Den wan di kaba a Gileadskoro kisi rai di naki den ati

TAPU 9 september 2006, den studenti fu a di fu 121 klas fu a Waktitoren Bijbelskoro Gilead, kaba a skoro fu den na a Waktitoren Skoro Centrum na ini Patterson, New York. A dei dati wan konmakandra hori di gi ala arkiman deki-ati trutru.

Na a bigin fu a konmakandra, Geoffrey Jackson di de wan memre fu a Tiri Skin fu Yehovah Kotoigi, gi den 56 studenti nanga den tra 6366 arkiman fu difrenti kondre, wan switikon. A ben taki fu Psalm 86:11, pe skrifi: „Leri mi, o Yehovah, fu den pasi fu yu. Mi sa waka na ini yu waarheid. Meki mi ati kon de wán fu man frede yu nen.” Brada Jackson taki fu dri sani di e kon na krin na ini a vers disi. A taki: „A fosi pisi fu a vers e sori taki a prenspari fu teki leri. A di fu tu pisi e sori taki wi musu du san wi leri. A di fu dri pisi e sori san o meki taki wi wani du san wi leri. Den dri sani disi de prenspari spesrutu gi unu di o go dini na difrenti kondre leki zendeling.” Baka dati, a aksi den arkiman fu poti prakseri na den difrenti lezing èn den difrenti takimakandra di ben o tyari den dri prenspari sani disi kon na krin.

Rai di e gi deki-ati

William Malenfant di e wroko na a edekantoro, ben taki fu a tori „A moro bun libi di de”. A ben taki fu Maria, a sisa fu Marta. Wan leisi di Yesus go na a oso fu den, Maria go sidon na Yesus futusei fu arki en. Dati ben de a moro prenspari sani gi en. Yesus ben taigi Marta: „Maria . . . teki a bun pisi èn mi no o puru disi na en anu” (Lukas 10:38-42). „Prakseri nomo: Fu di Maria teki a yoisti bosroiti, meki ala ten a o memre taki a ben sidon na Yesus futusei e arki nanga en eigi yesi fa Yesus ben e fruteri den moi tru tori di abi fu du nanga Gado”, na so a takiman ben taki. Baka di a brada prèise den studenti fu den bun bosroiti di den teki na ini a diniwroko fu Gado, dan a taigi den: „Den bosroiti di unu teki meki taki unu abi a moro bun libi di de.”

Baka dati, Anthony Morris di de wan memre fu a Tiri Skin, taki fu wan tori di teki puru fu Romesma 13:14, namku „De leki Masra Yesus Krestes”. Fa wi kan du dati? Brada Morris ben sori taki efu wi wani de leki Masra Yesus Krestes, dan wi musu kon abi den srefi fasi fu en. Sobun, wi musu de leki Yesus èn wi musu denki leki fa a e denki. „Yesus ben e meki sma firi bun”, na so a takiman taki, „fu di a ben e poti prakseri na sma trutru èn sma ben man firi dati.” Dan a takiman fruteri fa den studenti kisi furu leri na a Gileadskoro, di yepi den fu „man frustan krin san na a bradi nanga a langa nanga a hei nanga a dipi” fu den leri fu Bijbel, soleki fa Efeisesma 3:18 e sori. Ma a memre den tu san vers 19 e taki. Drape skrifi: „Kon sabi a lobi fu Krestes di bigi moro sabi.” Brada Morris gi den studenti a deki-ati disi: „Bakaten, te unu e studeri, dan un musu prakseri fa unu kan sori lobi nanga sari-ati neleki Krestes, so taki unu kan ’de leki Masra Yesus Krestes’ trutru.”

 Den lasti rai fu den leriman fu Gileadskoro

Baka dati, Wallace Liverance, wan fu den leriman fu a Gileadskoro hori wan lezing di abi fu du nanga Odo 4:7. A ben taki dati a koni di Gado e gi sma na wan tumusi prenspari sani, ma wi no musu frigiti fu „kon kisi frustan” tu. Disi wani taki dati wi musu kon sabi a fini fu wan tori di wi e leri. Wi musu man frustan san den difrenti pisi fu a tori dati abi fu du nanga makandra, so taki te fu kaba wi man frustan a heri tori. A takiman ben sori taki te wi kon kisi frustan na so wan fasi, dan wi sa abi prisiri. Fu eksempre, na ini a ten fu Nehemia, den Leifisma ben e „tyari a wet kon na krin”, èn den ben e „meki sma kon frustan” a wet. Dati meki a pipel ben „abi bigi prisiri, bika den ben frustan den wortu di sma ben meki den kon sabi” (Nehemia  8:7, 8, 12). Na a kaba fu a lezing Brada Liverance taki: „Te wan sma e frustan den sani di Gado meki sma skrifi, dan a sma dati o abi prisiri.”

„Suma na yu feanti trutru?” Dati na a tori di Mark Noumair, wan tra leriman fu a Gileadskoro ben taki fu en. Te feti de, dan furu srudati e dede fu di tra srudati fu den eigi legre e sutu den kiri, ma no fu espresi. A brada aksi: „Fa a de nanga a feti di Kresten musu feti? Efu wi no luku bun, dan wi kan bruya na so wan fasi, taki wi no sabi moro suma na wi feanti trutru. Disi kan meki taki wi du ogri nanga wi Kresten brada noso sisa.” Wan fu den sani di kan bruya sonwan fu wi, na dyarusu. Na a sani dati meki taki Kownu Saul pruberi fu kiri David di ben e anbegi a srefi Gado leki en. Ma den trutru feanti fu den ben de den Filisteasma (1 Samuel 18:7-9; 23:27, 28). Dan Brada Noumair taki moro fara: „Fa a de te yu musu wroko makandra nanga wan zendeling di sabi du furu sani moro bun leki yu? Yu o du ogri nanga a brada dati fu di yu e taigi en hati sani ibri tron baka, aladi a e feti a srefi feti leki yu? Noso yu o tan libi bun nanga en fu di yu sabi taki furu sani de di tra sma man du moro bun leki yu? Te wi e poti prakseri tumusi na den fowtu fu trawan, dan dati kan bruya wi na so wan fasi, taki wi no sabi moro suma na wi feanti trutru. Feti nanga a trutru feanti, Satan.”

Moi ondrofenitori nanga takimakandra di kan leri wi wan sani

Lawrence Bowen, wan tra leriman fu a Gileadskoro, ben hori a lezing di nen „Du a wroko fu wan sma di musu preiki a bun nyunsu”. Na ini a lezing disi, a brada ben abi takimakandra nanga wan tu sma èn a ben e fruteri wan tu ondrofenitori. A ben taki dati a moro prenspari wroko fu wan zendeling di kisi leri na a Gileadskoro, na fu preiki a bun nyunsu. A ben fruteri taki den studenti fu a klas disi ben du dati trutru na ala sei pe den ben miti sma. Ne a meki den demo wan tu fu den sani di den ondrofeni.

Baka dati, tu memre fu a Bethelfamiri hori wan lezing. Fosi yu ben kisi Michael Burnett èn baka dati Scott Shoffner. Den taki nanga brada fu den Bijkantoro Komte fu Australia, Barbados, Korea, nanga Uganda. Den brada fu den Bijkantoro Komte sori omeni muiti den e du fu sorgu gi den zendeling, fu suku wan bun tanpe gi den, èn fu sorgu taki den kisi bun datrayepi. Den brada fu a Bijkantoro Komte tyari kon na krin taki Kresten di wani de bun zendeling, musu de klariklari fu fiti densrefi na a fasi fa den sma na ini a kondre e libi.

A lasti lezing gi sma deki-ati èn a naki den ati

A moro prenspari lezing ben de „Frede Gado èn gi en glori”. John E. Barr di de wan memre fu a Tiri Skin langa ten kaba, ben hori a lezing disi. A taki fu Openbaring 14:6, 7 pe skrifi: „Mi si wan tra engel e frei na loktu; a ben abi têgo bun nyunsu di a ben musu meki bekènti leki prisiri nyunsu na den sma di e libi na grontapu, èn gi ala kondre, lo, tongo, nanga pipel; nanga wan tranga sten a ben e taki: ’Un frede Gado èn gi en glori, bika a yuru doro kaba taki a o krutu sma.’”

Brada Barr aksi den studenti fu poti prakseri na dri sani di na engel du. Na a fosi presi, na engel ben musu meki a têgo bun nyunsu bekènti, taki Krestes e tiri now èn taki a abi ala makti na ini a Kownukondre. Brada Barr taki: „Wi de seiker taki Yesus tron Kownu na ini 1914. Sobun, a prisiri nyunsu disi musu meki bekènti na heri grontapu.” Leki di fu tu sani, na engel taki: „Frede Gado.” A takiman ben sori den studenti taki den musu yepi den bijbelstudenti fu kisi bigi lespeki gi Gado, so taki den no du sani di no e plisi Gado. Leki di fu dri sani, na engel gi a komando: ’Gi Gado glori.’ A takiman taigi den studenti: „Noiti no frigiti taki a wroko fu wi na fu gi Gado glori, a no fu suku glori gi wisrefi.” Dan Brada Barr taki fu ’a yuru te Gado o krutu sma’. A taki: „Safrisafri a ten e kon fu fruteri sma taki Gado o strafu a grontapu disi wan lasti leisi. Furu sma na ini a kontren pe wi e libi musu yere a bun nyunsu ete bifo a lati tumusi.”

Nanga den wortu disi na prakseri, den 56 studenti di kaba a skoro, kisi den diploma. Den ben de srekasreka fu go na ala sei fu grontapu. Den moi rai di den takiman ben gi, naki na ati fu den studenti nanga den tra arkiman di ben kon drape na a prisiri dei dati.

[Faki na tapu bladzijde 17]

WAN TU SANI FU A KLAS

A nomru fu den kondre pe den studenti komoto: 6

A nomru fu den kondre pe den studenti o go: 25

A nomru fu studenti: 56

Gemiddeld yari di den abi: 35,1

Gemiddeld yari di den dopu: 18,3

Gemiddeld yari di den de na ini a furuten diniwroko: 13,9

[Prenki na tapu bladzijde 18]

A di fu 121 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.