A fasi fa yu kan kon abi wan bun libi
A fasi fa yu kan kon abi wan bun libi
LEKI fa papa nanga mama e broko den ede nanga den pikin fu den èn den wani taki sani waka bun gi den, na so wi hemel Tata e broko en ede nanga wi èn a wani taki sani waka bun gi wi tu. Fu sori taki a lobi wi trutru, a e fruteri wi fa wi kan abi bun bakapisi na ini a libi èn san kan tyari takru bakapisi kon gi wi. Fu taki en leti, Bijbel e taki krin taki te wan sma e gi yesi na Gado, dan „ala san a e du sa waka bun”.—Psalm 1:3.
Ma efu dati de so, dan fu san ede so furu sma no abi wan bun èn koloku libi? Te wi e luku a psalm disi moro fini, dan wi o kisi piki tapu na aksi disi, èn wi o frustan fa wisrefi kan abi wan bun libi tu.
„A rai fu den ogriwan”
A psalm skrifiman e warskow wi fu no gi yesi na „a rai fu den ogriwan” (Psalm 1:1). A basi fu den „ogriwan” na Satan Didibri (Mateyus 6:13). Bijbel e sori wi taki Satan na „a tiriman fu grontapu” èn taki „heri grontapu de na ini a makti fu na ogriwan” (Yohanes 16:11; 1 Yohanes 5:19). Dati meki a no e fruwondru wi taki furu fu den rai di de fu feni na ini a grontapu disi, e kruderi nanga a denki fu na ogriwan dati.
Sortu rai den ogriwan e gi? Nofo tron den ogriwan no e lespeki Gado (Psalm 10:13). Na ala sei, den e gi sma rai di no e kruderi nanga a denki fu Gado èn di e sori taki den no e lespeki En. A disiten grontapu e gi sma deki-ati fu poti prakseri na „a lostu fu a skin, a lostu fu den ai, èn a prodo di wan sma e prodo nanga den gudu di a abi” (1 Yohanes 2:16). Telefisi nanga radio e gi sma deki-ati fu prisiri nomo na ini a libi èn fu feti baka gudu. Na heri grontapu, bisnis e pai moro leki 500 milyard Amerkan dala ibri yari gi reklame soso fu meki sma bai den sani fu den, awinsi den sma no abi den sani dati fanowdu. Ma reklame no e meki nomo taki sma e bai moro sani. Den meki tu taki sma no sabi krin moro san de fanowdu trutru fu man abi wan bun èn koloku libi.
A bakapisi de, taki aladi furu sma abi sani now di den no ben man bai fosi, toku den sani disi no sari gi den. Den wani moro gudu. Den feni taki efu yu no abi den sani disi, dan yu no man abi wan bun èn koloku libi. Ma disi na wan fowtu denki, èn a ’no e kon fu a Tata, ma fu grontapu’.—1 Yohanes 2:16.
A Mekiman fu wi sabi san wi abi fanowdu fu kan abi wan bun libi trutru. A rai fu en e difrenti fu „a rai fu den ogriwan”. Fu dati ede, efu wi wani kisi a blesi fu Gado èn na a srefi ten wi e suku fu go na fesi na ini a grontapu disi, dan a de neleki wi e pruberi fu waka na tapu tu difrenti pasi na a srefi ten. A sani dati no kan kwetikweti. Dati meki Bijbel e warskow wi: „No libi moro leki fa a grontapu sistema disi wani taki un musu libi”!—Romesma 12:2.
No libi leki fa grontapu wani taki yu musu libi
A grontapu di de na ini a makti fu Satan, wani meki a gersi leki a e broko en ede nanga wi. Ma wi musu luku bun. No frigiti taki Satan ben bedrigi a fosi uma Eva soso fu man kisi wini gi ensrefi. Baka dati, a gebroiki Eva fu meki Adam sondu. Na ini a ten fu wi, Satan e gebroiki libisma tu fu panya den takru rai fu en.
Fu eksempre, David di wi ben kari na ini a fosi artikel, ben musu wroko lati son leisi. Nofo tron a ben musu go na tra kondre tu gi a wroko fu en. „Mi ben e gowe fruku munde mamanten, dan mi ben e drai kon baka fodewroko na neti”, na so David taki. Bun mati, famiriman, nanga sma na wrokope ben sabi taki David ben abi fu du ala den sani dati efu a ben wani meki en na ini a grontapu disi. Den ben e taigi en taki a ben musu du en gi en osofamiri. Den taki dati a ben o abi fu wroko na a fasi disi wan tu yari nomo teleki a seti en libi. David e fruteri: „Den taki dati efu mi du dati, dan sani ben o waka moro bun gi mi osofamiri, fu di mi ben o tyari moro moni kon na oso. Mi ben o man libi wan moro bun libi. Aladi mi no ben de nanga mi osofamiri, den mati fu mi meki mi bribi taki trutru mi ben de wan moro bigi yepi gi den.” Furu sma e wroko tranga neleki David fu man gi na osofamiri fu den ala sani di den denki taki den lobiwan fu den abi fanowdu. Ma sani o waka bun trutru te sma e gi yesi na den sortu rai disi? San wan osofamiri abi fanowdu trutru?
David kon frustan san en osofamiri ben abi fanowdu trutru di a ben de na wan tra kondre gi a wroko fu en. „Mi ben de na telefon e taki nanga mi umapikin Angelica, di a aksi mi: ’Papa, fu san ede yu no wani tan na oso nanga wi?’” „A sani dati hati mi srefisrefi”, David taki. A sani di en umapikin taki, ben gi en a deki-ati fu libi a wroko fu en. David bosroiti fu gi en osofamiri san den ben abi fanowdu trutru, iya, a bosroiti fu de moro nanga en osofamiri èn fu poti moro prakseri na den.
Wi sa abi wan bun libi te wi e gi yesi na den rai fu Gado
San yu kan du na presi fu arki den someni takru rai di e kori sma na ini a grontapu disi? A psalm skrifiman e fruteri wi taki wan sma sa abi wan bun èn koloku libi ’te a e prisiri nanga a wet fu Yehovah, èn te a e leisi nanga wan safri sten na ini a wet dei nanga neti’.—Psalm 1:2.
Di Gado ben poti Yosua leki fesiman fu den Israelsma, dan Gado taigi en: „Dei nanga neti yu musu leisi [Gado Wortu] nanga wan safri sten.” Iya, a ben de prenspari fu leisi èn fu denki dipi fu Gado Wortu, ma boiti dati, Yosua ben musu „du ala den sani di skrifi na ini”. A no de fu taki, dati yu no e kisi wan bun libi te yu e leisi Bijbel nomo. Nôno, yu musu du san yu leisi. Gado ben taigi Yosua: „Te yu du dati, dan sani sa waka bun gi yu èn yu sa handri nanga koni.”—Yosua 1:8.
Prakseri wan pikin di e prisiri fu sidon leisi wan moi tori makandra nanga en lobi-ati papa noso mama. Awinsi omeni tron den leisi a tori kaba, den lobi den switi momenti disi. Na a srefi fasi, wan sma di lobi Gado e prisiri fu leisi Bijbel ibri dei, fu di a abi switi demakandra nanga en hemel Tata. Fu di so wan sma e du san Yehovah taki, meki a e tron „leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka bun”.—Psalm 1:3.
A bon di kari na ini a buku Psalm no e gro kon fu ensrefi. Na wan gronman prani en leti sei a watra èn a e sorgu en. Na a srefi fasi, wi hemel Tata e gi wi rai na ini Bijbel fu yepi wi tyari kenki kon te wi abi fowtu denki. Leki bakapisi fu dati, wi e kisi moi fasi èn wi e tron sma di e tyari densrefi na wan fasi di Gado feni bun.
Ma „den ogrisma no de so”. A tru taki now a gersi leki sani e waka bun gi den, ma te fu kaba den o abi takru bakapisi. Den „no o man tan tanapu te den e kisi krutu”. Na presi fu dati, ’den ogriwan no o man du ogri moro, bika den sa kisi pori’.—Psalm 1:4-6.
Sobun, no libi soleki fa grontapu wani taki yu musu libi. A kan taki yu abi a koni fu du wan sani bun èn kande yu kan meki en na ini a grontapu disi, ma luku bun fa yu e gebroiki a koni dati, noso fa yu e meki grontapu gebroiki en. Te wan sma e suku fu kon gudu nomonomo, dan dati no o tyari trutru wini kon, ma na wan agersi fasi so wan sma kan ’kon flaw’. Na a tra sei, te wan sma abi wan bun matifasi nanga Gado, dan sani o waka bun gi en èn a o de koloku trutru.
A fasi fa yu kan kon abi wan bun libi
Fu san ede wi kan taki dati te wan sma e du san Gado taki, dan ala san a e du sa waka bun? A psalm skrifiman no ben taki fa yu kan go na fesi na ini a grontapu disi. Sani sa waka bun gi wan sma te a e du san Gado e taki, èn wi sabi taki den sani di Gado e taigi wi fu du, e tyari bun bakapisi kon ala ten. Meki wi si fa sani kan waka bun gi yu te yu e fiti Bijbel gronprakseri.
Osofamiri: Bijbel e taigi masra fu „lobi den wefi leki den eigi skin”, èn wan Kresten wefi musu „abi dipi lespeki gi en masra” (Efeisesma 5:28, 33). Papa nanga mama e kisi a rai fu meki ten gi den pikin fu den, fu abi prisiri nanga den, èn fu leri den prenspari sani fu a libi (Deuteronomium 6:6, 7; Preikiman 3:4). Gado Wortu e gi papa nanga mama a rai disi tu: „No tanteri den pikin fu unu.” Te den e gi yesi na a rai disi, dan a moro makriki gi den pikin fu „gi yesi na [den] papa nanga mama” èn fu „lespeki [den] papa nanga mama” (Efeisesma 6:1-4). Te sma e gi yesi na den rai disi di komoto fu Gado, dan dati kan yepi den fu abi wan bun osofamiri-libi.
Mati: Furu fu wi wani mati. Wi wani taki sma lobi wi, èn wi meki na so wan fasi taki wi man sori lobi tu gi trawan. Yesus ben taigi den bakaman fu en taki den musu „lobi makandra” (Yohanes 13:34, 35). Na mindri den sma disi, wi e feni mati di wi kan lobi èn di wi kan frutrow. Wi kan fruteri den srefi san wi e denki èn fa wi e firi (Odo 18:24). Ma a moro prenspari sani, na taki te wi e gebroiki den gronprakseri fu Bijbel, dan wi kan „kon krosibei na Gado”, èn neleki Abraham wi kan tron „Yehovah mati” srefi.—Yakobus 2:23; 4:8.
Wan marki na ini a libi: Ala dei sma e du sani sondro fu abi wan marki na ini den libi. Ma sma di abi wan marki na ini den libi, abi wan bun libi trutru. Den no e frutrow tapu grontapu sani di kan lasi gowe wantronso. Ala sani di den e du e meki den koloku trutru, fu di den e poti prakseri na a trutru marki fu a libi. San na a trutru marki fu a libi? „Abi frede gi a tru Gado èn hori yusrefi na den komando fu en. Bika disi na a plekti fu libisma.”—Preikiman 12:13.
Howpu: Te Gado de wi Mati, dan wi o abi a howpu taki sani o waka bun gi wi na ini a ten di e kon. Na apostel Paulus ben taigi Kresten taki „den no musu frutrow tapu gudu di kan lasi gowe, ma den musu frutrow tapu Gado”. Na so fasi den ben o „poti wan bun fondamenti gi a tamara, neleki wan gudu di kibri bun, so taki den kan grabu a trutru libi hori bun steifi” (1 Timoteyus 6:17-19). Wi o kisi a trutru libi disi heri esi te Gado en hemel Kownukondre sa meki grontapu kon tron wan Paradijs baka.—Lukas 23:43.
Te yu e gebroiki Bijbel gronprakseri na ini yu libi, dan disi no wani taki dati problema no o miti yu, ma a sa yepi yu fu wai pasi gi ogri, so taki yu no abi fu ondrofeni a pen nanga a sari di ogrisma e ondrofeni. David di wi ben kari na a bigin, èn sosrefi milyunmilyun tra sma leki en, kon frustan o warti a de fu gebroiki Bijbel gronprakseri na ini den libi. Baka di David feni wan wroko pe den wrokoyuru ben bun gi en, a taki: „Mi breiti srefisrefi nanga a banti di mi abi nanga mi wefi èn nanga den pikin fu mi. Mi de nanga tangi tu fu a grani di mi kisi fu dini Yehovah Gado leki wan gemeente owruman.” A de krin fu si fu san ede a psalm e taki dati te wan sma e gi yesi na den rai fu Gado, dan „ala san a e du sa waka bun”!
[Faki na tapu bladzijde 6]
FEIFI SANI DI KAN YEPI YU FU KON ABI WAN BUN LIBI
1 No libi soleki fa a grontapu disi wani taki yu musu libi.
2 Leisi èn denki dipi fu Gado Wortu ibri dei.
3 Gebroiki den rai fu Bijbel na ini yu libi.
4 Meki Gado tron yu mati.
5 Abi frede gi a tru Gado, èn hori yusrefi na den komando fu en.
[Prenki na tapu bladzijde 7]
Yu e du den sani di de fanowdu fu abi wan bun libi?