Samuel horibaka gi a tru anbegi

A PROFEITI Samuel ben piri-ai gi den Israelsma fu di den ben wani wan libisma leki kownu. A taigi den taki den musu gi yesi na Gado. Fu di a ben wani sori den Israelsma taki a de wan profeiti fu Gado trutru, meki a aksi Yehovah fu tyari wan sibibusi kon. Den Israelsma no ben gwenti fu si sibibusi na ini a pisi ten dati fu a yari te den ben e du kotiwroko. Ma toku Gado meki alen fadon, èn a meki dondru bari. A sani dati meki taki a pipel kon frede Yehovah nanga en profeiti Samuel srefisrefi.—1 Samuel 12:11-19.

A profeiti Samuel ben de wan skrifiman tu. A ben skrifi fu wan lo span tori di pasa na ini sowan 330 yari. Wan tu fu den tori disi na den bigi sani di den krutuman fu Israel du. Fu eksempre, Samuel skrifi a tori fu Simson, a moro tranga man di oiti ben libi. A tori disi meki taki sma skrifi puwema èn taki den meki komedi-prei nanga felem fu en (Krutuman, kapitel 13–16). Ete wan moi tori di Samuel skrifi, na a di fu Rut nanga Naomi, a mama fu Rut en masra. Den tu uma disi ben lasi den masra na ini dede èn den ben kon pôti. Ma te fu kaba, sani waka bun nanga den.—Rut, kapitel 1–4.

San wi kan leri fu den sani di Samuel skrifi èn fu a fasi fa a ben e libi? Fa a horibaka gi a tru anbegi?

Den yongu yari fu Samuel

Elkana, a papa fu Samuel, ben de wan anbegiman fu Yehovah èn a ben de wan lobi-ati masra gi en wefi. En wefi Hana ben abi wan tranga bribi. Ma Hana no ben man kisi pikin. Wan dei, a ben de na a oso fu Yehovah na Silo. Drape a begi Yehovah fayafaya èn a meki wan sweri. A taki: „Ke Yehovah fu den legre, poti prakseri na a nowtu fu yu umasrafu èn memre mi trutru. No frigiti yu umasrafu èn gi mi wan manpikin. Efu yu du den sani disi, dan mi sa gi yu, Yehovah, a manpikin disi. Ala den dei fu en libi a sa dini yu, èn nowan sma sa koti en edewiwiri” (1 Samuel 1:1-11). Sobun, Hana ben o gi Yehovah a pikin fu a du diniwroko gi En.

Bijbel e taki dati di Hana ben e begi, na „soso en mofobuba ben e buweigi”. Granpriester Eli ben denki taki Hana drungu, èn dati meki a piri-ai gi Hana. Ma Hana fruteri Eli na wan lespeki fasi san na a situwâsi fu en. Ne Eli taigi en: „Go ini vrede. Meki a de so taki a Gado fu Israel gi yu san yu aksi en na ini begi.” Yehovah arki a begi fu Hana, fu di Bijbel e taki moro fara: „Baka wan yari, Hana kon de nanga bere èn a kisi wan manpikin. A kari en Samuel, bika a taki: ’Na Yehovah mi ben aksi fu gi mi en.’”—1 Samuel 1:12-20.

A papa nanga mama fu Samuel ben kweki en „nanga a leri fu Yehovah” èn den ben e ’frumane en, so taki a ben kan kisi a denki fu Yehovah’ (Efeisesma 6:4). Di Hana puru Samuel na bobi, dan a tyari Samuel go na a oso fu Gado na Silo, èn a gi en na Granpriester Eli. Eli kweki a boi fu „tron wan dinari fu Yehovah”. Fu di Hana ben prisiri srefisrefi, meki a gi Gado tangi. Bakaten, Samuel skrifi den moi wortu di Hana ben taki.—1 Samuel 2:1-11.

Yu leki papa noso mama e kweki yu pikin na so wan fasi taki a wani du furuten diniwroko gi Yehovah te a kon bigi? A moro bun fasi fa wan sma kan gebroiki en krakti, na fu horibaka gi a tru anbegi.

Samuel no ben abi problema fu libi na ini a santa presi. A „gro kon bigi nanga Yehovah na en sei”. „Yehovah ben kon lobi en èn tra sma ben lobi en tu”. Sma ben lobi en, fu di a ben tyari ensrefi soleki fa Gado wani.—1 Samuel 2:21, 26.

Hofni nanga Pinehas, den wisiwasi manpikin fu Eli, no ben de leki Samuel, fu di den „no ben abi lespeki gi Yehovah”. Den ben e du hurudu, èn den ben e teki den moro bun pisi fu a  meti di sma ben e tyari kon leki ofrandi na a santa presi. Gado ben seni wan profeiti kaba fu taigi Eli sortu strafu a ben o kisi. Wan fu den strafu dati ben de taki den tu manpikin fu en ben o dede (1 Samuel 2:12, 15-17, 22-25, 27, 30-34). Bakaten, Yehovah ben o gebroiki Samuel fu tyari wan tra krutu boskopu.

Samuel e dini leki wan profeiti

Gado ben taigi Samuel: „Yu musu taigi [Eli] taki mi e krutu en osofamiri fu ala ten gi a sondu disi. A ben sabi taki den manpikin fu en fluku Gado, ma toku a no piri-ai gi den.” A no ben makriki fu tyari a boskopu disi. Boiti dati, Eli ben taigi Samuel fu no kibri noti gi en. Dati meki Samuel fruteri Eli ala san Yehovah taki. Sobun, fu man du disi, Samuel ben musu abi deki-ati trutru!—1 Samuel 3:10-18.

Di Samuel kon moro owru, dan ala sma na ini Israel kon sabi taki en ben de a profeiti fu Gado (1 Samuel 3:19, 20). Bakaten, den Filisteasma wini Israel èn furu Israelsma lasi den libi. Na so den sani di Samuel ben taki, bigin kon tru. Hofni nanga Pinehas dede na ini a feti, èn den Filisteasma teki na ark fu a frubontu fu Yehovah. Di Eli yere taki den manpikin fu en dede èn taki den Filisteasma teki na Ark, dan Eli fadon fu en sturu go na baka, a broko en neki, èn a dede.—1 Samuel 4:1-18.

Tutenti yari baka dati, Samuel taigi den Israelsma fu no anbegi falsi gado moro. Dati meki den broko den popki di den ben e anbegi, den bigin faste, èn den taki krin sortu sondu den ben du. Samuel begi gi den èn a tyari wan bron-ofrandi gi den. San ben de a bakapisi? Di den Filisteasma kon feti nanga Israel, dan Gado bruya den Filisteasma, èn den fetiman fu Israel wini den feanti disi. Fu di Yehovah ben de nanga den Israelsma, meki sani waka moro bun gi den. A pisi kontren di den Filisteasma ben teki fu den, ben kon de fu den Israelsma baka.—1 Samuel 7:3-14.

Samuel horibaka gi a tru anbegi trutru. Fu eksempre, te den Israelsma ben wini wan feti, dan den ben e teki den gudu fu den feanti. Samuel ben sorgu taki den Israelsma ben e gi wan tu fu den gudu dati fu du a wroko na ini a tabernakel. A ben yepi seti sani gi a Paskafesa, èn a ben orga den Leifisma na ini grupu fu hori wakti na den portu (1 Kroniki 9:22; 26:27, 28; 2 Kroniki 35:18). Ibri yari, Samuel ben komoto na en tanpresi na Rama fu go koti krutu na difrenti foto. Sma ben sabi en leki wan opregti man di no ben e teki sma sei. Fu di sma ben abi lespeki gi Samuel, meki a ben man yepi den fu tan dini Gado (1 Samuel 7:15-17;9:6-14; 12:2-5). Fu di Samuel ben de opregti èn fu di a ben gwenti du sani soleki fa Gado wani, meki furu sma ben wani de leki en. A libi fu Samuel e gi yu deki-ati fu de leki en tu?

Israel ben wani wan kownu

Di Samuel kon owru, a poti en manpikin Yoèl nanga Abia leki krutuman. Den man disi „no ben e tyari densrefi leki [Samuel], ma den ben e bedrigi trawan fu kisi wini, den ben gwenti fu teki tyuku, èn den no ben e koti krutu na wan reti fasi”. A fasi fa den ben e tyari densrefi, meki taki den owru man fu Israel aksi Samuel fu poti wan kownu fu tiri den (1 Samuel 8:1-5). Samuel no ben feni a sani disi bun. Ma di a begi fu a tori disi, Yehovah taki: „Den no drai baka gi yu, ma den drai baka gi mi, fu di den no wani mi leki kownu fu den” (1 Samuel 8:6, 7). Gado taigi Samuel fu du san a pipel aksi, ma a ben musu warskow den tu taki den no ben o man du son sani moro te den ben abi wan libisma leki kownu. Di a pipel hori nomo  taki den wani wan kownu, dan Yehovah meki Samuel salfu Saul leki kownu.—1 Samuel 8:6–22; 9:15-17; 10:1.

Samuel ben du ala den sani disi, ma a ben e broko en ede nanga a fasi fa sani ben o waka. Baka di den Israelsma wini den Amonsma, Samuel meki a pipel kon makandra na Gilgal fu sori ala sma taki Saul tron kownu (1 Samuel 10:17-24; 11:11-15). Ne Samuel taki fu a historia fu Israel èn a gi a kownu nanga a pipel deki-ati fu gi yesi na Yehovah. Soleki fa wi leisi kaba na a bigin fu na artikel disi, dan Gado piki a begi fu Samuel, fu di a meki wan sibibusi kon di sma no ben gwenti si na a pisi ten dati fu a yari. A sani disi meki a pipel kon si taki den du wan sondu fu di den no ben wani Yehovah leki kownu moro. Di den aksi Samuel fu begi gi den, a taki: „A no kon na mi prakseri srefi, fu tapu fu begi gi unu. Bika efu mi ben o du dati, mi ben o sondu teige Yehovah. Mi musu leri unu san bun èn san reti.” Samuel na wan moi eksempre trutru, fu di a tan lobi Yehovah nanga a pipel awinsi san ben pasa! (1 Samuel 12:6-24) Yu de klariklari tu fu horibaka gi sani di Gado seti èn fu begi gi den Kresten brada nanga sisa fu yu?

Den fosi tu kownu fu Israel

Saul ben abi sakafasi èn Gado ben feni en bun (1 Samuel 9:21; 11:6). Ma bakaten, Saul no ben arki Gado moro. Fu eksempre, wan leisi Samuel taigi Saul fu wakti en fu tyari wan srakti-ofrandi. Toku Saul tyari a srakti-ofrandi ensrefi fu di a no ben abi a pasensi fu wakti. Dati meki Samuel piri-ai gi en (1 Samuel 13:10-14). Saul no ben gi yesi tu na a komando di a ben kisi fu kiri Kownu Akak fu den Amaleksma. Dati meki Samuel taigi Saul: „Tide Yehovah puru yu leki kownu fu Israel, èn a o poti wan tra kownu di bun moro yu.” Ne Samuel srefi kiri Akak èn a go row gi Saul.—1 Samuel 15:1-35.

Te fu kaba, Yehovah taigi Samuel: „O langa yu o row gi Saul ete? Misrefi no wani en leki kownu fu Israel moro.” Baka dati, Yehovah seni Samuel go na Betlehem fu salfu wan manpikin fu Isai leki kownu. Samuel luku ibriwan fu den manpikin fu Isai, teleki Yehovah taigi en taki a ben musu salfu David, a moro yonguwan. A dei dati, Samuel kon frustan wan prenspari tori, namku taki „Gado no e si sani na a fasi fa libisma e si sani, fu di libisma e si san na ai e si nomo; ma Yehovah fu en sei, e si fa na ati de”.—1 Samuel 16:1-13.

Samuel ben e sari kaba taki Saul trangayesi Gado, sobun a ben musu fu hati en di Saul kisi so wan bita-ati gi David taki a ben wani kiri en! Awinsi den tesi disi ben miti Samuel, toku a tan dini Yehovah fayafaya, srefi di a kon owru.—1 Samuel 19:18-20.

Den sani di wi kan leri fu na eksempre fu Samuel

Di Samuel dede, Israel row gi a deki-ati profeiti disi di ben abi sakafasi. A ben abi krakti tapu a libi fu furu sma (1 Samuel 25:1). Samuel ben de wan sondu libisma, èn son leisi a no ben e si sani na wan yoisti fasi. Toku a tan dini Yehovah wawan èn a wroko fayafaya fu yepi tra sma fu du dati tu.

Furu sani kenki sensi a ten fu Samuel, ma wi kan leri wan tu prenspari tori te wi e luku a libi fu en. San moro prenspari, na taki Samuel ben e dini Yehovah soleki fa En wani, èn a ben e gi sma deki-ati fu du dati tu. Na dati yu e du tu?

[Faki na tapu bladzijde 16]

PRAKSERI FU A LIBI FU SAMUEL

• Du neleki a papa nanga mama fu Samuel di leri en Gado wortu. Kweki den pikin fu yu „nanga a leri fu Yehovah èn frumane den, so taki den kan kisi a denki fu en”.—Efeisesma 6:4.

• Kweki yu pikin na so wan fasi taki a wani du furuten diniwroko gi Yehovah te a kon bigi. Na so fasi a sa de leki Samuel.

• Fu di Samuel ben e tyari ensrefi na wan fasi di Gado feni bun, meki trawan kon lobi en. Na so a gi wi wan moi eksempre.

• Samuel ben du ala san a man fu gi sma deki-ati fu anbegi a tru Gado, èn wi musu du dati tu.

[Prenki na tapu bladzijde 15]

Samuel ben horibaka gi a tru anbegi èn a ben de klariklari fu yepi sma fu tan dini Gado