Yehovah sa „sorgu taki den feni reti”
Yehovah sa „sorgu taki den feni reti”
’A no de so dan, taki Gado sa sorgu taki den wan di a kari èn di e bari kari en dei nanga neti, feni reti?’—LUKAS 18:7.
1. Suma e gi yu deki-ati, èn fu san ede dati de so?
NA HERI grontapu Yehovah Kotoigi e nyan bun fu a demakandra di den abi nanga Kresten brada nanga sisa di dini Yehovah furu yari langa. Yu sabi wan tu fu den lobiwan disi? Kande a sani disi e meki yu prakseri wan owru sisa di dopu furu yari kaba, èn di pikinmoro noiti e misi den konmakandra di e hori na a Kownukondre zaal. Noso kande yu e prakseri wan getrow owru brada di e teki prati na a preikiwroko ibri wiki, èn a e du dati furu yari kaba. A tru taki furu fu den sma disi di tan dini Yehovah, ben denki fosi taki Armagedon ben sa musu kon kaba. Ma toku, na ogri grontapu disi di de ete, noiti meki taki den lasi a frutrow di den abi na ini den pramisi fu Yehovah, èn a no meki den lasi deki-ati tu fu „horidoro te na a kaba” (Mateyus 24:13). A no de fu taki dati a tranga bribi di den futuboi disi fu Yehovah e sori, e gi a heri gemeente deki-ati.—Psalm 147:11.
2. Sortu situwâsi e meki wi sari?
2 Ma son leisi wi e si wan heri tra sani. Son Kotoigi ben e teki prati na a diniwroko furu yari langa, ma te fu kaba den kon lasi bribi na ini Yehovah èn den no abi demakandra moro nanga a Kresten gemeente. Wi e sari taki den sma disi di ben de wi brada noso sisa fosi, gowe libi Yehovah, èn wi wani tan du ala san wi man fu yepi ibri „lasi skapu” fu drai kon baka na a ipi (Psalm 119:176; Romesma 15:1). Ma fu di a de so taki son sma e tan na ini a bribi aladi trawan e lasi bribi, meki wan tu aksi e opo kon. San e meki taki furu Kotoigi man tan bribi den pramisi fu Yehovah, aladi trawan e lasi bribi? San wi kan du fu sorgu taki wi e tan abi a tranga overtoigi taki „a bigi dei fu Yehovah” de krosibei? (Sefanya 1:14) Meki wi go luku wan agersitori di skrifi na ini na Evangelie fu Lukas.
Wan warskow gi den sma di e libi na ini a ten „te a Manpikin fu libisma doro”
3. Suma spesrutu kan kisi wini fu na agersitori fu na uma di lasi en masra na ini dede, èn a krutuman? Fu san ede den sma dati kan kisi wini fu na agersitori disi?
3 Na ini Lukas kapitel 18, wi e feni na agersitori fu Yesus di abi fu du nanga wan uma di lasi en masra na ini dede, èn wan krutuman. Disi na wan srefi sortu agersitori leki a di fu a man di ben tan aksi en mati wan tu brede, soleki fa wi si na ini na artikel na fesi (Lukas 11:5-13). Ma den tra vers lontu na agersitori di abi fu du nanga na uma di lasi en masra na ini dede, èn a krutuman, e sori taki a tori disi e fiti spesrutu den sma di e libi na ini a ten „te a Manpikin fu libisma doro” leki Kownu fu Gado Kownukondre. A pisi ten disi bigin na ini 1914.—Lukas 18:8. *
4. Fu sortu sani Yesus taki bifo a fruteri na agersitori di skrifi na ini Lukas kapitel 18?
4 Bifo Yesus fruteri na agersitori, a taki dati den sani di ben o sori taki a e tiri leki Kownu na ini a Kownukondre, ben o de fu si na ala sei, ’neleki te faya e koti na hemel èn e skèin en leti fu a wan sei fu hemel te go miti a tra sei’ (Lukas 17:24; 21:10, 29-33). Aladi dati ben o de so, toku furu sma di e libi na ini „a ten fu a kaba” no ben o poti prakseri na den krinkrin buweisi dati (Danièl 12:4). Fu san ede den no o du dati? Na fu a srefi reide fu san ede den sma na ini a ten fu Noa èn a ten fu Lot no ben e poti prakseri na den warskow fu Yehovah. Na ini den pisi ten dati, sma ’ben e nyan, dringi, bai sani, seri sani; den ben e prani, èn den ben e bow oso teleki a dei di den kisi pori’ (Lukas 17:26-29). Den sma disi dede fu di den ben e poti so furu prakseri na den aladei sani, taki den no ben e du a wani fu Gado (Mateyus 24:39). Na ini a ten disi, a de so tu taki wan lo sma e poti so furu prakseri na den aladei sani fu a libi, taki den no e si den buweisi di e sori taki a kaba fu na ogri grontapu disi de krosibei.—Lukas 17:30.
5. (a) Suma Yesus ben warskow, èn fu san ede a du dati? (b) San meki taki son sma lasi bribi?
5 A de krin fu si taki Yesus ben e broko en ede nanga den bakaman fu en, fu di a ben frede taki a grontapu fu Satan ben o puru den prakseri tu na den moro prenspari sani, so taki te fu kaba den ben o go ’du den sani di den ben libi na baka’ (Lukas 17:22, 31). Èn na a sani disi pasa nanga son Kresten. Furu yari langa den Kresten disi ben e angri fu si a dei te Yehovah o tyari wan kaba kon na a ogri grontapu disi. Ma di Armagedon no kon na a ten di den ben e fruwakti dati, dan den lasi-ati. Safrisafri den lasi a frutrow di den ben abi taki a krutudei fu Yehovah de krosibei. Den no ben e teki prati fayafaya moro na a diniwroko, èn safrisafri den bigin poti so furu prakseri na den aladei sani fu a libi, taki den no ben abi ten moro gi na anbegi fu den (Lukas 8:11, 13, 14). Te fu kaba den go ’du den sani di den ben libi na baka’, èn dati na wan sari sani trutru!
A de fanowdu fu „begi ala ten”
6-8. (a) Fruteri na agersitori fu na uma di lasi en masra na ini dede, èn a krutuman. (b) Fa Yesus ben fiti na agersitori disi?
6 San wi kan du fu sorgu taki wi no e lasi a frutrow di wi abi taki den pramisi fu Yehovah sa kon tru seiker? (Hebrewsma 3:14) Yesus ben taki fu a tori dati, leti baka di a warskow den disipel fu en fu no drai go baka na a ogri grontapu fu Satan.
7 A disipel Lukas e skrifi taki Yesus ben ’fruteri den wan agersitori fu sori den taki a de fanowdu fu begi ala ten èn fu no kon weri fu dati’. Yesus ben taki: „Na ini wan foto yu ben abi wan krutuman di no ben frede Gado èn a no ben abi lespeki gi nowan sma. Ma wan uma di ben lasi en masra na ini dede, ben de tu na ini a foto dati; ala yuru a ben go na a krutuman, èn a ben taki: ’Yepi mi so taki mi kan feni reti na ini a krutu afersi di mi abi nanga wan tra sma.’ We, wan heri pisi ten a krutuman no ben wani yepi en, ma bakaten a prakseri na ensrefi: ’Mi no e frede Gado èn mi no abi lespeki gi nowan sma, ma fu di na uma disi di lasi en masra na ini dede, e kon dyaso ala ten fu trobi mi, meki mi sa sorgu taki a feni en reti, dan a no sa tan kon na mi èn fruferi mi teleki mi no man moro.’”
8 Baka di Yesus fruteri na agersitori disi, dan a fiti en na a fasi disi: „Yere san a krutuman taki aladi a no ben de wan regtfardiki sma! A no de so dan, taki Gado di abi langa pasensi nanga den wan di a kari èn di e bari kari en dei nanga neti, sa sorgu taki den feni reti? Mi e taigi unu: A sa sorgu taki den o feni reti esi-esi. Ma te a Manpikin fu libisma doro, dan trutru a sa feni sma na grontapu di e bribi trutru?”—Lukas 18:1-8.
„Yepi mi so taki mi kan feni reti”
9. San na a moro prenspari sani na ini na agersitori fu na uma di lasi en masra na ini dede, èn a krutuman?
9 A de krin fu si san na a moro prenspari sani na ini a moi agersitori disi. Den tu sma na ini na agersitori, èn sosrefi Yesus e taki fu a sani dati. Na uma di lasi en masra na ini dede ben begi a krutuman: „Yepi mi so taki mi kan feni reti.” A krutuman ben taki: „Mi sa sorgu taki a feni en reti.” Yesus ben aksi: ’A no de so dan, taki Gado sa sorgu taki sma feni reti?’ Èn Yesus ben taki fu Yehovah: „A sa sorgu taki den o feni reti esi-esi” (Lukas 18:3, 5, 7, 8). O ten Gado sa ’sorgu taki sma o feni reti’?
10. (a) O ten Gado strafu sma na ini a fosi yarihondro? (b) O ten den futuboi fu Gado na ini a ten disi sa feni reti, èn fa dati o pasa?
10 Na ini a fosi yarihondro, namku na ini 70 G.T., Yerusalem nanga a tempel fu en kisi pori. Disi ben de ’a ten di sma kisi strafu’ (noso ’a ten di Gado puru en atibron na tapu sma’, Kingdom Interlinear) (Lukas 21:22). A pipel fu Gado na ini a ten disi, sa feni reti tapu „a bigi dei fu Yehovah” (Sefanya 1:14; Mateyus 24:21). Na a ten dati, Yehovah sa „pina den sma di e pina” a pipel fu en, èn dati o pasa te Yesus Krestes „o puru atibron na tapu den sma di no sabi Gado èn na tapu den sma di no e gi yesi na a bun nyunsu fu wi Masra Yesus”.—2 Tesalonikasma 1:6-8; Romesma 12:19.
11. Na sortu fasi libisma o feni reti „esi-esi”?
11 Ma fa wi musu frustan a dyaranti di Yesus ben gi taki Yehovah sa sorgu taki libisma o feni reti „esi-esi”? A Wortu fu Gado e sori taki aladi ’Yehovah abi langa pasensi’, toku a sa strafu sma esi-esi te a ten doro gi dati (Lukas 18:7, 8; 2 Petrus 3:9, 10). Na ini a ten fu Noa, di a Frudu ben kon, dan Gado no draidrai fu pori den ogri-ati sma. Na ini a ten fu Lot, di faya ben komoto fu hemel, dan den ogri-ati sma kisi pori tu. Yesus ben taki: „Na so a o de tu na a dei te a Manpikin fu libisma o tyari kon na krin” (Lukas 17:27-30). Na so a sa pasa baka, taki ’wan pori o kon wantronso na tapu’ den ogrisma (1 Tesalonikasma 5:2, 3). Iya, wi kan abi ala frutrow taki Yehovah no sa gi pasi taki a grontapu fu Satan sa tan srefi wan dei moro langa leki san de fanowdu.
„A sa sorgu taki den o feni reti”
12, 13. (a) San wi e leri fu Gado, soleki fa a e kon na krin na ini na agersitori fu Yesus di abi fu du nanga na uma di lasi en masra na ini dede, èn a krutuman? (b) Fu san ede wi kan abi a dyaranti taki Yehovah sa arki den begi fu wi, èn taki a sa sorgu taki wi feni reti?
12 Na agersitori fu Yesus di abi fu du nanga na uma di lasi en masra na ini dede, èn a krutuman, abi tra prenspari tru tori na ini. Yesus ben fiti na agersitori disi na a fasi disi: ’Yere san a krutuman taki aladi a no ben de wan regtfardiki sma! A no de so dan, taki Gado sa sorgu taki den wan di a kari sa feni reti?’ A no de fu taki dati Yesus no ben e agersi Yehovah nanga a krutuman, neleki a ben wani sori taki Gado ben o handri na a srefi fasi nanga den sma di poti bribi na ini en. Na presi fu dati, Yesus leri den bakaman fu en wan sani fu Yehovah, fu di a sori den a difrenti na mindri a krutuman nanga Gado. Na sortu fasi den e difrenti fu makandra?
13 A krutuman na ini na agersitori fu Yesus „no ben de wan regtfardiki sma”, ma „Gado na wan regtfardiki Krutuman” (Psalm 7:11; 33:5). A krutuman no ben e broko en ede kwetikweti nanga na uma di lasi en masra na ini dede, ma Yehovah e broko en ede nanga ibriwan sma (2 Kroniki 6:29, 30). A krutuman no ben wani yepi na uma, ma Yehovah wani yepi sma, iya a de klariklari fu yepi den sma di e dini en (Yesaya 30:18, 19). San wi e leri fu a tori disi? Fu di a krutuman di no ben de regtfardiki ben arki san na uma ben e aksi en èn fu di a meki a feni reti, meki a no de fu taki Yehovah sa de klariklari fu arki den begi fu a pipel fu en, èn a sa sorgu tu taki den feni reti!—Odo 15:29.
14. Fu san ede wi no musu lasi bribi taki a krutudei fu Gado o kon?
14 Fu dati ede, den sma di no e bribi moro taki a krutudei fu Gado de krosibei e meki wan bigi fowtu. Fu san ede? We fu taki en leti, den sma disi di no wani bribi moro taki „a bigi dei fu Yehovah” de krosibei, e sori taki den no e bribi taki Yehovah sa hori ensrefi na den pramisi fu en. Ma nowan sma abi a reti fu taki dati Gado no de getrow (Yob 9:12). Wan tumusi prenspari aksi di wi poti, na disi: ’Wi sa tan getrow na Gado?’ Èn na fu a sani dati Yesus ben taki di a kaba fruteri na agersitori fu na uma di lasi en masra na ini dede, èn a krutuman.
„A sa feni sma na grontapu di e bribi trutru?”
15. (a) Sortu aksi Yesus ben poti, èn fu san ede a du dati? (b) San wi musu aksi wisrefi?
15 Yesus ben poti a moi aksi disi: „Te a Manpikin fu libisma doro, dan trutru a sa feni sma na grontapu di e bribi trutru?” (Lukas 18:8) Den wortu ’sma di e bribi trutru’ no abi fu du nanga a bribi di furu sma e bribi na ini Gado, ma a abi fu du nanga wan spesrutu sortu bribi, namku a sortu bribi di na uma di lasi en masra na ini dede ben abi. Yesus no piki en eigi aksi. A ben poti na aksi disi fu meki den disipel prakseri efu den ben abi so wan bribi tu. A de so taki den ben e lasi bribi safrisafri, èn den ben o go du den sani di den ben libi na baka? Noso den ben abi a srefi sortu bribi leki a di fu na uma di lasi en masra na ini dede? Na ini a ten disi wi musu aksi wisrefi tu: ’Sortu bribi „a Manpikin fu libisma” e feni na ini mi ati?’
16. Sortu bribi na uma di lasi en masra na ini dede, ben abi?
16 Efu wi wani de wan fu den sma di o feni reti na Yehovah, dan wi musu de neleki na uma di lasi en masra na ini dede. Sortu bribi a ben abi? A ben sori a bribi fu en fu di a ben ’go ala yuru na a krutuman, èn a ben taki: „Yepi mi so taki mi kan feni reti.”’ Na uma disi ben de nomonomo fu feni reti na a onregtfardiki krutuman. Na so den futuboi fu Gado na ini a ten disi kan abi a frutrow taki Yehovah sa meki den feni reti, srefi te a e teki moro langa leki san den ben fruwakti. Boiti dati, den e sori taki den abi a frutrow taki den pramisi fu Gado sa kon tru, fu di den e tan begi, iya, den e ’bari kari Yehovah dei nanga neti’ (Lukas 18:7). Iya, efu wan Kresten no e aksi Yehovah moro fu meki a feni reti, dan dati e sori taki a no e bribi moro taki Yehovah sa yepi den futuboi fu en.
17. Sortu reide wi abi fu tan begi èn fu tan bribi taki a krutudei fu Yehovah o kon seiker?
17 A situwâsi di na uma disi ben de na ini, e sori wi taki wi abi moro reide fu tan begi Gado. Luku wan tu difrenti na mindri a situwâsi fu na uma nanga a di fu wi. Na uma ben e tan go na a krutuman aladi nowan sma ben gi en deki-ati fu du dati, ma a Wortu fu Gado e gi wi furu deki-ati fu „tan begi” (Romesma 12:12). Na uma disi no ben abi a dyaranti taki a krutuman ben o du san a aksi en, ma Yehovah e gi wi a dyaranti taki a sa sorgu taki wi feni reti. Nanga yepi fu en profeiti, Yehovah ben taki: „Awansi a e draidrai fu kon, tan fruwakti en; bika a sa kon tru seiker. A no sa kon lati” (Habakuk 2:3; Psalm 97:10). Na uma no ben abi nowan sma fu taki gi en so taki a krutuman ben kan yepi en. Ma wi abi wan makti yepiman, namku Yesus ’di de na a reti-anusei fu Gado èn di e taki gi wi tu’ (Romesma 8:34; Hebrewsma 7:25). Sobun, fu di na uma disi di ben de na ini wan muilek situwâsi ben e tan aksi a krutuman nanga ala frutrow taki a ben o meki a feni reti, meki wi abi moro reide fu tan bribi taki a krutudei fu Yehovah sa kon seiker!
18. Fa a begi di wi e begi sa yepi wi fu kisi wan moro tranga bribi, èn fa a sa yepi wi fu feni reti?
18 Na agersitori fu na uma di lasi en masra na ini dede e leri wi taki a begi di wi e begi abi furu fu du nanga a bribi fu wi, èn taki te wi e tan begi, dan dati kan yepi wi fu no lasi bribi. A no de fu taki dati wi no musu begi fu sma ai nomo, fu di dati no sa yepi wi fu tan abi wan tranga bribi (Mateyus 6:7, 8). Te wi begi fu di wi e frustan taki wi abi yepi fu Gado fanowdu, dan wi sa kon moro krosibei na Gado èn wi sa kisi wan moro tranga bribi. Èn fu di wi musu abi bribi fu man kisi frulusu, meki Yesus ben feni en fanowdu fu gi den disipel fu en a deki-ati fu „begi ala ten èn fu no kon weri fu dati”! (Lukas 18:1; 2 Tesalonikasma 3:13) A tru taki a no den begi fu wi o meki „a bigi dei fu Yehovah” kon, bika a dei dati sa kon efu wi e begi noso efu wi no e begi fu dati. Ma efu wi wani feni reti èn efu wi wani pasa a feti fu Gado libilibi, dan a de tumusi prenspari taki wi musu abi a yoisti bribi èn taki wi e libi akruderi den begi fu wi.
19. Fa wi kan sori taki wi abi a tranga overtoigi taki Gado ’sa sorgu taki wi feni reti’?
19 Soleki fa wi si, dan Yesus ben aksi: „Te a Manpikin fu libisma doro, dan trutru a sa feni sma na grontapu di e bribi trutru?” San na a piki tapu a tumusi prenspari aksi disi? Wi breiti trutru taki na ini a ten disi, milyunmilyun futuboi fu Yehovah na heri grontapu no drai baka gi en, èn nanga yepi fu den begi fu den, a pasensi fu den, nanga a fasi fa den e horidoro, den e sori taki trutru Yesus sa feni sma na grontapu di e bribi trutru! Iya, aladi wi no e feni reti na ini a grontapu disi fu Satan, toku wi abi a tranga overtoigi taki Gado sa ’sorgu taki den wan di a kari, sa feni reti’.
[Futuwortu]
^ paragraaf 3 Fu man frustan na agersitori disi moro krin, leisi Lukas 17:22-33. Luku san Lukas 17:22, 24, 30 abi fu du nanga na aksi na ini Lukas 18:8.
Yu e memre disi ete?
• San e meki taki son Kresten lasi bribi?
• Fu san ede wi kan abi a tranga overtoigi taki a krutudei fu Yehovah o kon?
• Sortu reide wi abi fu tan begi?
• Fa a begi di wi e tan begi sa yepi wi fu no lasi bribi?
[Aksi fu a tori disi]
[Prenki na tapu bladzijde 26]
San e kon na krin na ini na agersitori fu na uma di lasi en masra na ini dede, èn a krutuman?
[Prenki na tapu bladzijde 29]
Milyunmilyun sma na ini a ten disi abi a tranga overtoigi taki Gado sa „sorgu taki den feni reti”