Wan man di ben lobi a libi èn di ben lobi sma

DANIEL SYDLIK ben de wan memre fu a Tiri Skin fu Yehovah Kotoigi furu yari langa, èn a kaba en diniwroko na grontapu tapu tudewroko, 18 april 2006. A ben abi 87 yari, èn sowan 60 yari langa a ben de wan memre fu a Bethelfamiri na ini Brooklyn, New York.

A ben kon na Bethel na ini 1946, èn den moro bun mati fu en ben lobi kari en Brada Dan. Fosi a ben kon na Bethel, a ben e dini leki spesrutu pionier na California. Na a ten fu a di fu Tu Grontapufeti, a ben de na strafu-oso wan pisi ten, bika leki Kresten a no ben wani du srudatiwroko. Na artikel „Hoe onvolprezen is uw vriendschap, o God!” na ini De Wachttoren fu 1 yuni 1985, e fruteri wi fu ala den sani di a ondrofeni na a ten dati.

Sma ben sabi Brada Sydlik leki wan man di ben e taki sani leki fa den de, ma a ben abi switifasi èn sma ben lobi fu taki nanga en. Te a ben e teki fesi na a deitekst takimakandra fu Bethel na mamanten, dan nofo tron a ben bigin nanga den wortu: „A bun fu de na libi fu dini a libilibi tru Gado.” Den wortu disi e sori taki a ben suku fu si a bun sei fu sani èn taki a ben lobi a libi. Te a ben e hori lezing, a ben e suku fu meki trawan abi a srefi denki disi. Fu eksempre, a ben hori lezing di nen „Koloku fu den sma di abi Yehovah leki Gado”, „Sori prisiri neleki Yehovah”, „Meki Gado yeye tan bron leki wan faya”, èn „Den moro bun sani de fu kon ete”.

Na ini 1970, Brada Sydlik trow nanga Marina Hodson di ben de fu Ingrisikondre. Brada Sydlik ben taki fu en wefi: „Na Gado seni en kon gi mi.” Leki trowpaar den dini Yehovah 35 yari langa.

Na ini den yari di Brada Sydlik ben de na Bethel, a dini na difrenti presi, soleki a presi pe den e meki buku èn sosrefi a presi pe den e skrifi den buku. A ben e wroko na a radiostation WBBR tu. Na ini November 1974, a ben tron wan memre fu a Tiri Skin, èn te fu kaba a ben e wroko makandra nanga a Personeel Komte nanga a Skrifi Komte.

Na ini den moro leki 30 yari di Brada Sydlik wroko na ini a Personeel Komte, a ben de krin fu si taki a ben lobi sma srefisrefi. Nanga en krakti sten a ben e gi furu sma deki-ati, èn a ben e poti prakseri ala ten na a spesrutu grani di wi abi fu dini Yehovah. Ala ten baka a ben sori taki wi man de koloku trutru te wi abi wan matifasi nanga Yehovah èn te wi e poti prakseri na den bun sani fu a libi. Tra fasi no de fu kon de koloku.

Aladi a Bethelfamiri e misi Brada Sydlik srefisrefi, den sa tan memre na eksempre di a gi leki wan sma di ben lobi a libi trutru èn di ben lobi sma tu. Wi de seiker taki en na wan fu den sma di Openbaring 14:13 e taki fu den: „Koloku fu den sma di o dede na ini Masra bigin fu now. Iya, na so a yeye e taki, meki den rostu fu a tranga wroko di den du, bika den sani di den du o go makandra nanga den.”