„Yu o de nanga prisiri srefisrefi”

„Yu sa hori a fesa gi Yehovah . . . , èn yu o de nanga prisiri srefisrefi.” —DEUTERONOMIUM 16:15.

1. (a) Sortu seryusu tori Satan tyari kon na fesi? (b) San Yehovah ben taki na ini wan profeititori, baka di Adam nanga Eva opo densrefi teige en?

DI Satan meki Adam nanga Eva opo densrefi teige a Mekiman fu den, a tyari tu seryusu tori kon na fesi. Na a fosi presi, Satan ben feni taki Yehovah lei, èn taki Yehovah no ben e tiri na wan bun fasi. A tra sani, na taki Satan ben feni taki libisma ben o dini Gado soso fu kisi wini gi densrefi, èn disi a ben taki krin na ini a ten fu Yob (Genesis 3:1-6; Yob 1:9, 10; 2:4, 5). Toku, Yehovah handri wantewante na ini a situwâsi disi. Srefi di Adam nanga Eva ben de na ini a dyari fu Eden ete, Yehovah ben taki na fesi fa a ben o lusu den tori. A ben taki dati wan „pikin” ben o kon. Satan ben o masi a pikin na en bakafutu, ma baka dati a pikin ben o masi na ede fu Satan.—Genesis 3:15.

2. Na sortu fasi Yehovah sori fa a ben o meki a profeititori na ini Genesis 3:15 kon tru?

² Safrisafri Yehovah meki sma kon frustan a profeititori disi moro krin, èn na so fasi a sori taki a profeititori ben o kon tru seiker. Fu eksempre, Gado ben taigi Abraham taki a „pikin” ben o komoto fu wan fu den bakapikin fu en (Genesis 22:15-18). Abraham en granpikin Yakob ben tron papa fu den 12 lo fu Israel. Na ini 1513 b.G.T., di den lo dati tron wan pipel, Yehovah ben gi den wet di abi fu du nanga difrenti fesa di den ben musu hori ibri yari. Na apostel Paulus ben taki dati den fesa dati ben „e prenki den sani di musu kon ete” (Kolosesma 2:16, 17; Hebrewsma 10:1). Den fesa ben sori na fesi fa den sani di Yehovah ben abi na prakseri gi a Pikin, ben o kon tru. Den fesa dati ben e gi den Israelsma bigi prisiri. Te wi e luku den fesa syatu, dan dati sa tranga a bribi fu wi taki Yehovah o du seiker san a pramisi.

A Pikin doro

3. Suma ben de a Pikin di Gado ben pramisi, èn fa Satan masi en na en bakafutu?

³ Moro leki 4000 yari baka di Yehovah taki a fosi profeititori, a Pikin doro soleki fa Gado pramisi. A Pikin dati ben de Yesus (Galasiasma 3:16). Yesus, di no ben abi nowan sondu, tan getrow te na dede. Na so fasi a sori taki den sani di Satan taki, no ben tru srefisrefi. Boiti dati, fu di Yesus no ben abi sondu, meki a libi di a gi leki ofrandi ben warti srefisrefi. Nanga na ofrandi dati, Yesus frulusu den getrow bakapikin fu Adam nanga Eva fu sondu nanga dede. Di Yesus dede na a pina-postu, dan na wan agersi fasi Satan ’masi a bakafutu’ fu a Pikin di Gado ben pramisi.—Hebrewsma 9:11-14.

4. San ben e prenki na ofrandi fu Yesus?

⁴ Yesus dede tapu 14 Nisan 33 G.T. * Na ini Israel, den ben e hori a Paskafesa tapu 14 Nisan. Disi ben de wan prisiri ten srefisrefi. Ibri yari na a dei dati, den osofamiri ben e srakti wan yongu skapu di no abi nowan mankeri, èn den ben e nyan a meti fu en. Na so fasi den Israelsma ben e memre fa a brudu fu a skapu ben de prenspari fu hori den fosi manpikin fu den na libi, na a ten di wan engel kiri den fosi manpikin fu den Egeptesma tapu 14 Nisan 1513 b.G.T. (Exodus 12:1-14). A skapu di den srakti na a Paskafesa ben e prenki Yesus. Na apostel Paulus ben taki fu en: „Krestes, a Paska ofrandi fu wi, srakti trutru” (1 Korentesma 5:7). Neleki a brudu fu a Paska ofrandi, na so a brudu fu Yesus e  meki tu taki furu sma kan kisi frulusu.—Yohanes 3:16, 36.

„A fosiwan fu den wan di dede”

5, 6. (a) O ten Yesus ben kisi wan opobaka, èn sortu sani na ini a Wet ben e prenki na opobaka fu en? (b) Fa na opobaka fu Yesus meki taki Genesis 3:15 man kon tru?

⁵ Na a di fu dri dei, Yesus ben kon na libi baka, so taki a ben kan gi en Tata a libi di a ben gi leki frulusu-ofrandi (Hebrewsma 9:24). Wan tra fesa ben e prenki na opobaka fu en. A dei baka 14 Nisan ben de a bigin fu a Fesa fu brede sondro srudeki. A tra dei, 16 Nisan, den Israelsma ben e gi a priester wan bosu fu den fosi nyanyan di den koti. A gerst ben de a fosi nyanyan di den ben e koti na ini Israel. Dan a priester ben e buweigi a bosu gerst go-kon na fesi Yehovah (Lefitikus 23:6-14). A fiti srefisrefi taki tapu 16 Nisan 33 G.T., Yehovah gi Yesus wan opobaka fu libi na ini hemel leki wan yeye di no man dede. Na so fasi Yehovah gens Satan di ben wani taki a „getrow èn tru kotoigi” fu Gado ben musu dede fu ala ten!—Openbaring 3:14; 1 Petrus 3:18.

⁶ Yesus ben de „a fosiwan fu den wan di dede” (1 Korentesma 15:20). Tra sma di ben kisi wan opobaka, dede baka. Ma Yesus no dede baka. Na presi fu dati, a opo go na hemel fu sidon na a reti-anusei fu Yehovah, pe a ben e wakti a ten te Yehovah ben o poti en leki Kownu fu a hemel Kownukondre (Psalm 110:1; Tori fu den Apostel 2:32, 33; Hebrewsma 10:12, 13). Now di Yesus de Kownu, a abi a makti fu masi na ede fu a bigi feanti Satan fu ala ten èn fu kiri den pikin fu en.—Openbaring 11:15, 18; 20:1-3, 10.

A pikin fu Abraham na wan grupu sma

7. San den Israelsma ben musu du na a Wiki-fesa?

⁷ Yesus ben de a Pikin di Gado ben pramisi na ini Eden, èn Yehovah ben o gebroiki en fu „tyari wan kaba kon na den wroko fu Didibri” (1 Yohanes 3:8). Ma di Yehovah taki nanga Abraham, dan Yehovah sori taki a ’pikin’ fu Abraham no ben o de wán sma nomo, ma wan grupu sma. Den ben o „furu leki den stari na hemel èn leki den ai-santi na sesyoro” (Genesis 22:17). Wan tra prisiri fesa ben e sori taki a ’pikin’ disi abi fu du nanga tra sma tu. Feifitenti dei baka 16 Nisan, Israel ben e hori a Wiki-fesa. A Wet di abi fu du nanga a fesa disi, ben taki: „Na a di fu feifitenti dei, sobun a dei baka a di fu seibi sabat-dei, un musu tyari ete wan nyanyan-ofrandi gi Yehovah. Un musu teki tu brede na ini un oso èn un musu tyari den leki wan ofrandi di a priester o buweigi go-kon. Den brede musu meki nanga fo kilo fini blon. Un musu baka den nanga srudeki. Den de leki den fosi lepi nyanyan di unu musu tyari gi Yehovah.” *—Lefitikus 23:16, 17, 20.

8. Sortu tumusi moi sani pasa na a Pinksterfesa fu 33 G.T.?

⁸ Di Yesus ben de na grontapu, sma ben sabi a Wiki-fesa leki a Pinksterfesa (a wortu disi komoto fu wan Griki wortu di wani taki „a di fu feifitenti”). Na a Pinksterfesa fu 33 G.T. a moro bigi Granpriester, Yesus Krestes di ben kisi  wan opobaka, ben gi santa yeye na wan pikin grupu fu 120 disipel di ben kon makandra na ini Yerusalem. Na so den disipel kon tron salfu manpikin fu Gado èn brada fu Yesus Krestes (Romesma 8:15-17). Den ben tron wan nyun pipel, namku „na Israel fu Gado” (Galasiasma 6:16). A pikin grupu salfuwan dati ben o doro 144.000 sma te fu kaba.—Openbaring 7:1-4.

9, 10. Sortu sani fu a Pinksterfesa ben e prenki a gemeente fu den salfu Kresten?

⁹ Den tu brede nanga srudeki di a priester ben e buweigi go-kon na fesi Yehovah na ibri Pinksterfesa, ben e prenki a gemeente fu den salfu Kresten. A srudeki na ini den brede ben sori taki den salfu Kresten ben o abi a sondu ete di den kisi fu Adam nanga Eva. Ma toku den ben kan abi wan banti nanga Yehovah fu di Yesus gi en libi leki wan frulusu-ofrandi (Romesma 5:1, 2). Fu san ede den ben musu tyari tu brede? A kan taki den tu brede ben sori taki Gado ben o teki den manpikin fu en fu tu grupu sma, namku fu den Dyu fosi èn bakaten fu sma di no ben de Dyu.—Galasiasma 3:26-29; Efeisesma 2:13-18.

¹⁰ Den tu brede di den ben e gi leki ofrandi na a Pinksterfesa, ben meki fu den fosi tarwe di den koti. Dati meki Bijbel e kari den Kresten di salfu nanga santa yeye, „den fosiwan di a teki puru na mindri den wan di a meki” (Yakobus 1:18). Den na den fosiwan di kisi pardon fu sondu nanga yepi fu Yesus brudu, èn disi e meki taki den man libi na ini hemel sondro fu dede. Drape den o tiri makandra nanga Yesus na ini en Kownukondre (1 Korentesma 15:53; Filipisma 3:20, 21; Openbaring 20:6). Heri esi den yeye manpikin disi di de na ini hemel, o „tiri [den] pipel nanga wan isri tiki”, èn den o ’masi Satan na ondro den futu’ (Openbaring 2:26, 27; Romesma 16:20). Na apostel Yohanes ben taki: „Den na den wan di e tan waka na baka a Pikin Skapu awansi pe a e go. Den na den fosiwan di bai puru na mindri libisma gi Gado èn gi a Pikin Skapu.”—Openbaring 14:4.

Wan dei pe den ben poti prakseri na a frulusu fu den

11, 12. (a) San ben e pasa na a Dei pe sma ben man kisi pardon fu sondu? (b) Sortu wini den Israelsma ben kisi te a priester ben tyari a mankaw nanga den bokoboko leki ofrandi?

¹¹ Na a di fu tin dei fu Ethanim (bakaten den  ben kari en Tisjri), * Israel ben e hori wan fesa di ben sori fa sma ben o kisi wini fu a frulusu-ofrandi fu Yesus. Na a dei dati, a heri pipel ben e kon makandra fu tyari ofrandi, so taki den ben man kisi pardon fu den sondu fu den.—Lefitikus 16:29, 30.

¹² Na a Dei pe sma ben man kisi pardon fu sondu, a granpriester ben srakti wan yongu mankaw. A ben e teki pikinso fu a brudu go na ini a Moro Santa Presi, èn seibi leisi a ben e natinati a presi na fesi a tapun fu na Ark. Na a fasi dati, a ben gi Yehovah a brudu leki ofrandi. Na ofrandi dati ben de gi den sondu fu a granpriester èn gi „en osofamiri”, namku den tra priester nanga den Leifisma. Baka dati, a granpriester ben teki tu bokoboko. Wán fu den a ben srakti leki wan sondu-ofrandi „gi a pipel”. A ben teki pikinso brudu tu fu a bokoboko, dan a ben e natinati a presi na fesi a tapun fu na Ark, di ben de na ini a Moro Santa Presi. Baka te a granpriester du disi, a ben e poti en tu anu na tapu na ede fu a tra bokoboko, dan a ben taki sortu sondu den manpikin fu Israel du. Baka dati, a ben meki wan sma tyari a bokoboko go na ini a sabana, so taki a bokoboko ben kan tyari den sondu fu a pipel gowe na wan agersi fasi.—Lefitikus 16:3-16, 21, 22.

13. Fa den sani di ben e pasa na a Dei pe sma ben man kisi pardon, e prenki den sani di Yesus ben o du?

¹³ Den sani di den ben e du a dei dati, e sori fa a bigi Granpriester Yesus e gebroiki a brudu noso a libi di a gi leki frulusu-ofrandi fu gi sma pardon fu sondu. A fosi grupu di e kisi wini fu a brudu fu Yesus na a „oso na yeye fasi”, namku den 144.000 salfu Kresten. Disi e meki taki den man tron sma di regtfardiki èn krin na ini Yehovah ai (1 Petrus 2:5; 1 Korentesma 6:11). Dati na san na ofrandi fu a mankaw e prenki. Na so fasi den kisi na okasi fu go libi na ini hemel. Wan tra grupu di e kisi wini fu a brudu fu Yesus, na den milyunmilyun tra sma di e bribi na ini Krestes. Dati na san na ofrandi fu a bokoboko e prenki. Den sma disi o kisi a libi di Adam nanga Eva ben lasi, namku têgo libi dyaso na grontapu (Psalm 37:10, 11). Neleki fa a libi bokoboko tyari den sondu fu den Israelsma gowe na ini a sabana na wan agersi fasi, na so wi kan taki dati Yesus tyari den sondu fu a libisma famiri gowe nanga yepi fu a brudu fu en.—Yesaya 53:4, 5.

Den e prisiri na fesi Yehovah

14, 15. San ben e pasa na a Kampufesa, èn na sortu sani a fesa disi ben e memre den Israelsma?

¹⁴ Baka a Dei pe den ben man kisi pardon fu  sondu, den Israelsma ben e hori a Kampufesa, a moro prisiri Dyu fesa fu a yari (Lefitikus 23:34-43). A fesa disi ben e hori fu 15 te go miti 21 Ethanim, èn den ben tapu en nanga wan santa konmakandra tapu 22 Ethanim. A dei dati ben de a kaba fu a kotiwroko, èn a fesa disi ben de wan okasi fu taki Gado tangi gi den furu blesi di a gi den. Dati meki Yehovah taigi den sma di ben e hori a fesa: ’Yehovah, un Gado, sa meki den gron fu unu gi furu nyanyan èn a sa blesi ala den wroko di unu e du, èn unu o de nanga prisiri srefisrefi’ (Deuteronomium 16:15). Disi ben musu fu de wan tumusi prisiri ten!

¹⁵ Na a fesa dati, den Israelsma ben e tan na ini kampu seibi dei langa. Disi ben e memre den taki den ben e tan na ini kampu di den ben de na ini a sabana. A fesa ben e gi den okasi fu prakseri fa Yehovah sorgu den leki wan papa (Deuteronomium 8:15, 16). Ala sma na a fesa, guduwan nanga pôtiwan, ben e tan na ini kampu di ben de a srefi. Disi ben e memre den Israelsma taki den alamala ben de a srefi na a ten fu a fesa.—Nehemia 8:14-16.

16. San a Kampufesa ben e prenki?

¹⁶ A Kampufesa ben de wan fesa pe den ben e prisiri nanga den sani di den tyari kon na wán na a kotiwroko. A fesa disi ben e sori taki Gado ben o tyari sma di e bribi na ini Yesus Krestes, kon na wán. A bigin tyari sma kon na wán na a Pinksterfesa fu 33 G.T. Na a dei dati, Gado ben salfu 120 disipel fu Yesus kon tron „santa priester”. Leki fa den Israelsma ben e tan na ini kampu wan tu dei nomo, na so den salfuwan sabi taki den e „libi wan syatu pisi ten nomo” na ini na ogri grontapu disi. Den abi a howpu fu libi na ini hemel (1 Petrus 2:5, 11). Den lastiwan fu den 144.000 salfu Kresten e tyari kon na wán na ini den „lasti dei” disi.—2 Timoteyus 3:1.

17, 18. (a) San e sori taki tra sma boiti den salfu Kresten o kisi wini fu na ofrandi fu Yesus? (b) Suma na ini a ten disi e kisi wini fu na agersi Kampufesa, èn o ten a fesa disi o kon na wan kaba?

¹⁷ Wan prenspari sani di den ben e du na a  Kampufesa fu den Israelsma, na taki den ben e tyari 70 mankaw leki ofrandi (Numeri 29:12-34). A nomru 70 na 7 tron 10, èn Bijbel e gebroiki den nomru 7 nanga 10 fu sori go na sani na hemel èn na grontapu di no e mankeri noti. Sobun, na ofrandi fu Yesus sa tyari wini kon gi getrowsma na ini ala den 70 famiri di komoto fu Noa (Genesis 10:1-29). Fu di dati de so, meki sma fu ala kondre e tyari kon na wán na ini a ten fu wi. Den sma disi di e bribi na ini Yesus, abi a howpu fu libi na ini wan paradijs na grontapu.

¹⁸ Na apostel Yohanes ben si na ini wan fisyun taki sma ben o tyari kon na wán na ini a ten fu wi. A yere fosi taki den lastiwan fu den 144.000 o kisi wan marki. Baka dati, a si „wan bigi ipi sma di nowan sma ben man teri”. Den ben e tanapu na fesi Yehovah èn na fesi Yesus, èn „den ben hori palmtaki na ini den anu”. Den sma disi „komoto na ini a bigi banawtu” èn den o libi na ini a nyun grontapu. Densrefi e libi soso wan syatu pisi ten nomo na ini na owru grontapu sistema disi, èn den abi a tranga bribi taki na ini a ten di e kon „a Pikin Skapu . . . o tiri den, èn a o tyari den go na den peti di abi watra di e gi libi”. Na a ten dati, „Gado o figi ala watra puru na den ai” (Openbaring 7:1-10, 14-17). Na agersi Kampufesa o kon na wan kaba te a bigi ipi sma disi, makandra nanga den wan di sa kisi wan opobaka, kisi têgo libi baka a Dusun Yari Tiri fu Krestes.—Openbaring 20:5.

19. Fa wi e kisi wini te wi e poti prakseri na den fesa di den Israelsma ben e hori?

¹⁹ Te wi prakseri dipi san den Dyu fesa fu owruten wani taki, dan wisrefi kan „de nanga prisiri srefisrefi”. A e naki wi ati fu si taki Yehovah sori wi fa a profeititori di a ben taki na ini Eden, ben o kon tru. Ma wi e prisiri fu si tu fa safrisafri den sani di a profeititori taki, e pasa trutru. Tide na dei, wi sabi taki a Pikin doro kaba, èn taki Satan ben masi en na en bakafutu. Now a Pikin dati de Kownu na ini hemel. Boiti dati, moro furu fu den 144.000 salfuwan buweisi kaba taki den tan getrow te na dede. San musu pasa ete? O langa a o teki fosi a heri profeititori kon tru? Wi o taki fu disi na ini a tra artikel.

[Futuwortu]

Yu kan tyari disi kon na krin?

• San a skapu fu a Paskafesa ben e prenki?

• San den sani di ben e pasa na a Pinksterfesa, ben e prenki?

• Sortu sani di ben pasa na a Dei pe sma ben man kisi pardon fu sondu, e sori fa sma man kisi wini fu a frulusu-ofrandi fu Yesus?

• Fa a Kampufesa ben e sori taki Kresten ben o tyari kon na wán?

[Aksi fu a tori disi]

[Schema/Faki na tapu bladzijde 22, 23 di e tyari sani kon na krin]

(Efu yu wani si pe den sani disi skrifi, luku a tijdschrift)

Paskafesa

14 Nisan

San den ben e du:

Den ben srakti a skapu fu a Pasakafesa

San dati ben e prenki:

Yesus gi en libi leki ofrandi

A Fesa fu brede sondro srudeki (15-21 Nisan)

15 Nisan

San den ben e du:

Den ben hori Sabat

16 Nisan

San den ben e du:

Den ben tyari gerst leki ofrandi

San dati ben e prenki:

Yesus kisi wan opobaka

50 dei

A Wiki-fesa

6 Sivan

San den ben e du:

Den ben tyari tu brede leki ofrandi

San dati ben e prenki:

Yesus gi Yehovah den salfu brada fu en

A Dei pe sma ben man kisi pardon fu sondu

10 Tisjri

San den ben e du:

Den ben tyari wan mankaw nanga tu bokoboko leki ofrandi

San dati ben e prenki:

Yesus gi a brudu fu en leki wan ofrandi gi a heri libisma famiri

A Kampufesa

15-21 Tisjri

San den ben e du:

Den ben tan na ini kampu èn ben prisiri nanga a kotiwroko. Den gi 70 mankaw leki ofrandi

San dati ben e prenki:

Den salfuwan nanga wan „bigi ipi sma” e tyari kon na wán

[Prenki na tapu bladzijde 21]

Neleki a brudu fu a skapu na a Paskafesa, na so a brudu fu Yesus e meki taki furu sma man kisi frulusu

[Prenki na tapu bladzijde 22]

Den fosi gerst di den ben e tyari leki ofrandi tapu 16 Nisan, ben e prenki na opobaka fu Yesus

[Prenki na tapu bladzijde 23]

Den tu brede di den ben e gi leki ofrandi na a Pinksterfesa, ben e prenki a gemeente fu den salfu Kresten

[Prenki na tapu bladzijde 24]

A Kampufesa ben e sori taki a ben o gi prisiri fu tyari den salfuwan nanga „wan bigi ipi sma” fu ala kondre kon na wán