Fa fu tan tanapu kánkan te yu pikin drai baka gi Gado

WAN Kresten uma di wi o kari Joy, ben pruberi fu leri en manpikin fu lobi Yehovah Gado. Ma di a boi ben de wan tini, a drai baka gi Yehovah èn a gowe libi oso. „Dati ben de a moro hati sani di pasa nanga mi”, Joy taki. „A boi broko mi saka, mi ati priti, èn mi no ben sabi san fu du. Mi ben lasi-ati srefisrefi.”

Kande yusrefi pruberi tu fu leri den pikin fu yu fu lobi Gado èn fu dini en, ma bakaten wán noso moro fu den drai baka gi en. San yu kan du te a tumusi sari sani disi pasa nanga yu? San o yepi yu fu tan dini Yehovah?

Manpikin fu Yehovah opo densrefi teige en

A fosi sani di kan yepi yu fu tan tanapu kánkan, na fu frustan taki Yehovah sabi soifri fa yu e firi. Na ini Yesaya 49:15 wi e leisi: „Wan uma kan frigiti en pikin di a abi na bobi, so taki a no ben sa firi sari gi a manpikin fu en bere? Srefi den uma disi kan frigiti, ma misrefi no sa frigiti yu.” Iya, Yehovah abi den srefi sortu firi leki papa nanga mama. Sobun, prakseri fa a ben e prisiri di ala den yeye manpikin fu en ben e prèise en èn ben e dini en. Di Yehovah taki nanga a famiri-edeman Yob „komopo fu a draiwinti”, dan a ben e poti prakseri na den prisiri momenti di a ben abi nanga en yeye famiri di den ben de makandra ete. A ben taki: „Pe yu ben de di mi ben seti a fondamenti fu grontapu? . . . Di ala den mamanten stari makandra ben bari fu prisiri, èn ala den manpikin fu Gado ben bigin bari fu di den ben breiti srefisrefi?”—Yob 38:1, 4, 7.

Baka wan pisi ten, wan yeye manpikin di ben bun fosi, bigin opo ensrefi teige a tru Gado. A yeye disi tron Satan, san wani taki „Gensman”. Yehovah si tu fa en fosi libisma manpikin Adam nanga en volmaakti wefi Eva trangayesi en tu (Genesis 3:1-6; Openbaring 12:9). Bakaten, tra yeye manpikin noso engel „gowe libi a reti tanpresi fu den” èn den drai baka gi Gado.—Yudas 6.

Bijbel no e fruteri wi fa Yehovah ben e firi di sonwan fu den volmaakti manpikin fu en drai baka gi en. Ma Bijbel e taki krin: „Yehovah kon si taki libisma ben e du bun furu ogri sani na grontapu èn taki doronomo den ben e prakseri soso ogri. Ne a hati Yehovah taki a meki libisma poti na grontapu, èn a ben sari srefisrefi” (Genesis 6:5, 6). Den Israelsma di  Gado ben teki leki en eigi pipel, ben e trangayesi Yehovah, èn a sani dati ben meki a „firi sari” èn a ben „hati” en trutru.—Psalm 78:40, 41.

Sobun, wi no abi fu tweifri taki Yehovah e firi nanga papa noso mama di e sari fu di den pikin fu den gowe libi Yehovah. Na ini en Wortu, Bijbel, Gado e gi bun rai nanga deki-ati fu yepi den sortu papa nanga mama disi, so taki den kan sabi san den musu du na ini so wan situwâsi. Gado e gi den deki-ati fu trowe den sorgu fu den na en tapu, fu saka densrefi, èn fu kakafutu gi Satan Didibri. Meki wi si fa den rai disi kan yepi yu fu tan tanapu kánkan te a pikin fu yu drai baka gi Gado.

Trowe yu sorgu na Yehovah tapu

Yehovah sabi taki papa nanga mama e broko den ede srefisrefi te den sabi taki den pikin o du wan sani di kan du den ogri, noso te den sabi taki trawan o du den ogri. Na apostel Petrus e sori san den kan du te a sani disi noso tra sani e gi den broko-ede. A e skrifi: „Un musu trowe ala un sorgu na [Yehovah] tapu, bika a e broko en ede nanga unu” (1 Petrus 5:7). Fu san ede a deki-ati nanga a dyaranti disi bun, spesrutu gi papa nanga mama di abi wan pikin di drai baka gi Gado?

Di a pikin fu yu ben yongu, yu ben de na ai ala ten fu kibri en gi ogri, èn kande a ben arki yu te yu ben e warskow en na wan lobi-ati fasi. Di a kon moro owru, yu no ben man taigi en ala ten san a musu du, ma toku yu ben wani tan kibri en gi ogri. Fu taki en leti, kande yu ben wani du dati moro leki fosi srefi.

Fu dati ede, te a pikin fu yu trangayesi èn a lasi en matifasi nanga Gado, noso a e firi brokosaka, noso ogri miti en, dan yu kan denki taki na yu abi a fowtu. Na dati Joy, di wi kari na a bigin, ben e denki. A e taki: „Ibri dei baka, mi ben e prakseri sortu fowtu mi meki, bika mi ben denki taki mi no kweki mi pikin bun.” Spesrutu na den momenti dati, Yehovah wani taki yu musu ’trowe ala yu sorgu na en tapu’. A o yepi yu efu yu du dati. „Trowe yu hebi na Yehovah tapu”, na so a psalm skrifiman taki, „èn ensrefi sa horibaka gi yu. Noiti a sa gi pasi taki a regtfardikiwan e degedege” (Psalm 55:22). Joy ben kisi a trowstu dati. A e fruteri: „Mi fruteri Yehovah fa mi ben e firi. Mi taigi en ala san ben de tapu mi ati, èn dati ben meki mi firi bun trutru.”

 Fu di yu leki papa nanga mama na sondu libisma, meki a kan taki yu meki wan tu fowtu di yu ben e kweki a pikin fu yu. Ma no tan poti prakseri soso na den fowtu dati, bika a de krin taki Yehovah no e du dati. Luku san Yehovah meki a psalm skrifiman taki: „Efu na fowtu yu ben musu luku, o Yah, o Yehovah, dan suma ben kan tan tanapu?” (Psalm 130:3) Èn awinsi yu no ben meki nowan fowtu, toku a ben kan pasa taki a pikin fu yu drai baka gi Gado. Sobun, fruteri Yehovah na ini begi fa yu e firi, èn a o yepi yu. Ma efu yusrefi wani tan dini Yehovah, èn efu yu no wani taki Satan kisi yu, dan yu musu du moro.

Saka yusrefi

„Un musu saka unsrefi na ondro a makti anu fu Gado”, na so Petrus ben skrifi, „so taki a kan hei unu na a reti ten” (1 Petrus 5:6). Fu san ede sakafasi de fanowdu te wan pikin fu yu gowe libi Gado? Boiti taki yu e sari èn taki yu e firi leki na yu abi a fowtu, dan kande yu e syen tu taki yu pikin drai baka gi Gado. Kande yu e feni taki den sani di yu pikin du, meki taki a famiri kisi porinen, spesrutu te a pikin puru fu a Kresten gemeente. Fu di yu e krutu yusrefi èn fu di yu e firi syen, meki yu kan lasi-ati so te taki yu no wani go na den Kresten konmakandra.

Efu so wan sani pasa nanga yu, dan yu abi fu handri nanga koni. Odo 18:1 e gi a warskow disi: „Wan sma di e hori ensrefi aparti, sa suku en eigi wini nomo; a sa handri na wan fasi di e sori taki a no e poti prakseri kwetikweti na koni rai.” Te yu e go na den Kresten konmakandra doronomo aladi yu e firi sari, yu o kisi prenspari rai nanga deki-ati. „Biginbigin, mi no ben wani miti nowan sma”, na so Joy e fruteri. „Ma mi taigi misrefi taki a de prenspari fu tan abi bun gwenti na ini na anbegi fu Gado. Èn te yu luku en bun, efu mi ben tan na oso, dan mi ben o sidon prakseri den problema fu mi nomo. Den konmakandra yepi mi fu tan poti prakseri na a anbegi fu Gado, èn dati gi mi deki-ati. Mi breiti srefisrefi taki mi no hori misrefi aparti, bika efu mi ben du dati, mi no ben o kisi a yepi fu mi brada nanga sisa di horibaka gi mi na wan lobi-ati fasi.”—Hebrewsma 10:24, 25.

No frigiti tu taki ibri sma na ini na osofamiri musu „tyari en eigi lai” noso en eigi frantwortu leki Kresten (Galasiasma 6:5). Yehovah e fruwakti fu papa nanga mama taki den lobi den pikin fu den èn taki den e gi den leri. A e fruwakti tu fu pikin taki den e gi yesi èn taki den e lespeki a papa nanga mama fu den. Te papa nanga mama e du ala san den man fu kweki den pikin fu den „nanga a leri fu Yehovah” èn te den e „frumane den”, dan den papa nanga mama srefi sa abi wan bun nen na Gado (Efeisesma 6:1-4). Efu wan pikin trangayesi a leri fu en lobi-ati papa nanga mama, dan a pikin o pori en eigi nen. Odo 20:11 e taki: „Wan boi e sori nanga den sani di a e du, efu a krin èn opregti.” Satan opo ensrefi teige Yehovah, ma toku sma di sabi fa sani waka trutru e si Yehovah ete leki wan bun Gado.

Kakafutu gi Didibri

Petrus e gi a warskow disi: „Tan nanga krin frustan, de na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma” (1 Petrus 5:8). Nofo tron Satan e waka lontu neleki wan lew fu kisi den yonguwan di no abi ondrofeni. Na ini owruten Israel, yu ben abi lew di ben e onti den osometi. Efu wan yongu skapu gowe libi na ipi, dan wan lew ben kan kisi en makriki. Wan  mama-skapu ben o suku fu kibri en pikin, awinsi ensrefi ben kan dede. Ma wan mama-skapu no ben o man feti nanga wan lew. Fu dati ede, deki-ati skapuman ben de fanowdu fu kibri na ipi.—1 Samuel 17:34, 35.

Yehovah no wani taki a „lew di e bari” e du ogri nanga den agersi skapu fu en. Dati meki a poti agersi skapuman fu sorgu gi na ipi, na ondro a tiri fu „a gran skapuman” Yesus Krestes (1 Petrus 5:4). Petrus e gi den skapuman dati a frumane disi: „Luku den skapu fu Gado di a gi unu fu sorgu, èn no du dati neleki na dwengi wan sma dwengi unu, ma du dati nanga prisiri; no du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan” (1 Petrus 5:1, 2). Te yu leki papa noso mama e wroko makandra nanga den skapuman disi, dan den kan yepi a yonguwan fu drai kon baka na Gado.

Te Kresten skapuman musu piri-ai gi a trangayesi pikin fu yu, dan a kan taki yu o wani kibri en fu a no kisi a piri-ai. Ma dati ben o de wan bigi fowtu. Petrus taki dati yu musu „kakafutu gi [Didibri]”. A no taki dati yu musu kakafutu gi den Kresten skapuman.—1 Petrus 5:9.

Te a trangaleri hebi

Efu a pikin fu yu no abi berow èn a de wan dopu Kresten, dan a kan taki den o gi en a moro hebi sortu trangaleri di de, namku den o puru en fu a gemeente. Te dati pasa, dan a kan taki yu no o man abi so furu demakandra nanga yu pikin moro. Yu o abi fu luku omeni yari a pikin abi, èn sosrefi fa a situwâsi de.

Efu a pikin no de wan bigisma ete èn a e tan nanga yu ete, dan a no de fu taki dati yu o tan sorgu gi en. A musu leri fa fu tyari ensrefi na wan bun fasi, èn a musu kisi trangaleri tu te dati de fanowdu, èn yu abi a frantwortu fu du dati (Odo 1:8-18; 6:20-22; 29:17). A kan taki yu musu hori wan bijbelstudie nanga en èn a sa abi fu teki prati. Yu kan meki a poti prakseri na difrenti bijbeltekst èn na den buku fu „a getrow nanga koni srafu” (Mateyus 24:45). Yu kan tyari en go na den Kresten konmakandra tu èn meki a sidon nanga yu. Kande ala den sani disi sa yepi en fu gi yesi na den rai fu Bijbel.

Ma a de tra fasi te a pikin na wan bigisma kaba èn te a no e tan nanga yu moro. Na apostel Paulus ben warskow den Kresten na ini owruten Korente: „Un no musu bumui moro nanga wan sma di de wan brada, aladi a de sosrefi wan huruman, noso wan gridiman, noso wan sma di e anbegi kruktugado, noso wan sma di e kosi trawan, noso wan drunguman, noso wan bedrigiman. Un no musu nyan srefi nanga so wan sma” (1 Korentesma 5:11). Te prenspari famiri afersi musu seti, dan a kan de fanowdu fu miti nanga a sma di puru fu a gemeente, ma wan Kresten papa noso mama musu du muiti fu no abi demakandra nanga en te dati no de fanowdu.

Te den Kresten skapuman gi trangaleri na wan pikin di du wan sondu, dan a no ben o de wan koni sani fu krutu den skapuman gi a trangaleri di den gi nanga yepi fu Bijbel. A no ben o bun tu fu si a trangaleri fu den leki wan sani di no seryusu. Te yu e du dati, dan yu no e kibri yu pikin trutru gi Didibri. Iya, yu ben kan lasi yu eigi matifasi nanga Gado. A moro bun sani di yu kan du fu yepi yu pikin, na fu horibaka gi den muiti di den skapuman e meki. Dati o yepi yu tu fu tan „abi wan tranga bribi”.—1 Petrus 5:9.

Yehovah sa yepi yu

Efu yu pikin drai baka gi Gado, hori na prakseri taki yu no de yu wawan. Tra Kresten papa nanga mama e ondrofeni a srefi sani. Awinsi sortu tesi e miti wi, Yehovah kan yepi wi.—Psalm 68:19.

Taki nanga Yehovah na ini begi. Go na den Kresten konmakandra doronomo. Horibaka gi den skapuman te den e gi trangaleri. Efu yu du dati, dan yu o man tan tanapu kánkan. A bun eksempre di yusrefi e gi, kan yepi yu pikin fu gi yesi na a kari di Yehovah e gi en fu drai kon baka na en.—Maleaki 3:6, 7.

[Prenki na tapu bladzijde 18]

Yu o kisi krakti te yu e begi èn te yu e go na Kresten konmakandra