Lobi a Gado di lobi yu
Lobi a Gado di lobi yu
„Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.”—MATEYUS 22:37.
1, 2. San ben kan meki taki den Fariseiman go aksi Yesus sortuwan fu den wet na a moro prenspariwan?
NA INI a ten fu Yesus, den Fariseiman ben e haritaki fu wan prenspari aksi. Moro leki 600 wet ben skrifi na ini a Wet fu Moses. Ma now den Fariseiman ben e aksi densrefi sortuwan fu den wet disi ben de a moro prenspariwan. A ben de wan wet di abi fu du nanga den ofrandi? Bika te yu luku en bun, dan sma ben e tyari ofrandi fu kisi pardon fu sondu èn fu gi tangi na Gado. Noso a ben de so taki a moro prenspari wet ben de a wan di ben abi fu du nanga a besnèi di den ben musu besnèi? Dati ben de wan prenspari wet tu, fu di a ben memre den na a frubontu di Yehovah ben meki nanga Abraham.—Genesis 17:9-13.
2 Na a tra sei, yu ben abi den Dyu di ben e hori nomonomo na den owru gwenti. Soleki fa a sori, dan den man disi ben e feni taki ala den wet fu Gado de prenspari. Dati meki den ben e denki taki a ben o fowtu fu taki dati wán wet prenspari moro ala trawan, awinsi a ben e gersi leki wan tu fu den wet no ben de so prenspari. Fu di den Fariseiman disi no ben man agri nanga a tori, meki den bosroiti fu poti na aksi disi gi Yesus. Den ben howpu taki Yesus ben o taki wan sani di ben o meki taki sma no bribi en moro. Wan fu den Fariseiman go na Yesus, èn a aksi en: „San na a moro bigi komando na ini a Wet?”—Mateyus 22:34-36.
3. Soleki fa Yesus taki, dan sortuwan fu den komando ben de a moro prenspariwan?
3 A piki di Yesus gi den, prenspari trutru gi wi na ini a ten disi. A piki fu en e sori wi san ben o de a moro prenspari wet na ini a tru anbegi ala ten. Yesus ben piki den nanga den wortu di skrifi na ini Deuteronomium 6:5, taki: „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando.” A Fariseiman ben aksi fu wán komando nomo, ma Yesus gi en wan trawan tu. A piki den nanga den wortu di skrifi na ini Lefitikus 19:18: „A di fu tu komando de leki a wan disi, èn dati na: ’Yu musu lobi tra sma leki fa yu lobi yusrefi.’” Baka dati, Yesus sori den taki den tu wet disi na den moro prenspariwan fu a tru anbegi. Fu meki taki den no aksi en fu kari wan heri ipi komando baka makandra fu sori sortuwan de moro prenspari, dan Yesus tapu nanga den wortu disi: „A heri Wet nanga den leri fu den Profeiti e anga na den tu komando disi” (Mateyus 22:37-40). Na ini na artikel disi, wi sa poti prakseri na a moro prenspariwan fu den tu komando. Fu san ede wi musu lobi Gado? Fa wi kan sori taki wi lobi Gado? Èn fa wi kan kon kisi lobi gi En? A de tumusi prenspari fu kon sabi den piki tapu den aksi disi, bika efu wi wani plisi Yehovah, dan wi musu lobi en nanga wi heri ati, sili, nanga frustan.
O prenspari lobi de?
4, 5. (a) Fu san ede a Fariseiman no fruwondru di a yere a piki fu Yesus? (b) Sortu sani warti moro gi Gado leki bron-ofrandi nanga srakti-ofrandi?
4 A gersi leki a Fariseiman di ben poti na aksi, no skreki di a yere a piki fu Yesus èn a no ben e fruwondru tu. A ben sabi taki lobi gi Gado na Deuteronomium 6:4-9. Disi ben de den srefi wortu di Yesus ben kari di a piki na aksi fu a Fariseiman. Soleki fa a buku Markus e sori, dan a Fariseiman piki Yesus: „Leriman, yu taki en soleki fa a de trutru: ’A de Wán, èn nowan trawan no de, boiti En wawan’; wi musu lobi en nanga wi heri ati èn nanga wi heri frustan èn nanga ala wi krakti, èn wi musu lobi tra sma leki fa wi lobi wisrefi; den sani disi warti moro ala bron-ofrandi nanga srakti-ofrandi.”—Markus 12:32, 33.
wan prenspari sani fu a tru anbegi. Ma furu sma no ben sori a lobi disi. Na ini a snoga, den Dyu ben gwenti fu leisi den wortu fu a Syema nanga wan tranga sten. Disi ben de wan Hebrew begi pe sma ben e taki den wortu di skrifi na ini5 A tru taki a Wet ben e sori taki den Dyu ben musu tyari bron-ofrandi nanga srakti-ofrandi. Ma a moro prenspari sani gi Gado na taki den futuboi fu en musu lobi en nanga den heri ati. Efu wan sma di lobi Gado nanga en heri ati, ben o tyari wan pikin fowru leki ofrandi, dan dati ben o moro warti leki te wan sma di no de opregti, ben o tyari dusundusun skapu (Mika 6:6-8). Prakseri a tori fu a pôti uma di Yesus ben si na ini a tempel fu Yerusalem. Den tu pikin sensi di na uma ben poti na ini a monikisi, no ben nofo fu bai wán pikin fowru srefi. Ma na uma ben poti a moni dati fu di a lobi Yehovah nanga en heri ati. Dati meki a moni dati ben warti gi Yehovah moro leki a moni di den gudusma ben e poti, bika den ben poti san ben tan abra fu a moni fu den (Markus 12:41-44). A e gi deki-ati fu sabi taki awinsi na ini sortu situwâsi wi de, wi alamala kan gi Yehovah wan sani di a e warderi moro iniwan tra sani. A sani dati na lobi!
6. Fa Paulus sori o prenspari lobi de?
6 Na apostel Paulus ben sori o prenspari lobi de na ini a tru anbegi, di a skrifi den wortu disi: „Awinsi mi e taki den tongo fu libisma èn fu engel, ma mi no abi lobi, dan mi kon de leki wan pisi kopro di e meki babari, noso leki wan gengen di no e loi so moi. Èn awinsi mi abi a presenti fu taki profeititori èn mi sabi ala den santa kibritori èn sosrefi ala sani di de fu sabi, èn awinsi mi abi so wan tranga bribi taki mi man opo bergi poti na wan tra presi, ma mi no abi lobi, dan toku mi no de noti. Awinsi mi e gi ala sani san mi abi so taki trawan man nyan, èn awinsi mi e gi mi skin leki wan srakti-ofrandi fu man meki bigi, ma mi no abi lobi, dan dati no e tyari nowan enkri wini kon gi mi” (1 Korentesma 13:1-3). A de krin taki wi musu abi lobi efu wi wani taki Gado breiti nanga na anbegi fu wi. Ma fa wi kan sori taki wi lobi Yehovah?
Fa wi kan sori taki wi lobi Yehovah?
7, 8. Fa wi kan sori taki wi lobi Yehovah?
7 Furu sma e bribi taki lobi na wan firi nomo di yu no man basi. Son leisi wi e yere sma e taki fu lobi firi. Ma trutru lobi a no wan firi nomo. A lobi disi de fu si na den sani di wi e du. Wi no e firi en nomo. Bijbel e taki dati lobi ’bun moro ala tra sani’ èn taki wi musu „du ala muiti” fu sori lobi (1 Korentesma 12:31; 14:1). Kresten e kisi a deki-ati fu no sori ’lobi gi makandra nanga wortu nomo noso nanga san den e taki, ma sosrefi nanga san den e du èn nanga waarheid’.—1 Yohanes 3:18.
8 Te wi lobi Gado, dan wi o du sani di e plisi en. Nanga den sani di wi e taki èn den sani di wi e du, wi o sori taki wi e horibaka gi a tirimakti fu en. Wi no sa lobi grontapu èn den ogri sani di grontapusma e du (1 Yohanes 2:15, 16). Sma di lobi Gado, no lobi ogridu kwetikweti (Psalm 97:10). Efu wi lobi Gado, wi o lobi tra sma tu. Na ini a tra artikel wi sa poti prakseri na a tori disi. Boiti dati, efu wi lobi Gado, dan wi musu gi yesi na en. Bijbel e taki: „Disi na san a lobi fu Gado wani taki, dati wi e hori wisrefi na den komando fu en.”—1 Yohanes 5:3.
9. Fa Yesus sori taki a lobi Gado?
9 Yesus sori heri bun san a wani taki fu lobi Gado. Fu di a lobi Gado, meki a ben gowe libi en tanpresi na ini hemel fu kon libi na grontapu leki wan libisma. Fu di a lobi en Tata, meki a gi glori na En nanga den sani di a ben e du èn nanga den sani di a ben e leri sma. Lobi meki taki a „gi yesi te na dede” (Filipisma 2:8). Iya, Yesus gi yesi fu di a lobi Gado. Fu di a du dati, meki den sma di e tan getrow, man de regtfardiki na ini Gado ai. Paulus ben skrifi: „Neleki fa furu sma tron sondari fu di a wán man dati [Adam] trangayesi Gado, na so furu sma o kon de regtfardiki fu di wán sma [Krestes Yesus] gi yesi na Gado.”—Romesma 5:19.
10. Efu wi lobi Gado, dan fu san ede wi musu gi yesi na en?
10 Neleki Yesus, wi e sori Gado taki wi lobi en te wi e gi yesi na En. Yohanes, na apostel di Yesus ben lobi trutru, ben skrifi: „Disi na lobi, namku taki wi musu tan waka soleki fa den komando fu en e taki” (2 Yohanes 6). Den wan di lobi Yehovah trutru, wani taki a tiri den. Fu di den sabi taki densrefi no man tiri den eigi libi na wan bun fasi, meki den e frutrow tapu a koni fu Gado èn den e hori densrefi na den rai di a e gi fu di a lobi den (Yeremia 10:23). Den de neleki den Bereasma di ben de klariklari fu teki leri èn di ben teki a boskopu fu Gado „nanga den heri ati”, fu di den ben e angri trutru fu du a wani fu Gado (Tori fu den Apostel 17:11). Den ben e ondrosuku den Buku fu Bijbel finifini, so taki den ben kan frustan a wani fu Gado moro bun èn so taki den ben kan gi yesi na en na ini tra sani tu. Na so fasi den ben man sori moro lobi gi Gado.
11. San a wani taki fu lobi Gado nanga wi heri ati, frustan, sili, nanga krakti?
11 Soleki fa Yesus ben taki, dan wi musu lobi Gado nanga wi heri ati, frustan, sili, nanga krakti (Markus 12:30). A lobi disi e komoto fu na ati. Sobun, a abi fu du nanga den firi fu wi, den sani di wi wani du, èn den dipi prakseri fu wi. Te wi lobi Yehovah, wi wani plisi en trutru. Wi lobi Gado nanga wi frustan tu. Dati wani taki dati wi no e dini wan Gado di wi no sabi. Wi kon sabi fa Yehovah de, san na den markitiki fu en, èn san a abi na prakseri fu du. Wi e gebroiki wi sili, noso wi heri libi, fu dini Gado èn fu prèise en. Èn wi e gebroiki wi krakti tu fu dini èn fu prèise en.
Fu san ede wi musu lobi Yehovah?
12. Fu san ede Gado wani taki wi musu lobi en?
12 Wán reide fu san ede wi musu lobi Yehovah, na fu di a wani taki wi musu sori den srefi fasi fu en. Lobi e kon fu Gado, èn en gi wi a moro bun eksempre fa fu sori lobi. Nanga yepi fu santa yeye, na apostel Yohanes ben skrifi taki „Gado na lobi” (1 Yohanes 4:8). Libisma meki leki wan prenki fu Gado. Gado meki wi na so wan fasi taki wi kan sori lobi. Fu taki en leti, a heri fasi fa Yehovah e tiri, e sori taki a abi lobi. A wani taki den sma di e anbegi en, musu de sma di lobi a regtfardiki fasi fa a e tiri, èn di wani saka densrefi na en ondro trutru. Fu tru, efu sma wani vrede nanga wánfasi, dan den musu abi lobi.
13. (a) Fu san ede den Israelsma ben kisi a komando: „Yu musu lobi Yehovah yu Gado”? (b) Fu san ede Yehovah no e aksi furu fu wi te a e taki dati wi musu lobi en?
13 Wan tra reide fu san ede wi lobi Yehovah, na fu di wi abi warderi gi den sani di a du gi wi. Memre san Yesus ben taigi den Dyu: „Yu musu lobi Yehovah yu Gado.” Den no ben kisi a komando fu lobi wan Gado di no e broko en ede nanga den èn di den no sabi. Den ben musu lobi a Gado di sori taki a lobi den. Yehovah ben de den Gado. Na en ben frulusu den fu Egepte fu tyari den go na a Pramisi Kondre. Na En ben kibri den, sorgu den, èn lobi den. En na a sma di gi den trangaleri na wan lobi-ati fasi. Na ini a ten disi, Yehovah na wi Gado, a sma di gi en Manpikin leki wan lusu-paiman so taki wi kan kisi têgo libi. Dati meki, te Yehovah e taki dati wi musu lobi en baka, a no e aksi furu fu wi! Wi e sori lobi, fu di A lobi wi. Wi e kisi a deki-ati fu lobi a Gado di lobi wi. Wi lobi a Sma ’di ben lobi wi fosi’.—1 Yohanes 4:19.
14. Na sortu fasi a lobi fu Yehovah de leki a lobi fu wan papa noso mama?
14 Yehovah lobi a libisma famiri neleki fa wan papa noso mama lobi den pikin fu en. Aladi papa nanga mama abi sondu, toku den e wroko tranga fu sorgu gi den pikin fu den furu yari langa. Fu di den lobi den pikin fu den, meki den e sorgu gi den awinsi o furu a e kostu den, èn awinsi sortu muiti den musu du. Papa nanga mama e gi den leri, den e gi den deki-ati, den e horibaka gi den, èn den e gi den trangaleri,
fu di den wani taki den pikin musu de koloku èn den wani taki sani waka bun nanga den. San papa nanga mama e fruwakti dan fu den pikin? Den wani taki den pikin musu lobi den èn taki den no musu frigiti den bun sani di den papa nanga mama leri den. Wi kan frustan fu san ede wi volmaakti hemel Tata e fruwakti taki wi lobi en èn taki wi e sori warderi gi ala den sani di a du gi wi, a no so?Fa wi kan kon kisi lobi gi Gado?
15. San na a fosi sani di wan sma musu du fu kon kisi lobi gi Gado?
15 Noiti wi si Gado, noso yere a sten fu en (Yohanes 1:18). Toku a e gi wi a kari fu abi wan krosibei matifasi nanga en (Yakobus 4:8). Fa wi kan du dati? A fosi sani di wi musu du fu kon kisi lobi gi wan sma, na fu kon leri sabi en. A muilek fu lobi wan sma di wi no sabi. Yehovah gi wi en Wortu, Bijbel, so taki wi kan leri sabi en. Dati meki Yehovah e gi wi a deki-ati nanga yepi fu en organisâsi, fu leisi Bijbel doronomo. Na Bijbel e leri wi fu Gado, fu a fasi fa a de èn fu a fasi fa a handri nanga en pipel dusundusun yari langa. Te wi e denki dipi fu den tori disi, dan wi o kon sabi en moro bun, èn wi o lobi en moro nanga moro.—Romesma 15:4.
16. Fa wi o kisi moro lobi gi Gado te wi e poti prakseri na a diniwroko fu Yesus?
16 Wan prenspari fasi fa wi kan kon kisi moro lobi gi Yehovah, na te wi e poti prakseri na a libi èn a diniwroko fu Yesus. Te yu luku en bun, Yesus sori den fasi fu en Tata na wan heri bun fasi. Dati meki a ben kan taki: „A sma di si mi, si a Tata tu” (Yohanes 14:9). A no e naki yu ati fu si fa Yesus sori sari-ati di a gi a wan-enkri manpikin fu wan uma wan opobaka? (Lukas 7:11-15) A no moi fu sabi taki Yesus, a Manpikin fu Gado èn a moro bigi man di oiti libi, saka ensrefi fu wasi den futu fu den disipel fu en? (Yohanes 13:3-5) A no e gi yu deki-ati fu sabi taki nowan sma ben e frede fu kon na en? Srefi pikin-nengre no ben frede fu go na en, awinsi a ben bun èn koni moro ala tra sma (Markus 10:13, 14). Te wi e denki dipi fu den sani disi èn te wi e warderi den, dan wi e tron leki den Kresten fu suma Petrus ben skrifi: „Noiti unu no si Krestes, ma toku unu lobi en” (1 Petrus 1:8). Te wi e kisi moro lobi gi Yesus, dan wi o kisi moro lobi gi Yehovah tu.
17, 18. Sortu sani di Yehovah seti gi wi na wan lobi-ati fasi, kan meki wi kisi moro lobi gi en te wi e denki dipi fu den?
17 Wan tra fasi fa wi kan kisi moro lobi gi Gado, na te wi e prakseri dipi fu den furu sani di a seti gi wi so taki wi kan prisiri fu a libi. Prakseri fu den moi sani di a meki, den difrenti switi sani di wi kan nyan, den bun mati di wi abi, èn den someni tra sani di e meki wi prisiri èn e meki wi firi bun (Tori fu den Apostel 14:17). O moro wi e kon sabi wi Gado, o moro wi o si fa a bun èn fa a lobi fu gi sani. Dati o meki wi kisi moro warderi gi en. Prakseri fu ala den sani di Yehovah du gi yu na ini yu eigi libi. Yu no feni taki yu musu sori lobi gi en?
18 Wan fu den sani di Gado gi wi, na a grani di wi abi fu taki nanga en na ini begi na iniwan momenti. Wi sabi taki a „Yereman fu begi” e arki wi (Psalm 65:2). Yehovah gi en lobi Manpikin a frantwortu fu tiri èn fu krutu sma. Ma a no gi nowan sma a frantwortu fu arki den begi fu wi. Srefi en Manpikin a no gi a grani dati. Yehovah srefi e arki den begi fu wi. Fu di Yehovah e poti prakseri na ibriwan fu wi na so wan lobi-ati fasi, meki wi e kisi wan moro bun banti nanga en.
19. Sortu pramisi fu Yehovah e meki wi kisi wan moro bun banti nanga en?
19 Wi kan kisi wan moro bun banti tu nanga Yehovah, te wi e prakseri fu den sani di a o du ete gi a libisma famiri. A pramisi wi taki a o tyari wan kaba kon na siki, sari, nanga dede (Openbaring 21:3, 4). Te libisma kon volmaakti kaba, dan nowan sma o firi brokosaka noso lasi-ati, èn nowan sma o pina tu. Angriten, pôtisma, nanga orloku no sa de moro (Psalm 46:9; 72:16). Grontapu o tron wan paradijs (Lukas 23:43). Yehovah sa blesi wi nanga den sani disi, a no fu di a musu du dati, ma fu di a lobi wi.
20. Soleki fa Moses ben taki, dan sortu wini a abi te wi lobi Yehovah?
20 Fu dati ede, wi abi bun reide fu lobi wi Gado èn fu meki a lobi dati kon moro tranga. Yu sa tan meki a lobi di yu abi gi Gado kon moro tranga? Yu sa meki Gado tiri yu? A didon na yu. Moses ben sabi sortu wini a e gi te wan sma e kisi lobi gi Yehovah èn te a e sorgu taki a lobi dati tan. Langa ten pasa, Moses ben taigi den Israelsma: „Yu musu teki a libi so taki yu kan tan na libi, yu nanga yu bakapikin, te yu lobi Yehovah, yu Gado, te yu e arki en sten èn te yu e tai hori na en; bika a e gi libi, èn a kan meki yu libi fu wan langa pisi ten.”—Deuteronomium 30:19, 20.
Yu e memre disi ete?
• Fu san ede a de prenspari fu lobi Yehovah?
• Fa wi kan sori taki wi lobi Gado?
• Sortu reide wi abi fu lobi Yehovah?
• Fa wi kan kon kisi lobi gi Gado?
[Aksi fu a tori disi]
[Prenki na tapu bladzijde 20]
Yehovah e warderi a sani di wi alamala kan sori en, èn dati na lobi
[Prenki na tapu bladzijde 23]
„A sma di si mi, si a Tata tu.”—Yohanes 14:9