Aksi fu leisiman

Na ini Preikiman 7:28, Salomo ben taki dati a feni soso „wán man na mindri fu wan dusun”, ma taki a no feni „nowan uma na den mindri”. San a ben wani taki nanga den wortu disi?

Efu wi wani frustan a bijbeltekst disi bun, dan wi musu frustan fosi fa Gado e denki fu umasma. Bijbel e taki fu Rut, a wefi fu Naomi en manpikin, taki a ben de „wan bun uma” (Rut 3:11). Odo 31:10 e taki fu wan bun wefi taki „en warti de bigi moro leki den moro diri ston” (Da Bijbel na ini Sranantongo). Ma Kownu Salomo fu owruten Israel ben taki: „Mi feni . . . wán bun man na mindri dusun, ma noiti mi feni wan bun uma” (A Moffatt-bijbel). San a kownu ben wani taki nanga den wortu disi dan?

Wan fu den vers na fesi e sori taki furu uma ben e tyari densrefi na wan takru fasi na ini a ten fu Salomo (Preikiman 7:26). Moro furu, disi ben de so fu di trakondre uma di ben e anbegi a gado Bâal, ben abi krakti tapu tra sma. Srefi Kownu Salomo ben meki den furu trakondre wefi fu en hari en fu du ogri. ’A ben abi seibi hondro wefi, nanga dri hondro tra uma’, na so Bijbel e taki, ’èn safrisafri den wefi fu en kori en’ fu go anbegi falsi gado (1 Kownu 11:1-4). Ma den mansma srefi ben e tyari densrefi na wan takru fasi tu. A ben muilek trutru fu feni wán regtfardiki man na mindri wan dusun. „Mi kon si”, na so Salomo taki, „taki a tru Gado meki a libisma famiri fu du san reti, ma densrefi prakseri fu du furu tra sani” (Preikiman 7:29). Salomo ben kon si fa a heri libisma famiri de. A no ben e teki mansma gersi nanga umasma. Fu dati ede, a sani di taki na ini Preikiman 7:28 e sori wi nomo fa moro furu libisma ben e tyari densrefi na ini a ten fu Salomo.

Ma a kan taki a vers disi wani taki wan tra sani tu. A kan taki a de wan profeititori, bika noiti wan uma ben de di gi yesi na Yehovah na ini ala sani. Ma wan man ben de di du dati ala ten, namku Yesus Krestes.—Romesma 5:15-17.

[Prenki na tapu bladzijde 31]

„Wán man na mindri fu wan dusun”