Yu man pasa den muilek ten

NA INI den muilek ten disi, furu sma e kisi fu du nanga problema di wi kan agersi nanga sibibusi. Ma wan sani di e yepi Kresten fu pasa problema, na lobi gi Gado èn a hori di den e hori densrefi na den rai fu en. Fa disi e yepi den? Wi kan kon sabi a piki tapu na aksi disi te wi luku wan agersitori di Yesus Krestes ben fruteri. A ben agersi den getrow disipel fu en nanga „wan koni man di bow en oso na tapu ston-gron”. Yesus ben taki: „Alen fadon, bigi frudu kon, winti wai èn a naki na oso dati bun tranga, ma na oso no fadon, bika a ben bow na tapu ston-gron.”—Mateyus 7:24, 25.

Luku taki aladi a man na ini na agersitori ben handri nanga koni, toku rampu ben miti en. A ben kisi fu du nanga alen, frudu, nanga tranga winti. Sobun, Yesus no ben taki dati den disipel fu en ben o abi wan switi libi sondro broko-ede noso problema (Psalm 34:19; Yakobus 4:13-15). Ma a sani di Yesus tyari kon na krin, na taki getrow futuboi fu Gado kan sreka densrefi gi bigi problema èn taki den man pasa den tu.

Na a bigin fu na agersitori, Yesus taki: „Efu wan sma e yere den sani disi di mi taki èn a e du den, dan a sa de leki wan koni man di bow en oso na tapu ston-gron.” A no de fu taki dati Yesus no ben e fruteri sma fa fu bow trutru oso, ma a ben fruteri sortu fasi Kresten musu abi èn fa den musu tyari densrefi. Den wan di e gi yesi na Krestes, e du sani nanga koni, èn den e prakseri bun fosi den du wan sani. Den e meki den leri fu Krestes abi krakti tapu na ati fu den èn tapu den sani di den e du. Sobun, na wan agersi fasi den e bow na tapu ston-gron fu di den e du san den e leri. Luku taki na agersi ston-gron disi no de fu si na tapusei fu a doti. A man na ini na agersitori ben musu diki „go dipi na ini a gron” fu feni ston-gron (Lukas 6:48). Den disipel fu Yesus e tan meki furu muiti tu fu kisi moi fasi di kan meki den kon abi wan moro bun banti nanga Gado.—Mateyus 5:5-7; 6:33.

San e pasa te bigi problema e suku fu broko a fondamenti fu den bakaman fu Yesus? A gi di den e gi yesi na den leri fu Krestes èn sosrefi den Kresten fasi fu den, e yepi den fu pasa problema na ini a ten disi. A moro prenspari sani, na taki den sani disi o yepi den tu fu pasa a bigi pori di o kon na Armagedon heri esi (Mateyus 5:10-12; Openbaring 16:15, 16). Iya, furu sma man pasa bigi tesi nownow kaba fu di den e du san Krestes leri. Yu man du a srefi tu.—1 Petrus 2:21-23.