Man nanga uma meki fu yepi makandra

ALA ten a ben de so kaba taki man nanga uma abi a tranga firi fu de nanga makandra. Na so Gado meki den. Yehovah ben sabi taki a no ben bun gi a fosi man Adam fu tan en wawan. Fu dati ede Gado meki „wan yepiman gi [a man], leki wan patna di fiti en”.

Yehovah meki Adam sribi wan dipi sribi, dan a puru wan fu den lebriki fu Adam „fu meki wan uma; dan a tyari na uma go na a man”. Di Adam si a moi uma di Yehovah meki, dan a prisiri so te dati a taki: „Ai, disi na trutru bonyo fu mi bonyo èn skin fu mi skin.” A no ben muilek srefisrefi fu lobi na uma disi di ben nen Eva, bika a ben abi tumusi moi fasi èn a no ben abi fowtu. A man Adam srefi no ben abi fowtu èn a ben abi moi fasi tu di ben o meki Eva lespeki en. Iya, Gado ben meki den gi makandra. Bijbel e taki: „Dati na fu san ede wan man sa gowe libi en papa nanga en mama, èn a musu tai hori na en wefi èn den musu tron wán skin.”—Genesis 2:18-24.

Ma na ini a ten disi, osofamiri e prati, èn nofo tron man nanga uma e feti nanga makandra, èn den e denki densrefi nomo. A strei di man nanga uma e strei nanga makandra, e tyari pratifasi kon tu. A no disi Gado ben wani gi mansma nanga umasma. Gado ben gi mansma wan moi frantwortu noso wroko na grontapu. Umasma ben kisi den eigi prenspari frantwortu noso wroko leki patna fu den masra. Den ben musu wroko switi nanga makandra. Sensi a ten di Gado meki libisma, mansma nanga umasma di e lespeki a seti fu Yehovah pruberi fu tyari a frantwortu fu den soleki fa Yehovah wani, èn disi gi den prisiri èn a meki den firi koloku. San na den frantwortu fu mansma nanga umasma, èn fa wi kan tyari den frantwortu dati na wan bun fasi?

[Prenki na tapu bladzijde 3]

Gado meki man nanga uma fu tyari prenspari frantwortu