Aksi fu leisiman

San na „a feti . . . fu Gado na Almaktiwan” na Har–Magedon, èn san sa de a bakapisi fu a feti dati?—Openbaring 16:14, 16.

Fu taki en leti, a feti fu Har–Magedon di o feti na ini a ten di e kon, na wan feti di o de na heri grontapu. Na ini a feti disi, Yesus Krestes, a sma di Yehovah poti leki Kownu, sa pori den feanti fu Gado. Bijbel e taki dati den feanti disi, namku „ala den kownu na heri grontapu”, kon makandra fu di den sani di „den ogri yeye e taki” abi krakti na den tapu, èn den kon na wán „fu feti a feti na tapu a bigi dei fu Gado na Almaktiwan . . . na a presi di sma e kari Har–Magedon na ini Hebrewtongo.”—Openbaring 16:14, 16.

A presi pe den o feti a no wan trutru presi. A nen Har–Magedon, wani taki ’Megidobergi’ (Openbaring 16:16, futuwortu). Nowan enkri bergi no de di abi a nen dati. Boiti dati, „den kownu fu grontapu, nanga den legre fu den” no ben o man kon makandra na wán presi (Openbaring 19:19). Fu taki en leti, „a presi” abi fu du nanga wan situwâsi di grontapu politiek tiriman nanga den sma di e horibaka gi den o kon de na ini. Iya, den sma disi o gens Yehovah nanga „den legre di ben de na hemel” na ondro a tiri fu a „Kownu fu den kownu èn a Masra fu den masra”, Yesus Krestes.—Openbaring 19:14, 16.

A sani di de prenspari, na taki a wortu „Har–Magedon” abi fu du nanga Megido, wan foto fu Israel fu owruten. A foto Megido, di ben de na a owstusei fu a Karmelbergi, ben de na wan bun presi fu di bisnisman nanga legre ben e pasa na ini a foto drape. Furu prenspari feti ben feti tu na ini a foto disi. Fu eksempre, „na a liba fu Megido”, a Krutuman Barak fu Israel ben wini a makti legre fu Kanan di ben de na ondro a tiri fu Legre-edeman Sisera (Krutuman 4:12-24; 5:19, 20). Na ini a kontren dati tu, Krutuman Gideon ben wini den Midiansma krinkrin (Krutuman 7:1-22). Fu di Bijbel e sori taki Megido abi fu du nanga a feti di o pasa na ini a ten di e kon, meki wi e kisi a dyaranti taki Gado sa gebroiki en Manpikin fu wini ala sma di e gens en.

San sa de a bakapisi fu a feti dati? A feti Har–Magedon sa tyari wan kaba kon na ala kruktudu nanga ogridu na grontapu. Disi sa gi libisma na okasi fu abi a moro bun libi di noiti bifo den ben abi (Openbaring 21:1-4). Na ondro a lobi-ati tiri fu Gado Kownukondre, grontapu sa kenki kon tron wan paradijs pe regtfardikisma sa libi na tapu fu têgo.—Psalm 37:29.