Yu kan opo yu ati fu lobi trawan?

A KETI di fasi na a ankra fu wan sipi musu tranga nofo, so taki a sipi no drifi gowe. Ma a keti o tranga nofo soso efu den linga steifi èn efu den fasi bun na makandra. Bika efu dati no de so, dan a keti o koti.

Na so a de tu nanga a Kresten gemeente. Efu wi wani wan tranga gemeente, dan ibri sma musu abi wan bun banti nanga makandra. San e meki taki den abi a bun banti dati? Lobi. Dati na a moro tranga sani di e meki taki wánfasi de na mindri sma. Fu dati ede wi kan frustan fu san ede Yesus Krestes ben taigi den disipel fu en: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.” Iya, furu sma sabi makandra èn den e lespeki makandra, ma tru Kresten abi wan lobi di tranga moro dati. A lobi fu den e meki den du sani gi trawan sondro fu suku den eigi wini.—Yohanes 13:34, 35.

Wi musu warderi wi Kresten brada nanga sisa

Na ini furu gemeente, yu abi owrusma nanga yongusma, sma fu difrenti kondre, sma di abi tra gwenti, sma di e taki tra tongo, èn sma di kweki tra fasi leki wi. Ibri sma na ini a gemeente abi sani di a lobi èn sani di a no lobi, sani di a e fruwakti èn sani di a e frede. Nofo tron ibriwan fu den abi den eigi broko-ede tu, kande den siki noso den abi moni problema. Ala den difrenti disi kan meki en muilek fu tan hori a Kresten wánfasi. San kan yepi wi fu lobi trawan èn fu tan abi wánfasi, aladi wi e difrenti fu makandra? Te wi abi trutru warderi gi ala sma na ini a gemeente, dan dati sa yepi wi fu lobi makandra moro.

Ma san a wani taki fu warderi wan sma? Wan wortubuku e sori taki te wi e warderi wan sma, dan wi e firi gi a sma, wi e lespeki a sma, wi e si den bun fasi fu a sma, èn wi breiti nanga a sma (The New Shorter Oxford English Dictionary). Efu wi e warderi wi Kresten brada nanga sisa, dan wi e firi gi den èn wi e suku fu yepi den, wi abi furu lespeki gi den, wi e si den bun fasi fu den, èn wi breiti taki den e dini Gado makandra nanga wi. A sani disi e meki taki wi e kon lobi den srefisrefi. Te wi e luku syatu san na apostel Paulus ben skrifi gi den fosi-yarihondro Kresten fu Korente, dan dati sa yepi wi fu si fa wi kan sori trutru lobi leki Kresten.

Den Korentesma ’no ben e opo den ati nofo’

Paulus ben skrifi en fosi brifi gi den Korentesma na ini 55 G.T., èn a ben skrifi den wan tra brifi na ini a srefi yari dati. Den brifi fu en e sori taki wan tu sma fu a gemeente na ini Korente no ben abi nofo warderi gi den Kresten brada nanga sisa fu den. Paulus ben fruteri fa a situwâsi ben de: „Un Korentesma, wi opo wi mofo fu taki nanga unu èn wi opo wi ati gi unu. Wi ati no tapu gi unu, ma unu no e opo un ati nofo fu sori dipi firi fu lobi gi wi” (2 Korentesma 6:11, 12). Di Paulus taki dati den ’no ben e opo den ati nofo’, dan san a ben wani taki nanga dati?

A ben wani sori den taki den no ben e sori  nofo lobi gi trawan. Wan Bijbel sabiman e taki dati den Korentesma no ben e sori lobi gi Paulus, fu di den ben feni taki a no ben de fu frutrow èn taki a ben hati den firi fu den.

Luku a rai di Paulus ben gi: „Mi e taki nanga unu leki nanga pikin-nengre, iya, unsrefi musu opo un ati tu” (2 Korentesma 6:13). Paulus ben gi den Korentesma deki-ati fu sori moro lobi gi den Kresten brada nanga sisa fu den. Den no ben musu si makandra leki feanti, èn den no ben musu meki trobi fu pikinpikin sani. Ma den ben musu luku den bun fasi fu den brada nanga sisa, èn den ben musu de klariklari fu sori lobi.

Fa fu sori moro lobi gi trawan na ini a ten disi

A e naki wi ati fu si fa tru anbegiman fu Gado na ini a ten disi e meki muiti fu sori moro lobi gi makandra. Iya, wi musu meki muiti efu wi wani opo wi ati fu lobi trawan. A no nofo fu sabi nomo san wi musu du. Efu wi wani opo wi ati, dan wi o abi fu tyari wisrefi tra fasi leki sma di no e hori densrefi na Bijbel gronprakseri. Nofo tron den sortu sma disi no e warderi trawan. Den no e broko den ede nanga sma, den no abi lespeki gi trawan, èn den e spotu sma. Fu dati ede wi musu luku bun taki noiti wi e tyari wisrefi na a fasi disi. A ben o de wan sari sani srefisrefi efu wi ben de leki den Korentesma di no ben e sori lobi gi trawan fu di den ben feni taki trawan no de fu frutrow. A sani disi kan pasa te wi e luku soso den swakifasi fu wan Kresten brada noso sisa, na presi fu den bun fasi fu en. A sani disi kan pasa tu te wi no wani sori lobi gi wan sma fu di a de fu wan tra kondre noso fu di a abi tra gwenti.

Ma wan futuboi fu Gado di e opo en ati fu lobi trawan, abi trutru warderi gi en Kresten brada nanga sisa. A abi furu lespeki gi den, a e si  den leki warti sma, èn a de klariklari fu yepi den te den abi wan sani fanowdu. Srefi te a abi leti fu kragi, toku a de klariklari fu gi pardon èn a no e hori sma na ati. Na presi fu dati, a e bribi taki a Kresten brada noso sisa no du a sani fu espresi. Te wan sma de klariklari fu du sani gi trawan, dan a o sori a lobi di Yesus ben abi na prakseri, di a taki: „Na a fasi disi ala sma o sabi taki unu na mi disipel, te unu lobi makandra.”—Yohanes 13:35.

Du muiti fu meki nyun mati

Trutru lobi sa meki taki wi o man meki tra mati boiti den wan di wi abi kaba, èn taki wi o suku fu abi demakandra nanga sma na ini a gemeente di wi no e taki nanga den so furu. Suma na den sma disi? Sonwan fu wi Kresten brada nanga sisa e syensyen, noso kande den no abi furu mati. Kande wi feni taki wi e difrenti tumusi fu den sma disi. A gersi leki a wan-enkri sani di de a srefi, na taki wi de na ini a srefi bribi. Ma sortu sma na ini Bijbel ben abi wan krosibei matifasi? Nofo tron na sma di ben e difrenti furu fu makandra, a no so?

Fu eksempre, Naomi ben owru omeni yari moro Rut. Den ben komoto fu difrenti kondre, den no ben abi den srefi gwenti, èn den ben e taki difrenti tongo tu. Ma aladi den ben e difrenti so furu fu makandra, toku den ben de bun mati. Yonatan ben de a manpikin fu wan kownu, èn David ben de wan skapuman. David ben yongu omeni yari moro Yonatan, ma toku den ben de kefalek bun mati soleki fa den Santa Buku fu Bijbel e sori. Fu di den sma disi ben de bun mati fu makandra, meki ibriwan fu den ben e prisiri èn ben e kisi deki-ati fu tan dini Gado.—Rut 1:16; 4:15; 1 Samuel 18:3; 2 Samuel 1:26.

Srefi na ini a ten disi, tru Kresten e tron mati fu makandra awinsi den no owru a srefi èn awinsi den no de na ini a srefi situwâsi. Luku wan eksempre. Regina e kweki tu tini pikin en wawan. * A abi furu fu du èn a no abi furu ten fu abi demakandra nanga tra sma. Harald nanga Ute na wan trowpaar di go nanga pensyun kaba, èn den no abi pikin. Te yu e luku den tu famiri disi, dan den e difrenti furu fu makandra. Ma Harald nanga Ute opo den ati soleki fa Bijbel e gi leki rai. Den pruberi fu du furu sani makandra nanga Regina èn den pikin fu en. Fu eksempre, den e go na ini a preikiwroko èn den abi prisiriten nanga makandra.

Yu kan suku fu meki tra mati boiti den wan di yu abi kaba? Yu denki taki yu ben o man tron mati fu Kresten brada nanga sisa di kon fu wan tra kondre noso di abi tra gwenti, noso di owru moro yu?

Suku fu yepi trawan

Te wi wani sori lobi gi trawan, dan wi o suku fu kon sabi san den abi fanowdu. Sortu sani den kan abi fanowdu? We, luku den sma na ini a Kresten gemeente. Yonguwan abi rai fanowdu fu man tyari densrefi na wan bun fasi, owruwan abi deki-ati fanowdu, furuten preikiman abi wan sma fanowdu fu prèise den èn fu horibaka gi den, èn son leisi Kresten brada nanga sisa di lasi-ati abi wan sma fanowdu fu arki den. Ala sma abi wan sani fanowdu. Wi wani yepi den so furu leki wi man.

Efu wi opo wi ati, dan wi o sori switifasi tu gi den wan di abi spesrutu yepi fanowdu. Yu sabi wan sma di abi wan seryusu siki, noso di abi wan tra problema? Te yu e opo yu ati gi trawan èn te yu e suku fu du moro gi den, dan dati o yepi yu fu sori switifasi èn yu o man yepi den wan di de na nowtu.

Bijbel profeititori di abi fu du nanga a kaba fu grontapu, o kon tru heri esi. Fu dati ede, a de prenspari fu abi wan tranga banti na ini a gemeente, bika gudu noso biginen no o man yepi wi te fu kaba (1 Petrus 4:7, 8). Ibriwan fu wi kan tranga a banti na ini wi eigi gemeente fu di wi e sori moro lobi gi wi Kresten brada nanga sisa. Wi kan de seiker taki Yehovah sa blesi wi bogobogo te wi e du soleki fa en Manpikin, Yesus Krestes, ben taki: „Disi na a komando fu mi, taki un musu lobi makandra neleki fa mi lobi unu.”—Yohanes 15:12.

[Futuwortu]

[Prenspari pisi na tapu bladzijde 10]

Te wi e warderi wi brada nanga sisa, dan wi o abi furu lespeki gi den, wi o si den leki warti sma, èn wi o yepi den te den abi wan sani fanowdu