Ondrofenitori

A reide fu san ede a e gi mi prisiri fu meki disipel

Soleki fa Pamela Moseley fruteri

Na ini 1941, mi mama tyari mi go na wan kongres fu Yehovah Kotoigi na ini a foto Leicester. Na a ten dati, Ingrisikondre ben e teki prati fayafaya na a di fu Tu Grontapufeti. Joseph Rutherford ben hori wan spesrutu lezing di ben abi fu du nanga pikin-nengre. Di mi nanga mi mama teki dopu na a kongres dati, dan mi si taki den sma di ben yepi wi fu go na fesi na yeye fasi, ben breiti srefisrefi. Na a ten dati mi no ben sabi omeni prisiri a e gi wan sma te a yepi trawan fu tron disipel fu Yesus Krestes.

WÁN yari na fesi, na ini 1940, wi ben bigin meki muiti fu go na fesi so taki wi ben kan tron disipel fu Yesus. Mi kan memre a takru dei ete na ini september 1939, di a di fu Tu Grontapufeti bigin. Mi ben si fa mi mama ben e krei langalanga watra-ai, aladi a ben e tan aksi: „Fu san ede vrede no man de na grontapu?” Mi papa nanga mama ben e wroko na ini a legre na a pisi ten fu a Fosi Grontapufeti, èn den ben ondrofeni furu ogri sani na ini a feti. Mi mama poti na aksi disi gi a domri fu na Anglikan Kerki na ini a foto Bristol. A domri taki nomo: „Feti ben de kaba ala ten, èn dati sa tan so ala ten.”

Ma syatu baka dati, wan owru uma kon na wi oso. A ben de wan fu den Kotoigi fu Yehovah. Mi mama poti a srefi aksi disi gi en: „Fu san ede vrede no man de na grontapu?” A Kotoigi tyari kon na krin taki a feti di sma e feti, na wan fu den marki di e sori taki wi e libi na ini a kabapisi fu na ogri grontapu sistema disi (Mateyus 24:3-14). A no teki langa baka dati di na umapikin fu na uma disi bigin studeri Bijbel nanga wi. Den ben de tu fu den sma di ben breiti fu si taki wi teki dopu a dei dati. Fu san ede a e gi sma prisiri te den e meki disipel? Bakaten, mi kon sabi fu san ede dati de so. Meki mi fruteri yu pikinso san mi leri na ini den 65 yari di mi meki disipel.

 Mi kon sabi fa a e gi prisiri fu gi trawan leri

Di mi ben abi 11 yari, dan mi bigin teki prati na a Kownukondre preikiwroko na ini Bristol. Wan brada ben gi mi wan gramafon èn sosrefi wan karta pe wan syatu boskopu ben skrifi na tapu, èn a taigi mi: „Yu kan go na ala den oso na a sei dati fu a pasi.” We, na so mi bigin preiki mi wawan. A no de fu taki dati mi ben e senwe srefisrefi. Mi ben e drai a Bijbel lezing di ben de na tapu a gramafon so taki na ososma ben kan arki en, èn baka dati mi ben e sori na ososma a karta di ben abi wan boskopu na tapu. Den sani disi ben e gi sma deki-ati fu teki Bijbel publikâsi.

Baka wan tu yari, Yehovah Kotoigi bigin si en leki wan prenspari sani fu leisi Bijbel gi sma na ini na oso-fu-oso wroko fu wi. Na a bigin a ben muilek gi mi fu taki nanga freimdesma èn fu fruklari bijbeltekst gi den, fu di mi ben e syensyen. Ma te fu kaba mi kisi a deki-ati fu taki fri nanga sma. A sani dati meki taki a preikiwroko bigin gi mi prisiri trutru. Son sma ben e si wi nomo leki sma di ben e seri buku, ma te wi ben e leisi èn ben e fruklari bijbeltekst gi den, dan den ben e kon si taki wi na leriman fu Gado Wortu. Mi ben lobi a wroko disi so te taki mi ben wani du moro. Sobun, na ini september 1955, mi go dini leki pionier na ini a furuten diniwroko.

Mi kisi blesi fu di mi horidoro

Wán fu den fosi sani di mi leri, na taki wan sma kan kisi blesi te a e horidoro. Wan leisi, mi gi wan yongu uma, Violet Morice, wan Waktitoren. Di mi go baka na en, dan a bradi a doro opo, a fow en anu tapu en borsu, èn a arki bun di mi tyari bijbeltekst kon na krin gi en. Ibri leisi te mi ben e go baka na en, dan a ben gersi leki a ben wani sabi moro. Ma te mi ben e aksi en efu a wani studeri Bijbel doronomo, dan a ben e taki: „Nôno. Te den pikin kon bigi, dan mi sa studeri.” A sani dati meki mi sari trutru! Bijbel e taki dati „wan ten de fu suku sani èn wan ten de fu no suku moro san lasi” (Preikiman 3:6). Mi bosroiti fu go baka na a uma disi.

Baka wan mun, mi go baka na Violet èn mi luku wan tu tra bijbeltekst nanga en. Fosi yu denki mi ben e studeri Bijbel ibri wiki nanga en na en mofodoro. Te fu kaba a taki: „A moro bun taki yu kon na inisei, a no so?” Violet tron wan heri bun kompe bribiman èn sosrefi wan bun mati fu mi! Iya, Violet teki dopu kon tron wan Yehovah Kotoigi.

Wan dei, Violet skreki srefisrefi di a kon sabi taki a masra fu en ben seri na oso fu den sondro fu taigi en, èn taki a ben gowe libi en. Koloku taki wan tra Kotoigi yepi en fu feni wan tra oso a srefi bakadina dati. Fu di a ben de nanga tangi gi san Yehovah du gi en, meki a bosroiti fu pionier en heri libi langa. Di mi si fa a yeye fu Yehovah meki Violet kon de fayafaya gi a tru anbegi, dan mi kon frustan fu san ede a e gi sma so furu prisiri te den e meki disipel. Iya, na a wroko disi mi ben wani du mi heri libi langa!

Na ini 1957, mi nanga Mary Robinson ben musu pionier na ini a bisnis kontren fu Rutherglen na ini a foto Glasgow, na Skotland. Awansi hebi dow ben e fadon, hebi winti ben e wai, noso alen nanga snew ben e fadon, toku wi ben e preiki, èn dati no ben de fu soso. Wan dei mi miti Jessie. Mi ben lobi fu studeri Bijbel nanga en. A masra fu en, Wally, ben de wan Communist, èn biginbigin a ben e wai pasi gi mi. Di a man disi bigin studeri Bijbel èn a kon frustan taki soso a Kownukondre fu Gado sa man meki sma abi wan bun libi, dan a ben breiti srefisrefi fu sabi dati. Baka wan pisi ten, den ala tu tron sma di e meki disipel.

A no ala ten sani de soleki fa a sori

Bakaten, wi ben musu go preiki na ini a foto Paisley, na ini Skotland. Wan dei di mi ben e preiki drape, wan uma di no ben wani arki, naki a doro tapu leti na mi fesi. Ma  syatu baka dati a kon suku mi fu aksi mi pardon. Di mi go baka na en a wiki baka dati, a taki: „A ben de neleki mi naki a doro tapu leti na Gado fesi. Mi ben musu fu kon suku yu.” Na uma disi nen Pearl. A taigi mi taki a ben lasi-ati so te fu di a no ben abi wan bun banti nanga den mati nanga famiriman fu en, taki a begi Gado fu feni wan bun mati. „Ne yu naki na mi doro”, na so a taki. „Now mi e frustan taki yu musu fu de a bun mati dati.”

A no ben makriki fu de wan mati fu Pearl. Na uma disi ben e libi na tapusei fu wan pikin bergi, èn mi ben musu waka fu doro drape. Di mi go teki en na en oso fu tyari en go na a konmakandra fu a fosi leisi, dan pikinmoro mi grati fadon fu di a winti ben e wai èn alen ben e fadon. Mi trowe a prasoro fu mi gowe fu di a ben kon priti. Siksi mun nomo baka di Pearl naki a doro tapu leti na mi fesi, a teki dopu na ini watra fu sori taki a gi en libi abra na Gado.

Syatu baka dati, a masra fu en bosroiti fu studeri Bijbel, èn a no teki langa di a kon nanga mi na ini na oso-fu-oso wroko. Alen ben e fadon baka. „No broko yu ede nanga mi”, na so a taki. „Efu mi kan tanapu omeni yuru langa na ini na alen fu luku futubal, dan mi kan tanapu na ini na alen gi Yehovah tu.” Ala ten, mi feni en moi fu si a fasti bosroiti di den sma fu Skotland abi te den wani du wan sani.

A gi mi prisiri trutru fu si taki, baka den someni yari di mi go drape baka, furu fu den sma di mi ben e studeri nanga den e horidoro na ini a bribi te now ete! Na a prisiri disi wan sma e kisi te a e meki disipel (1 Tesalonikasma 2:17-20). Na ini 1966, baka sowan aiti yari di mi ben e pionier na ini Skotland, dan mi kisi a kari fu go na a Waktitoren Bijbelskoro Gilead fu kisi leri fu tron wan zendeling.

Mi go dini na wan presi pe sma e taki wan tra tongo

Mi ben musu go dini na ini Bolifia, na ini a foto Santa Cruz pe a weer waran, èn pe wan gemeente ben de fu sowan 50 sma. A foto dati ben de leki den foto na ini cowboi felem pe sma no ben e hori densrefi na nowan enkri wet. Te mi e luku a fasi fa mi libi waka, dan mi feni taki mi no ondrofeni wan lo kefalek sani leki zendeling. Noiti bigi kaiman suku fu beti mi, noiti a pasa taki grupu ogri-ati sma ben wani du mi ogri, noiti mi lasi na ini a sabana, èn noiti mi ben de na ini wan sipi di broko na se. Ma toku, mi kisi bun furu prisiri fu a wroko di mi e du fu meki disipel.

Wan fu den fosi umasma di mi studeri Bijbel nanga en na ini Santa Cruz, ben de Antonia. A no ben makriki gi mi fu gi sma leri fu Bijbel na ini Spanyorotongo. Wan leisi a pikin boi fu Antonia ben taki: „Mama, na fu espresi a e meki fowtu so taki wi kan lafu?” Antonia tron wan disipel te fu kaba, èn na umapikin fu en tu di nen Yolanda. Yolanda ben abi wan mati di ben e studeri fu tron wan afkati. A yonkuman disi di sma ben e kari Dito, bigin studeri Bijbel tu èn a ben e kon na den konmakandra fu wi. Di mi ben e studeri nanga en, dan mi leri wan tra sani di wi musu hori na prakseri te wi e leri sma den tru tori fu Bijbel. Iya, mi leri taki son leisi a de fanowdu fu pusu sma pikinso so taki den kan go na fesi.

Di Dito no ben e studeri doronomo moro, dan mi taigi en: „Dito, Yehovah no e dwengi yu fu horibaka gi a Kownukondre fu en. Yu musu teki wan bosroiti.” Di a taki dati a wani dini Gado, dan mi taigi en: „Yu abi fowtow dyaso fu wan refo tiriman. Te wan sma ben o si den fowtow dati, dan a ben o denki taki yu bosroiti fu horibaka gi a Kownukondre fu Gado?” Na a pusu dati Dito ben abi fanowdu.

Tu wiki baka dati, wan refo bigin, èn skowtu nanga den studenti fu na universiteit bigin sutu tapu makandra. „Kon meki wi gowe fu dyaso!” Na so Dito bari gi en mati. A mati taigi en: „Nôno! Na a prenspari dei disi wi ben e wakti”, èn a grabu wan gon èn lon go na tapu a daki fu na universiteit. A ben de wan fu den aiti mati fu Dito di dede a dei dati. Yu kan frustan fa mi breiti te mi e luku Dito, bika efu a no ben teki a bosroiti fu tron wan tru Kresten, dan kande a ben dede now.

Mi si fa a yeye fu Yehovah e yepi sma

Wan dei mi pasa wan oso fu di mi ben denki taki wi preiki drape kaba. Ne na uma di ben e libi drape kari mi. Na uma nen Ignacia. A ben sabi  sortu wroko Yehovah Kotoigi e du, ma fu di a masra fu en, namku wan bigiskin skowtu di nen Adalberto, ben e gens en, meki Ignacia no ben e go na fesi na yeye fasi. Ignacia no ben frustan furu prenspari Bijbel leri, sobun mi bigin studeri Bijbel nanga en. Aladi Adalberto ben de nomonomo fu tapu a bijbelstudie fu wi, toku mi ben man taki bun langa nanga en fu tra tori. Na so wi bigin tron mati.

Yu kan frustan fa mi breiti taki Ignacia tron wan lobi-ati memre fu a gemeente, èn taki a e yepi furu tra sma di abi trowstu fanowdu, fu tan gosontu na yeye fasi èn na skin fasi. Baka wan pisi ten, a masra fu en èn sosrefi dri fu den pikin fu den tron Kotoigi. Fu taki en leti, di Adalberto kon frustan a bun nyunsu te fu kaba, dan a go baka na a skowtu-oso, èn a taki nanga so furu faya taki den skowtu aksi en fu tyari Waktitoren nanga Ontwaakt! gi 200 sma doronomo.

Yehovah e meki a wroko go na fesi

Baka di mi dini siksi yari na ini Santa Cruz, mi ben musu go dini na ini La Paz, a mamafoto fu Bolifia, èn mi dini drape 25 yari langa. Na ini den yari syatu baka 1970, a bijkantoro fu Yehovah Kotoigi di ben de na ini La Paz, ben abi 12 sma nomo di ben e wroko drape. Fu di a preikiwroko ben e go na fesi, meki wan moro bigi bijkantoro ben de fanowdu. Fu dati ede, den bow wan nyun bijkantoro na ini a foto Santa Cruz di ben e kon tron wan prenspari foto moro nanga moro. Na ini 1998 den brada froisi a bijkantoro go na Santa Cruz, èn mi kisi a kari fu tron wan memre fu a bethelfamiri di abi moro leki 50 sma now.

Na ini 1966, wan-enkri gemeente ben de na ini Santa Cruz, ma now moro leki 50 gemeente de na ini a foto dati. A nomru fu 640 Kotoigi di ben de na ini Bolifia na ini a pisi ten dati, kon tron pikinmoro 18.000 na ini a ten disi!

Mi breiti taki a wroko di mi du na ini Bolifia ben abi bun bakapisi. Ma ala ten mi e kisi deki-ati fu den getrow Kresten brada nanga sisa fu mi di de na ala sei. Wi alamala breiti fu si taki Yehovah e blesi a Kownukondre preikiwroko. Iya, a e gi mi prisiri trutru taki mi abi wan prati na a wroko di wi e du fu meki disipel.—Mateyus 28:19, 20.

[Prenki na tapu bladzijde 13]

Di mi ben e pionier na ini Skotland

[Prenki na tapu bladzijde 15]

Mi e dini na a bijkantoro fu Bolifia; (a pikin fowtow) mi nanga den studenti fu a di fu 42 klas fu Gilead