A Wortu fu Yehovah de libilibi

Edepenti fu a buku Yesaya—Pisi II

YESAYA na wan profeiti di e du en wroko soifri soleki fa Gado wani. Fosi, a ben taki sortu ogri ben o miti a tin-lo kownukondre Israel, èn na so a pasa trutru. Ma now a o fruteri san o pasa nanga Yerusalem.

A foto Yerusalem o kisi pori, èn feanti o tyari den sma fu a foto gowe na ini katibo. Ma a foto no o de wan brokopresi fu ala ten. Baka wan pisi ten, a tru anbegi o seti kon bun baka. Dati na a moro prenspari boskopu na ini Yesaya 36:1–66:24. * A bun fu poti prakseri na den kapitel disi, fu di a moro prenspari pisi fu wan lo fu den profeititori na ini Yesaya 36:1-66:24 e kon tru na ini a ten fu wi, noso den o kon tru na ini a ten di e kon. A pisi disi fu a buku Yesaya abi moi profeititori tu di abi fu du nanga a Mesias.

„LUKU! A TEN E KON”

(Yesaya 36:1–39:8)

Na ini a di fu 14 yari di Heskia ben e tiri leki kownu (732 b.G.T.), den Asiriasma kon fu feti nanga Yuda. Yehovah ben pramisi fu feti gi Yerusalem. Soso wán engel fu Yehovah kiri 185.000 srudati fu Asiria. Dati meki den Asiriasma no ben prefuru fu feti nanga Yuda moro.

Ne Heskia kon siki. Di a begi Yehovah, dan a arki a begi fu Heskia èn a meki en kon betre. Na so fasi Heskia libi ete 15 yari. Di a kownu fu Babilon seni boskopuman fu fristeri Heskia, dan Heskia du wan don sani. A sori den boskopuman ala den gudu fu en. Dati meki Yehovah seni Yesaya fu gi Heskia a boskopu disi: „Luku! A ten e kon taki sma o teki ala sani di de na ini yu eigi oso èn ala sani di den afo fu yu tyari kon na wán te na a dei disi. Dan den o tyari den sani dati go na Babilon” (Yesaya 39:5, 6). Sowan 100 yari baka dati, a profeititori disi kon tru.

Piki tapu den aksi fu Bijbel:

38:8​—A tekst disi e taki dati skaduw fadon na tapu wan „trapu”, èn taki a skaduw skoifi go na baka. San na a trapu dati? Na ini a di fu aiti yarihondro b.G.T., sma na ini Egepte nanga Babilon ben e meki spesrutu sani fu luku a ten nanga yepi fu a son. Kande a tekst disi abi fu du nanga den marki di ben de fu si na tapu wan fu den sani disi di Akas, a papa fu Heskia, ben abi. A kan tu taki wan trapu ben de na ini a kownu-oso èn taki wan tiki ben de na sei a trapu. Kande a ben de so, taki te son ben e skèin, a skaduw fu a tiki ben de fu si na tapu a trapu. Na so fasi sma ben kan sabi o lati a de.

Sani di wi kan leri:

36:2, 3, 22. Aladi Sebna ben lasi en wroko leki edeman na ini na oso fu a kownu, toku a kisi na okasi fu tan wroko gi a kownu, fu di a tron sekretarsi fu a nyun edeman di teki en presi (Yesaya 22:15, 19). Kande wi lasi wan grani na  ini na organisâsi fu Yehovah. Toku wi musu tan dini Gado, awinsi sortu tra grani a e gi wi.

37:1, 14, 15; 38:1, 2. Te wi de na nowtu, dan a de wan koni sani fu begi Yehovah meki a yepi wi èn fu frutrow na en tapu dorodoro.

37:15-20; 38:2, 3. Di den Asiriasma ben wani kon feti nanga Yerusalem, Heskia ben e broko en ede moro furu nanga a porinen di Yehovah ben o kisi te Yerusalem ben o kisi pori. Aladi Heskia frustan taki na a siki fu en ben o meki taki a dede, toku a no soso a dede fu en ben de na en prakseri. Wan tra sani ben de moro prenspari gi Heskia. A ben e frede taki nowan bakapikin fu David ben o man tron kownu moro, efu a ben o dede sondro fu meki wan pikin. Boiti dati, a ben aksi ensrefi tu suma ben o teki fesi fu feti nanga den Asiriasma. Heskia ben wani taki a nen fu Yehovah kon santa èn taki den prakseri fu En kon tru. Den sani dati ben de moro prenspari gi Heskia, leki fu tan na libi. Wi wani de leki Heskia.

38:9-20. A singi fu Heskia e leri wi taki a moro prenspari sani na ini a libi, na taki wi man prèise Yehovah.

„DEN SA BOW EN BAKA”

(Yesaya 40:1–59:21)

Yesaya ben taki dati Yerusalem ben o kisi pori èn taki den sma na ini a foto ben o go na ini katibo na Babilon. Wantewante baka dati, a taki wan profeititori di ben sori taki Yerusalem ben o kon bun baka (Yesaya 40:1, 2). „Den sa bow en [Yerusalem] baka”, na so Yesaya 44:28 e taki. Sma ben o teki den popki di den Babilonsma ben e anbegi, èn den ben o tyari den gowe leki „bagasi” (Yesaya 46:1). Iya, Babilon ben o kisi pori. Tu hondro yari baka dati, ala den sani disi kon tru.

Yesaya ben taki tu dati Yehovah ben o meki en futuboi de leki „wan leti gi den trakondre sma” (Yesaya 49:6). Den „hemel” fu Babilon, noso den tiriman, ben o „de leki smoko di wai gowe na alasei, teleki a no de fu si moro”, èn den Babilonsma ben „o dede leki wan pikin maskita”. Ma na „umapikin fu Sion di de na ini katibo, [ben] o lusu den titei di tai na en neki” (Yesaya 51:6; 52:2). Yehovah ben taigi den sma di kon fu arki en, taki: „Mi o meki wan têgo frubontu nanga unu wantewante, fu di mi wani sori bun-ati gi David” (Yesaya 55:3). Den sma di hori densrefi na den regtfardiki markitiki fu Gado, e „prisiri fu dini Yehovah” (Yesaya 58:14). Ma den ogri di a pipel du, ’meki taki a Gado fu den no ben de nanga den moro’.—Yesaya 59:2.

Piki tapu den aksi fu Bijbel:

40:27, 28​—Fu san ede Israel taki: „Yehovah no man si den pasi fu mi, èn mi Gado no e poti prakseri na a retidu di sma musu sori mi”? Son Dyu na ini Babilon ben denki taki Yehovah no ben si a pina di den ben e pina. Yesaya ben memre den taki a Mekiman fu grontapu ben man si ala sani di ben e pasa na ini Babilon èn taki Gado no ben e kon weri.

43:18-21​—Fu san ede Yehovah taigi den Dyu di komoto na ini katibo, taki den no ben musu „prakseri den sani fu fositen”? A no de so, taki Yehovah ben taigi den fu frigiti den sani di a ben du fu frulusu den na ini owruten. Na presi fu dati, Yehovah ben wani taki den ben musu prèise en fu ’wan nyun sani’ di a ben o du gi den. Wan fu den ’nyun sani’ disi ben de taki den ben o man si nanga den eigi ai fa Gado ben o kibri den te den ben de na pasi fu go na Yerusalem. Kande a ben o meki den waka wan pasi na ini a sabana di ben o tyari den langalanga go na Yerusalem. „Wan bigi ipi sma” o komoto na ini „a bigi banawtu” èn Yehovah o du nyun sani gi ibriwan fu den sma dati tu. Disi sa meki taki den o prèise en.—Openbaring 7:9, 14.

49:6​—Di a Mesias ben de na grontapu, a preiki soso gi den manpikin fu Israel. Sobun, fa a ben de „wan leti gi den trakondre sma”? Fu man frustan disi, wi musu luku san pasa baka a dede fu Yesus. Bijbel e sori taki Yesaya 49:6 abi fu du nanga den disipel fu Yesus (Tori fu den Apostel 13:46, 47). Na ini a ten disi, den salfu Kresten makandra nanga wan bigi grupu anbegiman, de leki „wan leti gi den trakondre  sma”, fu di den e gi sma leri „te na den moro farawe presi fu grontapu”.—Mateyus 24:14; 28:19, 20.

53:10​—Fu san ede wi kan taki dati Yehovah ben e prisiri fu kwinsi en Manpikin? Fu di Yehovah na wan Gado di abi sari-ati èn di e firi gi sma, meki a ben musu fu hati en di a si fa en lobi Manpikin ben e pina. Ma na a tra sei, A ben e prisiri taki Yesus ben de klariklari fu gi yesi na en. Boiti dati, te Yesus ben o pina èn dede, dan dati ben o tyari furu wini kon.—Odo 27:11; Yesaya 63:9.

53:11​—San na a sabi di a Mesias ben o gebroiki ’fu meki furu sma kon regtfardiki’? Disi na a sabi di Yesus kisi di a ben de na grontapu. A ondrofeni san a wani taki fu de wan libisma èn a nyan pina teleki a dede, aladi a no ben de wan ogriman (Hebrewsma 4:15). Sobun, Yesus ben de wan frulusu-ofrandi gi wi. Na so a ben kan yepi den salfu Kresten nanga a bigi ipi, fu tron regtfardikisma na fesi Gado.—Romesma 5:19; Yakobus 2:23, 25.

56:6​—Suma na „den trakondre sma”, èn na sortu fasi den ’e hori densrefi na a frubontu fu Yehovah’? „Den trakondre sma” na den „tra skapu” fu Yesus (Yohanes 10:16). Den e hori densrefi na a nyun frubontu, fu di den e gi yesi na den wet di de na ini a frubontu dati. Den e horibaka gi ala den sani di seti na ini a frubontu disi. Den e kisi a srefi leri di den salfu Kresten e kisi, èn den e yepi den salfu Kresten fu preiki fu a Kownukondre èn fu meki disipel.

Sani di wi kan leri:

40:10-14, 26, 28. Yehovah tranga, a abi switifasi, a abi ala makti, a abi ala koni, èn a man frustan sani moro bun leki fa wi ben sa man frustan den oiti.

40:17, 23; 41:29; 44:9; 59:4. Den politiek organisâsi nanga kruktugado, na „sani di no de trutru”. Na fu soso sma e frutrow na den tapu.

42:18, 19; 43:8. Efu wan sma no wani poti prakseri na den sani di skrifi na ini Gado Wortu, èn efu a no wani arki den leri di Gado e gi nanga yepi fu „a getrow èn koni srafu”, dan na agersi fasi so wan sma o kon breni èn dofu.—Mateyus 24:45.

43:25. Na fu di Yehovah e prakseri a bun nen fu en, meki a e gi sma pardon fu sondu. A moro prenspari fu santa a nen fu Yehovah, leki fu kisi libi èn fu kon fri fu sondu nanga dede.

44:8. Yehovah e horibaka gi wi. A de leki wan bigi ston di tranga èn di no e degedege. Noiti wi no musu frede fu taigi sma taki en na Gado trutru!—2 Samuel 22:31, 32.

44:18-20. Te wan sma e anbegi kruktugado, dan dati e sori taki en ati no bun. Noti musu teki a presi di Yehovah abi na ini wi libi.

46:10, 11. Yehovah man sorgu taki ’en eigi bosroiti e tan leki fa den de’. Sobun, a man du soifri san a abi na prakseri. Dati e sori krin taki Yehovah na Gado trutru.

48:17, 18; 57:19-21. Wi musu frutrow tapu Yehovah fu frulusu wi. Wi musu kon krosibei na en, èn gi yesi na den komando fu en. Na so fasi, a vrede fu wi sa furu leki a watra di e lon na ini wan liba, èn wi sa du furu bun sani, iya, den bun sani dati sa furu leki den skwala fu se. Den sma di no e du san Gado Wortu e taki de leki wan „krasi se”. Vrede no de na ini a libi fu den.

52:5, 6. Den Babilonsma ben abi a fowtu denki taki a tru Gado swaki. Den no ben frustan taki Yehovah meki en pipel go na ini katibo fu di den ben du sani di no e plisi en. Te rampu miti wan sma, dan wi no musu de esi fu prakseri san meki a rampu miti en.

52:7-9; 55:12, 13. Dri sani de fu san ede wi e prisiri fu du a Kownukondre preikiwroko èn fu meki disipel. Na agersi fasi, den futu fu wi moi gi den sma di wani sabi moro fu Gado. Wi e si Yehovah ’nanga wi eigi ai’, sobun, wi de bun mati fu en. Boiti dati, sani e go bun nanga wi fu di wi e anbegi Gado.

52:11, 12. Wi na sma di abi na okasi fu „tyari den wrokosani fu Yehovah”. Den wrokosani disi na den sani di Yehovah seti fu du diniwroko gi en. Ma wi no musu abi noti fu du nanga falsi anbegi èn wi musu tyari wisrefi na wan fasi di Gado feni bun.

 58:1-14. Te wan sma e du leki a e dini Gado èn leki a de regtfardiki, dan na fu soso a e du dati. Tru anbegiman musu dini Gado nanga wan krin ati ala ten, èn den musu sori lobi gi den brada nanga sisa fu den.—Yohanes 13:35; 2 Petrus 3:11.

59:15b-19. Yehovah e luku san libisma e du, èn te a feni taki a de fanowdu fu du wan sani, dan a e du dati tu.

A „MUSU KON DE LEKI WAN MOI KOWNU-ATI”

(Yesaya 60:1–66:24)

Yesaya 60:1 e sori taki a tru anbegi ben o seti kon bun baka na ini owruten èn sosrefi na ini a ten fu wi. Drape wi e leisi: „Opo, o uma, skèin leti, bika yu leti kon, èn a glori fu Yehovah srefi skèin na yu tapu.” Sion ’musu kon de leki wan moi kownu-ati na ini na anu fu Yehovah’.—Yesaya 62:3.

Yesaya begi Yehovah gi den kondreman fu en, di ben sori berow na a ten di den ben de na ini katibo na Babilon (Yesaya 63:15–64:12). Fosi, a profeiti sori fa tru anbegiman e difrenti fu falsi anbegiman. Baka dati, a e sori fa Yehovah o blesi den wan di e dini en.—Yesaya 65:1–66:24.

Piki tapu den aksi fu Bijbel:

61:8, 9​—San na a „têgo frubontu”, èn suma na den „bakapikin”? A „têgo frubontu” na a nyun frubontu di Yehovah meki nanga den salfu Kresten. Den „bakapikin” na den „tra skapu”, namku den milyunmilyun sma di e gi yesi na a boskopu fu den salfu Kresten.—Yohanes 10:16.

63:5​—Fa na atibron fu Gado e yepi en? Gado man basi na atibron fu en. A e atibron nanga reti. Na atibron fu Gado e yepi en, fu di disi e meki taki a man strafu sma na wan reti fasi.

Sani di wi kan leri:

64:6. Sondu libisma no man frulusu densrefi. Den regtfardiki sani di wan sma e du na ini en libi, no sari fu pai gi den sondu fu en, fu di den sani dati de leki doti krosi nomo.—Romesma 3:23, 24.

65:13, 14. Yehovah e blesi den getrow futuboi fu en, fu di a e gi den ala sani di den abi fanowdu fu de mati fu en.

66:3-5. Yehovah no lobi sma di e hoigri.

„Un pipel, un musu breiti srefisrefi”

A ben musu fu de wan trowstu gi den getrow Dyu di ben de katiboman na ini Babilon, fu yere a profeititori di ben sori taki sani ben o waka bun gi den baka! „Un pipel, un musu breiti srefisrefi”, na so Yehovah taki, „èn un musu prisiri fu têgo nanga den sani di mi e meki. Bika mi e meki Yerusalem kon de wan sani di e gi unu prisiri, èn mi e sorgu taki den sma fu Yerusalem kon de wan sani di o gi bigi prisiri.”—Yesaya 65:18.

Sosrefi wi e libi na ini wan ten pe dungru de na heri grontapu, èn wi kan taki dati den pipel fu grontapu de na ini wan bigi blaka wolku (Yesaya 60:2). Now wi e libi na ini ’muilek ten di tranga fu pasa’ (2 Timoteyus 3:1). Fu dati ede, a boskopu na ini a Bijbel buku Yesaya e gi wi furu deki-ati, te wi e leisi taki Yehovah o frulusu wi.—Hebrewsma 4:12.

[Futuwortu]

[Prenki na tapu bladzijde 8]

Yu sabi san na a moro prenspari sani di Heskia ben e prakseri di a begi Gado fu frulusu en fu den Asiriasma?

[Prenki na tapu bladzijde 11]

’Den futu fu den sma di e waka na tapu den bergi fu tyari bun nyunsu, moi fu tru!’