Yehovah e gi „santa yeye na den sma di e aksi en”
Yehovah e gi „santa yeye na den sma di e aksi en”
„Efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”—LUKAS 11:13.
1. Na ini sortu situwâsi wi abi a yepi fu a santa yeye moro tranga fanowdu?
’MI WAWAN no man kakafutu gi a tesi disi. Soso a santa yeye kan yepi mi fu horidoro!’ Oiti yu ben e firi so? Furu Kresten e firi so. Kande yu ben e firi so baka di yu kon sabi taki yu abi wan seryusu siki. Noso kande yu ben firi so di a trowpatna fu yu, di yu ben trow omeni tenti yari langa nanga en, kon lasi libi. A kan de so tu taki yu ben e firi so fu di yu lasi a prisiri di yu ben abi fosi, èn now yu e firi brokosaka doronomo. Na ini den muilek pisi ten fu yu libi, kande yu ben e firi taki yu ben man horidoro soso fu di a santa yeye fu Yehovah ben e gi yu a „krakti di bigi pasa marki”.—2 Korentesma 4:7-9; Psalm 40:1, 2.
2. (a) Nanga sortu tyalensi tru Kresten e kisi fu du? (b) Sortu aksi wi sa go luku na ini na artikel disi?
2 Leki tru Kresten, wi e kisi moro nanga moro kwinsi nanga gens fu na ogri grontapu fu a ten disi (1 Yohanes 5:19). Boiti dati, Satan Didibri srefi e feti fayafaya nanga den bakaman fu Krestes, fu di den ’e du san den komando fu Gado e taki èn fu di den kisi a wroko fu kotoigi fu Yesus’ (Openbaring 12:12, 17). Fu dati ede wi e frustan taki now wi abi a yepi fu a yeye fu Gado fanowdu moro leki oiti bifo. San wi kan du fu sorgu taki wi e tan kisi a santa yeye fu Gado bogobogo? Èn fu san ede wi kan de seiker taki Yehovah de klariklari fu gi wi a krakti di wi abi fanowdu fu man horidoro te wi e kisi tesi? Wi kan kisi piki tapu den aksi disi te wi o go luku tu agersitori di Yesus ben gi.
Tan begi doronomo
3, 4. Sortu agersitori Yesus ben fruteri, èn fa a gebroiki na agersitori dati fu leri wi fa fu begi?
3 Wan fu den disipel fu Yesus ben aksi en wan leisi: „Masra, leri wi fa fu begi” (Lukas 11:1). Leki piki tapu na aksi disi, Yesus gi den disipel fu en tu agersitori di abi fu du nanga makandra. A fosi agersitori abi fu du nanga wan man di e kisi wan fisitiman na en oso, èn a di fu tu abi fu du nanga wan papa di e arki a manpikin fu en. Meki wi poti prakseri na den tu agersitori disi.
4 Yesus ben taki: „Suma fu unu di abi wan mati, sa go na en mindrineti, èn taigi en: ’Mati, leni mi dri brede, bika didyonsro wan mati fu mi komoto na wan presi kon na mi èn mi no abi noti fu gi en’? Dan a sma di de na inisei, o piki yu taki: ’No trobi mi. A doro sroto kaba, èn mi nanga den yongu pikin fu mi e sribi; mi no man opo fu gi yu wan sani.’ Mi e taigi unu: A no fu di a sma disi na en mati, meki a o opo fu gi en wan sani, ma na fu di a tan aksi en nomonomo, meki a mati o opo fu gi en den sani di a abi fanowdu.” Baka dati Yesus tyari kon na krin fa na agersitori disi e leri wi fa wi musu begi. A taki: „Fu dati ede mi e taigi unu: Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu. Bika a sma di e aksi, e kisi èn a sma di e suku, e feni èn a sma di e naki na tapu a doro, a doro sa opo gi en.”—Lukas 11:5-10.
5. Sortu denki wi musu abi te wi e begi, soleki fa wi e leri fu a man di ben e tan aksi en mati fu yepi en?
5 A tumusi moi agersitori disi fu wan man di e tan aksi en mati fu yepi en, e sori sortu denki wi musu abi te wi e begi. Hori na prakseri taki Yesus ben taki dati a man kisi san a abi fanowdu „fu di a tan aksi en [mati] nomonomo” (Lukas 11:8). Den wortu „tan aksi nomonomo” de fu feni wán leisi nomo na ini Bijbel. Den wortu disi vertaal fu a Griki wortu di wani taki trutru „sondro syen”. Te wan sma no abi syen, dan nofo tron a sani dati na wan takru fasi. Ma te wan sma no e syen fu du wan bun sani, noso te a de nomonomo fu du a bun sani dati, dan dati kan de wan bun fasi. A man di e kisi wan fisitiman na en oso, abi a fasi dati. A no e syen kwetikweti fu tan aksi san a abi fanowdu. Fu di Yesus e sori taki a man disi na wan eksempre gi wi, meki wi musu tan begi Gado neleki fa a man ben e tan aksi fu kisi yepi. Yehovah wani taki wi e ’tan aksi, tan suku, èn tan naki na tapu a doro’. Te sma e du dati, dan Yehovah sa ’gi santa yeye na den sma disi’.
6. Fa sma na ini a ten fu Yesus ben e si a gwenti di den ben abi fu sori switifasi gi fisitiman?
6 Yesus no e sori wi nomo taki wi musu tan begi doronomo, ma a e sori wi tu fu san ede wi musu du dati. Fu man frustan a tori disi moro bun, dan wi musu luku fa den sma di ben e arki na agersitori fu Yesus ben e si a gwenti di sma ben abi fu teki trawan na den oso. Furu tori na ini Bijbel e sori taki na ini Bijbel ten, sma ben e si en leki wan tumusi prenspari sani fu sorgu bun gi fisitiman, èn spesrutu den futuboi fu Gado ben e denki so fu a tori disi (Genesis 18:2-5; Hebrewsma 13:2). A ben de wan syen te wan sma no ben e sori switifasi gi wan fisitiman (Lukas 7:36-38, 44-46). Meki wi go luku a tori fu Yesus baka, aladi wi e hori a sani disi na prakseri.
7. Fu san ede a man na ini na agersitori fu Yesus no e frede fu wiki a mati fu en?
7 Na ini na agersitori, a man e kisi wan fisitiman mindrineti. A man e firi fruplekti fu gi a fisitiman nyanyan, ma a „no abi noti fu gi en”. A feni taki a situwasi disi na wan seryusu situwâsi! Awansi fa a no fa, a musu feni wan tu brede. Fu dati ede a e go na wan mati fu en, èn a no e frede fu wiki a mati fu en. „Mati, leni mi dri brede”, na so a man e bari gi a mati fu en. A e tan aksi a mati fu en, teleki a e kisi san a abi fanowdu. Na te a abi den brede, dan fosi a kan sorgu bun gi a fisitiman fu en.
O moro wi abi en fanowdu, o moro wi musu aksi fu en
8. San o meki wi tan begi Gado fu gi wi a santa yeye fu en?
8 Fu san ede wi musu tan begi doronomo soleki fa na agersitori disi e sori? A man ben e tan aksi fu kisi den brede, fu di a ben feni taki a ben musu fu abi den brede fu man sorgu bun gi a fisitiman fu en (Yesaya 58:5-7). Sondro den brede a no ben o man du dati. Na so a musu de tu nanga wi. Fu di wi leki tru Kresten e frustan taki wi abi a yeye fu Gado tranga fanowdu fu du a diniwroko fu wi, meki wi e tan begi Gado doronomo fu gi wi a yeye dati (Sakaria 4:6). Sondro a yeye dati wi no sa man du a diniwroko dati na a yoisti fasi (Mateyus 26:41). Yu e si sortu prenspari sani wi kan leri fu na agersitori disi? Efu wi e si a yeye fu Gado leki wan sani di wi abi tranga fanowdu, dan wi no sa draidrai fu tan aksi Gado fu gi wi a yeye fu en.
9, 10. (a) Sori nanga yepi fu wan agersitori fu san ede wi musu tan aksi Gado fu gi wi a yeye fu en. (b) San wi musu aksi wisrefi, èn fu san ede?
9 Meki wi fiti a tori disi na ini wan situwâsi fu na aladei libi. Kon meki wi taki dati wan famiri fu yu kon siki mindrineti. Yu ben o wiki wan datra fu aksi en yepi? Yu no ben o du dati efu a famiriman fu yu no e siki seryusu. Ma efu a kon siki na en ati, dan yu no ben o draidrai fu kari wan datra. Fu san ede? Fu di a situwâsi disi na wan seryusu wan. Yu e frustan taki yu abi datrayepi tranga fanowdu. Efu yu no e suku yepi, dan a famiriman fu yu kan dede. Na agersifasi, tru Kresten de na ini wan seryusu situwâsi tu. Te yu e luku en bun, dan Satan e waka lontu leki „wan lew di e bari”, èn a e suku fu swari wi (1 Petrus 5:8). Efu wi wani tan na libi na yeye fasi, noso efu wi wani tan abi wan bun banti nanga Gado, dan a de tranga fanowdu taki wi e kisi yepi fu Gado en yeye. Efu wi no e aksi Gado fu yepi wi, dan wi kan dede na yeye fasi. Fu dati ede wi no e frede fu tan aksi Gado fu gi wi a santa yeye fu en (Efeisesma 3:14-16). Soso te wi e du dati wi sa tan abi a krakti di wi abi fanowdu fu man „horidoro te na a kaba”.—Mateyus 10:22; 24:13.
10 Fu dati ede a de tumusi prenspari taki wi e aksi wisrefi ten na ten: ’A de so trutru taki mi e tan begi fu kisi a santa yeye?’ Hori na prakseri taki te wi e frustan bun taki wi abi a yepi fu Gado fanowdu, dan wi sa tan begi fu kisi a santa yeye.
Fu san ede wi man begi nanga a frutrow taki Gado sa arki wi?
11. Fa Yesus fiti na agersitori fu a papa nanga en manpikin, na begi?
11 A fosi agersitori di Yesus ben fruteri e sori wi sortu denki wan sma di e begi Gado, namku wan bribiman, musu abi. A tra agersitori e tyari kon na krin sortu fasi a sma di e arki den begi, namku Yehovah Gado abi. Yesus ben aksi: „Iya, suma fu unu di de wan papa o gi en manpikin wan sneki te a pikin aksi en wan fisi? Sosrefi, te a e aksi wan eksi, dan unu no sa gi en wan kruktutere, a no so?” Yesus ben go moro fara fu fiti na agersitori disi, èn a ben taki: „Fu dati ede, efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”—Lukas 11:11-13.
12. Fa na agersitori fu a papa di e arki en manpikin di e aksi en wan sani, e sori taki Yehovah de klariklari fu arki den begi fu wi?
12 Nanga yepi fu na eksempre disi fu wan papa di e gi en manpikin san a aksi, Yesus e tyari kon na krin fa Yehovah e denki fu den sma di e begi en fu yepi den (Lukas 10:22). Meki wi go luku fosi san na a difrenti na mindri den tu agersitori disi. Tra fasi leki a man na ini a fosi agersitori di ben e draidrai fu yepi a mati fu en, Yehovah de leki wan lobi-ati papa di de klariklari fu gi a pikin fu en san a aksi (Psalm 50:15). Yesus e agersi wan libisma nanga Yehovah, fu sori wi moro fara fa Yehovah de klariklari fu yepi wi. Yesus e taki dati efu wan libisma „di abi takru fasi” fu di a kisi sondu, man gi en pikin bun sani, dan a no de fu taki dati wi kan fruwakti taki wi hemel Tata di lobi fu du bun gi trawan, sa gi santa yeye na den pikin fu en di e anbegi en!—Yakobus 1:17.
13. Sortu frutrow wi kan abi te wi e begi Yehovah?
13 San wi kan leri fu a tori disi? Wi kan abi a frutrow taki te wi e aksi wi hemel Tata fu gi wi santa yeye, dan a de klariklari fu gi wi san wi aksi en (1 Yohanes 5:14). Te wi e tan begi Yehovah ibri tron baka, dan noiti a sa taki: „No trobi mi. A doro sroto kaba” (Lukas 11:7). Tra fasi leki dati, Yesus ben taki: „Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu” (Lukas 11:9, 10). Iya, Yehovah „sa piki wi tapu a dei te wi e kari” en.—Psalm 20:9; 145:18.
14. (a) Sortu fowtu denki son sma abi te den e kisi tesi? (b) Te wi e kisi tesi, dan fu san ede wi kan begi Yehovah nanga a frutrow taki a sa arki wi?
14 Na agersitori fu Yesus di abi fu du nanga a lobi-ati papa, e tyari kon na krin tu taki a bun-ati fu Yehovah bigi omeni tron moro leki a bun-ati fu wan papa. Sobun, noiti wi musu denki taki den tesi di wi e kisi e kon fu di Gado no feni wi bun. Na Satan, a moro bigi feanti fu wi, wani taki wi musu abi a denki dati (Yob 4:1, 7, 8; Yohanes 8:44). Bijbel no e sori taki wi musu krutu wisrefi na so wan fasi. Yehovah no e tesi wi „nanga ogri sani” (Yakobus 1:13). A no en e meki wi kisi tesi di de leki wan sneki noso wan kruktutere. Wi hemel Tata e gi „bun sani na den sma di e aksi en” (Mateyus 7:11; Lukas 11:13). Iya, o moro wi e kon frustan taki Yehovah abi bunfasi èn taki a de klariklari fu yepi wi, o moro wi sa begi en nanga a frutrow taki a sa arki wi. Te wi e du dati, dan wi sosrefi sa man taki a srefi sani di a psalm skrifiman ben taki: „Fu tru, Gado arki mi; a poti prakseri na a begi fu mi.”—Psalm 10:17; 66:19.
A fasi fa a santa yeye e yepi wi
15. (a) Sortu pramisi Yesus ben meki di abi fu du nanga a santa yeye? (b) San na wan fasi fa a santa yeye e yepi wi?
15 Syatu bifo Yesus dede, a taki baka fu a dyaranti di a ben gi sma nanga yepi fu den agersitori di a ben fruteri. A ben taki fu a santa yeye, di a taigi den apostel fu en: „Mi o aksi a Tata èn a o gi unu wan tra yepiman fu de nanga unu ala ten” (Yohanes 14:16). Na so fasi Yesus ben pramisi taki a yepiman, noso a santa yeye, ben o de nanga den bakaman fu en na ini a ten di ben o kon, iya, sosrefi na ini a ten fu wi. San na wan prenspari fasi fa wi e kisi yepi fu a santa yeye na ini a ten disi? A santa yeye e yepi wi fu horidoro te wi e kisi fu du nanga difrenti tesi. Fa a e yepi wi fu du dati? Na apostel Paulus ben kisi fu du nanga tesi tu, èn na ini a brifi di a skrifi gi den Kresten na ini Korente a meki den kon sabi fa a yeye fu Gado ben yepi en. Meki wi go luku syatu san a ben skrifi.
16. Fa a situwâsi fu wi kan de neleki di fu Paulus?
16 Na ini a brifi, Paulus e bigin fosi fu fruteri den brada nanga sisa fu en krin taki a ben kisi fu du nanga „wan maka na ini [en] skin”, namku wan tesi di a ben kisi. Baka dati a taki: „Fu a sani disi ede, meki mi begi Masra [Yehovah] dri leisi fu puru a maka na ini mi skin” (2 Korentesma 12:7, 8). Aladi Paulus ben begi Gado fu puru a tesi disi, toku a tesi tan. A kan taki yu de na ini wan srefi sortu situwâsi now. A kan de so taki neleki Paulus, yu tan begi Yehovah fu puru wan tesi di yu e kisi èn taki yu du dati nanga a frutrow taki Yehovah ben o arki yu. Ma aladi yu e tan aksi Gado ibri tron baka fu yepi yu, toku yu abi a problema te now ete. A sani dati wani taki dati Yehovah no e arki den begi fu yu, èn taki a yeye fu en no e yepi yu? Nôno, kwetikweti! (Psalm 10:1, 17) Luku san na apostel Paulus ben taki baka dati.
17. Fa Yehovah piki den begi fu Paulus?
17 Leki piki tapu den begi fu Paulus, Gado taigi en: „A no-frudini bun-ati fu mi nofo gi yu; bika a krakti fu mi e kon volmaakti te yu swaki.” Paulus ben taki: „Fu dati ede, nanga trutru prisiri mi sa meki bigi, spesrutu te a abi fu du nanga den swakifasi fu mi, so taki a krakti fu Krestes kan tan leki wan tenti na mi tapu” (2 Korentesma 12:9; Psalm 147:5). Na so Paulus ondrofeni taki Gado kibri en trutru nanga yepi fu Krestes, iya, a ben de neleki Gado ben tapu en nanga wan tenti. Na ini a ten disi Yehovah e piki den begi fu wi na wan srefi sortu fasi. A e kibri den futuboi fu en, neleki fa wan tenti e tapu wan sma.
18. Fu san ede wi man horidoro te wi e kisi tesi?
18 A no de fu taki dati aladi wan tenti no e tapu alen fu fadon èn a no e tapu a winti fu wai, toku a kan kibri wan sma gi den sani dati. Na so a de tu taki te „a krakti fu Krestes” e kibri wi, dan dati no wani taki dati wi no sa kisi tesi noso problema. Ma a krakti dati e kibri wi na yeye fasi, fu di a e sorgu taki den takru sani fu a grontapu disi, èn Satan, a tiriman fu grontapu, no abi krakti na wi tapu (Openbaring 7:9, 15, 16). Fu dati ede, srefi efu yu e kisi fu du nanga wan tesi di ’Gado no e puru gi yu’, toku yu kan abi a dyaranti taki Yehovah sabi san e miti yu, èn taki a e yere fa yu e ’bari fu kisi yepi’ (Yesaya 30:19; 2 Korentesma 1:3, 4). Paulus ben skrifi: „Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro.”—1 Korentesma 10:13; Filipisma 4:6, 7.
19. Sortu fasti bosroiti yu abi, èn fu san ede yu abi a fasti bosroiti dati?
19 A tru taki „den lasti dei” disi fu na ogri grontapu fu a ten disi ’na muilek ten di tranga fu pasa’ (2 Timoteyus 3:1). Ma toku, a no de so taki den futuboi fu Gado no sa man pasa a ten disi. Fu san ede? Fu di a santa yeye fu Gado e yepi èn e kibri den, èn Yehovah de klariklari fu gi a yeye dati bogobogo na ala sma di e tan aksi en fu gi den a yeye dati, aladi den abi na overtoigi taki a sa arki den. Fu dati ede, meki a de so taki wi abi a fasti bosroiti fu tan begi Gado ibri dei fu gi wi a santa yeye fu en.—Psalm 34:6; 1 Yohanes 5:14, 15.
San yu ben sa piki?
• San wi musu du fu man kisi a santa yeye fu Gado?
• Fu san ede wi kan abi a frutrow taki Yehovah sa arki den begi fu wi te wi e aksi en fu gi wi a santa yeye fu en?
• Fa a santa yeye e yepi wi fu horidoro te wi e kisi tesi?
[Aksi fu a tori disi]
[Prenki na tapu bladzijde 21]
San wi kan leri fu na agersitori fu Yesus di abi fu du nanga a man di ben e tan aksi en birtisma fu gi en wan tu brede?
[Prenki na tapu bladzijde 22]
Yu e tan begi Gado fu gi yu a santa yeye fu en?
[Prenki na tapu bladzijde 23]
San wi e leri fu Yehovah te wi e luku na agersitori fu a lobi-ati papa?