Leri sma san Bijbel e leri trutru
Leri sma san Bijbel e leri trutru
’Meki sma fu ala kondre tron disipel, . . . èn leri den.’—MATEYUS 28:19, 20.
1. Omeni sma na ini a ten disi kan leisi Bijbel na ini a tongo fu den?
A WORTU fu Yehovah, a Santa Bijbel, na wan fu den moro owru buku na heri grontapu, èn nowan tra buku prati so furu leki Bijbel. Pisi fu en skrifi na ini moro leki 2300 difrenti tongo. Sowan neigi fu ibri tin sma na grontapu abi wan Bijbel na ini den eigi tongo.
2, 3. (a) Fa a du kon taki sma no sabi krin san Bijbel e leri? (b) Na sortu aksi wi o poti prakseri?
2 Milyunmilyun sma e leisi wan pisi fu Bijbel ibri dei. Son sma leisi a heri Bijbel someni leisi kaba. Dusundusun kerki e taki dati den sani di den e leri sma e komoto fu Bijbel, ma den kerki no e agri nanga makandra fu den sani di Bijbel e leri. Wan sani di e tyari moro bruya kon, na taki sma di de fu a srefi kerki no e agri nanga makandra. Son sma no e bribi ala sani di Bijbel e taki. Den denki disi meki taki den no sabi fu pe a buku disi komopo, èn o warti a de trutru. Furu sma e si en leki wan santa buku di yu kan gebroiki nomo te yu musu meki wan sweri, noso te yu e pramisi fu no lei na fesi krutubangi.
3 Ma fu taki en leti, Bijbel abi wan tumusi prenspari boskopu fu Gado gi a libisma famiri (Hebrewsma 4:12). Dati meki wi leki Yehovah Kotoigi wani taki sma e kon sabi san Bijbel e leri. Wi e prisiri fu du a wroko di Yesus Krestes ben gi den bakaman fu en, di a taki: „Go na sma fu ala kondre èn meki den tron disipel. . . . Leri den” (Mateyus 28:19, 20). Te wi e preiki, wi e miti opregtisma di no sabi san den musu bribi, bika kerki na heri grontapu e leri sma someni difrenti sani. Den wani sabi san Bijbel e taki trutru fu a Mekiman, èn fu san ede libisma de na grontapu. Meki wi luku dri aksi di furu sma e poti. Na ibriwan fu den aksi, wi o luku a fowtu denki di kerki fesiman abi fu a tori, èn baka dati wi o luku san Bijbel e leri trutru. Den aksi na: (1) Gado e broko en ede nanga wi? (2) Fu san ede wi de na grontapu? (3) San e pasa nanga wi te wi dede?
Gado e broko en ede nanga wi?
4, 5. Fu san ede sma e denki taki Gado no e broko en ede nanga wi?
4 Meki wi bigin nanga a fosi aksi: Gado e broko en ede nanga wi? A de wan sari sani taki furu sma e denki taki Gado no e broko en ede nanga wi. Fu san ede den abi a denki dati? Wán sani di e meki den denki so, na taki den e libi na ini wan grontapu pe bita-ati, feti, nanga pina lai. Den feni taki efu Gado ben e broko en ede trutru nanga wi, dan a no ben o meki den ogri sani dati pasa.
5 Ete wan sani di e meki sma denki taki Gado no e broko en ede nanga wi, na taki kerki fesiman e meki sma bribi dati. San kerki fesiman e taki nofo tron te wan sari sani miti wan sma? Di den tu yongu pikin fu wan uma dede na ini wan ongoloku nanga wagi, dan en domri taigi en: „Na Gado ben wani en so. Gado ben abi ete tu engel fanowdu.” Te kerki fesiman e taki den sortu sani disi, dan te yu luku en bun, den e taki dati na Gado e meki den takru sani disi miti sma. Ma a disipel Yakobus ben skrifi: „Te tesi miti wan sma, no meki a taki: ’Na Gado e tesi mi.’ Bika nowan sma kan tesi Gado nanga ogri sani, èn Gado srefi no e tesi sma tu” (Yakobus 1:13). Yehovah Gado noiti no e meki taki ogri e miti sma. Iya, „noiti a tru Gado sa handri na wan kruktu fasi”.—Yob 34:10.
6. Suma e meki taki so furu ogridu nanga pina de na ini a grontapu disi?
6 Ma dan fu san ede so furu ogridu nanga pina de? Wán sani fu san ede dati de so, na fu di a moro bigi pisi fu a libisma famiri no wani Gado leki a Tiriman fu den. Den no wani gi yesi na den regtfardiki wet fu en. Bijbel e taki dati „heri grontapu de na ini a makti fu na ogriwan”. Sobun, sondro fu sabi, libisma e gi yesi na a Feanti fu Gado, namku Satan (1 Yohanes 5:19). Now di wi sabi disi, wi e frustan moro bun fu san ede takru sani e pasa. Satan abi takru prakseri, a abi bita-ati, a e kori sma, èn a lobi fu du sma ogri. Sobun, wi musu fruwakti taki sma fu grontapu o du leki a tiriman fu den. A no e fruwondru wi srefisrefi taki so furu ogri e pasa!
7. San na wan tu sani di e meki taki wi e pina?
7 Wan tra sani di e meki taki wi e pina, na taki libisma abi sondu. Sondu libisma e du ala san den man fu basi trawan, èn nofo tron a sani dati e meki den feti nanga makandra, den e kwinsi trawan, èn trawan e pina. Preikiman 8:9 e taki nanga leti: „A wan libisma tiri a trawan na wan fasi di e tyari takru bakapisi gi en.” Ete wan sani di e meki taki sma e pina, na taki ’sani e pasa sondro taki sma e fruwakti dati’ (Preikiman 9:11). Nofo tron ogri e miti sma fu di den de na wan presi na wan ten te wan ogri e pasa.
8, 9. Fa wi sabi taki Yehovah e broko en ede trutru nanga wi?
8 A de wan trowstu fu sabi taki a no Yehovah e meki sma pina. Ma Gado e broko en ede trutru nanga san e pasa na ini wi libi? A bun fu sabi taki Yehovah e broko en ede nanga wi! Wi sabi dati, fu di en Wortu e sori wi fu san ede a gi pasi taki libisma e du ogri. Na fu tu sani ede meki Gado du dati, namku fu sori taki na en abi a reti fu tiri ala sani, èn fu gi libisma na okasi fu sori taki den de getrow na en. Fu di Yehovah na a moro makti Mekiman, meki a no abi fu taigi wi fu san ede a gi pasi taki sma e pina. Ma toku a e fruteri wi dati, fu di a e broko en ede nanga wi.
9 Luku tra buweisi di e sori taki Gado e broko en ede nanga wi. A „ben sari srefisrefi” di sma ben e du soso ogri na grontapu na ini a ten fu Noa (Genesis 6:5, 6). Yu denki taki Gado e firi tra fasi na ini a ten fu wi? Nôno, bika Gado no e kenki (Maleaki 3:6). Gado no man nanga kruktudu èn a no lobi te sma e pina. Bijbel e leri taki heri esi Gado o tyari wan kaba kon na ala den problema di libisma nanga Didibri tyari kon nanga a fasi fa den e tiri. Disi e sori wi krin taki Gado e broko en ede nanga wi, a no so?
10. Fa Yehovah e denki fu a pina di libisma e pina?
10 Kerki fesiman e gi sma wan fowtu denki fu Gado te den e taki dati ogri e miti wi fu di Gado wani en so. Ma dati no tru, fu di Yehovah e angri fu tyari wan kaba kon na a pina di libisma e pina. „A e broko en ede nanga unu”, na so 1 Petrus 5:7 e taki. Na dati Bijbel e leri trutru!
Fu san ede wi de na grontapu?
11. San den kerki fu grontapu e taki nofo tron fu a libi fu libisma dyaso na grontapu?
11 Meki wi luku a di fu tu aksi di furu sma e poti, namku: ’Fu san ede wi de na grontapu?’ Nofo tron den kerki fu grontapu e taki dati libisma de na grontapu fu wan syatu pisi ten nomo. Den e si grontapu leki wan presi di sma e pasa nomo, bifo den go na wan tra presi. Son kerki fesiman e meki sma bribi a lei taki wan dei Gado o pori a grontapu pe wi e libi na tapu. Fu di den e leri sma den sani disi, meki furu sma abi a denki taki a moro bun fu du ala san den wani du na ini a libi, bika toku den o dede. San Bijbel e leri trutru? Fu san ede wi de na grontapu?
12-14. San Bijbel e leri wi fu a prakseri di Gado abi gi grontapu èn gi a libisma famiri?
12 Gado abi moi sani na prakseri gi grontapu èn gi libisma. A „no meki [grontapu] fu soso”, ma a „ben seti en fu sma libi na tapu” (Yesaya 45:18). Boiti dati, Yehovah „seti grontapu na tapu den fasti presi fu en; te ten di no skotu, noso fu têgo, a no sa degedege” (Psalm 104:5). Te wi e kon sabi san Gado abi na prakseri gi grontapu èn gi libisma, dan dati kan yepi wi fu frustan fu san ede wi de na grontapu.
13 Genesis kapitel 1 nanga 2 e sori taki Yehovah ben e poti furu prakseri na a fasi fa a ben e seti grontapu, so taki libisma ben kan tan na tapu. Di Yehovah ben kaba meki den sani na grontapu, dan ala sani ben de „heri bun” (Genesis 1:31). Gado ben poti a fosi man nanga uma, Adam nanga Eva, na ini a moi dyari fu Eden, èn a ben gi den furu bun nyanyan. Gado ben taigi den fosi tu libisma disi: „Meki pikin èn kon furu, teleki unu kon lai na grontapu, èn poti grontapu na un ondro.” Den ben musu kisi pikin di no abi sondu. Den ben musu meki heri grontapu kon tron wan moi tanpresi, èn den ben musu sorgu na wan lobi-ati fasi gi den meti.—Genesis 1:26-28.
14 Yehovah wani taki libisma musu libi fu têgo na grontapu èn den no musu abi sondu. Gado Wortu e taki: „Na den regtfardikisma srefi sa abi grontapu leki a gudu fu den, èn den sa libi na tapu fu têgo” (Psalm 37:29). Iya, Gado ben meki libisma fu libi fu têgo na ini Paradijs na grontapu. Na dati Gado abi na prakseri, èn na dati Bijbel e leri trutru!
San e pasa nanga wi te wi dede?
15. Soleki fa furu kerki fu a grontapu e leri, dan san e pasa nanga wi te wi dede?
15 Meki wi luku ete wan aksi now di furu sma e poti, namku: San e pasa nanga wi te wi dede? Furu kerki fu a grontapu e leri sma taki te wan sma dede, dan wan sani e komoto na ini a sma skin èn a e libi go doro. Son kerki e bribi ete taki Gado e pina ogrisma fu têgo na ini wan faya hel. Ma disi de so trutru? San e pasa te wan sma dede? San Bijbel e leri trutru?
16, 17. San e pasa nanga den dedewan, soleki fa Bijbel e sori?
16 Gado Wortu e taki: „Den libiwan sabi taki den sa dede; ma den dedewan no sabi notinoti, èn den no e kisi pai moro.” Fu di den dedewan „no sabi notinoti”, meki den no man yere, den no man si, den no man taki, den no man firi, èn den no man denki tu. Den no e kisi nowan pai moro. Dati no kan tu, bika den no man du nowan wroko. Boiti dati, „a lobi fu den, a bita-ati fu den, nanga a dyarusu fu den no de moro”, bika den no man sori nowan firi.—Preikiman 9:5, 6, 10.
17 Bijbel e taki krin taki den dedewan no e libi go doro na wan tra presi. Te wan sma dede, dan nowan sani e komoto na ini en skin fu go libi na ini wan tra skin, soleki fa son sma e bribi. Wi kan frustan a tori disi moro krin te wi e agersi a libi fu wi nanga a faya fu wan kandra. Te a faya dede, a no e go na nowan presi. A de krin taki a no de moro.
18. Te wan bijbelstudenti leri taki den dedewan no sabi notinoti, dan san a o man frustan?
18 Prakseri fa a tru tori disi kan yepi sma. Te wan bijbelstudenti leri taki den dedewan no sabi notinoti, dan a o man frustan taki den dede afo fu en no sa kon trobi en, awinsi den afo ben atibron tapu en di den ben de na libi. A o man frustan tu taki den lobiwan fu en di dede, no man yere, si, taki, firi, noso denki moro. Fu dati ede, dedesma no man firi sari taki den wawan de na wan presi pe dedewan de, èn den no man firi pen na ini wan faya hel. Ma Bijbel e leri taki den dedewan di de na ini Gado prakseri, sa kisi wan opobaka. Dati na wan tumusi moi howpu!—Yohanes 5:28, 29.
Wi kisi wan nyun buku
19, 20. Sortu frantwortu wi abi leki Kresten, èn sortu buku meki spesrutu gi wi fu hori bijbelstudie na ini wi diniwroko?
19 Wi luku soso dri aksi di furu sma e poti. Tapu ibriwan fu den aksi dati, Bijbel e gi piki di de krin fu frustan. A e gi wi furu prisiri fu fruteri den tru tori disi na sma di wani sabi san Bijbel e leri! Ma opregtisma abi furu prenspari aksi ete, èn den wani kon sabi den yoisti piki tapu den aksi disi. Wi leki Kresten abi a frantwortu fu yepi den sma disi fu feni den piki tapu den aksi dati.
20 A muilek fu leri sma Bijbel tori na wan fasi di de krin fu frustan èn di e naki na ati fu den. Fu yepi wi nanga dati, dan „a getrow èn koni srafu” meki wan buku spesrutu gi wi di wi kan gebroiki na ini a Kresten diniwroko (Mateyus 24:45-47). A buku disi abi 224 bladzijde, èn a nen San Bijbel e leri wi trutru?
21, 22. San na wan tu moi sani na ini a buku San Bijbel e leri wi trutru?
21 A buku disi kon na doro na a „Gi yesi na Gado” Distrikt Kongres fu Yehovah Kotoigi di ben hori na ini 2005. A buku abi wan tu moi sani na ini. Fu eksempre, den feifi bladzijde na a bigin fu a buku kan yepi yu bun fu bigin wan oso-bijbelstudie. Yu o si taki a makriki fu taki fu den prenki nanga den bijbeltekst na den bladzijde dati. A abi wan pisi tu di yu kan gebroiki fu sori den studenti fa den musu suku den kapitel nanga den vers na ini Bijbel.
22 A buku disi e taki sani krin èn a no muilek fu frustan. Fu man doro na ati fu a bijbelstudenti, dan son leisi a buku e poti aksi langalanga gi en, èn a e sori fa a tori abi fu du nanga en. Ibri kapitel e bigin nanga wan tu aksi, èn na a kaba yu abi wan faki di nen „San Bijbel e leri wi”. A faki disi abi den piki di Bijbel e gi tapu den aksi di poti na a bigin fu a kapitel. Den moi prenki nanga den sani di skrifi na den, èn sosrefi den eksempre nanga agersitori sa yepi a studenti fu frustan den nyun sani di a e leri. Den kapitel srefi no e go tumusi dipi na ini wan tori, ma na a bakasei fu a buku yu kan luku 14 prenspari tori efu a studenti wani sabi sani moro fini.
23. Fa wi kan gebroiki a Bijbel leri-buku na den bijbelstudie?
23 A Bijbel leri-buku meki fu gi ala sortu sma leri, awinsi sortu skoroleri den kisi, noso awinsi fu sortu kerki den ben de. Efu wan studenti no sabi noti fu Bijbel, dan kande yu o abi fu studeri moro leki wán leisi fu kaba wan heri kapitel. No suku fu klari a buku esi-esi, ma suku fu doro na ati fu a studenti. Efu a no e frustan wan eksempre na ini a buku, dan tyari dati kon na krin gi en, noso gebroiki wan tra eksempre. Sreka yusrefi bun, du ala san yu man fu gebroiki a buku na wan bun fasi, èn begi Gado fu yepi yu fu „gebroiki a wortu fu waarheid na wan reti fasi”.—2 Timoteyus 2:15.
Warderi den tumusi moi grani fu yu
24, 25. Sortu tumusi moi grani Yehovah gi en pipel?
24 Yehovah gi en pipel tumusi moi grani. A meki wi kon sabi suma na en trutru. Noiti wi musu si a grani dati leki wan soso sani! Bika te yu luku en bun, Gado no fruteri heimemre sma san a abi na prakseri, ma a fruteri dati na den sma di abi sakafasi. Yesus ben taki fu disi: „Mi Tata, Masra fu hemel nanga grontapu, mi e prèise yu na fesi ala sma, bika yu kibri den sani disi gi den koniwan èn gi den sma di abi frustan èn yu tyari den kon na krin gi nyofi pikin” (Mateyus 11:25). A de wan tumusi bigi grani fu de wan fu den sakafasi sma di e dini a Moro Hei Tiriman, Yehovah.
25 Gado gi wi a grani tu fu yepi sma kon sabi en. No frigiti taki sma kisi wan fowtu denki fu Gado fu di kerki leriman fruteri lei fu en. Dati meki furu sma e denki taki Yehovah no e broko en ede nanga sma èn taki a no e firi gi sma. Yu e angri fu meki sma kisi a yoisti denki fu Gado? Yu wani taki opregtisma na ala sei musu kon sabi suma na Gado trutru? We, dan gi yesi na Gado fu di yu e preiki fayafaya gi sma èn fu di yu e leri den san Bijbel e taki fu tumusi prenspari tori. Sma di wani kon sabi fa sani de trutru, musu kon sabi san Bijbel e leri trutru.
San yu ben o piki?
• Fa wi sabi taki Gado e broko en ede nanga wi?
• Fu san ede wi de na grontapu?
• San e pasa nanga wi te wi dede?
• Sortu sani na ini a Bijbel leri-buku yusrefi man gebroiki bun?
[Aksi fu a tori disi]
[Prenki na tapu bladzijde 22]
Bijbel e leri wi taki sma no o pina moro
[Sma di abi a reti fu a prenki]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Prenki na tapu bladzijde 23]
Den regtfardikisma o libi fu têgo na ini Paradijs