Ebla—Wan owruten foto di sma feni

PREI

Ebla—Wan owruten foto di sma feni

Na ini a waran pisi ten fu a yari 1962, Paolo Matthiae, wan yonguman fu Italiakondre di ben de sabiman fu owruten sani, ben e ondrosuku den lagi opo presi na a noord westsei fu Siria. A ben e du dati, sondro fu sabi efu a ben o feni wan sani. Sabiman fu owruten sani ben e denki taki furu owruten sani no ben de fu feni na a mindri pisi fu Siria. Ma tu yari baka dati, di den bigin diki a gron na Tell Mardikh noso a bergi Mardikh di de sowan 60 kilometer na a zuidsei fu Aleppo, dan den feni wan sani di furu sma e si leki ’a moro prenspari owruten sani di sabiman feni na ini a di fu 20 yarihondro’.

SKRIFIMARKI na tapu owruten sani ben e sori taki a foto Ebla ben de trutru. Ma nowan sma ben sabi na ondro sortuwan fu den pikin bergi di lai na ini a kontren fu a Mindri Owstusei, den ben kan feni a foto dati. Na tapu wan fu den owruten sani a tori ben skrifi di ben abi fu du nanga Sargon, a kownu fu Akkad, di ben wini „Mari, Yarmuti, nanga Ebla”. Na tapu wan tra owruten sani a skrifi taki Kownu Gudea fu Sumeria ben taki fu a diri udu di a ben kisi èn di ben komoto fu „den bergi fu Ibla [Ebla]”. Na tapu wan owruten sani na ini a foto Karnak, na Egepte, a skrifi tu taki Ebla ben de wan fu den foto di Farao Thoetmozes III ben teki abra. Yu kan frustan fu san ede sabiman fu owruten sani ben pruberi fu feni Ebla.

Ma di den go diki a gron na tra presi dan den ben abi bun bakapisi. Na ini 1968, den feni wan pisi fu a stonpopki fu Ibbit-Lim, wan kownu fu Ebla. Na tapu a stonpopki wan sweri ben skrifi na ini na Akadiatongo, èn disi ben e sori taki a stonpopki disi ben gi abra na a umagado Isjtar, di ben de wan „tumusi prenspari gado na ini Ebla”. Iya, den owruten sani di sabiman feni, bigin tyari kon na krin taki „wan tongo, wan historia, nanga wan kulturu” ben de di den no ben sabi ete.

Na ini a pisi ten fu 1974 nanga 1975, sma feni plata pisi kleidoti pe a nen fu a foto Ebla ben skrifi furu leisi na tapu na ini owruten skrifimarki. A sani disi ben de wan buweisi taki Ebla fu owruten ben de na a presi pe Tell Mardikh de now. Den sani di sma diki puru na ini a gron, e sori tu taki a foto disi ben seti tu leisi. Ebla ben de wan prenspari foto, di a kisi pori a fosi leisi. Baka dati, sma bow a foto baka, ma a kisi pori baka èn hondrohondro yari langa sma no ben sabi noti moro fu a foto disi.

Wan foto di abi difrenti historia

Den moro owru foto fu fositen ben bow na tapu opo presi pe liba ben wasi a santi go na syoro, soleki a kontren na mindri a Tigrisliba nanga na Eufraatliba, pe sma ben e prani furu sani. Den fosi foto di kari na ini Bijbel ben de na ini Mesopotamia (Genesis 10:10). Soleki fa a sori, dan a nen Ebla wani taki „Weti ston”, fu di karkiston ben de na ondro a gron fu a foto. A ben musu fu de so taki sma ben bow a foto drape fu di a karkiston di ben de na ondro a gron ben e gi sma a dyaranti taki watra de drape, èn a watra disi ben de tranga fanowdu na ini wan kontren di de fara fu den bigi liba.

Fu di furu alen no ben e fadon na ini a kontren pe Ebla ben de, meki den wan-enkri sani di sma ben man prani furu drape, na karu, droifibon, nanga olèifbon. A kontren disi ben bun tu fu kweki meti, spesrutu skapu. Fu di Ebla ben de na mindri na opo presi fu Mesopotamia nanga a kontren na a syoro fu Mindrikondre Se, meki a ben de wan bun presi fu du bisnis nanga udu, diriston, nanga sani soleki gowtu, solfru noso isri. Sowan 200.000 sma ben e libi na ini Ebla, èn sowan 10 procent fu den ben e libi na ini a mamafoto.

Den pisi di tan abra fu wan bun bigi kownu-oso e buweisi taki a pipel fu Ebla ben gudu. Sma ben musu pasa wan bun bigi doro di ben hei sowan 12 te go miti 15 meter, fu man go na ini a kownu-oso. Fu di a foto ben e kon makti moro nanga moro, meki a ben de fanowdu ibri tron baka fu meki a kownu-oso kon moro bigi, so taki den ben kan tiri a foto moro bun. Heiheiman ben abi difrenti posisi na ini a tirimakti, den ben de „edeman fu granman” nanga „granman” di ben e yepi a kownu nanga kownu uma.

Sma feni moro leki 17.000 plata pisi kleidoti, noso pisi fu dati, pe sani ben skrifi na tapu. Na a bigin, sma ben feni kande moro leki 4000 plata pisi kleidoti di ben de bunbun ete, èn den sani disi ben seti bun na tapu udu planga di fasi na a skotu fu wan kamra. Den plata pisi kleidoti disi e sori taki den sma fu Ebla ben e du bisnis nanga furu kondre. Fu eksempre, a foto ben e du bisnis nanga Egepte, soleki fa den skrifimarki fu tu farao e sori. Moro furu, na owruten skrifimarki fu den Sumeriasma ben skrifi na tapu den plata pisi kleidoti. Ma fu di sani ben skrifi na ini a tongo fu den Eblasma na tapu wan tu fu den plata pisi kleidoti, meki sma kon sabi a bun owru tongo disi di sma fu a Mindri Owstusei ben e taki. Sabiman di e ondrosuku sani fu den Owstusei kondre, ben fruwondru fu feni so wan owru tongo di sma fu Mindri Owstusei ben e taki. Kande yu sa feni en moi fu sabi taki sonwan fu den plata pisi kleidoti ben abi grupu fu Sumeriatongo nanga Eblatongo wortu na tapu. Wan buku e kari den plata pisi kleidoti disi „den moro owru wortubuku di sma sabi” (Ebla—Alle origini della civiltà urbana).

Soleki fa a sori, dan a foto Ebla ben abi wan makti srudati legre, fu di sma feni pisi fu owruten sani di ben abi prenki na tapu, èn den prenki e sori fa srudati e kiri den feanti fu den, èn fa den e sori sma den ede di den koti puru fu den feanti fu den. Ma di Asiria nanga Babilon ben e kisi moro makti, dan Ebla kon lasi a makti di a ben abi. Sma no sabi soifri fa dati pasa, ma soleki fa a sori, dan Sargon I (disi a no a Sargon di kari na ini Yesaya 20:1) fosi go feti teige Ebla, èn bakaten en granpikin Naram-Sin. Den sani di sma diki na ini a gron e sori taki den ben e feti na wan ogri-ati fasi, èn den ben e tyari bigi pori kon.

Ma soleki fa wi taki kaba, dan baka wan pisi ten sma bow a foto baka, èn a kon de wan prenspari foto na ini a kontren drape. Sma ben seti sani na fesi fu bow a foto na so wan fasi, taki a ben o moro moi leki fa a ben de fosi. Na a zuidsei fu a foto yu ben abi wan kontren di sma ben e si leki wan santa presi, fu di den ben gi en abra na a umagado Isjtar. Den Babilonsma ben e si na umagado disi tu leki a gado di ben e gi den furu meti nanga nyanyan. Kande yu yere kaba fu a pôpi Isjtarpoort di sma ben feni na a brokopresi fu Babilon. Den feni wan bun bigi oso na ini Ebla, èn soleki fa a sori dan sma ben poti den lew fu na umagado Isjtar, di den ben e si leki santa meti, na ini na oso dati. Disi e meki wi poti prakseri na a anbegi fu den Eblasma.

Na anbegi fu den Eblasma

Soleki fa a gwenti ben de na tra Owstusei kondre fu owruten, den sma na ini Ebla ben e anbegi difrenti gado. Sonwan fu den gado ben de Bâal, Hadad (wan pisi fu a nen fu son Siria kownu), nanga Dagan (1 Kownu 11:23; 15:18; 2 Kownu 17:16). Den Eblasma ben e anbegi ala den gado disi. Den ben e gi grani srefi na gado fu tra pipel. Owruten sani di sabiman feni, e sori taki spesrutu na ini a pisi ten fu 2000 b.G.T., den Eblasma ben e anbegi sosrefi den afo fu a kownu famiri di den ben e si leki gado.

Den Eblasma no ben e frutrow den gado fu den dorodoro. A nyun foto Ebla ben abi bun bigi dobru skotu na en lontu, èn a ben musu fu de so taki den skotu disi ben e tapu skreki gi den feanti fu den. A dorosei skotu ben langa sowan dri kilometer. Pisi fu a skotu disi de fu si krin ete.

Ma toku, a foto Ebla di sma ben bow baka kisi pori. A kan taki na a pisi ten fu 1600 b.G.T. den Hètsma pori a makti foto disi krinkrin. Soleki fa wan owruten puwema e taki, Ebla ben „panya leki wan tokotoko prapi”. A no teki langa di sma no ben e yere noti moro fu a foto disi. Sma di ben e teki waka go na Yerusalem na ini 1098, ben skrifi wan dokumenti di e taki fu Mardikh, wan farawe presi na ini a kondre, èn na a presi disi Ebla fu fositen ben de. Pikinmoro, sma ben frigiti Ebla, ma baka hondrohondro yari den feni en baka.

[Faki na tapu bladzijde 14]

San Ebla abi fu du nanga Bijbel?

Na ini 1976, wan artikel kon na doro na ini a tijdschrift Biblical Archeologist. A sabiman di ben tyari kon na krin san skrifi na tapu den plata pisi kleidoti di sma feni na ini Ebla, ben taki wan sani na ini na artikel dati, èn a sani disi hari a prakseri fu Bijbel sabiman. A man dati ben taki dati a kan taki den nen fu son sma nanga presi di kari na ini Bijbel hondrohondro yari bakaten, ben skrifi tu na tapu den plata pisi kleidoti disi. A kan taki sonwan fu den sabiman go moro fara srefi leki san na artikel ben e taki, fu di den bigin skrifi taki den owruten sani di sma feni na ini Ebla na buweisi di e sori taki den tori na ini Genesis tru. * A Lomsu priester Mitchell Dahood, ben taki dati „den sani di skrifi na tapu den plata pisi kleidoti [fu Ebla] e tyari den dangra pisi fu Bijbel kon na krin”. A e bribi fu eksempre taki den sani dati kan yepi den fu kon sabi „o langa sma ben e gebroiki a nen fu a Gado fu Israel kaba”.

Now sabiman e ondrosuku den sani di skrifi na tapu den plata pisi kleidoti, moro fini. Fu di a de so taki a Hebrewtongo nanga na Eblatongo na bun owru tongo di sma fu a Mindri Owstusei ben e taki, meki a kan taki sonwan fu den nen fu foto noso sma gersi den nen di kari na ini Bijbel, noso den de a srefi. Ma disi no wani taki dati den nen dati trutru na nen fu presi noso sma di kari na ini Bijbel. Sma no sabi fa den owruten sani fu Ebla sa yepi Bijbel sabiman moro fara fu tyari sani fu Bijbel kon na krin. Ma fa a de nanga a nen fu Gado? We, a skrifiman fu na artikel na ini a tijdschrift Biblical Archeologist, e taki dati noiti a taki dati „Yahweh” ben skrifi na tapu den plata pisi kleidoti fu Ebla. Son sabiman e taki dati den owruten skrifimarki di wani taki ja, abi fu du nomo nanga wan fu den someni gado di den Eblasma ben e anbegi, èn wan tra grupu sabiman e taki dati den skrifimarki dati abi fu du nomo nanga a fasi fa sma ben e skrifi a tongo dati. Awansi fa a no fa, den skrifimarki disi no abi fu du nanga a wan-enkri tru Gado, Yehovah.—Deuteronomium 4:35; Yesaya 45:5.

[Futuwortu]

^ paragraaf 19 Fu kon sabi moro krin fa owruten sani e sori taki den tori fu Bijbel tru, luku kapitel 4 fu a buku De bijbel — Gods woord of dat van mensen?, di Yehovah Kotoigi tyari kon na doro.

[Karta/Prenki na tapu bladzijde 12]

(Efu yu wani si pe den sani disi skrifi, luku a tijdschrift)

BIGI SE

KANAN

SIRIA

Aleppo

Ebla (Tell Mardikh)

Eufraatliba

[Sma di abi a reti fu a prenki]

Archaeologist: Missione Archeologica Italiana a Ebla - Università degli Studi di Roma ‘La Sapienza’

[Prenki na tapu bladzijde 12, 13]

Wan gowtu keti fu a pisi ten fu 1750 b.G.T.