Ondrofenitori

Wi heri libi langa wi kisi furu blesi fu di wi teki bun bosroiti

Soleki fa Paul Kushnir fruteri

NA INI 1897, mi granpapa nanga mi granmama froisi fu Ukraini go na Kanada, èn den go libi na wan presi di nen Saskatchewan, na ini a foto Yorkton. Den doro drape nanga den fo pikin fu den, dri boi nanga wán meisje. A meisje fu den ben de mi mama, di nen Marinka. Mi gebore na ini 1923, èn mi ben de a di fu seibi pikin fu mi mama. Na a ten dati wi no ben abi furu gudu, ma wi ben abi wan bun libi. Wi ben e nyan bun, wi ben abi bun krosi fu weri te a ben kowru, èn lanti ben sorgu gi den tra sani di wi ben abi fanowdu. Wi ben abi birtisma di ben e libi bun nanga makandra, èn di ben e yepi makandra te furu wroko ben de fu du. Na ini a kowru pisi ten fu a yari 1925, wan Bijbel Ondrosukuman, soleki fa Yehovah Kotoigi ben nen fosi, kon na wi oso. Den sani di a fruteri wi, gi wi deki-ati fu teki bun bosroiti, èn te now ete mi breiti taki wi teki den bosroiti dati.

Wi osofamiri leri sabi a tru bribi

Mi mama ben teki wan tu buku fu a Bijbel Ondrosukuman di ben kon na wi oso, èn heri esi a si taki disi na a tru bribi. A go na fesi esi-esi na ini a tru anbegi èn a teki dopu na ini 1926. Di mi mama tron wan Bijbel Ondrosukuman, dan dati meki taki a heri osofamiri bigin denki tra fasi fu a libi. Sensi a ten dati, wi ben lobi fu meki sma tan na wi. Furu tron, den pilgrim noso opziener di e fisiti difrenti gemeente, èn tra Bijbel Ondrosukuman ben e tan na wi. Na ini 1928, wan kring-opziener sori wi na „Eureka Drama”. Disi ben de a syatuwan fu a „Photo-Drama der Schepping”. Wi leki pikinwan ben abi wan preiprei todo di ben e meki wan babari so, klik-klik-klik. Di a brada kon fu sori wi a drama, dan a ben leni a todo fu wi. Ibri leisi te wi ben yere a babari fu a todo, dan wi ben sabi taki a ben o sori wi wan tra prenki fu a drama. Wi ben feni en wan kefalek sani taki wi ben kan leni en a preiprei todo fu wi!

Wan kring-opziener di nen Emil Zarysky ben lobi fu kon na wi nanga wan sortu wagi pe a ben tan na ini. Son leisi a ben e kon nanga a bigi boi fu en di ben gi wi leki pikinwan deki-ati fu prakseri fu go na ini a furuten diniwroko, noso a pionierwroko.  Furu pionier ben kon tan na wi oso tu. Wan leisi, na empi fu wan pionier ben priti. Mi mama leni en wan tra empi so taki a ben kan nai na empi fu en. Di a brada disi gowe, a frigiti fu gi mi mama na empi baka. Baka wan heri pisi ten, a seni na empi kon baka èn a aksi pardon taki a hori en so langa. A ben skrifi: „Mi no ben man pai den tin sensi fu seni en gi unu.” Wi ben winsi taki a ben hori na empi! Mi ben howpu taki wan dei mi ben kan de leki den pionier disi di e du ala san den man fu yepi trawan. Mi de nanga tangi taki mi mama ben lobi fu meki sma tan na wi. A sani dati gi wi moro prisiri na ini a libi èn a meki wi kisi moro lobi gi wi Kresten brada nanga sisa.—1 Petrus 4:8, 9.

Mi papa noiti no tron wan Bijbel Ondrosukuman, ma a no ben e gens wi. Na ini 1930 a ben gi den brada primisi srefi fu gebroiki a bigi maksin fu wi fu hori wan bigi konmakandra di ben teki wán dei. Aladi mi ben abi seibi yari nomo, toku a naki mi ati fu si fa den brada nanga sisa ben abi prisiri, èn fa sani ben waka na wan lespeki fasi. Mi papa dede na ini 1933. Sensi a ten dati, mi mama wawan ben musu sorgu gi aiti pikin, ma a ben abi a fasti bosroiti fu du ala san a man fu meki wi tan na ini a tru anbegi. A ben tyari mi go na den konmakandra. Na a ten dati, a ben gersi leki den konmakandra ben langa tumusi. Te mi ben si taki tra pikin ben mag go prei na dorosei, dan mi ben wani go prei nanga den tu. Ma fu di mi ben abi lespeki gi mi mama, meki mi ben tan sidon na tapu mi presi. Te mi mama ben e bori, dan a ben lobi kari wan bijbeltekst èn a ben aksi mi pe a skrifi na ini Bijbel. Na ini 1933, a kotiwroko ben waka so bun gi wi, taki mi mama ben abi nofo moni fu bai wan wagi. Wan tu birtisma ben feni taki mi mama ben e frumorsu moni, ma mi mama ben denki taki wi ben o man gebroiki en bun na ini a diniwroko. A ben abi leti.

Tra sma yepi mi fu teki bun bosroiti

Wan dei o kon te wan yonguwan musu teki bosroiti di sa abi krakti tapu en libi. Di den bigi sisa fu mi, Helen nanga Kay, ben musu teki wan bosroiti, dan den bigin pionier. Wan fu den pionier di ben kon wan leisi na wi oso, ben de John Jazewsky. A ben de wan yonkuman di ben e tyari ensrefi na wan lespeki fasi. Mi mama ben aksi John fu tan wan pisi ten na wi fu yepi wroko a gron fu wi. Bakaten, John trow nanga Kay, èn den ben e dini leki pionier na wan presi di no ben fara fu wi oso. Di mi ben abi 12 yari, den aksi mi fu go nanga den na ini a preikiwroko na ini a fakansi. Dati gi mi na okasi fu si san a wani taki fu de wan pionier.

Baka wan pisi ten, mi nanga mi brada John ben man teki a gronwroko na wi tapu. Na so fasi mi mama ben kan go na ini a yepi-pionierwroko na ini den mun yuli nanga augustus. A ben e gebroiki a burikiwagi di ben abi tu banti, èn di wan owru asi ben e hari. Mi papa ben e kari a trangayesi asi dati Saul, ma mi mama no ben feni taki a ben trangayesi. Mi nanga John ben lobi wroko a gron, ma te mi mama ben kon na oso, dan a ben lobi fruteri wi den moi sani di a ondrofeni na ini a preikiwroko. A sani dati meki wi kisi moro lobi gi a pionierwroko. Na ini 1938, mi bigin du moro na ini a preikiwroko, èn tapu 9 februari 1940 mi teki dopu.

Wan pisi ten baka dati, mi tron dinari na ini a gemeente. Mi ben musu sorgu gi den raportu fu a gemeente, èn ibri leisi te mi ben si taki a gemeente ben go na fesi, mi ben e prisiri. Mi ben abi mi eigi kontren pe mi ben e go preiki na ini wan foto di ben de sowan 15 kilometer fu mi oso. Na ini a kowru pisi ten fu a yari, mi ben waka go drape ibri wiki èn mi ben sribi wán noso tu neti drape na a sodro fu wan oso di ben de fu wan osofamiri di ben wani sabi moro fu Bijbel. Wan leisi, mi ben abi wan takimakandra nanga a fesiman fu a Luther Kerki, ma mi no ben luku bun fa mi ben e taki nanga en. Dati meki a fesiman taigi mi taki a o kari skowtu gi mi efu mi ben o tan go na den memre fu en kerki. A sani dati no tapu mi, ma a gi mi moro faya fu preiki go doro.

 Na ini 1942 mi sisa Kay nanga en masra John ben o go na wan kongres di ben o hori na Amerkankondre na ini a foto Cleveland, na Ohio. Mi ben breiti di den aksi mi fu go nanga den. A kongres dati ben de wan fu den moro bun sani di pasa na ini mi libi. A gi mi moro deki-ati fu du den sani di mi ben wani du na ini mi libi. Brada Nathan Knorr, di ben e teki fesi na a wroko di e du na heri grontapu, ben hori wan lezing na a kongres dati. A ben fruteri taki 10.000 pionier ben de fanowdu, èn nanga faya a ben gi den sma na a kongres deki-ati fu tron pionier. Leti drape mi teki a bosroiti fu tron wan pionier!

Na ini yanuari 1943, Henry, wan kring-opziener, fisiti a gemeente fu wi. A hori wan moi lezing di meki taki wi kon de nanga faya. A dei baka di a hori a lezing, a ben kowru sowan 40 graden Celcius, èn fu di a winti ben e wai tranga, meki a ben moro kowru. Furu tron te a ben kowru so, wi ben tan na oso, ma Henry ben angri fu go na ini a preikiwroko. En nanga wan tu trawan ben rèi na ini wan sortu wagi di asi ben e hari na tapu snew. A ben abi wan sortu onfu na inisei fu waran den skin. Na so den go na wan dorpu di ben de sowan 11 kilometer fara. Mi ben go mi wawan na wan osofamiri di ben abi feifi manpikin. Mi aksi den efu den ben wani studeri Bijbel, èn den ben wani dati. Bakaten den teki a tru bribi.

Wi tan preiki aladi lanti ben tapu a wroko

Na a ten fu a di fu Tu Grontapufeti, lanti ben tapu a preikiwroko na ini Kanada. Wi ben musu kibri den buku fu wi, èn na ososei wi ben abi furu presi fu kibri den. Furu tron den skowtu ben e kon na wi oso, ma noiti den feni wan sani. Te wi ben e preiki, wi ben e gebroiki Bijbel wawan. Wi ben kon makandra na ini pikin grupu, èn mi nanga mi brada John ben kisi a wroko fu tyari buku na wan kibri fasi go na brada nanga sisa na difrenti presi.

Na a ten fu na orloku, a gemeente fu wi ben e prati a pikin buku di nen End of Nazism (A kaba fu a Nazi tirimakti). A wroko disi ben du na ini a heri kondre. Wi ben e wroko mindrineti. Mi ben frede trutru te wi ben e waka safri go na ibri oso fu libi wan buku na a mofodoro. Noiti ete mi ben frede so. Mi ben breiti srefisrefi di wi prati a lastiwan fu a buku! Esi-esi wi drai go baka na a wagi, wi luku efu ala sma ben de, èn wi ben rèi gowe na ini a dungru.

A pionierwroko, strafu-oso, nanga den bigi konmakandra

Tapu 1 mei 1943, mi taigi mi mama adyosi fu di mi ben o gowe. Dan mi teki pasi go na a fosi presi pe den seni mi go fu pionier. Mi ben abi 20 dala nomo nanga wan pikin kofru. Mi ben man tan nanga Brada Tom Troop nanga en lobi-ati osofamiri di ben e libi na ini a foto Quill Lake, na Saskatchewan. A yari baka dati, mi go na wan farawe presi na ini Weyburn, wan foto na Saskatchewan. Tapu 24 december 1944, skowtu teki mi go sroto di mi ben e prati buku na strati. Mi tan wan pisi ten na ini wan strafu-oso na ini Weyburn, èn baka dati den tyari mi go na wan wrokoman kampu na ini Jasper, wan foto na Alberta. Di mi nanga wan tu tra Kotoigi ben de drape, wi ben man si den moi bigi bergi fu Kanada di Yehovah meki. Na a bigin fu a yari 1945, den waktiman fu a kampu gi wi primisi fu go na wan konmakandra na ini Edmonton, Alberta. Brada Knorr fruteri wi fa a wroko ben e go moi na fesi na heri grontapu. Wi no ben man wakti fu komoto na strafu so taki wi ben kan go preiki fayafaya baka.

Di den lusu mi, mi bigin pionier baka. Syatu baka dati, den brada ben meki bekènti taki wan bigi konmakandra ben o hori na ini Los Angeles, Kalifornia. A konmakandra ben nen „Uitbreiding tot alle natiën” (A bun nyunsu e preiki na ala kondre). Wan brada na ini a nyun kontren pe mi ben e pionier, poti 20 sidonpresi na ini a baki fu en wagi. Tapu 1 augustus 1947, wi teki pasi fu go na Los Angeles. Noiti mi o frigiti a ten dati. Wi rèi sowan 7200 kilometer èn wi pasa bigi wei, drei sabana, nanga tra kefalek moi presi soleki Yellowstone nanga Yosemite. Wi ben de na pasi 27 dei langa, èn a ben de wan switi ten trutru!

A kongres ben de wan blesi, iya, wan sani di  mi no sa frigiti noiti. Fu di mi ben wani kisi wini fu a kongres dorodoro, meki mi ben wroko leki dienst-yepiman te deiten, èn leki waktiman te neti. Baka di mi go na a konmakandra di ben hori gi den wan di ben wani tron zendeling, dan mi gi mi nen fu dini leki zendeling, ma mi no ben fruwakti taki mi ben o kisi a grani dati. Baka dati na ini 1948, mi go dini leki pionier na Quebec, wan distrikt fu Kanada.—Yesaya 6:8.

Gileadskoro èn den sani di mi du baka dati

Na ini 1949, mi ben breiti taki mi kisi a kari fu go na a di fu 14 klas fu a Waktitoren Bijbelskoro Gilead. Den sani di mi leri drape tranga a bribi fu mi èn a meki mi kisi wan moro tranga banti nanga Yehovah. John nanga Kay ben klari a di fu 11 klas èn den ben e dini leki zendeling na ini Noord-Rodesia (now a nen Sambia). Mi brada John klari a Gileadskoro na ini 1956. Makandra nanga en wefi, Frieda, a dini na ini Brasyonkondre 32 yari langa teleki a dede.

Na ini februari 1950, a lasti dei fu a Gileadskoro, mi ben breiti di mi kisi tu syatu brifi, wán fu mi mama, nanga a trawan fu na osofamiri Troop di e tan na ini a foto Quill Lake. Na a bigin fu a brifi, famiri Troop ben skrifi „Rai gi wan sma di klari a skoro”. A brifi ben taki moro fara: „Disi na wan tumusi prenspari dei gi yu. Wan dei di yu no sa frigiti noiti, èn wi e howpu taki sani waka bun na ini yu libi èn taki yu sa abi furu prisiri.”

Mi kisi a grani fu go dini na ini a foto Quebec, ma fosi mi go drape mi tan wroko wan pisi ten na a Kownukondre Boerderij na ini New York State, pe a Gileadskoro ben de na ini a ten dati. Wan dei, Brada Knorr aksi mi efu mi wani go na Belgia. Ma wan tu dei baka dati, a aksi mi efu mi wani go dini na Bakrakondre. Di mi kisi a brifi di ben taki sortu wroko mi ben o du, dan mi leisi taki mi ben o „dini leki bijkantoro dinari”. Mi ben frede taki mi no ben o man du a wroko.

Tapu 24 augustus 1950, mi teki boto go na Bakrakondre èn a teki 11 dei fosi mi doro drape. Mi ben abi nofo ten fu leisi a heri Nyun Grontapuvertaling fu den Kresten Griki Buku fu Bijbel, di ben kon na doro no so langa ete. Mi doro na ini Rotterdam tapu 5 september 1950, pe a Bethelfamiri gi mi wan switikon. Aladi a di fu Tu Grontapufeti ben pori so furu sani, toku den brada nanga sisa ben man sreka sani fu du a Kresten diniwroko baka. Di den fruteri mi sortu hebi tesi den kisi èn fa den horidoro, dan mi ben denki taki a ben o muilek gi den brada fu wroko na mi ondro, fu di mi ben yongu èn fu di noiti ete mi dini leki bijkantoro dinari. Ma heri esi mi kon si taki mi no ben abi fu frede.

A no de fu taki dati wan tu prenspari sani ben musu seti. Mi doro leti fosi wan kongres ben o hori, èn a naki mi ati fu si fa dusundusun sma ben e tan na ini tenti na tapu a dyari fu a konmakandra presi. Mi gi den brada a rai fu seti sani so taki den brada nanga sisa ben kan tan na ini sma oso, te wan tra kongres ben o hori. Aladi den brada ben feni en wan bun sani, toku den taki dati den no ben o man du dati na ini a kondre fu den. Baka di wi taki-go-taki-kon fu a tori, wi agri taki afu fu den sma ben o tan na tapu a  dyari fu a konmakandra presi èn afu ben o tan na ini oso fu grontapusma na ini a foto pe a kongres ben o hori. Di Brada Knorr kon na a kongres, mi ben breiti fu fruteri en fa wi seti sani. Ma fosi yu denki, mi no ben breiti moro di mi leisi san ben skrifi fu wi kongres na ini A Waktitoren. Drape ben skrifi: „Wi de seiker taki tra leisi den brada o sori bribi èn taki den o seti sani moro bun, so taki den sma di e go na a kongres kan tan na ini den moro bun presi pe den kan gi kotoigi, namku na ini den oso fu sma.” Dati na soifri san wi du a „tra leisi”!

Na ini yuli 1961, tu brada fu wi bijkantoro ben kisi a kari fu go na wan konmakandra na ini London di ben o hori nanga brada fu tra bijkantoro. Brada Knorr ben meki bekènti taki a Bijbel, namku a New World Translation of the Holy Scriptures, ben o vertaal na ini tra tongo, èn sosrefi na ini Bakratongo. Wi ben breiti fu yere a nyunsu dati! A bun taki wi no ben sabi o bigi a wroko dati ben o de. Tu yari baka dati, na ini 1963, wan kongres ben hori na ini New York. Mi ben prisiri taki mi ben abi wan prati na a kongres disi pe den meki bekènti taki a Nyun Grontapuvertaling fu den Kresten Griki Buku fu Bijbel kon na doro na ini Bakratongo.

Den bosroiti di mi teki èn den nyun grani di mi kisi

Na ini augustus 1961, mi trow nanga Leida Wamelink. En heri osofamiri tron anbegiman fu Yehovah na ini 1942 di den Nazi ben e frufolgu den Kotoigi. Leida bigin pionier na ini 1950 èn a go wroko na Bethel na ini 1953. A fasi fa a ben e wroko na Bethel èn na ini a gemeente ben sori mi taki a ben o horibaka gi mi na ini mi diniwroko.

Moro leki wan yari baka di wi trow, mi kisi wan kari fu go na Brooklyn fu kisi moro leri èn a ben o teki tin mun langa. Sani no ben seti so taki den wefi ben kan go makandra nanga den masra. Aladi a gosontu fu Leida no ben bun so, toku a agri taki mi ben kan go. Bakaten, Leida kon moro siki. Wi pruberi fu tan wroko na Bethel, ma te fu kaba wi si taki a ben o moro bun fu go na ini a furuten diniwroko dorosei fu Bethel. Dati meki wi go na ini a kringwroko. Syatu baka dati, mi wefi ben musu du wan bigi oparâsi. Na wan lobi-ati fasi mati horibaka gi wi na ini a pisi ten dati, èn wán yari baka dati mi ben kan dini leki distrikt-opziener srefi.

Seibi yari langa wi du kringwroko èn wi ben kisi furu deki-ati fu dati. Baka dati, wi ben musu teki wan prenspari bosroiti baka. Mi ben kisi a kari fu gi leri na a Kownukondre Diniwroko-skoro na Bethel. Wi teki a kari dati, aladi a ben hebi gi wi fu komoto na ini a kringwroko bika wi ben lobi a wroko dati trutru. Mi ben musu gi leri na 47 klas èn ibri klas ben musu kisi leri tu wiki langa. Ma dati ben gi mi wan moi okasi fu leri den gemeente owruman fa fu du a diniwroko moro bun.

Na a ten dati, mi ben e sreka sani fu go luku mi mama na ini 1978. Ma wantronso, tapu 29 april 1977, wi kisi boskopu taki mi mama dede. Mi ben sari trutru fu di mi ben sabi taki mi no ben o yere en switi sten moro èn taki mi no ben o man taigi en moro fa mi e warderi ala den sani di a du gi mi.

Na a kaba fu a Kownukondre Diniwroko-skoro, den brada aksi wi efu wi ben wani tron memre fu a Bethelfamiri. Na ini den yari baka dati, mi dini tin yari leki fesiman fu a Bijkantoro Komte. Baka wan pisi ten, a Tiri Skin poti wan tra brada leki fesiman, fu di a ben o man tyari a frantwortu moro bun. Mi de nanga tangi taki den du dati.

Mi e du san mi man now di mi kon owru

Mi nanga Leida abi 83 yari now. Mi dini moro leki 60 yari na ini a furuten diniwroko, èn den lasti 45 yari mi du dati makandra nanga mi wefi di horibaka gi mi ala ten. A horibaka gi mi na ini ala den wroko di mi ben musu du, fu di a ben si disi leki wan fasi fu dini Yehovah. Now wi e du san wi man na Bethel èn na ini a gemeente.—Yesaya 46:4.

Ten na ten, wi lobi taki fu moi sani di pasa na ini wi libi. A no e hati wi taki wi du ala den sani disi gi Yehovah, èn wi abi na overtoigi taki wi teki den moro bun bosroiti di wi ben yongu. Wi abi a fasti bosroiti fu tan dini Yehovah èn fu tan gi en glori nanga ala wi krakti.

[Prenki na tapu bladzijde 13]

Mi nanga mi bigi brada Bill, èn nanga Saul, na asi fu wi

[Prenki na tapu bladzijde 15]

Tapu wi trowdei na ini augustus 1961

[Prenki na tapu bladzijde 15]

Mi nanga Leida na ini a ten disi