Yepi trawan fu du san Bijbel e leri
Yepi trawan fu du san Bijbel e leri
„A siri na tapu a bun doti, na den sma di yere a wortu nanga wan krin èn bun ati; dan den e du san a wortu e taki èn den e meki froktu fu di den e horidoro.”—LUKAS 8:15.
1, 2. (a) Fu san ede Yehovah Kotoigi meki a buku San Bijbel e leri wi trutru? (b) Fa Yehovah blesi a muiti di en pipel du fu meki disipel na ini den tu yari di pasa?
„A BUKU moi kefalek. Den bijbelstudenti fu mi lobi en. Misrefi lobi en tu. A buku disi e meki taki wi man bigin bijbelstudie nanga sma leti na den mofodoro.” Na dati wan gewoon pionier fu Yehovah Kotoigi ben taki fu a buku San Bijbel e leri wi trutru? * Wan owru Kownukondre preikiman ben taki fu a srefi buku disi: „Feifitenti yari mi e du a preikiwroko kaba èn mi ben abi a grani fu yepi furu sma kon sabi Yehovah. Ma fu taki en leti, a buku disi na wan kefalek bun buku fu studeri nanga sma. Den moi agersitori e gi deki-ati èn a de wan prisiri fu luku den prenki.” Na so yu e denki tu fu a Bijbel leri-buku? A bijbelstudie buku disi meki fu yepi yu fu du san Yesus komanderi, namku: „Fu dati ede, go na sma fu ala kondre èn meki den tron disipel. . . . Leri den fu du ala san mi komanderi unu.”—Mateyus 28:19, 20.
2 A no de fu taki dati Yehovah e prisiri fu si taki sowan 6.600.000 Kotoigi fu en e gi yesi na a komando fu Yesus fu meki disipel (Odo 27:11). A de krin fu si taki Yehovah e blesi den muiti fu den. Fu eksempre, na ini 2005, den preiki a bun nyunsu na ini 235 kondre, èn den ben hori sowan 6.061.500 bijbelstudie. Leki bakapisi fu dati, furu sma ’yere Gado wortu èn den no teki a wortu leki a wortu fu libisma, ma trutru leki a wortu fu Gado’ (1 Tesalonikasma 2:13). Na ini den tu yari di pasa, moro leki afu milyun nyun disipel tyari kenki kon fu libi soleki fa Yehovah wani, èn den gi densrefi abra na Gado.
3. Sortu aksi di abi fu du nanga a Bijbel leri-buku, wi o luku na ini na artikel disi?
3 Yu ben abi a prisiri kaba fu studeri Bijbel nanga wan sma? Na heri grontapu yu abi sma ete di abi „wan krin èn bun ati”. Te den sma disi yere a wortu fu Gado, den sa ’du san a wortu e taki èn den sa meki froktu fu di den e horidoro’ (Lukas 8:11-15). Meki wi luku fa yu kan gebroiki a Bijbel leri-buku fu meki disipel. Na artikel disi o poti prakseri na dri aksi: (1) Fa yu kan bigin wan bijbelstudie? (2) Sortu sani yu kan du fu gi sma leri na wan bun fasi? (3) Fa yu kan yepi wan bijbelstudenti fu tron wan leriman fu Gado Wortu, Bijbel?
Fa fu bigin wan bijbelstudie
4. Fu san ede son sma e draidrai fu studeri Bijbel, ma fa yu kan yepi den fu bigin wan bijbelstudie?
4 Efu wan sma aksi yu fu dyompo wantron abra wan bradi kriki, dan kande yu no ben o du dati. Ma efu yu ben kan waka na tapu wan tu bigi ston di de na ini a kriki, dan kande yu ben o abi moro deki-ati fu abra en. Na so a kan tu taki wan sma e draidrai fu studeri Bijbel fu di a abi furu fu du. Kande na ososma e denki taki a o teki tumusi furu ten nanga muiti fu studeri Bijbel. Fa yu kan yepi na ososma fu bigin wan bijbelstudie? Yu kan hori wan tu syatu takimakandra fu leri na ososma wan tu sani fu a Bijbel leri-buku. Safrisafri yu kan gi en deki-ati fu studeri Gado Wortu doronomo. Efu yu e sreka yusrefi bun, dan ibri takimakandra nanga a sma o tyari en kon moro krosibei fu Yehovah fu tron wan mati fu en, neleki fa den ston e yepi wan sma fu abra a kriki.
5. Fu san ede yu musu leisi a Bijbel leri-buku?
5 Ma efu yu wani yepi wan tra sma fu kisi wini fu a Bijbel leri-buku, dan yusrefi musu kon sabi a buku bun fosi. Yu leisi a heri buku kaba? Di wan trowpaar go nanga fakansi, dan den tyari a buku tu èn den bigin leisi en di den ben e teki bro na watrasei. Wan uma di ben e seri sani, waka kon miti den èn a si taki a buku nen San Bijbel e leri wi trutru? A taigi a trowpaar taki wan tu yuru na fesi, a begi Gado fu kisi piki tapu a srefi aksi dati. Nanga prisiri a trowpaar gi na uma wan buku. Yu ’gebroiki ibri okasi’ fu leisi a buku disi, kande ete wan tron srefi? Kande yu kan du disi te yu e wakti wan sma, noso te yu abi na okasi fu teki pikin bro na wroko noso na skoro (Efeisesma 5:15, 16). Efu yu du dati, yu o kon sabi a bijbelstudie buku disi bun èn yu o man kisi okasi tu fu taki nanga trawan fu a buku.
6, 7. Fa yu kan gebroiki a Bijbel leri-buku fu bigin bijbelstudie nanga sma?
6 Te yu e pristeri a buku na ini a preikiwroko, dan gebroiki den prenki, den bijbeltekst, nanga den aksi na tapu bladzijde 4, 5, nanga 6 na wan bun fasi. Fu eksempre, kande yu kan bigin a takimakandra nanga wan aksi: „Te yu e luku ala den problema di e miti libisma na ini a ten disi, dan pe yu denki taki wi kan feni bun yepi?” Baka te yu arki bun san a sma piki, dan leisi 2 Timoteyus 3:16, 17, èn sori a sma taki Bijbel e fruteri fa den problema fu a libisma famiri o kon na wan kaba trutru. Baka dati, sori na ososma bladzijde 4 nanga 5, èn aksi en: „Nanga sortuwan fu den problema na tapu den prenki disi yu e broko yu ede moro furu?” Baka te na ososma sori yu wán fu den problema, dan meki a hori a buku aladi yu e leisi a tekst na ini yu Bijbel di abi fu du nanga a tori. Te yu kaba nanga dati, dan leisi bladzijde 6, èn aksi na ososma: „Na ondrosei fu a bladzijde disi, yu e si siksi aksi. Tapu sortuwan fu den yu wani wan piki?” Te a sma sori yu na aksi, dan sori en a kapitel di e gi piki tapu na aksi. Libi a buku gi en, èn seti wan dei te yu kan kon baka fu taki fu na aksi dati.
7 A e teki sowan feifi miniti fu hori a takimakandra disi. Ma na ini den feifi miniti disi yu o kon sabi san e gi na ososma broko-ede, yu o man leisi èn fruklari tu bijbeltekst, èn yu o man poti wan aksi di yu o piki te yu e go baka na a sma. A syatu takimakandra di yu abi nanga na ososma kan gi en a deki-ati nanga a trowstu di a ben abi langa ten fanowdu. A bakapisi kan de taki srefi wan sma di abi furu fu du, sa wani taki moro langa nanga yu na wan tra okasi, so taki yu kan yepi en fu go na tapu ’a pasi di e tyari sma go na libi’ (Mateyus 7:14). Efu na ososma wani kon sabi moro bakaten, dan yu o abi fu teki moro ten fu studeri nanga en. Yu kan aksi en efu a wani sidon èn studeri moro langa.
Den sani di yu kan du fu gi sma leri na wan bun fasi
8, 9. (a) Fa yu kan yepi yu bijbelstudenti fu kakafutu gi den tesi di kan miti en? (b) Pe yu kan feni den sani di de fanowdu fu yepi wan bijbelstudenti fu kisi wan tranga bribi?
8 Te wan sma e bigin du san Bijbel e leri, dan a kan taki problema o miti en di kan tapu en fu go na fesi. Na apostel Paulus ben taki: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). Paulus ben teki den tesi disi gersi nanga faya di e bron son sani di sma e gebroiki fu bow wan oso, ma a no e bron den warti sani leki gowtu, solfru, nanga diriston (1 Korentesma 3:10-13; 1 Petrus 1:6, 7). Efu yu wani yepi yu bijbelstudenti fu pasa den faya tesi di kan miti en, dan yu musu leri en fu kweki den fasi di de fanowdu fu man kakafutu gi den tesi dati.
9 A psalm skrifiman ben taki dati „den sani di Yehovah taki”, de leki „solfru di krin seibi leisi na ini wan onfu di de na ini a gron” (Psalm 12:6). Iya, Bijbel abi ala den warti sani di de fanowdu fu yepi sma kisi wan tranga bribi (Psalm 19:7-11; Odo 2:1-6). A Bijbel leri-buku e sori yu fa yu kan gebroiki den tekst na ini Bijbel fu yepi wan bijbelstudenti.
10. Fa yu kan meki a studenti poti prakseri na Bijbel?
10 Te yu e studeri nanga wan sma, dan meki a poti prakseri na den bijbeltekst na ini ibri kapitel. Poti aksi gi a studenti fu yepi en frustan den prenspari bijbeltekst èn aksi en fa a kan gebroiki den na ini en eigi libi. Luku bun taki yu no taigi en san a musu du. Na presi fu dati, du san Yesus ben du. Wan leisi, wan man di ben sabi a Wet bun, poti wan aksi gi Yesus. Ne Yesus piki en: „San skrifi na ini a Wet? San yu leisi?” Di a man piki san skrifi na ini den Santa Buku, dan Yesus yepi en fu si fa ensrefi ben kan gebroiki a gronprakseri dati. Baka dati, Yesus gi wan agersitori, èn na so a yepi a man tu fu si fa a leri musu abi krakti na en tapu (Lukas 10:25-37). A Bijbel leri-buku abi furu agersitori nanga eksempre di no muilek fu frustan èn di yu kan gebroiki fu yepi wan studenti fu gebroiki Bijbel gronprakseri na ini en eigi libi.
11. Omeni paragraaf yu musu studeri ibri leisi nanga wan sma?
11 Neleki fa Yesus ben fruteri sma muilek sani na wan fasi di makriki fu frustan, na so a Bijbel leri-buku e fruklari Gado Wortu na wan fasi di krin èn makriki fu frustan (Mateyus 7:28, 29). Du soleki fa Yesus ben du. Fruteri sani soifri, èn du dati na wan fasi di krin èn makriki fu frustan. No suku fu kaba den kapitel esi-esi. Na presi fu dati, luku a situwâsi fu a sma èn o furu a sma man frustan, so taki yu kan sabi omeni paragraaf yu o studeri ibri leisi. Yesus ben sabi o furu den disipel fu en ben man frustan, èn fu dati ede a no ben e furu den ede nanga sani di den no ben abi fanowdu na a momenti dati.—Yohanes 16:12.
12. Fa yu musu gebroiki den 14 prenspari tori na bakasei fu a buku?
12 A Bijbel leri-buku abi wan pisi na bakasei di e taki fu 14 prenspari tori. Yu leki leriman musu sabi san a studenti abi fanowdu, so taki yu kan luku fa yu kan gebroiki den tori disi bun. Kande wan studenti e feni wan tori muilek fu frustan, noso kande a wani sabi moro fu wan spesrutu tori fu di a ben denki tra fasi fu dati fosi. Kande a nofo kaba fu sori en a pisi na bakasei fu a buku di e taki fu a tori di a wani sabi. Dan yu kan meki a leisi dati gi ensrefi. Ma a kan taki wan tra studenti abi yepi fanowdu èn taki yu abi fu leisi a tori makandra nanga en. A pisi na bakasei fu a buku abi prenspari Bijbel tori, soleki „’Sili’ nanga ’yeye’—San den wortu disi wani taki trutru?” èn „San na ’Babilon a Bigiwan’”? Yu kan taki nanga a studenti fu den tori disi efu yu feni taki a de fanowdu. Den pisi tori disi no abi aksi na ondrosei. Dati meki yu sa abi fu sabi den pisi tori bun, so taki yusrefi man poti aksi fu yepi a studenti.
13. Fa begi kan tranga a bribi fu wan bijbelstudenti?
13 Psalm 127:1 e taki: „Efu Yehovah srefi no bow na oso, dan na fu soso den wrokoman wroko tranga na en.” Fu dati ede, te yu e sreka yusrefi fu hori wan bijbelstudie, dan begi Yehovah fu yepi yu. Meki den begi di yu e taki na a bigin èn na a kaba fu ibri studie sori taki yu abi wan bun matifasi nanga Yehovah. Gi a studenti deki-ati fu aksi Yehovah a koni fu frustan En Wortu èn sosrefi a krakti fu du san skrifi na ini (Yakobus 1:5). Efu a studenti du dati, dan a o abi a krakti fu horidoro te a e kisi tesi, èn a bribi fu en o kon moro tranga.
Yepi bijbelstudenti fu tron leriman
14. San bijbelstudenti musu tron?
14 Efu wi wani taki den bijbelstudenti fu wi musu du „ala san” Yesus komanderi den disipel fu en, dan den no musu tan studenti fu Gado Wortu nomo, ma den musu tron leriman tu (Mateyus 28:19, 20; Tori fu den Apostel 1:6-8). San yu kan du fu yepi wan studenti fu tron wan leriman?
15. Fu san ede yu musu gi a bijbelstudenti fu yu deki-ati fu go na den Kresten konmakandra?
15 Aksi a studenti na a fosi studie kaba fu go na den gemeente konmakandra nanga yu. Fruteri en taki den konmakandra e leri yu fa fu gi tra sma leri fu Gado Wortu. Wan tu wiki langa, yu kan teki wan tu miniti na a kaba fu ibri bijbelstudie fu fruteri a studenti sortu leri yu e kisi na den difrenti gemeente konmakandra nanga bigi konmakandra. Taki nanga prisiri fu den wini di yu e kisi na den konmakandra dati (Hebrewsma 10:24, 25). Te a studenti e bigin kon na den konmakandra doronomo, dan dati o yepi en moro bun fu tron wan leriman fu Gado Wortu.
16, 17. San na wan tu marki di wan bijbelstudenti kan suku fu doro?
16 Yepi a bijbelstudenti fu poti marki di a man doro. Fu eksempre, gi en deki-ati fu fruteri wan mati noso wan famiriman san a leri. Gi en a deki-ati tu fu leisi a heri Bijbel. Efu yu e yepi en fu kisi a gwenti fu leisi Bijbel ibri dei, dan a o kisi wini fu dati, srefi baka te a dopu. Boiti dati, yu kan gi a studenti a rai fu hori bijbeltekst na ede, awinsi na wán nomo, di e gi piki tapu wan prenspari aksi na ini ibri kapitel fu a Bijbel leri-buku. Efu a du dati, dan a o tron „wan wrokoman di no abi fu syen fu noti èn di e gebroiki a wortu fu waarheid na wan reti fasi”.—2 Timoteyus 2:15.
17 No leri a studenti nomo fu taki den wortu fu wan bijbeltekst di a hori na ede, èn no leri en nomo fu fruteri nanga en eigi wortu san a tekst e taki. Ma na presi fu dati, gi en deki-ati tu fu fruteri san a bijbeltekst abi fu du nanga a tori di unu e studeri, bika na so a o leri fu piki den sma di wani sabi san a e bribi. Kande yu kan hori wan tu syatu takimakandra nanga en. Du leki yu na wan famiri noso wan wrokomati di e aksi en san a e bribi, èn meki a pruberi fu piki yu. Te a e gi piki, dan sori en fa fu du dati „na wan safri fasi èn nanga bigi lespeki”.—1 Petrus 3:15.
18. Te wan bijbelstudenti tron wan preikiman di no dopu ete, dan fa yu kan yepi en moro fara?
18 Baka wan pisi ten, a kan taki a studenti doro den markitiki fu go na ini a preikiwroko. Sori en krin taki a de wan grani te a kisi primisi fu du a preikiwroko (2 Korentesma 4:1, 7). Efu den owruman taki dati a studenti man tron wan preikiman di no dopu ete, dan yepi en fu sreka wan syatu takimakandra èn go na ini a preikiwroko nanga en. Sori en den difrenti fasi fa wi e du a preikiwroko èn wroko doronomo nanga en. Leri en sosrefi fa a musu sreka ensrefi gi gobaka èn fa fu tyari bun gobaka. Te yusrefi de wan bun eksempre, dan a studenti o man leri furu fu dati.—Lukas 6:40.
„Frulusu yusrefi èn sosrefi den sma di e arki yu”
19, 20. San wi musu pruberi fu du, èn fu san ede?
19 A no de fu taki dati wi musu wroko tranga fu yepi wan sma fu „kon sabi a waarheid soifri” (1 Timoteyus 2:4). Ma a e gi prisiri trutru te yu man yepi wan sma fu du san Bijbel e leri (1 Tesalonikasma 2:19, 20). Iya, wi abi wan bigi grani trutru fu „wroko makandra nanga Gado” fu gi sma leri na heri grontapu!—1 Korentesma 3:9.
20 Heri esi Yehovah o meki Yesus Krestes nanga den tranga engel strafu den sma ’di no sabi Gado èn den sma di no e gi yesi na a bun nyunsu fu wi Masra Yesus’ (2 Tesalonikasma 1:6-8). Sma kan lasi den libi. Yu kan pruberi fu hori awinsi wán oso-bijbelstudie nanga a buku San Bijbel e leri wi trutru? Te yu e du a wroko disi, dan yu abi na okasi fu „frulusu yusrefi èn sosrefi den sma di e arki yu” (1 Timoteyus 4:16). Spesrutu now a de tumusi prenspari fu yepi trawan fu du san Bijbel e leri.
[Futuwortu]
^ paragraaf 1 Yehovah Kotoigi tyari a buku disi kon na doro.
San yu leri?
• Fu san ede a Bijbel leri-buku meki?
• Fa yu kan gebroiki a Bijbel leri-buku fu bigin wan bijbelstudie?
• Sortu sani yu kan du fu gi sma leri na wan bun fasi?
• Fa yu kan yepi wan studenti fu tron wan leriman fu Gado Wortu?
[Aksi fu a tori disi]
[Prenki na tapu bladzijde 26]
Yu e gebroiki a buku disi bun?
[Prenki na tapu bladzijde 27]
Wan syatu takimakandra kan meki taki wan sma wani sabi moro fu Bijbel
[Prenki na tapu bladzijde 29]
San yu kan du fu meki a studenti poti prakseri na Bijbel?
[Prenki na tapu bladzijde 30]
Yepi a bijbelstudenti fu go na fesi