Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San kan yepi yu te wan famiriman fu yu gowe libi Yehovah?

Yu kan tranga yusrefi èn sosrefi tra famiriman fu yu di e dini Yehovah ete. Abi furu fu du na ini a tru anbegi. De klariklari fu yepi trawan. Noiti no lasi a howpu taki a famiriman fu yu kan drai kon baka. No gi yusrefi a fowtu. Sori lespeki gi den sani di Yehovah seti fu gi sma trangaleri èn taki nanga yu mati fu a fasi fa yu e firi.—1/9, bladzijde 18-21.

• San na tu fasi fa Bijbel e yepi wi fu kon sabi san na „den lasti dei”?

Bijbel e taki fu sani di ben o pasa na ini a ten fu „a kaba fu a grontapu sistema disi” (Mateyus 24:3, 7, 8; Lukas 21:11). Bijbel e taki tu dati sma di e libi na ini „den lasti dei” ben o abi wan heri tra denki, èn den ben o tyari densrefi na wan heri tra fasi (2 Timoteyus 3:1-5). A prenspari fu hori na prakseri, taki a bun nyunsu fu a kownukondre ben o preiki tu na ini a ten disi.—15/9, bladzijde 4-6.

• San a gemeente musu du te wan Kresten di ben e rèi oto meki taki wan ongoloku pasa di abi leki bakapisi taki wan sma lasi en libi?

Den owruman di e ondrosuku a tori kan feni taki a sma no abi brudu-paiman, fu di a no ben man yepi taki so wan ongoloku pasa. Ma efu a sma abi brudu-paiman èn a sori berow, dan den owruman sa gebroiki Bijbel fu gi en piri-ai, èn a sa lasi son frantwortu di a abi na ini a gemeente.—15/9, bladzijde 30.

• Fu san ede sabidensi no man meki libisma libi fu têgo?

Sabiman e du difrenti sani fu pruberi fu meki libisma libi moro langa, iya, den e meki a libisma skin tan meki nyun cel, den e meki nyun lefre, niri, ati, nanga tra sani fu a libisma skin. Den e gebroiki den sani dati gi sikisma, sondro taki a skin fu den sma disi e kisi problema nanga dati. Ma Bijbel e sori taki a wan-enkri sani di kan meki libisma kisi têgo libi, na a lusu-paiman fu Yesus.—1/10, bladzijde 3-5.

• A Kresten dopu komoto fu a Dyu bribi di ben e sori taki sma ben musu wasi den heri skin?

Nôno dati no de so. Den Dyu ben e krin densrefi, ma a dopu fu Yohanes ben de tra fasi. A wet di Gado ben gi Moses ben sori taki wan sma ben musu krin ensrefi ibri tron baka, ma wan Kresten e dopu wán leisi nomo.—15/10, bladzijde 12, 13.

• San na a Dinariskoro?

Disi na wan skoro di e hori aiti wiki langa, gi gemeente owruman nanga dinari ini a diniwroko di no trow èn di man go dini na presi pe moro kownukondre preikiman de fanowdu. A kan taki den e go dini na ini a gemeente pe den komoto, na wan tra gemeente na ini a kondre dati, noso na wan tra kondre.—15/11, bladzijde 10, 11.

• San noso suma na a anti-krestes di kari na ini 1 Yohanes 2:18; 4:3?

Fu taki en leti, a wortu anti-krestes abi fu du nanga ala sma di e gens Krestes nanga den bakaman fu en, noso ala sma di e lei taki den na Krestes noso taki den e teki presi gi Krestes. Den wortu fu Yesus nanga Yohanes e sori taki na anti-krestes na wan grupu sma di e panya falsi kerkileri èn di no e saka densrefi na ondro a Kownukondre fu Gado.—1/12, bladzijde 4-6.