Fu san ede wi musu taki san tru?

DI MANFRED ben abi 18 yari, dan a bigin wroko na wan kantoro. * A basi fu en ben seti sani so taki en nanga wan tu tra wrokoman ben kan teki leri na wan heiskoro tu dei na ini a wiki. Wan dei a skoro tapu moro fruku. Soleki fa a driktoro fu a kantoro ben e fruwakti, dan den wrokoman ben musu go baka na wroko a dei dati. Na presi fu dati den wrokoman go meki prisiri. Manfred no go, ma a go baka na wroko. Ne a basi fu den wrokoman kon na a afdeling pe den ben e wroko. Di a si Manfred, dan a aksi en: „Fu san ede yu no go na skoro tide? Èn pe den tra wrokoman de?” San Manfred ben o piki en?

Manfred ben de na ini wan muilek situwâsi di furu sma kan kon de na ini. A ben o taki san tru, noso a ben o lei fu kibri den tra wrokoman? Efu a ben o taki san tru, dan den trawan ben o kon na ini problema èn den ben o mandi na en tapu. A ben o bun efu a ben o lei? San yu ben o du? Bakaten wi sa luku san Manfred du, ma meki wi luku fosi sortu prenspari sani wi musu hori na prakseri te wi musu bosroiti efu wi o taki san tru noso efu wi o lei.

A bigi strei na mindri tru nanga lei

Na a bigin di Gado meki libisma, dan ala sani ben de tru. Nowan enkri bedrigifasi ben de, èn nowan enkri lei. Yehovah, a Mekiman, na „a Gado fu waarheid”. A wortu fu en tru, a no man lei, èn a e tegu gi lei nanga leiman.—Psalm 31:5; Yohanes 17:17; Titus 1:2.

Fu di dati de so, dan pe lei komoto? Yesus Krestes ben gi wan krin piki tapu na aksi disi. A ben taigi den kerki fesiman di ben e gens en èn ben wani kiri en: „Unu na fu un tata Didibri èn unu wani du den sani di un tata wani. Di a bigin waka en eigi pasi, a ben de wan kiriman èn a no ben tanapu kánkan na ini a waarheid, fu di a waarheid no de na ini en. Te a e taki lei, dan a e taki soleki fa ensrefi de, fu di a de wan leiman èn a tata fu ala lei” (Yohanes 8:44). A no de fu taki dati Yesus ben taki fu a sani di ben pasa na ini a dyari fu Eden di Satan kori den fosi tu libisma fu trangayesi Gado. A sani dati meki taki den sondu èn den dede te fu kaba.—Genesis 3:1-5; Romesma 5:12.

 Den wortu fu Yesus e sori krin taki Satan na „a tata fu ala lei”, iya, a sma fu pe lei komoto. Te now ete Satan na a moro prenspari sma di e gi sma deki-ati fu lei, èn fu taki en leti „a e kori sma na heri grontapu”. A e tyari bigi frantwortu fu den ogri sani di e miti libisma na ini a ten disi fu di sma na heri grontapu e lei.—Openbaring 12:9.

Na Satan Didibri meki taki wan bigi strei de na mindri tru nanga lei, èn te now ete a strei disi de. A strei disi de na ala sei fu a libimakandra èn a abi krakti tapu ibri sma. A fasi fa wan sma e libi e sori efu a e horibaka gi san tru noso gi lei. Den sma di e teki a sei fu Gado e libi akruderi den tru tori di de fu feni na ini Gado Wortu, Bijbel. Iniwan sma di no e du san tru, efu a sabi noso efu a no sabi dati, e teki a sei fu Satan fu di „heri grontapu de na ini a makti fu na ogriwan”.—1 Yohanes 5:19; Mateyus 7:13, 14.

Fu san ede sma abi a gwenti fu lei?

Fu di „heri grontapu” de na ondro a makti fu Satan, meki wi e frustan fu san ede so furu sma e lei. Ma wi ben kan aksi wisrefi: ’Fu san ede Satan, „a tata fu ala lei” bigin lei?’ Satan ben sabi taki Yehovah na a Sma di abi a reti fu tiri ala sani di A meki, sosrefi a fosi man nanga uma. Ma Satan ben wani a hei posisi disi aladi a no abi reti na tapu, bika na Yehovah wawan kan abi a posisi disi. Fu di a ben gridi èn fu di a ben e denki ensrefi nomo, meki a pruberi fu teki a posisi fu Yehovah. Na fu dati ede, Satan bigin lei èn bedrigi trawan.—1 Timoteyus 3:6.

Fa a de na ini a ten disi? Te now ete furu sma e lei fu di den gridi èn fu di den e suku fu kisi wini gi densrefi nomo, a no so? A triki fasi fa sma e du bisnis, a kruka fasi fa den e du politiek, èn den leitori di kerki e leri sma e sori taki furu sma lobi fu lei, den lobi fu bedrigi trawan, èn den lobi fu kori trawan. Fu san ede dati de so? We, a no de so furu tron taki na fu di sma gridi èn na fu di den wani kisi wini gi densrefi nomo, meki den e suku fu kisi moro hei posisi? A no de so taki na fu den sani disi meki den e suku fu kon gudu, fu abi makti, noso fu kisi bigi nen aladi den no abi reti tapu den sani dati? Wan koni tiriman, namku Kownu Salomo fu owruten Israel, ben gi a warskow disi: „A sma di e hasti ensrefi fu kisi gudu, no sa tan sondro fowtu” (Odo 28:20). Èn na apostel Paulus ben skrifi: „Te wan sma lobi moni, dan dati na wan rutu fu ala sortu ogri sani” (1 Timoteyus 6:10). Wi kan taki a srefi tu fu wan sma di de nomonomo fu abi makti, noso fu kisi bigi nen.

Wan tra sani di e meki taki sma e lei, na a frede di den e frede, iya, den frede gi san o pasa noso gi san trawan o denki te den e taki san tru. Ala sma wani taki trawan lobi den. Ma a sani disi kan meki taki wan sma e lei, awansi na pikinso nomo, fu di a no wani trawan fu kon sabi den swakifasi fu en. Iya, a kan taki a sma disi no wani den fu kon sabi den finifini tori di no moi fu yere, èn kande a wani trawan fu abi wan bun denki fu en. Fu dati ede Salomo ben skrifi: „A frede gi libisma, na dati e seti wan trapu, ma a sma di e frutrow tapu Yehovah, sa kisi kibri.”—Odo 29:25.

Wi musu de getrow na a Gado fu ala sani di tru

San Manfred taki di a basi fu en aksi en fu san ede a no ben go na skoro? Manfred taigi en san ben pasa. A taki: „A skoromeester seni wi gowe fruku tide, sobun mi kon na wroko. Ma mi no kan taki gi den trawan. Kande yusrefi kan aksi den.”

Manfred ben kan kori a basi fu en, èn efu a ben o du dati, dan den tra wrokoman ben o lobi en. Ma a ben abi bun reide fu san ede a weigri fu lei. Manfred na wan Yehovah Kotoigi. Fu di a ben de opregti, meki a tan abi wan  krin konsensi. A sani disi meki sosrefi taki a basi bigin frutrow en. Manfred kisi na okasi fu leri wroko na a afdeling pe den ben e seri gowtu sani nanga diri ston, aladi nyun wrokoman no ben gwenti wroko na a afdeling dati. Sowan 15 yari baka dati, di Manfred kisi moro frantwortu na kantoro, dan a srefi basi dati bel Manfred fu fristeri en èn fu fruteri en baka fu na opregtifasi fa a ben handri a wan leisi dati.

Fu di Yehovah na a Gado fu ala sani di tru, meki iniwan sma di wani abi wan bun banti nanga en ’no musu lei moro’, ma a musu „taki san tru”. Wan futuboi fu Gado musu lobi san tru. „Wan getrow kotoigi na wan sma di no sa lei”, na so wan koniman ben skrifi. Ma san na wan lei?—Efeisesma 4:25; Odo 14:5.

San na wan lei?

Wan sma di no e taki san tru e lei, ma a no de so ala ten taki wan sma e lei te a no e taki fa sani de trutru. Fu san ede? Wan wortubuku e taki dati wan lei na „wan sani di wan sma e taki fu kori trawan, aladi a sma sabi taki a sani di a taki no tru”. Iya, te wan sma e lei, dan a e kori wan trawan fu espresi. Sobun, te wan sma e taigi wan trawan wan sani di no tru, èn a no e du dati fu espresi, dan dati no wani taki dati a sma lei.

Boiti dati, wi musu luku tu efu a sma di wani kon sabi wan sani abi a reti fu kon sabi sani finifini. Fu eksempre, kon meki wi taki dati wan basi fu wan tra wrokopresi ben aksi Manfred den srefi aksi dati. Manfred ben o de fruplekti fu taigi en ala sani finifini? Nôno. Fu di a basi dati no ben abi a reti fu kon sabi den sani dati finifini, meki Manfred no ben o de fruplekti fu taigi en. A no de fu taki dati a no ben o bun efu a ben o lei.

Sortu eksempre Yesus Krestes gi ini a tori disi? Wan leisi Yesus ben e taki nanga wan tu sma di no ben de bakaman fu en, èn den ben wani sabi pe a ben o go. Den sma disi ben taigi en: „Komoto fu dya èn go na Yudea.” San Yesus piki den? „Un kan go na a fesa; mi no o go na a fesa disi ete, fu di a reti ten fu mi no doro trutru ete.” Toku Yesus go na Yerusalem syatu baka dati fu de na a fesa. Fu san ede a ben piki den sma na a fasi dati? Den no ben abi a reti fu kon sabi finifini pe a ben o go. Sobun, aladi Yesus no lei, toku a no taigi den finifini pe a ben o go, fu di a no ben wani taki den du ogri nanga en noso den bakaman fu en. Yesus no ben lei fu di na apostel Petrus ben skrifi fu en: „A no du nowan sondu èn noiti a taki wan bedrigi sani.”—Yohanes 7:1-13; 1 Petrus 2:22.

Fa a ben de nanga Petrus srefi? A neti di sma grabu Yesus, Petrus lei dri tron taki a no sabi Yesus, a no so? Iya, fu di Petrus ben e frede sma, meki a lei. Ma wantewante baka dati a „krei nanga bigi sari” fu di a ben abi berow, èn  na so a kisi pardon fu a sondu fu en. Boiti dati, a leri fu no meki a fowtu dati moro. Wan tu dei baka dati, a ben e fruteri sma fu Yesus, èn den Dyu tiriman na ini Yerusalem tapu skreki gi en èn den taigi en fu no taki moro fu Yesus. Ma Petrus weigri krinkrin fu du dati. A no de fu taki dati baka di Petrus lei, a kisi ensrefi baka heri esi. A sani disi musu gi wi alamala deki-ati, bika a kan pasa makriki taki wi e taki noso e du wan sani di no fiti fu di wi e lasi wisrefi wan momenti.—Mateyus 26:69-75; Tori fu den Apostel 4:18-20; 5:27-32; Yakobus 3:2.

Tru sa tan fu têgo

„Na a mofobuba fu waarheid sa tan fu têgo, ma a tongo di e taki leitori sa tan fu wan syatu pisi ten nomo”, na so Odo 12:19 e taki. Iya, te wan sma e taki san tru, dan dati sa abi bun bakapisi gi en ala ten. Èn te sma abi a gwenti fu taki san tru èn fu handri akruderi dati, dan den sa abi wan moro bun banti nanga trawan. Iya, te wan sma e taki san tru, dan dati e tyari bun bakapisi wantewante. A sma disi sa abi wan krin konsensi, a sa abi wan bun nen, wan bun banti nanga en trowpatna, nanga en famiri, en mati, èn srefi nanga den sma di a e du bisnis nanga den.

Ma te wan sma e lei, dan dati sa kon na krin te fu kaba. Wan sma di e taki leitori kan kori trawan fu wan pisi ten, ma dati no sa de fu ala ten. Boiti dati, Yehovah, a Gado fu ala sani di tru, no sa gi pasi taki lei nanga leiman tan fu têgo. Bijbel e pramisi taki Yehovah sa tyari wan kaba kon na a kori di Satan Didibri, a tata fu ala lei, e kori sma na heri grontapu. Heri esi Yehovah sa tyari wan kaba kon na ala lei nanga leiman.—Openbaring 21:8.

A sa de wan frulekti trutru te „a mofobuba fu waarheid” sa tan fu têgo te fu kaba!

[Futuwortu]

[Prenspari pisi na tapu bladzijde 5]

Te sma gridi èn e suku wini gi densrefi nomo, dan den sa bigin lei

[Prenspari pisi na tapu bladzijde 6]

Wan sma di no e taki san tru e lei, ma a no de so ala ten taki wan sma e lei te a no e taki fa sani de trutru

[Prenki na tapu bladzijde 6]

San wi e leri fu a fowtu di Petrus meki?

[Prenki na tapu bladzijde 7]

Te wi e taki san tru, dan wi sa man abi wan bun banti nanga trawan