Fu san ede wi musu kon sabi suma na a anti-krestes?

„Soleki fa unu ben yere, dan na anti-krestes ben o kon”, na so na apostel Yohanes ben skrifi nanga yepi fu santa yeye, langa ten kaba (1 Yohanes 2:18). Den wortu disi e hari sma prakseri trutru! Hondrohondro yari langa, sma e aksi densrefi san den wortu disi wani taki. Suma na a anti-krestes? O ten a o kon? San a o du te a kon?

NA INI den yari di pasa, furu sma kisi a nen anti-krestes. Na ini a ten di pasa, den wan di sma ben e kari anti-krestes, ben de Dyu, pawsu fu a Katolik Kerki, nanga kèiser fu Rome. Fu eksempre, di Kèiser Frederik II (1194-1250) bosroiti fu no feti wán fu den feti fu a kerki, dan Pawsu Gregorius IX kari en na anti-krestes èn a meki bekènti taki Frederik no de wan memre fu a kerki moro. Innocentius IV, a Pawsu di kon baka Gregorius, ben du a srefi sani baka nanga Frederik. Frederik fu en sei, taki dati Innocentius na a anti-krestes.

Na apostel Yohanes na a wan-enkri Bijbel skrifiman di gebroiki a wortu „anti-krestes”. Na ini tu fu den brifi di e tyari a nen fu en, Yohanes gebroiki a wortu feifi tron. Son leisi a e taki fu wán anti-krestes, èn wan tra leisi a e taki fu wan grupu anti-krestes. Den vers pe a wortu disi skrifi na ini, de fu si na ini a faki na tapu a tra bladzijde. Den vers disi e sori taki na anti-krestes na wan leiman nanga wan bedrigiman, èn a abi a fasti bosroiti fu pori a matifasi di wan sma abi nanga Krestes èn nanga Gado. Dati meki na apostel e gi tra Kresten a deki-ati disi: „Un lobiwan, no bribi ala sani di gersi leki den e kon fu Gado en yeye, ma ondrosuku den sani disi fu si efu den e kon fu Gado trutru, bika furu falsi profeiti de na grontapu.”—1 Yohanes 4:1.

Yesus ben warskow den disipel fu en sosrefi, fu luku bun nanga bedrigiman, noso falsi profeiti. A ben taki: „Den e kon na unu na ini krosi di e meki den gersi skapu, ma na ini den ati den na ogri busidagu. Na den froktu fu den [noso den sani di den e du], unu sa si suma na den” (Mateyus 7:15, 16). A de so taki nanga den wortu disi, Yesus ben e warskow den bakaman fu en fu luku bun nanga na anti-krestes? Meki wi go luku fa wi kan kon sabi suma na a ogri-ati bedrigiman disi.