Sma kan gi rai na wan krutuman?

SLADJANA, wan Yehovah Kotoigi na ini Krowâsia, ben musu go na fesi krutu fu seti moni afersi. A sisa disi doro biten na fesi a krutuman, ma na afkati ben lati. Sladjana ben angri fu gi kotoigi. Sobun, di ala sma ben e wakti, dan a teki deki-ati fu taki nanga a krutuman.

Sladjana aksi a krutuman: „Masra, yu sabi taki heri esi krutuman nanga krutubangi no o de moro na grontapu?” A no de fu taki dati a ben e taki fu krutuman soleki fa wi sabi den na ini a ten disi.

Fu di a krutuman ben e fruwondru fu a tori, meki a luku a sisa nomo sondro fu taki wan sani. Leti na a momenti dati, a krutu ben bigin. Di a krutu kaba, dan Sladjana opo tanapu fu poti en nen na tapu wan dokumenti. Ne a krutuman anga kon na a sei fu Sladjana, èn a aksi en safri: „Yu de seiker taki wan ten o de te krutuman nanga krutubangi no sa de moro na grontapu?”

Sladjana piki: „Iya masra. Mi no e tweifri fu dati kwetikweti!”

A krutuman aksi en: „Sortu buweisi yu abi gi dati?”

Sladjana piki en: „A buweisi skrifi na ini Bijbel.”

A krutuman taki dati a ben sa wani leisi a buweisi dati, ma a no ben abi wan Bijbel. Dati meki Sladjana taigi en taki a ben o suku wan gi en. Di den Kotoigi go fisiti a krutuman, den gi en wan Bijbel, èn den gi en deki-ati fu studeri Bijbel nanga den ibri wiki. A krutuman bigin studeri Bijbel nanga den èn heri esi a tron wan Yehovah Kotoigi.

Psalm 2:10 ben taki na fesi: „We dan, o kownu, un sori taki unu abi a koni fu man si sani krin; teki a rai di unu e kisi, o krutuman fu grontapu.” A e naki wi ati trutru te den sortu sma disi e saka densrefi èn e meki Yehovah tiri den na wan lobi-ati fasi!

[Prenki na tapu bladzijde 32]

Sladjana nanga a krutuman