Yu e kisi wini te yu de opregti

SENSI a ten fu Eden, sma e bedrigi trawan. Ma na ini furu kulturu nanga libimakandra, sma e si en leki wan bun sani ete te trawan de opregti, èn den no lobi te sma e lei noso e bedrigi trawan. Wan sma musu breiti te trawan e frutrow en. Ma moro nanga moro sma na ini a ten disi feni taki a de fanowdu fu lei efu den wani go na fesi na ini a libi. Fa yu e si a tori? Yu feni taki a abi wini te yu de opregti? San a wani taki gi yu fu de opregti?

Efu wi wani plisi Gado, dan wi no musu lei èn wi no musu bedrigi trawan. Na apostel Paulus ben gi den Kresten brada fu en deki-ati: „Ibriwan fu unu musu taki san tru te unu e taki nanga trawan” (Efeisesma 4:25). Paulus ben skrifi tu: „Wi wani du ala sani na wan opregti fasi” (Hebrewsma 13:18). Wi no musu de opregti soso fu di wi wani taki sma prèise wi. Wi de opregti fu di wi abi lespeki gi wi Mekiman èn wi wani plisi en.

No suku fu kori trawan, soso fu no meki den sabi fa yu de trutru

Na ini furu kondre, sma e fruteri lei, fu di den no wani meki trawan sabi fa den de trutru. Na so fasi den e suku fu kisi wini gi densrefi. Den e gebroiki sani soleki falsi ID-karta fu man go na ini wan tra kondre, noso falsi skoropapira fu feni wan wroko. Son papa nanga mama e meki falsi geborte karta gi den pikin fu den, so taki den pikin kan go doro na skoro.

Ma efu wi wani plisi Gado, dan wi no musu bedrigi sma. Bijbel e taki dati Yehovah na „a Gado fu waarheid”, èn a wani taki den sma di de mati fu en, musu de opregtisma (Psalm 31:5). Efu wi wani tan bun mati fu Yehovah, dan wi no kan de leki „den man di no lobi waarheid”, èn di „e kibri san den de trutru”.—Psalm 26:4.

Sma abi a gwenti tu fu lei te den sabi taki den o kisi piri-ai fu wan ogri di den du. Srefi na ini a Kresten gemeente, wan sma ben sa kan kisi a firi fu du so wan sani. Fu eksempre, wan brada na ini wan gemeente ben taigi den owruman taki a ben du wan tu ogri. Ma a no taigi den taki a ben fufuru, aladi buweisi ben de taki a brada ben fufuru. Te fu kaba, a kon na krin taki a brada disi ben e lei èn den owruman ben abi fu puru a brada disi na ini a gemeente. A ben o moro bun te a brada disi no ben pruberi fu kori trawan, a no so? Efu a no ben lei, den ben kan yepi en fu kisi wan bun banti nanga Yehovah baka. Bika te yu  luku en bun, Bijbel e taki: „No si a strafu fu Yehovah leki wan pikin sani, èn no lasi-ati tu te a e piri-ai gi yu; bika Yehovah e strafu a sma di a lobi.”—Hebrewsma 12:5, 6.

Kande wan brada wani moro frantwortu na ini a gemeente, ma a no wani meki sma sabi taki a abi problema, noso taki a du wan ogri. Fu eksempre, kande a brada kisi wan papira pe a musu piki wan tu aksi di de fanowdu fu kisi wan spesrutu grani. Kande a musu skrifi fa a de nanga a gosontu fu en èn fa a e tyari ensrefi. Ma a no e taki fa sani de trutru, bika a e frede taki den sani disi ben o meki taki a no kisi a grani. Kande a e prakseri: ’A no lei mi lei.’ Ma a ben de opregti trutru? Luku san skrifi na ini Odo 3:32: „Bika Yehovah e tegu gi wan sma di e bedrigi trawan, ma A de bun mati nanga den opregtiwan.”

Te wi wani de opregti, dan a prenspari taki wi no kori wisrefi. Nofo tron wi e bribi san wi wani, aladi wi sabi san bun èn san tru. A makriki fu taki dati na trawan abi a fowtu! Fu eksempre, di Kownu Saul ben trangayesi Gado, dan a ben pruberi fu gi trawan a fowtu. Fu dati ede Yehovah puru en leki kownu (1 Samuel 15:20-23). Ma Kownu David ben de heri tra fasi. A ben begi Yehovah: „Te fu kaba, mi ben taigi yu mi sondu, èn mi no ben tapu mi fowtu. Mi ben taki: ’Mi sa taigi Yehovah den fowtu fu mi.’ Ne yusrefi gi mi pardon fu den sondu fu mi.”—Psalm 32:5.

 Yu sa kisi furu blesi te yu de opregti

Te yu de opregti, dan dati o abi krakti tapu a fasi fa sma e prakseri fu yu. Na so a de tu te yu no de opregti. Efu sma sabi taki yu kori den, awinsi na wán leisi nomo, dan den no sa frutrow yu moro, èn a no makriki fu meki den frutrow yu baka. Ma efu yu na wan sma di no e lei èn di no e bedrigi trawan, dan den sa kon sabi yu leki wan opregti sma di den kan frutrow. Na so sma sabi Yehovah Kotoigi. Luku wan tu eksempre.

Wan driktoro fu wan bisnis ben kon si taki furu wrokoman fu en ben e fufuru en. Fu dati ede a kari skowtu kon fu ondrosuku a tori. Di a yere taki skowtu sroto wan wrokoman fu en di ben de wan Yehovah Kotoigi, dan a go aksi skowtu fu lusu a Kotoigi wantewante. Fu san ede a driktoro du a sani disi? Fu di a ben sabi taki a sma disi ben de wan wrokoman di no ben e bedrigi trawan èn di no ben e fufuru. A driktoro yagi ala den trawan, ma a Kotoigi no lasi en wroko. Den tra Kotoigi ben breiti, fu di den ben sabi taki a fasi fa a brada tyari ensrefi, ben gi Yehovah nen grani.

Sma e si te trawan e tyari densrefi na wan bun fasi. Na wan presi na ini Afrika, sma ben fufuru wan tu udu planga fu wan broki di ben abra wan bigi gotro, èn fu dati ede a broki ben musu meki baka. Den sma fu a presi drape ben bosroiti fu tyari moni kon na wán, so taki den ben kan bai nyun planga. Ma suma den ben kan aksi fu hori a moni? Ala sma ben agri taki na soso wan Kotoigi fu Yehovah ben kan hori a moni.

Na ini wan Afrikan kondre, feti ben broko fu di furu problema ben de na politiek sei, èn dyugudyugu ben de na mindri sma fu difrenti ras. Wan Kotoigi drape ben e luku den monitori fu wan bun bigi bisnis. Ma fu di a ben kan lasi en libi, meki den seni en go na wan tra kondre wan tu mun teleki a feti ben tapu. A heri pisi ten di a ben de drape, a bisnis pai ala den kostu gi en. Fu san ede den du disi? Fu di wan pisi ten na fesi, a Kotoigi no ben wani yepi wan grupu sma di ben wani fufuru moni fu a wrokope. Den basi ben sabi taki a Kotoigi disi ben de opregti ala ten. Den ben o yepi a wrokoman disi efu den ben sabi taki a ben e fufuru?

Odo 20:7 e taki: „A regtfardikiwan e du san reti.” Wan opregti sma e du san reti ala ten. Noiti a e bedrigi noso e kori trawan. A no so yu wani taki trawan musu handri nanga yu? Na ini a tru anbegi a de prenspari taki wi de opregti. Na a fasi disi wi e sori Gado nanga tra sma taki wi lobi den. Te wi de opregti, wi e sori taki wi wani du san Yesus ben taki, namku: „Ala sani di unu wani meki sma du gi unu, na dati un musu du gi den tu.”—Mateyus 7:12; 22:36-39.

Son leisi te wi de opregti, sani kan miti wi di no switi. Ma te wi de opregti, wi sa abi wan krin konsensi èn dati bun moro iniwan sani di ben kan miti wi. Wan opregti sma sa kisi furu blesi te fu kaba. Fu tru, wan bun banti nanga Yehovah warti moro ala tra sani. Wi no musu bedrigi trawan fu di wi no wani meki wi fesi fadon, noso fu di wi wani kisi wini na wan kruka fasi. Dati kan pori a banti di wi abi nanga Yehovah. Disi no ben o de wan koni sani, a no so? Awinsi sortu problema e miti wi, wi sa ondrofeni san a psalm skrifiman taki: „Koloku fu a tranga man di e frutrow tapu Yehovah. A no e luku den trangayesi sma, noso den sma di abi a gwenti fu lei.”—Psalm 40:4.

[Prenki na tapu bladzijde 18]

Tru Kresten no e bai noso gebroiki falsi papira