Kresneti—Fa sma e si a fesa disi?

TIN yari pasa, na ini a mun disi, a tijdschrift U.S.News & World Report tyari wan artikel kon na doro di nen „A suku di sma e suku fu hori Kresneti na wan fasi di fiti”. Na artikel ben e tyari kon na krin efu a de so taki furu sma no e si Kresnetiten moro leki wan okasi „fu du bisnis, ma leki wan ten fu gi grani na Krestes”. Na dati e pasa trutru?

Na artikel ben kari wan tu reide fu san ede wi no musu fruwakti dati. Na artikel ben taki: „Nowan buweisi de di e sori taki sma ben e memre a dei di Krestes gebore, teleki a ten fu a di fu fo yarihondro di Constantijn . . . ben de kèiser fu Rome.” A sani disi e sori „kaba taki nowan sma ben sabi seiker o ten Yesus gebore”. Na artikel e agri taki „den evangelietori no e taki na ini sortu yari Yesus gebore, èn a no de fu taki dati a mun noso a dei no kari tu”. Soleki fa wan historia skrifiman fu na Universiteit fu Texas e taki, dan „den fosi Kresten no ben e si en leki wan prenspari sani fu memre a dei di Krestes gebore”.

Na artikel abi wan ondro edeprakseri di nen „A sani di kon na krin”, èn a pisi tori na ondro e sori „fa a du kon taki kerki teki a dei fu 25 december leki a dei di Yesus gebore”. A tori e taki: „Furu sma e agri taki na fu espresi sma meki Kresneti kon tron wan Kresten fesa, aladi a abi fu du nanga a Saturnalia fesa èn nanga tra fesa di sma di no ben de Kresten ben e hori.” „Fu di den kerki fesiman bosroiti taki Kresneti musu hori na a kaba fu a mun december, namku na a ten te sma ben e gwenti fu hori fesa kaba, meki den sorgu taki sma na ala sei bigin memre 25 december, leki a dei di a Frulusuman gebore.” Na ini den yari baka 1850, sma bigin si a dei disi leki wan okasi fu bai kado èn fu gi kado na trawan. „Wantronso bisnisman bigin meki furu moni nanga a nyun gwenti di sma ben abi now fu gi trawan kado na Kresnetiten, èn den bigin gi sma deki-ati fu hori a fesa disi.”

Fu dati ede wi no abi nowan enkri reide fu fruwakti taki Kresneti oiti sa kruderi nanga a tru Kresten bribi. Aladi furu sma na ini a ten disi e si Kresnetiten leki wan okasi fu „meki bogobogo moni”, toku a de so taki tru Kresten noiti no bribi taki den musu memre a dei di Yesus gebore. Na presi fu dati, Bijbel e sori krin taki san prenspari gi Kresten, na a lusu-paiman di Krestes pai fu di a dede èn a kisi wan opobaka na hemel (Mateyus 20:28). A sani disi sa tan de a moro prenspari sani gi Kresten, èn dati sa de so fu ala ten.