9; Openbaring 19:11-21). Na a sani disi sma e aksi te den e begi a Wi Tata begi: „Meki yu kownukondre kon. Meki yu wani pasa na grontapu.”—Mateyus 6:10.

Fu di furu kerki fesiman e horibaka gi a politiek sistema fu a grontapu disi, meki den e gens den wan di e preiki a waarheid fu Gado Kownukondre. Den kerki fesiman e frufolgu den preikiman disi srefi. A moi fu si taki a Bijbel buku Openbaring e taki fu wan agersi huru-uma di nen „Babilon a Bigiwan”. Na uma disi „drungu fu di a dringi a brudu fu den santawan èn a brudu fu den kotoigi fu Yesus” (Openbaring 17:4-6). Na wan agersi fasi, na uma disi e du hurudu sosrefi, fu di a e horibaka gi „den kownu” noso den politiek tiriman fu grontapu, soso fu kisi wini fu dati. Fu taki en leti, na agersi uma disi na den falsi bribi fu grontapu. Babilon a bigiwan na a moro bigi grupu fu den anti-krestes.—Openbaring 18:2, 3; Yakobus 4:4.

Na anti-krestes e ’switi sma yesi’

Furu sma di e kari densrefi Kresten no e bribi na ini Bijbel, èn den no wani hori densrefi na Bijbel gronprakseri tu di e sori fa sma musu tyari densrefi. Na presi fu dati, den e libi soleki fa grontapusma gwenti libi. Gado Wortu ben taki na fesi taki a sani disi ben o pasa: „Wan ten o kon taki den [sma di e taki dati den e dini Gado] no sa frudrage a bun leri, ma na fu di densrefi wani,  meki den o suku leriman gi densrefi fu switi den yesi nanga sani di densrefi wani yere” (2 Timoteyus 4:3). Den falsi leriman disi e leri sma wan lo sani di no tru. Bijbel e taki dati den na „falsi apostel, den na wrokoman di e bedrigi sma, èn den e kenki densrefi kon tron apostel fu Krestes”. Bijbel e taki moro fara: „A kaba fu den sa fiti den wroko fu den.”—2 Korentesma 11:13-15.

Den e libi „wan yayolibi”, èn dati e sori taki den e wisiwasi den Bijbel gronprakseri di e sori fa sma musu tyari densrefi (2 Petrus 2:1-3, 12-14). A no de krin fu si taki furu kerki fesiman èn den bakaman fu den e teki den gwenti abra di no e kruderi nanga den leri fu Krestes? Na presi fu krutu sani soleki homo-sekslibi nanga seks di sma abi sondro fu trow, den kerki fesiman disi e gi sma pasi fu du den sani disi. Teki pikinso ten fu luku san Bijbel e taki fu den denki nanga den gwenti disi di furu sma abi na ini a ten disi. Grantangi, leisi Lefitikus 18:22; Romesma 1:26, 27; 1 Korentesma 6:9, 10; Hebrewsma 13:4; nanga Yudas 7.

’Ondrosuku efu den leri disi e kon fu Gado trutru’

Te wi e prakseri den sani di wi luku didyonsro, dan a de prenspari fu gi yesi na den wortu fu na apostel Yohanes. A ben gi wi a deki-ati fu denki seryusu fu a bribi fu wi. A taki: „No bribi ala sani di gersi leki den e kon fu Gado en yeye, ma ondrosuku den sani disi fu si efu den e kon fu Gado trutru, bika furu falsi profeiti de na grontapu.”—1 Yohanes 4:1.

Luku a bun eksempre fu den sma di ben e tan na ini a foto Berea na ini a fosi yarihondro. Bijbel e taki dati den ben de „klariklari fu teki leri”. „Den ben teki a wortu nanga den heri ati, èn den ben e ondrosuku Gado Buku finifini ibri dei fu si efu den sani disi [di Paulus nanga Silas ben e taki] ben tru” (Tori fu den Apostel 17:10, 11). Iya, aladi den sma fu Berea ben angri fu leri sani, toku den ben ondrosuku efu den sani di den ben yere èn di den ben e bribi, ben komoto trutru na ini den Buku fu Bijbel.

Na so a de na ini a ten disi tu, taki tru Kresten no e teki den denki abra di furu sma abi, ma den e tan hori densrefi na a waarheid fu Bijbel. Na apostel Paulus ben skrifi: „Disi na san mi e tan begi, taki unu kan sori lobi moro nanga moro, èn taki unu kan abi soifri sabi èn ala koni fu man si sani krin.”—Filipisma 1:9.

Efu yu no du dati ete, dan teki a bosroiti fu kon sabi san Bijbel e leri trutru, so taki yu kan kisi „soifri sabi èn ala koni fu man si sani krin”. Den wan di e teki na eksempre fu den Bereasma no e meki den anti-krestes kori den nanga „falsi tori” (2 Petrus 2:3). Na presi fu dati, den tru tori di Bijbel e leri fu Krestes nanga den bakaman fu en, meki den kon fri.—Yohanes 8:32, 36.

[Faki/​Prenki na tapu bladzijde 4]

DEN SANI DI BIJBEL E TAKI FU NA ANTI-KRESTES

„Un yongu pikin, wan syatu pisi ten de ete [soleki fa a sori, dan den apostel no ben o de moro]. Soleki fa unu ben yere, dan na anti-krestes ben o kon; we, nownow kaba furu anti-krestes de.”—1 Yohanes 2:18.

„Suma na a leiman? A no a sma di e taki dati a no e bribi taki Yesus na a Krestes? Na anti-krestes na a sma di e taki dati a no e bribi na ini a Tata nanga a Manpikin.”—1 Yohanes 2:22.

„Te wan sma e taki dati Yesus no kon leki libisma, dan a sani di a taki no kon fu Gado en yeye. Boiti dati, disi na den sani di na anti-krestes taki. Unu yere taki na anti-krestes ben o kon, èn now a de kaba na grontapu.”—1 Yohanes 4:3.

„Furu bedrigiman de na grontapu èn den sma dati e taki krin dati den no e bribi taki Yesus Krestes kon leki wan libisma. Den sma disi na bedrigiman èn den na a anti-krestes.”—2 Yohanes 7.

[Faki/​Prenki na tapu bladzijde 5]

A WAN DI E BEDRIGI TRAWAN NA OMENI FASI

A wortu „anti-krestes” e sori go na ala sma di no wani bribi san Bijbel e taki fu Yesus Krestes, ala sma di e gens a Kownukondre fu en, èn ala sma di e frufolgu den bakaman fu en. A e sori go tu na aparti sma, organisâsi, nanga kondre di e taki dati den e horibaka gi Krestes, aladi dati no tru. Den e prefuru fu taki dati den na a Mesias, fu di den e pramisi sma taki den o tyari trutru vrede kon èn taki den o sorgu taki sani o waka bun, aladi na Krestes wawan kan du den sani dati.

[Sma di abi a reti fu a prenki]

Augustine: ©SuperStock/age fotostock

[Prenki na tapu bladzijde 7]

Wi musu „ondrosuku Gado Buku finifini ibri dei”, neleki den sma fu Berea