San yu e si leki wan bun libi?

SON sma ben si Jesse Livermore leki a moro bun bisnisman di ben de na Wall Street. Den ben sabi en leki wan man di sabi teki koni bosroiti na ini bisnis afersi. A bakapisi ben de taki a man disi kon gudu srefisrefi. A ben e weri den moro moi krosi, a ben e libi na ini wan bun bigi oso nanga 29 kamra, èn a ben abi wan sma di ben e rèi en go na presi na ini en diri blaka wagi.

David * ben wani wan srefi sortu libi. A ben de ondro-driktoro fu wan bigi bisnis di abi kantoro na difrenti presi, èn a ben o man tron driktoro fu wan tu fu den kantoro dati. Gudu nanga biginen ben hari en. Ma toku David ben teki a bosroiti fu libi a wroko. „Mi sabi taki mi no sa abi so wan hei posisi noiti moro”, na so David taki. Yu denki taki David teki wan fowtu bosroiti?

Furu sma e denki taki wan sma abi wan bun libi te a gudu, te a pôpi, noso te a abi biginen. Ma a kan taki den wan di abi furu gudu, no de koloku trutru èn taki den no sabi san den musu du nanga den libi. Na so a ben de tu nanga Masra Livermore. Aladi a ben gudu, toku en libi ben lai problema nanga sari. A ben e firi brokosaka, a broko trow wan tu leisi, èn a no ben abi wan bun banti nanga den manpikin fu en. Wan dei, Masra Livermore go sidon na ini wan diri hotel. A ben e sari, fu di a ben lasi bun furu fu den gudu fu en. A bai  wan dringi, a teki en skrifibuku, dan a skrifi wan syatu brifi fu taigi en wefi adyosi. Di a kaba dringi, a waka go na ini wan dungru kamra, dan a sutu ensrefi kiri.

Difrenti sani de di e meki taki sma e kiri densrefi, ma na ondrofenitori disi e sori taki Bijbel abi leti te a e taki: „Den sma di wani kon gudu nomonomo . . . gi densrefi furu sari nanga pen.”—1 Timoteyus 6:9, 10.

Soleki fa wi si, dan furu sma e taki dati wan sma abi wan bun libi te a gudu, noso te a abi wan prenspari wroko noso biginen. Yu denki taki den sma disi e si a tori bun? Yu feni taki yu abi wan bun libi? Fu san ede yu e taki dati? San yu denki wan sma musu abi fu kan abi wan bun libi? San e meki taki yu abi a denki dati? Na artikel di e kon, o taki fu rai di yepi milyunmilyun sma fu abi wan bun libi. Meki wi luku fa yu kan abi wan bun libi tu.

[Futuwortu]