„A fosi opobaka” bigin kaba!
„A fosi opobaka” bigin kaba!
„Den sma di dede èn di de wán nanga Krestes, o de den fosiwan di o opo baka.”—1 TESALONIKASMA 4:16.
1, 2. (a) Sortu howpu de gi den sma di dede? (b) Fu san ede yu e bribi na ini na opobaka? (Luku a futuwortu.)
„DEN libiwan sabi taki den sa dede.” A sani dati de so sensi di Adam sondu. Hondrohondro yari kaba, ibri sma di gebore sabi taki a o dede te fu kaba, èn furu sma aksi densrefi: ’San e pasa baka te wan sma dede? Den dedewan sabi wan sani ete?’ Bijbel e piki: „Den dedewan no sabi notinoti.”—Preikiman 9:5.
2 Den dedewan o man libi baka dan? Iya. Te yu luku en bun, Gado ben abi wan sani na prakseri gi a libisma famiri sensi a bigin, èn fu meki a prakseri dati kon tru, dan sma abi fu kon na libi baka. Na ini den hondrohondro yari di pasa, getrow futuboi fu Gado sori taki den ben e bribi a pramisi fu Yehovah taki wan Pikin o kiri Satan èn taki a o lusu den problema di Satan tyari kon (Genesis 3:15). Furu fu den getrow sma dati dede. Den sa abi fu kon na libi baka fu man si fa Yehovah o du san a pramisi na ini Genesis 3:15 èn sosrefi tra sani di a pramisi (Hebrewsma 11:13). Sma man kon na libi baka? Iya, sma man kon na libi baka. Na apostel Paulus ben taki: „Gado sa gi wan opobaka na den regtfardikiwan èn na den onregtfardikiwan” (Tori fu den Apostel 24:15). Wan leisi, wan yonkuman di nen Etikus ben fadon komoto fu wan fensre di ben de na a di fu dri sodro. „Di den go opo en, dan den si taki a dede”, ma Paulus meki a yonkuman disi kon na libi baka. Disi ben de a lastiwan fu den neigi opobaka di kari na ini Bijbel.—Tori fu den Apostel 20:7-12. *
3. Sortu trowstu yusrefi kisi fu a sani di Yesus taki na ini Yohanes 5:28, 29, èn fu san ede?
3 Den neigi opobaka dati e yepi wi fu bribi san Paulus ben taki. Den e meki wi abi moro bribi na ini a dyaranti di Yesus ben gi: „A yuru o kon te ala den sma di de na ini den grebi o yere [Yesus] sten, èn den o komopo drape” (Yohanes 5:28, 29). Den wortu disi e gi wi prisiri trutru! A de wan trowstu tu gi den milyunmilyun sma di abi lobiwan di dede!
4, 5. Fu sortu opobaka Bijbel e taki, èn fu sortuwan wi o taki na ini na artikel disi?
4 Moro furu fu den sma di sa kisi wan opobaka, sa kon na libi baka na ini wan grontapu pe sani e waka bun na ondro a tiri fu Gado Kownukondre (Psalm 37:10, 11, 29; Yesaya 11:6-9; 35:5, 6; 65:21-23). Ma fosi dati pasa, dan tra sma ben o kisi wan opobaka fosi. Na a fosi presi, Yesus Krestes ben musu kisi wan opobaka, so taki a ben man gi Gado a libi di a ben gi leki wan frulusu-ofrandi gi a bun fu wi. Yesus dede èn a kisi wan opobaka na ini 33 G.T.
5 Baka dati, den salfuwan fu „na Israel fu Gado” o kisi glori na ini hemel makandra nanga Masra Yesus Krestes. Drape den „o de ala ten nanga Masra” (Galasiasma 6:16; 1 Tesalonikasma 4:17). Bijbel e taki dati den na „den fosiwan di sa opo baka”, noso den e kisi „a fosi opobaka” (Filipisma 3:10, 11; Openbaring 20:6). Baka te ala den salfuwan kisi na opobaka dati, dan milyunmilyun sma sa kisi wan opobaka na grontapu fu man libi fu têgo na ini Paradijs. Fu dati ede, awinsi wi abi a howpu fu libi na hemel noso na grontapu, wi wani sabi moro fu „a fosi opobaka”. Fa den sma disi o opo baka? O ten disi o pasa?
„Nanga sortu skin” den o opo baka?
6, 7. (a) San musu pasa fosi den salfu Kresten kan go na hemel? (b) Nanga sortu skin den sa opo baka?
6 Na ini a fosi brifi di Paulus ben skrifi gi den Korentesma, a poti wan aksi di abi fu du nanga a fosi opobaka: „Fa den dedesma o opo baka? Iya, nanga sortu skin den o kon?” Baka dati a piki na aksi: „Te yu e sai wan siri, dan a no e kon na libi efu a no dede fosi . . . ma Gado e meki a siri gro kon tron a bon di Ensrefi wani en fu tron . . . A glori fu den libisani di de na hemel de tra fasi leki a glori fu den libisani na grontapu.”—1 Korentesma 15:35-40.
7 Paulus e sori taki Kresten di salfu nanga santa yeye, musu dede fosi den kan kisi libi na ini hemel. Te den dede, dan a libisma skin fu den e tron doti baka (Genesis 3:19). Na wan ten di Gado poti, den e kisi wan skin di fiti fu libi na ini hemel (1 Yohanes 3:2). Gado e gi den a grani tu fu libi sondro fu man dede. A libi disi no de wan sani di den e kisi te den gebore. „A skin di kan dede, musu tron wan skin di no man dede moro”, na so Paulus taki. Gado e gi a skin disi di no man dede, leki wan presenti na den sma di e kisi a fosi opobaka.—1 Korentesma 15:50, 53; Genesis 2:7; 2 Korentesma 5:1, 2, 8.
8. Fa wi sabi taki Gado no teki den 144.000 salfuwan puru na ini difrenti kerki?
8 Soso 144.000 sma o kisi a fosi opobaka. Yehovah ben bigin tyari den sma disi kon na wán na a Pinksterfesa fu 33 G.T., syatu baka di a gi Yesus wan opobaka. Den alamala abi „a nen fu [Yesus] nanga a nen fu en Tata . . . na tapu den fesi-ede” (Openbaring 14:1, 3). Sobun, Gado no teki den sma disi puru na ini furu difrenti kerki. Ala den sma di a teki, na bakaman fu Krestes, èn den alamala e prisiri fu tyari a nen fu a Tata, Yehovah. Baka te den kisi wan opobaka, den e kisi wan wroko fu du na ini hemel. A e gi den furu prisiri fu sabi taki den o de so krosibei fu Gado fu dini en.
A fosi opobaka bigin kaba?
9. Fa Openbaring 12:7 nanga 17:14 e yepi wi fu sabi o ten so a fosi opobaka bigin?
9 O ten a fosi opobaka e bigin? Furu buweisi de taki a bigin kaba. Fu eksempre, teki tu kapitel na ini Openbaring gersi nanga makandra. Luku Openbaring kapitel 12 fosi. Drape wi e leisi taki a nyun Kownu Yesus Krestes nanga den santa engel fu en, e feti teige Satan nanga den ogri yeye fu en (Openbaring 12:7-9). Nofo tron a tijdschrift disi sori taki a feti disi bigin na ini 1914. * Ma luku taki nowan fu den salfu bakaman fu Krestes de nanga Yesus fu feti a feti na ini hemel. Luku Openbaring kapitel 17 now. Drape wi e leisi taki baka te „Babilon a Bigiwan” kisi pori, dan a Pikin Skapu sa wini a feti teige den pipel. Wi e leisi moro fara: „Den sma di de nanga en, iya, den sma di Gado kari, den wan di a teki èn di de getrow, o wini a strei tu” (Openbaring 17:5, 14). Soleki fa a tekst e sori, dan „den sma di Gado kari, den wan di a teki èn di de getrow”, o de nanga Yesus fu pori a grontapu fu Satan krinkrin. Ma fu man du dati, dan den sma dati musu kisi wan opobaka fosi. Dati meki wi kan taki dati den salfuwan di dede bifo Armagedon, e kisi wan opobaka na ini a pisi ten na mindri 1914 nanga Armagedon.
10, 11. (a) Suma na den 24 owru man, èn san wan fu den e fruteri Yohanes? (b) San disi e sori wi?
10 Wi kan sabi moro fini o ten a fosi opobaka bigin? Openbaring 7:9-15 e fruteri wi wan prenspari sani. Drape na apostel Yohanes e taki fu wan fisyun pe a si „wan bigi ipi sma di nowan sma ben man teri”. Wan fu den 24 owru man e fruteri Yohanes suma na a bigi ipi sma. Den 24 owru man disi e prenki den 144.000 salfuwan di de makandra nanga Krestes na ini hemel (Lukas 22:28-30; Openbaring 4:4). * Yohanes srefi ben abi a howpu fu libi na ini hemel, ma a ben de wan libisma na grontapu ete di na owru man taki nanga en. Fu dati ede a musu de so, taki na ini a fisyun Yohanes e prenki den salfuwan na grontapu di no kisi libi na ini hemel ete.
11 Soleki fa wi si, dan wan fu den 24 owru man e fruteri Yohanes suma na den sma fu a bigi ipi. San disi e sori wi? A kan taki den wan fu a grupu fu 24 owruman di kisi wan opobaka kaba, e gi boskopu fu Gado na den salfuwan na grontapu na ini a ten disi. Fu san ede a prenspari fu sabi disi? Fu di na ini 1935, den salfu futuboi fu Gado na grontapu ben kon sabi krin suma na den sma fu a bigi ipi. Efu a de so taki wan fu den 24 owru man fruteri den salfuwan na grontapu a prenspari boskopu disi, dan dati e sori taki na owru man dati kisi wan opobaka no moro lati leki 1935. Disi wani taki dati a fosi opobaka bigin na ini a pisi ten na mindri 1914 nanga 1935. Ma wi kan sabi moro soifri srefi o ten a bigin?
12. Fu san ede a kan taki a fosi opobaka bigin na a pisi ten fu maart nanga april 1918?
12 Efu wi wani kon sabi a ten moro soifri, dan a ben o bun fu luku wan sani di pasa na ini Bijbel ten, èn fu teki dati gersi nanga wan sani di pasa na ini a ten fu wi. Na ini oktober 29 G.T., Gado ben salfu Yesus Krestes leki a sma di ben o tron Kownu fu Gado Kownukondre. Dri nanga afu yari baka dati, na a pisi ten fu maart nanga april 33 G.T., a kon na libi leki wan makti yeye. Wi sabi taki Yesus tron Kownu na ini oktober 1914. Wi kan taki dan dati na opobaka fu den getrow salfu bakaman fu en bigin dri nanga afu yari baka dati, sobun na a pisi ten fu maart nanga april 1918? We, a kan. Aladi Bijbel no e taki krin taki disi de so trutru, toku disi e kruderi nanga tra bijbeltekst di e sori taki a fosi opobaka bigin syatu baka di a denoya fu Krestes bigin.
13. Fa 1 Tesalonikasma 4:15-17 e sori taki a fosi opobaka bigin syatu baka di a denoya fu Krestes bigin?
13 Fu eksempre, Paulus ben skrifi: „Wi di o tan na libi te na a denoya fu Masra [a no e taki ’te na a kaba fu en denoya’], kwetikweti no sa gowe bifo den wan di dede kaba; bika Masra srefi o saka komoto fu hemel èn a o gi komando nanga wan tranga sten, iya, a sten fu wan gran engel, èn nanga a trompeti fu Gado. Dan den sma di dede èn di de wán nanga Krestes, o de den fosiwan di o opo baka. Baka dati, Gado o tyari wi di tan na libi, gowe makandra nanga den wan dati na ini den wolku fu miti Masra na loktu; na so fasi wi o de ala ten nanga Masra” (1 Tesalonikasma 4:15-17). Fu dati ede, den salfu Kresten di dede bifo a denoya fu Krestes, kisi wan opobaka bifo den salfuwan di ben de na libi ete na ini a denoya fu Krestes. Disi wani taki dati a fosi opobaka bigin syatu baka di a denoya fu Krestes bigin, èn a e go doro „na a ten fu en denoya” (1 Korentesma 15:23). A no de so taki ala salfuwan e kisi wan opobaka na a srefi momenti. A fosi opobaka e pasa na ini wan pisi ten.
„Ibriwan fu den kisi wan langa weti krosi fu weri”
14. (a) O ten den fisyun na ini Openbaring kapitel 6 e kon tru? (b) Fu sortu sani Openbaring 6:9 e taki?
14 Luku wan tra buweisi na ini Openbaring kapitel 6. Drape wi e si Yesus e sidon leki Kownu na tapu wan asi, èn a e go fu wini wan feti (Openbaring 6:2). Den pipel fu grontapu e feti bigi feti (Openbaring 6:4). Angriten de na ala sei (Openbaring 6:5, 6). Takru siki e kiri ipi-ipi sma (Openbaring 6:8). Sensi 1914 den sani disi e pasa na grontapu soleki fa den profeititori disi taki. Ma wan tra sani e pasa tu. A kapitel e taki fu wan altari, èn na a futu fu na altari Yohanes e si „a brudu fu den wan di sma kiri fu di den ben e horibaka gi a wortu fu Gado èn fu di den ben e kotoigi fu dati” (Openbaring 6:9). Na a brudu fu den getrow futuboi fu Yesus di sma kiri fu di den ben e gi kotoigi fayafaya, de na a futu fu na altari.
15, 16. Fruteri fu san ede Openbaring 6:10, 11 abi fu du nanga a fosi opobaka.
15 Neleki a brudu fu a regtfardiki man Abel, na so a brudu fu den Kresten disi e bari kari Gado fu strafu den sma di kiri den (Genesis 4:10). „Den ben bari nanga wan tranga sten, taki: ’Almakti Masra, yu di santa èn di tru, o langa yu o wakti fu krutu èn fu strafu den sma na grontapu di kiri wi?’” San e pasa baka dati? „Ibriwan fu den kisi wan langa weti krosi fu weri; den ben kisi fu yere tu taki den ben musu wakti pikinso ete, teleki ala den trawan di de srafu neleki den èn di de brada fu den, ben o dede; bika sma ben de fu kiri den trawan disi neleki fa sma ben kiri den.”—Openbaring 6:10, 11.
16 A de so taki a brudu na a futu fu na altari ben kisi den langa weti krosi? Dati no kan kwetikweti! Na wan agersi fasi a brudu fu sma trowe na tapu na altari, èn na den sma dati kisi den langa krosi. Den gi den libi leki bakaman fu Yesus, èn den kisi wan opobaka now leki yeye sma. Fa wi du sabi dati? Pikinmoro na a bigin fu a buku Openbaring, wi e leisi: „A sma di wini a strei, o weri weti krosi; mi no sa figi en nen puru kwetikweti na ini a buku fu libi.” Memre tu taki den 24 owru man ben „weri weti krosi èn na tapu den ede den ben weri gowtu kownu-ati” (Openbaring 3:5; 4:4). Sobun, baka di orloku, angriten, nanga takru siki bigin pori grontapu, dan a brudu na a futu fu na altari, namku den wan fu den 144.000 sma di dede, kisi libi baka fu go na hemel. Na wan agersi fasi den sma disi kisi langa weti krosi fu weri.
17. Na sortu fasi den wan di e kisi den langa weti krosi, musu „wakti”?
17 Den sma dati di e kisi wan opobaka fu libi na ini hemel, musu „wakti”. Den musu abi pasensi èn wakti a dei te Gado o strafu sma. Den wan di de „srafu neleki den”, namku den salfu Kresten di de na grontapu ete, musu sori ete taki den tan getrow na ondro tesi. Te a ten doro gi Gado fu strafu sma, dan den no abi fu „wakti” moro (Openbaring 7:3). Na a ten dati, den wan di kisi wan opobaka sa yepi Masra Yesus Krestes fu pori den ogrisma èn sosrefi den sma di kiri den Kresten.—2 Tesalonikasma 1:7-10.
San a wani taki gi wi
18, 19. (a) Fu san ede yu e taki dati a fosi opobaka bigin kaba? (b) Now di yu kon sabi moro fu a fosi opobaka, fa dati e meki yu firi?
18 Gado Wortu no e taki soifri sortu dei a fosi opobaka bigin, ma a e fruteri taki a e pasa na ini wan pisi ten, namku na ini a denoya fu Krestes. Den fosiwan di kisi na opobaka disi, na den salfu Kresten di dede bifo a denoya fu Krestes bigin. Te getrow salfu Kresten dede na ini a denoya fu Krestes, dan „fosi yu pingi yu ai”, den e kenki kon tron makti yeye (1 Korentesma 15:52). A de so taki ala den salfuwan o de na hemel bifo a feti fu Armagedon bigin? Wi no sabi dati. Ma san wi sabi, na taki ala den 144.000 salfuwan sa tanapu na tapu a hemel Sionbergi na a ten di Gado poti.
19 Wi sabi tu taki moro furu fu den 144.000 salfuwan de nanga Krestes kaba. Furu fu den no de na grontapu moro. Disi na wan bigi buweisi taki a ten te Gado o strafu sma, de krosibei! Heri esi a heri grontapu sistema fu Satan o kisi pori. Yesus o trowe Satan go na ini wan dipi peti. Baka dati, na opobaka fu a libisma famiri kan bigin, èn nanga yepi fu a frulusu-ofrandi fu Yesus, getrowsma kan opo baka fu kisi a libi di Adam ben lasi, namku wan libi sondro sondu. A profeititori fu Yehovah di skrifi na ini Genesis 3:15 e kon tru na wan tumusi moi fasi. A de wan bigi grani trutru fu libi na ini a ten disi!
[Futuwortu]
^ paragraaf 2 Yu kan leisi fu den tra aiti opobaka na ini 1 Kownu 17:21-23; 2 Kownu 4:32-37; 13:21; Markus 5:35, 41-43; Lukas 7:11-17; 24:34; Yohanes 11:43-45; Tori fu den Apostel 9:36-42.
^ paragraaf 9 Fu man sabi efu Bijbel e taki trutru taki a denoya fu Krestes bigin na ini 1914, dan luku a buku San Bijbel e leri wi trutru?, bladzijde 215-218. Yehovah Kotoigi tyari a buku disi kon na doro.
^ paragraaf 10 Efu yu wani ondrosuku fa wi sabi taki den 24 owru man e prenki salfu Kresten na ini hemel, dan yu kan luku a buku De Openbaring — Haar grootse climax is nabij! bladzijde 77. Yehovah Kotoigi tyari a buku disi kon na doro.
Yu kan tyari disi kon na krin?
Fa den bijbeltekst disi e yepi wi fu frustan o ten den salfuwan e kisi „a fosi opobaka”?
• 1 Korentesma 15:23; 1 Tesalonikasma 4:15-17
[Aksi fu a tori disi]
[Prenki na tapu bladzijde 26]
Sortu sma musu kisi wan opobaka fosi, bifo trawan fu a libisma famiri e kisi wan opobaka?
[Prenki na tapu bladzijde 29]
San a wani taki dati wan tu sma di dede, kisi wan langa weti krosi?