Wan uma di abi moro leki wán hondro yari, abi wan marki na ini en libi

ELIN na wan fu den 60 sma na ini Sweden di abi 105 yari noso di moro owru. Elin abi 105 yari. A e tan na wan presi pe den e sorgu gi owrusma, ma a de gosontu nofo fu du en diniwroko fayafaya ete leki wan Kotoigi fu Yehovah. Moro leki 60 yari pasa, a ben teki a bosroiti fu du dati.

Fu man preiki gi trawan, dan Elin e du soleki fa na apostel Paulus ben du di a ben musu tan leki strafuman na ini wan oso. Paulus ben e preiki gi ala sma di ben kon na en (Tori fu den Apostel 28:16, 30, 31). Na a srefi fasi, Elin e gebroiki ibri okasi fu fruteri a bun nyunsu fu Bijbel na sma di e krin a presi, datra, sma di e koti ede-wiwiri, den sma di e sorgu gi den owruwan, èn tra sma di a e miti na a presi pe a e tan. Ten na ten, tra Kotoigi fu a gemeente fu Elin e tyari srefi den bijbelstudenti fu den go na Elin, so taki den kan kisi wini fu a sabi nanga na ondrofeni fu en.

Den brada nanga sisa na ini a gemeente fu Elin lobi a fasi fa a de. A de nanga prisiri ala ten èn a lobi fu leri sani. Wan brada e fruteri: „A sabi san e pasa na ini a gemeente. A man memre den nen fu ala den pikin èn fu den nyun sma di kon na ini a gemeente.” Furu sma sabi Elin tu leki wan uma di e sori switifasi ala ten te sma e kon luku en, a lobi lafu, èn a e poti prakseri na den bun sani na ini a libi.

San e yepi Elin fu tan abi prisiri èn fu tan poti prakseri na a marki na ini en libi? A e leisi wan bijbeltekst ibri dei na ini a pikin buku Ondrosuku den Buku fu Bijbel ala dei, di Yehovah Kotoigi tyari kon na doro. A e leisi wan pisi fu Bijbel ibri dei tu nanga yepi fu wan grasi di e yepi en fu si den letter moro bigi. Boiti dati, Elin e sreka ensrefi gi den alawiki konmakandra fu Yehovah Kotoigi. Aladi a no man de na den konmakandra srefi, a e arki den cassette-lolo fu den konmakandra. Te wi abi a gwenti fu leisi Bijbel nanga den buku di e taki fu Bijbel, èn te wi no e misi den Kresten konmakandra, dan dati kan yepi wi fu abi wan koloku libi, iya, a kan yepi wi fu abi wan marki na ini wi libi, awinsi omeni yari wi abi.—Psalm 1:2; Hebrewsma 10:24, 25.